သးစၢၢ်ဆၢ နီၢ်သးအတၢ်ထူးတၢ်တီၤတက့ၢ်
“အဂ့ၢ်ဒ်အံၤ ဖဲသုတၢ်လုၢ်ဒိၣ်ပှ့ၤဒိၣ် အိၣ်ဝဲအလီၢ်န့ၣ် သုသးကအိၣ်ဝဲဖဲန့ၣ်လီၤ.” —လူၤကၣ် ၁၂:၃၄
၁, ၂. (က) နီၢ်သးအတၢ်ထူးတၢ်တီၤ သၢခါလၢယဟိဝၤယွၤ ဟ့ၣ်လီၤပှၤန့ၣ် မ့ၢ်မနုၤလဲၣ်. (ခ) လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်.
ယဟိဝၤယွၤန့ၣ် မ့ၢ်ယွၤလၢအထူးအတီၤကတၢၢ်တဂၤလီၤ. (၁ ကွဲးနီၣ်တၢ် ၂၉:၁၁, ၁၂) ဒီးမ့ၢ်လၢယဟိဝၤယွၤ အသးအိၣ်ဟ့ၣ်ပှၤ နီၢ်သးအတၢ်ထူးတၢ်တီၤအဃိ ပစံးဘျုးဘၣ်အီၤဒိၣ်မးလီၤ. နီၢ်သးအတၢ်ထူးတၢ်တီၤလၢ ယဟိဝၤယွၤဟ့ၣ်လီၤပှၤတနီၤန့ၣ် မ့ၢ်မနုၤလဲၣ်. မ့ၢ်ဝဲ (၁) ယွၤအဘီအမုၢ်, (၂) တၢ်စံၣ်တဲၤတဲလီၤတၢ်မၤ ဒီး (၃) တၢ်မ့ၢ်တၢ်တီလၢ အလုၢ်ဒိၣ်ပှ့ၤဒိၣ်လၢ လံာ်စီဆှံအပူၤန့ၣ်လီၤ. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်ဝဲအသိး ပမ့ၢ်တပလီၢ်ပသးဘၣ်န့ၣ် နီၢ်သးအတၢ်ထူးတၢ်တီၤလၢ ယွၤဟ့ၣ်ပှၤတဖၣ်အံၤ ပတပာ်လုၢ်ပာ်ပှ့ၤအီၤ အါအါလၢၤဘၣ်. လၢတၢ်န့ၣ်အဃိ ပကဘၣ်ဂုာ်ကျဲးစၢးဒ်သိး ပတၢ်ပာ်လုၢ်ပာ်ပှ့ၤ နီၢ်သးအတၢ်ထူးတၢ်တီၤတဖၣ်အံၤ သုတစှၤလီၤတဂ့ၤအဂီၢ်လီၤ. ယ့ၣ်ၡူးစံးဝဲလၢ– “ဖဲသုတၢ်လုၢ်ဒိၣ်ပှ့ၤဒိၣ်အိၣ်ဝဲအလီၢ်န့ၣ် သုသးကအိၣ်ဝဲဖဲန့ၢ်လီၤ.” လၢတၢ်န့ၣ်အဃိ ပကဘၣ်သ့ၣ်နီၣ်ထီၣ်လၢ နီၢ်သးအတၢ်ထူးတၢ်တီၤတဖၣ်န့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ် ဒီးပကဘၣ်ပာ်လုၢ်ပာ်ပှ့ၤအီၤထီဘိလီၤ.—လူၤကၣ် ၁၂:၃၄.
၂ ခဲအံၤပကတဲသကိး တၢ်ဂ့ၢ်ဘၣ်ဃးဒီး ပပာ်လုၢ်ပာ်ပှ့ၤ ဒီးပသူၣ်ဆူၣ်သးဆူၣ်လၢ ယွၤအဘီအမုၢ်, တၢ်စံၣ်တဲၤတဲလီၤတၢ်မၤ ဒီးတၢ်မ့ၢ်တၢ်တီအဂီၢ် ကသ့ဒ်လဲၣ်န့ၣ်လီၤ. ဖဲပတဲသကိး တၢ်ဂ့ၢ်တဖၣ်အံၤအခါ ဆိကမိၣ်ထီၣ်ဘၣ်ဃး ပပာ်လုၢ်ပာ်ပှ့ၤအါထီၣ် နီၢ်သးအတၢ်ထူးတၢ်တီၤတဖၣ်အံၤ ကသ့လၢကျဲဒ်လဲၣ် န့ၣ်တက့ၢ်.
