1, 2. (a) Wetin na di tri valyu tin dɛn we Jiova dɔn gi wi? (b) Wetin wi go tɔk bɔt insay dis atikul?

JIOVA na di Pɔsin we jɛntri pas ɔlman na di wan ol wɔl. Na in gɛt ɔltin. (Fɔs Kronikul 29:​11, 12) Bɔt Jiova gud to ɔlman. Wi gladi bikɔs i dɔn gi wi bɔku valyu tin dɛn! Wetin na sɔm pan dɛn valyu tin dɛn ya? Dɛn valyu tin dɛn ya na (1) Gɔd in Kiŋdɔm, (2) wi prichin wok, ɛn (3) di tru tin dɛn we de na in Wɔd. Bɔt if wi nɔ tek tɛm, as tɛm de go wi go fɔgɛt se dɛn tin dɛn ya rili valyu. Wi nid fɔ kɔntinyu fɔ de mɛmba wisɛf bɔt aw dɛn valyu ɛn tray fɔ lɛk dɛn mɔ ɛn mɔ. Jizɔs bin se, “una at go de di say we una kip una jɛntri.”—Lyuk 12:​34.

² Lɛ wi tɔk bɔt aw wi go kɔntinyu fɔ lɛk ɛn sho se wi gladi fɔ di Kiŋdɔm, di prichin wok, ɛn di tru tin dɛn na Gɔd in Wɔd. As wi de du dat, tink bɔt aw yusɛf go kɔntinyu fɔ lɛk dɛn valyu tin dɛn ya mɔ ɛn mɔ.

3. Wetin di man na Jizɔs in stori bin rɛdi fɔ du fɔ mek i bay wan pal? (Luk di pikchɔ nia dis atikul in taytul.)

³ Rid Matyu 13:​45, 46. Jizɔs bin pul wan stori bɔt wan man we bin de bay ɛn sɛl fayn bid dɛn, we dɛn kɔl pal. Wan de, i fɛn wan pal we valyu pas ɔl di ɔda pal dɛn we i dɔn si. Di man bin rili want dis pal. So i bin rɛdi fɔ sɛl ɔl wetin i gɛt fɔ bay am. Yu go ebul imajin aw da pal de bin rili valyu to am?

4. Wetin wi go rɛdi fɔ du fɔ di Kiŋdɔm?

⁴ Wetin wi go lan frɔm Jizɔs in stori? Di tru tin bɔt Gɔd in Kiŋdɔm tan lɛk da valyu pal de. If wi lɛk di Kiŋdɔm jɔs lɛk aw di man bin rili valyu di pal, wi go rɛdi fɔ lɛf bɔku tin dɛn biɛn fɔ mek wi go kɔntinyu fɔ de ɔnda Gɔd in Kiŋdɔm. (Rid Mak 10:​28-30.) Lɛ wi si aw tu pipul dɛn bin du dat.

5. Wetin Zakiɔs bin rɛdi fɔ du fɔ di Kiŋdɔm?

⁵ Zakiɔs na bin pɔsin we de gɛda taks. I bin jɛntri bay we i bin de pul mɔni na pipul dɛn an bay kruk. (Lyuk 19:​1-9) Wan de, Zakiɔs bin yɛri bɔt wetin Jizɔs bin de tɔk bɔt di Kiŋdɔm. I bin rili lɛk wetin i de yɛri, so i bin want fɔ chenj. I bin se: “Masta, a go sheb mi prɔpati tu ɛn gi dɛn po pipul wan pat, ɛn ɛnitin we a bin tek na pɔsin in an we a nɔ bin fɔ tek a go gi di pɔsin fo tɛm pas wetin a bin tek nain an.” Zakiɔs bin gi di mɔni we i tek frɔm di pipul dɛn ɛn i lɛf want want.