ယွၤအဘီအမုၢ်န့ၣ် လီၤဂာ်ဒ် တၢ်မျၢ်ပလဲလၢ လုၢ်ဒိၣ်ပှ့ၤဒိၣ်
၃. လၢယ့ၣ်ၡူးတၢ်ကတိၤဒိအပူၤန့ၣ် ပှၤတဂၤဒ်သိး ကပှ့ၤဝဲတၢ်မျၢ်ပလဲလၢ အလုၢ်ဒိၣ်ပှ့ၤဒိၣ်တဖျၢၣ်အံၤအဂီၢ် ဘၣ်မၤဝဲတၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၃ ဖး မးသဲ ၁၃:၄၅, ၄၆ တက့ၢ်. ယ့ၣ်ၡူးတဲဝဲ တၢ်အဒိတခါလၢဘၣ်ဃးဒီး ပှၤပှ့ၤတၢ်ဆါတၢ်ဖိတဂၤလၢအ ပှ့ၤဒီးဆါဝဲတၢ်မျၢ်ပလဲအဂ့ၢ်လီၤ. ဘၣ်တနံၤန့ၣ် အဝဲထံၣ်ဘၣ်ဝဲ တၢ်မျၢ်ပလဲတဖျၢၣ် လၢအလုၢ်ဒိၣ်ပှ့ၤဒိၣ်န့ၢ်ဒံး တၢ်မျၢ်ပလဲလၢ အထံၣ်ဝဲလၢညါသ့ၣ်တဖၣ်န့ၣ်လီၤ. ပှၤတဂၤအံၤလီကီဝဲ တၢ်မျၢ်ပလဲအံၤဒိၣ်မးအဃိ ဒ်သိးကပှ့ၤဝဲတၢ်မျၢ်ပလဲအံၤအဂီၢ် အဝဲဆါလီၤကွံာ်ဝဲ ကယဲၢ်တၢ်လၢအအိၣ်ဒီးအီၤခဲလၢာ်လီၤ. လၢတၢ်န့ၣ်အဃိ တၢ်မျၢ်ပလဲတဖျၢၣ်အံၤ ကလုၢ်ဒိၣ်ပှ့ၤဒိၣ်လၢအဂီၢ်ထဲလဲၣ်န့ၣ် ဆိကမိၣ်ကွၢ်တက့ၢ်.
ပမ့ၢ်ပာ်လုၢ်ပာ်ပှ့ၤ ယွၤအဘီအမုၢ် ဒ်ပှၤတဂၤအံၤ ပာ်လုၢ်ပာ်ပှ့ၤဝဲ တၢ်မျၢ်ပလဲအသိးန့ၣ် ပကသးအိၣ် ဟ့ၣ်လီၤကွံာ် တၢ်လၢအိၣ်ဒီးပှၤ တဖၣ်လၢ ယွၤအဘီအမုၢ်အဂီၢ်
၄. လၢယွၤအဘီမုၢ်အဂီၢ်ပသးအိၣ်မၤတၢ်မနုၤလဲၣ်.
၄ ပဟံးန့ၢ်တၢ်မၤလိလၢ ယ့ၣ်ၡူးဟ့ၣ်တၢ်အဒိအတဲာ်အံၤ ကသ့ဒ်လဲၣ်. တၢ်မ့ၢ်တၢ်တီလၢအဘၣ်ဃးဒီး ယွၤအဘီအမုၢ်အဂ့ၢ်န့ၣ် အလုၢ်ဒိၣ်ပှ့ၤဒိၣ်ဒ် တၢ်မျၢ်ပလဲအံၤအသိးလီၤ. ပမ့ၢ်ပာ်လုၢ်ပာ်ပှ့ၤ ယွၤအဘီအမုၢ် ဒ်ပှၤတဂၤအံၤပာ်လုၢ်ပာ်ပှ့ၤဝဲ တၢ်မျၢ်ပလဲအသိးန့ၣ် ပကသးအိၣ်ဟ့ၣ်လီၤကွံာ် တၢ်လၢအိၣ်ဒီးပှၤခဲလၢာ် ဒ်သိးပကကဲထီၣ် ယွၤအပှၤဂီၢ်မုၢ် ဒီးဆဲးအိၣ်လၢယွၤအဘီအမုၢ် အတၢ်ပၢဖီလာ်ထီဘိလီၤ. (ဖး မၢ်ကူး ၁၀:၂၈-၃၀ တက့ၢ်.) ခဲအံၤပကကွၢ်သကိးပှၤခံဂၤလၢ အမၤဝဲဒ်အံၤအဂ့ၢ်န့ၣ်လီၤ.
၅. လၢယွၤဘီမုၢ်အဂီၢ် စီၤစးဃဲသးအိၣ်မၤတၢ်မနုၤလဲၣ်.
၅ စီၤစးဃဲန့ၣ် မ့ၢ်ဝဲပှၤဃ့သွဲဖိတဂၤလီၤ. အဝဲကဲဒိၣ်ထီၣ်ခီဖျိလၢ အမၤလံၣ်အီၣ်လီအီၣ်တၢ်အဃိလီၤ. (လူၤကၣ် ၁၉:၁-၉) ဘၣ်တနံၤန့ၣ် အဝဲနၢ်ဟူဘၣ်ယ့ၣ်ၡူးတဲဝဲ ဘီမုၢ်အဂ့ၢ်လီၤ. တၢ်လၢအနၢ်ဟူဘၣ်ဝဲတဖၣ်န့ၣ် ထုးန့ၢ်အသးဒိၣ်မးအဃိ အသးအိၣ်ဆီတလဲကွံာ် အတၢ်အိၣ်မူလီၤ. အဝဲတဲဝဲလၢ “ကွၢ်ကွၢ် ကစၢ်ဧၢ, ယစုလီၢ်ယခီၣ်ခိၣ်, ခံပူန့ၣ် ယဟ့ၣ်လီၤပှၤဖှီၣ်ဖိယာ်ဖိတပူလီၤ. ဒီးယမ့ၢ်အီၣ်ကဘျံးအီၣ်ကဘျၣ် ပှၤတဂၤအတၢ်တမံၤမံၤဒီး ယဟ့ၣ်လီၤက့ၤအီၤအါန့ၢ်အလီၢ် လွံၢ်စးလီၤ.” စီၤစးဃဲ ဟ့ၣ်က့ၤစ့လၢ အဟံးန့ၢ်ဆူၣ်ဝဲလၢပှၤဂၤအအိၣ် ဒီးလၢခံအဝဲ တသူၣ်လီသးကွံပှၤဂၤအတၢ်လၢၤဘၣ်.
၆. ပိာ်မုၣ်တဂၤ ဆီတလဲအတၢ်အိၣ်မူဒ်လဲၣ် ဒီးဘၣ်မနုၤအဃိလဲၣ်.
၆ လၢအပူၤကွံာ်စှၤနံၣ်န့ၣ် ပိာ်မုၣ်တဂၤ နၢ်ဟူဘၣ်ဝဲ ယွၤအဘီအမုၢ်အဂ့ၢ်လီၤ. ပိာ်မုၣ်တဂၤအံၤ မ့ၢ်ပှၤလၢ အမံဃုာ်အိၣ်ဃုာ်ဒီး ပိာ်မုၣ်ကဒဲကဒဲလီၤ. တကးဒံးဘၣ် အဝဲမ့ၢ်ပှၤတီခိၣ်ရိၤမဲ တၢ်ကရၢကရိလၢ အမၤစၢၤဝဲ ဒ်သိးပိာ်မုၣ်ကဒဲကဒဲ ပိာ်ခွါကဒဲကဒဲတဖၣ် ကအိၣ်ဒီးတၢ်သဘျ့လၢ ကအိၣ်ဃုာ်လိာ်အသးအဂီၢ်န့ၣ်လီၤ. ဘၣ်ဆၣ် ဖဲအမၤလိလံာ်စီဆှံဒီး သ့ၣ်ညါဘၣ်ယွၤအဘီမုၢ်အဂ့ၢ်အခါ အဝဲသ့ၣ်ညါလီၤအသးလၢ ကဘၣ်ဆီတလဲအတၢ်အိၣ်မူဖးဒိၣ်ညါ. (၁ ကရံၣ်သူး ၆:၉, ၁၀) မ့ၢ်လၢအဝဲအဲၣ် ယဟိဝၤယွၤဒိၣ်မးအဃိ အဝဲပာ်တ့ၢ်ကွံာ်ဝဲ ပိာ်မုၣ်လၢအအိၣ်ဃုာ်ဒီးအီၤတဂၤလီၤ. တကးဒံးဘၣ် အဝဲဟးထီၣ်ကွံာ်လၢ တၢ်ကရၢကရိလၢ အတီခိၣ်ရိၤမဲဝဲန့ၣ်လီၤ. ဖဲ ၂၀၀၉ န့ၣ်အဝဲဒိးဘျၢထံ ဒီးလၢခံတနံၣ်န့ၣ် အဝဲကဲထီၣ်ပှၤလဲၤလၢညါလီၤ. မ့ၢ်လၢအဝဲအဲၣ်ယဟိဝၤယွၤဒိၣ်န့ၢ်ဒံး အအဲၣ်တၢ်သူၣ်လီသးကွံလၢ အတကြၢးတဘၣ်တဖၣ်အဃိ အဝဲဆီတလဲ အတၢ်အိၣ်မူကဲဝဲလီၤ.—မၢ်ကူး ၁၂:၂၉, ၃၀.
၇. ဒ်သိးပတၢ်အဲၣ်ယွၤအဘီအမုၢ် သုတစှၤလီၤတဂ့ၤအဂီၢ် ပကဘၣ်မၤဒ်လဲၣ်.