6. Us chenj dɛn wan uman bin mek? Wetin mek i mek dɛn chenj dɛn de?

⁶ Wan uman bin de pan lɛsbian biznɛs di tɛm we i yɛri bɔt Gɔd in Kiŋdɔm. Na in bak na bin di prɛsidɛnt fɔ wan ɔganayzeshɔn we bin de fɛt fɔ lɛ omo dɛn gɛt rayt. Bɔt as i bin de stɔdi di Baybul, ɛn i kam fɔ lan bɔt aw Gɔd in Kiŋdɔm valyu, i si se i nid fɔ mek sɔm chenj dɛn na in layf. (Fɔs Lɛta Fɔ Kɔrint 6:​9, 10) Bikɔs i lɛk Jiova, i bin lɛf di ɔganayzeshɔn ɛn lɛf di lɛsbian layf we i bin de liv. I bin baptayz insay 2009, ɛn i bi rɛgyula payɔnia insay 2010. I chenj di we aw i bin de liv in layf bikɔs i lɛk Jiova pas aw i bin de fil fɔ du bad.—Mak 12:​29, 30.

7. Aw wi go kɔntinyu fɔ lɛk Gɔd in Kiŋdɔm mɔ ɛn mɔ?

⁷ Fɔ mek wi go de na Gɔd in Kiŋdɔm, bɔku pan wi rili gɛt fɔ chenj di we aw wi de liv wi layf. (Lɛta Fɔ Rom 12:​2) Bɔt nɔto dat nɔmɔ wi nid fɔ du. Wi nid fɔ tray tranga wan fɔ mek natin nɔ ambɔg di lɛk we wi lɛk di Kiŋdɔm. Tin dɛn lɛk fɔ want bɔku prɔpati ɔ fɔ du mami ɛn dadi biznɛs di we aw Gɔd nɔ want. (Prɔvabs 4:​23; Matyu 5:​27-29, NW) Fɔ  mek wi go kɔntinyu fɔ lɛk Gɔd in Kiŋdɔm mɔ ɛn mɔ, Jiova dɔn gi wi ɔda tin we rili valyu.

8. (a) Wetin mek apɔsul Pɔl bin kɔmpia di prichin wok to valyu tin dɛn we de insay “kɔntri pɔt”? (b) Aw Pɔl bin sho se i lɛk di prichin wok?

⁸ Jizɔs dɔn gi wi di wok fɔ prich ɛn tich di gud nyuz bɔt Gɔd in Kiŋdɔm. (Matyu 28:​19, 20) Di apɔsul Pɔl bin kɔmpia di prichin wok to valyu tin we de insay kɔntri pɔt. (Sɛkɛn Lɛta Fɔ Kɔrint 4:​7; Fɔs Lɛta To Timoti 1:​12) Bikɔs wi nɔ pafɛkt, wi tan lɛk kɔntri pɔt. Bɔt di mɛsej we wi de prich tan lɛk valyu tin dɛn bikɔs i go mek wi ɛn di wan dɛn we de lisin to wi, gɛt layf we go de sote go. Pɔl bin no dis, na dat mek i bin de yuz difrɛn we dɛn fɔ prich, ɛn i bin tɔk se: “Ɔl dɛn tin ya we a de du na fɔ mek di Gud Nyuz prɛd ɔlɔbɔt.” (Fɔs Lɛta Fɔ Kɔrint 9:​23) Pɔl bin wok tranga wan fɔ tich ɔda pipul dɛn bɔt Gɔd in Kiŋdɔm. (Rid Lɛta Fɔ Rom 1:​14, 15; Sɛkɛn Lɛta To Timoti 4:​2.) Bikɔs i bin lɛk di gud nyuz, dat bin ɛp am fɔ kɔntinyu fɔ prich pan ɔl we dɛn bin de du bad tin dɛn to am. (Fɔs Lɛta Fɔ Tɛsalonayka 2:​2) Aw wi go falamakata di kayn we aw Pɔl bin lɛk di prichin wok?

9. Wetin na sɔm we dɛn we wi go sho se wi lɛk di prichin wok?

⁹ Wan we we Pɔl bin sho se i lɛk di prichin wok na bay we i bin de yuz ɛni chans we i bin de gɛt fɔ tɔk to ɔda pipul dɛn. Jɔs lɛk aw Pɔl ɛn di fɔstɛm Kristian dɛn bin de du, wisɛf kin prich di gud nyuz frɔm os to os, na say dɛn we pipul dɛn bɔku, ɛn ɛnisay we dɛn de. (Di Apɔsul Dɛn Wok [Akt] 5:​42; 20:​20) Wi kin luk fɔ we dɛn we wi kin prich to bɔku bɔku pipul dɛn ɛnitɛm we wi gɛt chans. If wi ebul, sɔntɛm wi go sav as ɔgzilari payɔnia ɔ rɛgyula payɔnia. Ɔ wi kin lan ɔda langwej, muf go na ɔda eria insay wi kɔntri, ɔ ivin go na ɔda kɔntri.—Di Apɔsul Dɛn Wok [Akt] 16:​9, 10.

10. Aw Ayrini bɛnifit we i wok tranga wan fɔ prich di gud nyuz?

¹⁰ Wan sista we de na Amɛrika we nem Ayrini, bin want fɔ prich to pipul dɛn we de tɔk Rɔshian langwej. So insay 1993, i jɔyn di Rɔshian grup we bin de insay Nyu Yɔk Siti. Da tɛm de, na lɛk 20 pɔblisha dɛn nɔmɔ bin de na di grup. Afta 20 ia, Ayrini bin se: “A nɔ stil ebul fɔ tɔk Rɔshian langwej gud gud wan.” Bɔt Jiova dɔn ɛp in ɛn ɔda pɔblisha dɛn fɔ prich to pipul dɛn insay da langwej de. Dat dɔn mek dɛn dɔn gɛt siks Rɔshian kɔngrigeshɔn dɛn insay Nyu Yɔk Siti. Ayrini bin stɔdi di Baybul wit bɔku pipul dɛn ɛn 15 pan dɛn dɔn baptayz. Sɔm pan dɛn de wok na  Bɛtɛl, sɔm na payɔnia dɛn, ɛn sɔm na ɛlda dɛn. Ayrini tɔk se, “We a tink bɔt ɔda gol dɛn we a bin fɔ dɔn sɛt, a nɔ ebul imajin se ɛni wan pan dɛn bin fɔ mek a gladi dis kayn we.” Ayrini rili valyu in prichin wok!

11. Us gud tin kin apin we wi kɔntinyu fɔ prich pan ɔl we pipul dɛn de mek wi sɔfa?

¹¹ If wi valyu wi prichin wok, wi go tan lɛk di apɔsul Pɔl ɛn kɔntinyu fɔ prich pan ɔl we pipul dɛn de mek wi sɔfa. (Di Apɔsul Dɛn Wok [Akt] 14:​19-22) Fɔ ɛgzampul, frɔm 1930 to 1944, pipul dɛn bin de mek wi brɔda dɛn na Amɛrika sɔfa bad bad wan. Bɔt dɛn bin stil kɔntinyu fɔ prich. We di wan dɛn we gɛt pawa na di kɔntri tray fɔ stɔp dɛn, wi brɔda dɛn bin kɛr di kes go na kɔt ɛn dɛn bin win bɔku pan di kes dɛn. Insay 1943, Brɔda Nɔ bin tɔk bɔt wan pan di kes dɛn we wi bin win na di Ay Kɔt na Amɛrika. I bin se dɛn nɔ bin fɔ dɔn kɛr go ɛni kes na di Ay Kɔt na Amɛrika, if di brɔda dɛn bin stɔp fɔ prich. I kɔntinyu fɔ tɔk se bikɔs di brɔda dɛn ɔlsay na di wɔl bin kɔntinyu fɔ prich, dat dɔn pruv se di sɔfa we dɛn bin de mek wi sɔfa nɔ ebul fɔ stɔp di prichin wok. Wi brɔda dɛn na ɔda kɔntri dɛn dɔn win dɛn sem kayn kes dɛn ya. Fɔ tru, di lɛk we wi lɛk di prichin wok nɔ go mek wi stɔp fɔ prich pan ɔl we pipul dɛn de mek wi sɔfa.

12. Wetin yu dɔn mekɔp yu maynd fɔ du?

¹² We wi valyu wi prichin wok, wi nɔ go jɔs bisin bɔt ɔmɔs awa wi de rayt na wi fil savis ripɔt. Wi go du ɔl wetin wi ebul fɔ prich di ‘gud nyuz gud gud wan.’ (Di Apɔsul Dɛn Wok [Akt] 20:​24; Sɛkɛn Lɛta To Timoti 4:​5) Bɔt wetin wi go tich ɔda pipul dɛn? Lɛ wi tɔk bɔt wan ɔda valyu tin we Gɔd dɔn gi wi.

13, 14. Wetin na di stɔ we gɛt valyu tin dɛn we Jizɔs bin tɔk bɔt na Matyu 13:​52? Aw wi go ful-ɔp am?