၇ ဒ်သိး ပဒိးပၢပသးလၢ ယွၤအဘီမုၢ် အတၢ်ပၢဖီလာ် ကန့ၢ်အဂီၢ် ပဝဲသ့ၣ်အါတက့ၢ်န့ၣ် ပကဘၣ်ဆီတလဲ ပတၢ်အိၣ်မူလီၤ. (ရိမ့ၤ ၁၂:၂) ဘၣ်ဆၣ် ပကဘၣ်ဆဲးမၤဒံး တၢ်ဆီတလဲကွ့ၢ်ကွ့ၢ်လီၤ. ပတဘၣ်ပျဲ တၢ်အဲၣ်တၢ်ထူးတၢ်တီၤ ဒီးတၢ်သူၣ်လီသးကွံလၢ အတကြၢးတဘၣ်တဖၣ် မၤစှၤလီၤပတၢ်အဲၣ် ယွၤအဘီအမုၢ်န့ၣ်ဘၣ်. (ကတိၤဒိ ၄:၂၃; မးသဲ ၅:၂၇-၂၉) ဒ်သိးပတၢ်အဲၣ်ယွၤအဘီအမုၢ် သုတစှၤလီၤတဂ့ၤအဂီၢ် ယဟိဝၤယွၤဟ့ၣ်ပှၤ နီၢ်သးအတၢ်ထူးတၢ်တီၤလၢ အဂၤတခါဒံးလီၤ.
ပတၢ်စံၣ်တဲၤတဲလီၤတၢ်မၤလၢ အမၤပူၤဖျဲးပှၤသးသမူ
၈. (က) ဘၣ်မနုၤအဃိ စီၤပီလူးတဲဝဲလၢ ပတၢ်စံၣ်တဲၤတဲလီၤ ဘီမုၢ်တၢ်သးခုကစီၣ်န့ၣ် လီၤဂာ်ဒ်တၢ်လုၢ်ဒိၣ်ပှ့ၤဒိၣ်လၢ အအိၣ်လၢ “သပၢၤဟီၣ်ခိၣ်” အပူၤန့ၣ်လဲၣ်. (ခ) စီၤပီလူး အိၣ်ဒီးတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤန့ၣ် ပာ်ဖျါထီၣ်ဝဲဒ်လဲၣ်.
၈ ယ့ၣ်ၡူးဟ့ၣ်ပှၤမူဒါလၢ အရ့ဒိၣ်ကတၢၢ်တခါန့ၣ်မ့ၢ်ဝဲ ပကဘၣ်စံၣ်တဲၤတဲလီၤတၢ် ဒီးသိၣ်လိပှၤဂၤ ယွၤအဘီအမုၢ်အဂ့ၢ်လီၤ. (မးသဲ ၂၈:၁၉, ၂၀) တၢ်မၢဖိပီလူး တဲဝဲလၢ တၢ်စံၣ်တဲၤတဲလီၤ တၢ်မၤအံၤလီၤဂာ်ဒ် တၢ်လုၢ်ဒိၣ်ပှ့ၤဒိၣ်လၢ အအိၣ်လၢ သပၢၤဟီၣ်ခိၣ်အပူၤန့ၣ်လီၤ. (၂ ကရံၣ်သူး ၄:၇; ၁ တံၤမသ့း ၁:၁၂) မ့ၢ်လၢပတလၢတပှဲၤဘၣ်အဃိ ပလီၤဂာ်ဒ် သပၢၤဟီၣ်ခိၣ်အသိးန့ၣ်လီၤ. ဘၣ်ဆၣ် ဘီမုၢ်တၢ်သးခုကစီၣ်လၢ ပစံၣ်တဲၤတဲလီၤအီၤန့ၣ် လီၤဂာ်ဒ်တၢ်ထူးတၢ်တီၤလၢ အလုၢ်ဒိၣ်ပှ့ၤဒိၣ် မ့ၢ်လၢအဟ့ၣ်ပှၤ ဒီးပှၤလၢအဒိကနၣ်တၢ်တဖၣ် တၢ်မူအထူအယိာ် သ့ဝဲအဃိလီၤ. လၢတၢ်န့ၣ်အဃိ တၢ်မၢဖိပီလူးတဲဝဲလၢ “ယမၤတၢ်ခဲလၢာ်လၢ တၢ်သးခုကစီၣ်အဃိ ဒ်သိးယကကဲလၢ ပှၤန့ၢ်ဃုာ်အဘျုးအဖှိၣ်န့ၣ်လီၤ.” (၁ ကရံၣ်သူး ၉:၂၃) စီၤပီလူး ဂုာ်ကျဲးစၢးဆူၣ်ဆူၣ် ဒ်သိးကသိၣ်လိပှၤဂၤ ဘီမုၢ်တၢ်သးခုကစီၣ်န့ၣ်လီၤ. (ဖး ရိမ့ၤ ၁:၁၄, ၁၅; ၂ တံၤမသ့း ၄:၂ တက့ၢ်.) ခီဖျိလၢစီၤပီလူး အိၣ်ဒီးတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤ တၢ်မၤအပူၤအဃိ ဖဲအကွၢ်ဆၢၣ်မဲာ်ဘၣ် တၢ်မၤအၢမၤနးအခါဒၣ်လဲာ် ဆဲးစံၣ်တဲၤတဲလီၤတၢ်လီၤ. (၁ သ့းစၤလနံ ၂:၂) ပအိၣ်ဒီး တၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤ ဒ်စီၤပီလူးအသိးကသ့ဒ်လဲၣ်.
ဘီမုၢ်တၢ်သးခုကစီၣ်လၢ ပစံၣ်တဲၤတဲလီၤအီၤန့ၣ် လီၤဂာ်ဒ် တၢ်ထူးတၢ်တီၤလၢ အလုၢ်ဒိၣ်ပှ့ၤဒိၣ် မ့ၢ်လၢအဟ့ၣ်ပှၤ ဒီးပှၤလၢအဒိကနၣ်တၢ်တဖၣ် တၢ်မူအထူအယိာ်သ့ဝဲအဃိလီၤ
၉. ပအိၣ်ဒီးတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤန့ၣ် ပပာ်ဖျါထီၣ်အီၤလၢ ကျဲအဂၤတဖၣ်ကသ့ဒ်လဲၣ်.
၉ ကျဲတဘိလၢ စီၤပီလူးပာ်ဖျါထီၣ် အတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤ တၢ်မၤအပူၤန့ၣ်မ့ၢ်ဝဲ အဝဲဃုတၢ်ခွဲးတၢ်ယာ်လၢ ကစံၣ်တဲၤတဲလီၤတၢ်ဆူ ပှၤဂၤအအိၣ်န့ၣ်လီၤ. ဒ်စီၤပီလူး ဒီးခရံာ်ဖိလၢညါတဖၣ်အသိး ပအိၣ်ဒီးတၢ်သူၣ်ဆူၣ်သးဆူၣ် ခီဖျိပစံၣ်တဲၤတဲလီၤ ဘီမုၢ်တၢ်သးခုကစီၣ်လၢ ဟံၣ်တဖျၢၣ်ဘၣ်တဖျၢၣ် ဒီးကယဲၢ်တၢ်လီၢ်တပူၤလၢ်လၢ်လၢ ပထံၣ်ပှၤဂၤတဖၣ်န့ၣ်လီၤ. (မၤတၢ် ၅:၄၂; ၂၀:၂၀) ဒ်သိးတၢ်သးခုကစီၣ် ကရၤလီၤအသးဝးဝးအဂီၢ် ပဝဲသ့ၣ်တဖၣ် ပဃုကျဲအကလုာ်ကလုာ်လီၤ. မ့ၢ်သ့န့ၣ် ပမၤပှၤလဲၤလၢညါမ့ၢ်ဂ့ၤ ပှၤလဲၤလၢညါမၤစၢၤတၢ်မ့ၢ်ဂ့ၤသ့လီၤ. မ့တမ့ၢ် ပမၤလိကျိာ်အဂၤ, လဲၤမၤစၢၤတၢ်လၢ တၢ်လီၢ်လၢအလိၣ်တၢ်မၤစၢၤ မ့တမ့ၢ် လဲၤသုးလီၢ်သုးကျဲဆူထံကီၢ်အဂၤသ့ဝဲလီၤ.—မၤတၢ် ၁၆:၉, ၁၀.
၁၀. ခီဖျိလၢ အၤရံနၤဂုာ်ကျဲးစၢးဆူၣ်ဆူၣ်လၢ တၢ်စံၣ်တဲၤတဲလီၤတၢ်မၤပူၤအဃိ အဒိးန့ၢ်ဘၣ် တၢ်ဘျုးတၢ်ဖှိၣ်ဒ်လဲၣ်.
၁၀ ဒီပုၢ်ဝဲၢ်မုၣ် အၤရံနၤမ့ၢ်ဝဲ ပှၤသဘျ့တဂၤ ဒီးအိၣ်လၢကီၢ်အမဲရကၣ်လီၤ. ဘၣ်ဆၣ် အဝဲအဲၣ်ဒိးစံၣ်တဲၤတဲလီၤ ဘီမုၢ်တၢ်သးခုကစီၣ်ဆူ ပှၤရၢၡါဖိတဖၣ်အအိၣ်လီၤ. လၢတၢ်န့ၣ်အဃိ ဖဲ ၁၉၉၃ နံၣ်န့ၣ် အဝဲလဲၤမၤစၢၤတၢ်လၢ ကရူၢ်လၢ ပှၤမၤလၢရၢၡါအကျိာ် လၢဝ့ၢ်နူယီးန့ၣ်လီၤ. ဖဲန့ၣ်အဆၢကတီၢ် လၢကရူၢ်အပူၤန့ၣ် ပှၤစံၣ်တဲၤတဲလီၤတၢ်ဖိ အိၣ်ဒၣ်ထဲအဂၤ ၂၀ လီၤ. ဘၣ်ဆၣ် အနံၣ် ၂၀ ဝံၤအလီၢ်ခံ ဒီပုၢ်ဝဲၢ်မုၣ် အၤရံနၤစံးဝဲလၢ “ယတဲရၢၡါအကျိာ် တဘၣ်ခဲလၢာ်ဒံးဘၣ်.” ဘၣ်ဆၣ် ယဟိဝၤယွၤမၤစၢၤယၤ ဒီးဒီပုၢ်ဝဲၢ်အဂၤတဖၣ်အဃိ ပစံၣ်တဲၤတဲလီၤတၢ်ဆူ ပှၤရၢၡါဖိအအိၣ်လီၤ. ခဲအံၤ လၢဝ့ၢ်နူယီးအပူၤန့ၣ် တၢ်အိၣ်ဖှိၣ်လၢ ပှၤကတိၤရၢၡါအကျိာ် အိၣ်ဝဲဃုခါလံ. အၤရံနၤ သိၣ်လိပှၤဂၤလံာ်စီဆှံဒီဒူၣ်ညါ ဒီးလၢအကျါ ပှၤဒိးဘျၢထံ ၁၅ ဂၤညါ. ပှၤသ့ၣ်တဖၣ်အံၤတနီၤနီၤန့ၣ် မၤတၢ်လၢဘ့ၤသ့လး, မၤပှၤလဲၤလၢညါ, ဒီးတနီၤနီၤန့ၣ် ကဲထီၣ်ဝဲ တၢ်အိၣ်ဖှိၣ်သးပှၢ်တဖၣ်လီၤ. အၤရံနၤစံးဝဲလၢ “ယမ့ၢ်မၤဘၣ်ဖုးတၢ်မၤလၢအဂၤန့ၣ် တမ့ၢ်လၢယကဒိးန့ၢ်ဘၣ် တၢ်သူၣ်ခုသးခုထဲထဲအံၤညါဘၣ်” အဝဲပာ်လုၢ်ပာ်ပှ့ၤဝဲ တၢ်စံၣ်တဲၤတဲလီၤတၢ်မၤန့ၣ်လီၤ.
ဘီမုၢ်တၢ်သးခုကစီၣ်လၢ ပစံၣ်တဲၤတဲလီၤအီၤန့ၣ် လီၤဂာ်ဒ် တၢ်ထူးတၢ်တီၤလၢ အလုၢ်ဒိၣ်ပှ့ၤဒိၣ် မ့ၢ်လၢအဟ့ၣ်ပှၤ ဒီးပှၤလၢအဒိကနၣ်တၢ်တဖၣ် တၢ်မူအထူအယိာ်သ့ဝဲအဃိလီၤ (ကွၢ် လံာ်အဆၢ ၁၁, ၁၂)
၁၁. တၢ်မၤအၢမၤသီပှၤ ထဲလဲၣ်သနာ်က့ ပဆဲးစံၣ်တဲၤတဲလီၤတၢ်အဃိ ကဲဘျုးဝဲဒ်လဲၣ်.
၁၁ ဒ်စီၤပီလူးအသိး ပမ့ၢ်ပာ်လုၢ်ပာ်ပှ့ၤ တၢ်စံၣ်တဲၤတဲလီၤတၢ်မၤန့ၣ် ပမ့ၢ်ကွၢ်ဆၢၣ်မဲာ်ဘၣ် တၢ်မၤအၢမၤနးဒၣ်လဲာ် ပသးတလီၤစၢ်ဘၣ်. (မၤတၢ် ၁၄:၁၉-၂၂) အဒိ, ဖဲ ၁၉၃၀ တုၤလၢ ၁၉၄၄ န့ၣ်ပဒီပုၢ်ဝဲၢ်တဖၣ်လၢ ကီၢ်အမဲရကၣ်န့ၣ် ဘၣ်တၢ်မၤအၢမၤနး အဝဲသ့ၣ်လီၤ. ဘၣ်ဆၣ် အဝဲသ့ၣ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. ပဒိၣ်ပပှၢ်သ့ၣ်တဖၣ်တြီဝဲ တၢ်စံၣ်တဲၤတဲလီၤတၢ်မၤသနာ်က့ အဝဲသ့ၣ် လဲၤထီၣ်တၢ်အမူးလၢရူ ဒီးမၤနၢၤတၢ်တဘျုးဘျီညါ. ဖဲ ၁၉၄၃ န့ၣ် ဒီပုၢ်ဝဲၢ်ခွါ နီ(ရ်) တဲဖျါထီၣ်ဝဲလၢ ဖဲဒီပုၢ်ဝဲၢ်သ့ၣ်တဖၣ် လဲၤထီၣ်ရူအဒိၣ်ကတၢၢ်တဖျၢၣ် လၢကီၢ်အမဲရကၣ်အခါနၢၤဝဲလီၤ. ဒီပုၢ်ဝဲၢ်ခွါ နီ(ရ်) တဲဝဲလၢ ပဒီပုၢ်ဝဲၢ်တဖၣ် မ့ၢ်တဟးစံၣ်တဲၤတဲလီၤတၢ်ဘၣ်န့ၣ် တမ့ၢ်လၢပကလဲၤထီၣ်ဘၣ်ရူဘၣ်. ခီဖျိလၢ ဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ် ဆဲးစံၣ်တဲၤတဲလီၤတၢ်လၢ တၢ်သးဒူအပူၤအဃိ မ့ၢ်တၢ်အုၣ်သးလၢ ပှၤမၤပတုာ်ပတၢ်မၤတန့ၢ်ဘၣ်. ပဒီပုၢ်ဝဲၢ်လၢထံကီၢ်အဂၤတဖၣ်စ့ၢ်ကီး ဖဲလဲၤထီၣ်ရူအခါ နၢၤဝဲလီၤ. ပအိၣ်ဒီးတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤအဃိ ပှၤမၤအၢမၤသီပှၤ ထဲလဲၣ်သနာ်က့ မၤပတုာ်ပှၤတန့ၢ်ဘၣ်.