¹³ Di ɔda valyu tin we Jiova dɔn gi wi na ɔl di tru tin dɛn we wi dɔn lan. Jiova de tɔk tru ɔltɛm. (Sɛkɛn Samiɛl 7:​28; Sam 31:​5) Jɔs lɛk papa we gud, Jiova want fɔ mek wi sabi dɛn tru tin dɛn de. Wi dɔn lan bɔku pan dɛn tru tin dɛn de bay we wi de rid in Wɔd, wi buk ɛn magazin dɛn, we wi go wi kɔnvɛnshɔn, asɛmbli, ɛn wi mitin dɛn. Di mɔ we wi de lan di tru tin dɛn we de na di Baybul, na di mɔ wi go tan lɛk “jɛntri man we de pul dɛn ol ɛn nyu tin kɔmɔt nain stɔ.” (Rid Matyu 13:​52.) Jiova go ɛp wi fɔ ful-ɔp wi stɔ wit valyu tin dɛn if wi luk gud gud wan fɔ di tru tin dɛn jɔs lɛk aw wi de luk fɔ valyu tin dɛn we ayd. (Rid Prɔvabs 2:​4-7.) Aw wi go du dat?

¹⁴ Ɔltɛm, wi nid fɔ de stɔdi di Baybul, wi buk ɛn magazin dɛn, ɛn tek tɛm rid mɔ bɔt ɛni tɔpik. Dis go ɛp wi fɔ lan “nyu” tin dɛn frɔm di Baybul. (Jɔshwa 1:​8, 9; Sam 1:​2, 3) Di fɔs Wach Tawa we dɛn mek insay Julay 1879, bin kɔmpia di tru tin dɛn insay Gɔd in Wɔd to flawa we ayd insay gras. Fɔ mek pɔsin fɛn da flawa de, i gɛt fɔ tek tɛm luk gud gud wan. We i si am, i nɔ fɔ jɔs satisfay wit da wangren wan. I fɔ kɔntinyu fɔ fɛn ɔda wan dɛn bak. Semweso, wi nɔ fɔ satisfay we wi lan wan tru tin. Wi fɔ kɔntinyu fɔ luk fɔ ɔda wan dɛn.

15. Wetin mek wi go se sɔm trut dɛn “ol”? Us wan pan dɛn yu valyu pas ɔl?

¹⁵ We wi stat fɔ stɔdi di Baybul, wi bin lan sɔm trut dɛn we rili wɔndaful. Wi go kɔl dɛn “ol” trut dɛn bikɔs na dɛn fɔs wi bin lan. Wetin na sɔm pan dɛn trut dɛn de? We wi bin bigin, wi bin lan se na Jiova mek ɔltin, ɛn i gɛt gud tin dɛn na in maynd fɔ mɔtalman. Wi bin lan bak se Gɔd bin sɛn in Pikin na di wɔl fɔ kam day fɔ wi, so dat i go fri wi frɔm sin ɛn day. Wi lan bak se Gɔd in Kiŋdɔm go pul ɔltin we de mek wi sɔfa, ɛn wi go de na dis wɔl wit kolat ɛn gladi at sote go.—Jɔn 3:​16; Rɛvɛleshɔn 4:​11; 21:​3, 4.

16. Wetin wi nid fɔ du we dɛn ajɔst di we aw wi ɔndastand sɔntin dɛn na di Baybul?

¹⁶ Sɔntɛnde, dɛn kin ajɔst di we aw wi ɔndastand wan skripchɔ ɔ sɔntin we di Baybul bin dɔn tɔk. We dat apin, i go fayn fɔ mek wi tek tɛm stɔdi ɛn tink gud wan bɔt wetin dɛn ajɔst. (Di Apɔsul Dɛn Wok [Akt] 17:​11; Fɔs Lɛta To Timoti 4:​15) Wi nɔ jɔs nid fɔ ɔndastand di men difrɛns bitwin aw wi bin ɔndastand am trade ɛn aw wi ɔndastand am naw, bɔt wi nid fɔ pe atɛnshɔn bak to ɔl di tin dɛn we de insay di nyu we aw wi ɔndastand am. If wi tek tɛm fɔ stɔdi da we de, wi shɔ se di nyu tin dɛn we wi dɔn lan go ad pan di wan dɛn we wi bin sabi na di Baybul. Wetin mek i fayn fɔ mek wi du dat?