၁၂. နပာ်လီၤနသးလၢ နကမၤတၢ်မနုၤလဲၣ်.
၁၂ ပမ့ၢ်ပာ်လုၢ်ပာ်ပှ့ၤ တၢ်စံၣ်တဲၤတဲလီၤတၢ်မၤန့ၣ် ပတဘၣ်ယိၣ်ထဲပကန့ၢ် ပှဲၤနၣ်ရံၣ်န့ၣ်ဘၣ်. ပကဂုာ်ကျဲးစၢးလၢအဂ့ၤကတၢၢ် ဒ်သိးပ ‘ကအုၣ်ပသးလီၤတံၢ်လီၤဆဲး လၢယွၤအဘျုးအဖှိၣ် အတၢ်သးခုအကစီၣ်အဂ့ၢ်လီၤ.’ (မၤတၢ် ၂၀:၂၄; ၂ တံၤမသ့း ၄:၅) ဘၣ်ဆၣ် ပကသိၣ်လိပှၤဂၤ တၢ်ဂ့ၢ်မနုၤလဲၣ်. ပကကွၢ်သကိး တၢ်လုၢ်ဒိၣ်ပှ့ၤဒိၣ်အဂၤတခါလၢ ယွၤအအိၣ်န့ၣ်လီၤ.
တၢ်မ့ၢ်တၢ်တီ အလုၢ်ဒိၣ်ပှ့ၤဒိၣ်တဖၣ်လၢ ပမၤလိဘၣ်
၁၃, ၁၄. ဖဲ မးသဲ ၁၃:၅၂ န့ၣ် ယ့ၣ်ၡူးသူဝဲတၢ်ကတိၤလၢအမ့ၢ်တၢ် “ပာ်ဖှိၣ်တၢ်အလီၢ်” န့ၣ် မ့ၢ်တၢ်မနုၤလဲၣ်. ဒီးပကမၤပှဲၤအီၤဒ်လဲၣ်.
၁၃ တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤဟ့ၣ်လီၤပှၤ အဂၤတခါန့ၣ် မ့ၢ်ဝဲတၢ်မ့ၢ်တၢ်တီ လၢလံာ်စီဆှံအပူၤန့ၣ်လီၤ. ယဟိဝၤယွၤမ့ၢ် တၢ်မ့ၢ်တၢ်တီအဂံၢ်ခီၣ်ထံးလီၤ. (၂ ၡမူၤအ့လး ၇:၂၈; စံးထီၣ်ပတြၢၤ ၃၁:၅) ဒ်အမ့ၢ်ပၢ်လၢ အသးအိၣ်ဟ့ၣ်တၢ်တဂၤအသိး အဝဲအဲၣ်ဒိးလၢ ပကသ့ၣ်ညါတၢ်မ့ၢ်တၢ်တီလီၤ. ပမၤလိဘၣ် တၢ်မ့ၢ်တၢ်တီသ့ၣ်တဖၣ်အံၤ သ့ခီဖျိ ပဖးလံာ်စီဆှံ, ပဖးလံာ်လဲၢ်လၢ ပတၢ်ကရၢကရိထုးထီၣ်ဝဲတဖၣ်, ထီၣ်တၢ်အိၣ်ဖှိၣ်ရိဖှိၣ် ကိးနွံဒဲး, ထီၣ်ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ်န့ၣ်လီၤ. ပသ့ၣ်ညါတၢ်မ့ၢ်တၢ်တီ ဒံးယံာ်ဒံးအါထီၣ်ဝဲအဃိ လီၤဂာ်ဒ်ယ့ၣ်ၡူးတဲဝဲလၢ ပပာ်ဖှိၣ် “တၢ်အလီၢ်လံၤ ဒီးတၢ်အသီ” လၢတၢ် “ပာ်ဖှိၣ်တၢ်အလီၢ်” လီၤ. (ဖး မးသဲ ၁၃:၅၂ တက့ၢ်.) ပမ့ၢ်ဃုတၢ်မ့ၢ်တၢ်တီဒ် ပဃုတၢ်ထူးတၢ်တီၤလၢ အအိၣ်ခူသူၣ်အသးအသိးန့ၣ် ယဟိဝၤယွၤကမၤစၢၤပှၤ ဒ်သိးပကထံၣ်အီၤ ဒီးမၤပှဲၤအီၤလၢတၢ် “ပာ်ဖှိၣ်တၢ်အလီၢ်” လီၤ. (ဖး ကတိၤဒိ ၂:၄-၇ တက့ၢ်) ပမၤကသ့ဒ်လဲၣ်.