17, 18. Aw di oli spirit kin ɛp wi?

¹⁷ Jizɔs bin tich se Gɔd in spirit go ɛp wi fɔ mɛmba di tin dɛn we wi bin dɔn lan trade. (Jɔn 14:​25, 26) Aw dis kin ɛp wi we wi de prich di gud nyuz? Tink bɔt wetin bin apin to wan brɔda we nem Pita. Insay 1970, Pita bin ol  19 ia, ɛn i bin jɔs dɔn bigin fɔ sav na di Bɛtɛl we de na Briten. Pita bin de prich frɔm os to os ɛn i mit wan big man we gɛt bɔku bia-bia. I aks di man if i go want fɔ ɔndastand di Baybul. Di man na bin Ju Lɔ ticha we dɛn kin kɔl rabay, ɛn i bin shɔk fɔ si dis yɔŋ man we tink se i go ebul fɔ tich am di Baybul. Fɔ tɛst Pita, di man aks am se, “Bɔbɔ, us langwej dɛn rayt di Baybul buk we nem Daniɛl?” Pita ansa am se, “Dɛn rayt sɔm pat pan am insay Arameik.” Pita tɔk se: “Di rabay bin sɔprayz we a sabi di ansa; bɔt a bin sɔprayz pas am! Aw a bin sabi di ansa? We a go bak na os ɛn chɛk di Wachtawa ɛn Awake! magazin dɛn we bin dɔn kam, a si wan atikul we ɛksplen se na insay Arameik dɛn rayt di Baybul buk we nem Daniɛl.” (Daniɛl 2:​4, NW, futnot) Fɔ tru, di oli spirit kin ɛp wi fɔ mɛmba di tin dɛn we wi bin dɔn rid ɛn ad pan di valyu tin dɛn we wi bin dɔn sabi trade.—Lyuk 12:​11, 12; 21:​13-15.

¹⁸ If wi lɛk di tru tin we wi bin dɔn lan frɔm Jiova ɛn wi gladi fɔ dɛn, wi go want fɔ kɔntinyu fɔ de ad pan di valyu tin dɛn we wi bin dɔn sabi trade. Di mɔ wi de du dat, na di mɔ wi go rɛdi fɔ tich ɔda pipul dɛn.

19. Wetin mek wi fɔ protɛkt di valyu tin dɛn we Jiova dɔn gi wi?

¹⁹ Insay dis atikul, wi dɔn lan aw i impɔtant fɔ mek wi valyu di tin dɛn we Jiova dɔn gi wi. Bɔt wi fɔ rili tek tɛm mek wi nɔ alaw Setan ɛn di pipul dɛn na di wɔl fɔ ambɔg di we aw wi lɛk dɛn valyu tin dɛn ya. If wi nɔ tek tɛm, tin dɛn lɛk fɔ gɛt wok we go mek dɛn pe wi bɔku mɔni, fɔ want fɔ liv pɔsh layf, ɔ fɔ bluf wit bɔku prɔpati go mek wi fɔgɛt bɔt di valyu tin dɛn we wi gɛt. Di apɔsul Jɔn bin mɛmba wi se i nɔ go te igen dis wɔl ɛn ɔl di tin dɛn we de de, nɔ go de igen. (Jɔn In Fɔs Lɛta 2:​15-17) Na dat mek wi fɔ kɔntinyu fɔ sho se wi gladi fɔ di valyu tin dɛn we Jiova dɔn gi wi ɛn wi fɔ protɛkt dɛn.

20. Wetin yu dɔn mekɔp yu maynd fɔ du fɔ protɛkt di valyu tin dɛn we Jiova dɔn gi yu?

²⁰ Na fɔ rɛdi fɔ lɛf ɛnitin we go ambɔg di we aw yu lɛk Gɔd in Kiŋdɔm. Mekɔp yu maynd fɔ prich wit zil, ɛn nɔ ɛva stɔp fɔ lɛk di prichin wok. Kɔntinyu fɔ de luk gud gud wan fɔ di tru tin dɛn we de na di Baybul. As yu de du dis, yu go de kip “gud gud tin we nɔ go dɔn na ɛvin, bikɔs tifman nɔ go tif dɛn de ɛn bɔgbɔg nɔ go it dɛn. Bikɔs ɔltɛm una at go de di say we una kip una jɛntri.”—Lyuk 12:​33, 34.