၁၄ ပကဘၣ်မၤလိလံာ်စီဆှံ ဒီးလံာ်လဲၢ်လၢ ပတၢ်ကရၢကရိထုးထီၣ်ဝဲတဖၣ် လီၤတံၢ်လီၤဆဲးလီၤ. ပမ့ၢ်မၤဒ်အံၤန့ၣ် ပကထံၣ်န့ၢ်အါထီၣ် နီၢ်သးအတၢ်ထူးတၢ်တီၤ “အသီ” တဖၣ်လီၤ. (ယိၤၡူ ၁:၈, ၉; စံးထီၣ်ပတြၢၤ ၁:၂, ၃) ဖဲ ၁၈၇၉ န့ၣ် တၢးထီခိးတၢ် အဆိကတၢၢ်တဘ့ၣ် ပာ်ဖျါထီၣ်ဝဲလၢ တၢ်မ့ၢ်တၢ်တီန့ၣ် လီၤဂာ်ဒ်ဖီဖိတဖိးလၢ အမဲထီၣ်လၢ နီၣ်ဧိၤမံၤဧိၤအကျါလီၤ. ဒ်သိးနကထံၣ်ဖီဖိတဖိးအံၤအဂီၢ် နကဘၣ်ဃုအီၤ လီၤတံၢ်လီၤဆဲးလီၤ. ဘၣ်ဆၣ်ဖဲနထံၣ်ဖီဖိတဖိးအခါ နသးတမံဒံးဘၣ် နကအဲၣ်ဒိးဆဲးဃုအါထီၣ် ဖီအဂၤတဖၣ်လီၤ. ဒ်န့ၣ်အသိး ဖဲပထံၣ်တၢ်မ့ၢ်တၢ်တီထဲတခါဧိၤန့ၣ် ပတဘၣ်သးမံဒံးဘၣ်. ပကဘၣ်သူၣ်ဆူၣ်သးဆူၣ်လၢ ပကဆဲးဃုအါထီၣ် တၢ်မ့ၢ်တၢ်တီအဂၤတဖၣ်လီၤ.
၁၅. တၢ်မ့ၢ်တၢ်တီတနီၤန့ၣ် ဘၣ်မနုၤအဃိ ပကိးအီၤလၢတၢ် “အလီၢ်လံၤ” လဲၣ်, ဒီးနပာ်လုၢ်ပာ်ပှ့ၤအီၤ အဒိၣ်ကတၢၢ်ဖဲလဲၣ် တခါလဲၣ်.
၁၅ ဖဲပစးထီၣ်မၤလိ လံာ်စီဆှံသီသီအခါ ပသ့ၣ်ညါဘၣ် တၢ်မ့ၢ်တၢ်တီလၢ အလီၤသူၣ်ပိၢ်သးဝးအါမးလီၤ. တၢ်မ့ၢ်တၢ်တီလၢ ပသ့ၣ်ညါတ့ၢ်အီၤလၢညါတဖၣ်န့ၣ် ပကိးအီၤလၢ တၢ်မ့ၢ်တၢ်တီလၢ “အလီၢ်လံၤ” လီၤ. တၢ်မ့ၢ်တၢ်တီတဖၣ်န့ၣ် ပၣ်ဃုာ်ဒီးယဟိဝၤယွၤန့ၣ်မ့ၢ်ဝဲ တၢ်ဘၣ်တ့ကစၢ် ဒီးအတၢ်တိာ်ပာ်အိၣ်ဝဲလၢ ပှၤဟီၣ်ခိၣ်ဖိအဂီၢ်ဒ်လဲၣ်ဒ်လဲၣ်အဂ့ၢ်န့ၣ်လီၤ. ဒီးပမၤလိဘၣ်စ့ၢ်ကီးလၢ ယွၤအဖိခွါန့ၣ် ဟဲလီၤလၢဟီၣ်ခိၣ်ဒ်သိး အကတူၢ်သံအသး ဒီးမၤပူၤဖျဲးပှၤလၢ တၢ်ဒဲးဘးဒီးတၢ်သံန့ၣ်လီၤ. ပသ့ၣ်ညါဘၣ်စ့ၢ်ကီးလၢ ယွၤအဘီအမုၢ်န့ၣ် ကမၤလီၤမၢ်ကွံာ် တၢ်နးတၢ်ဖှီၣ် ဒီးပကအိၣ်မူဘၣ်လၢ ဟီၣ်ခိၣ်လီၤထူလီၤယိာ် ပှဲၤဒီးတၢ်မုာ်တၢ်ခုၣ် ဒီးတၢ်သူၣ်ဖှံသးညီလီၤ.—ယိၤဟၣ် ၃:၁၆; လီၣ်ဖျါ ၄:၁၁; ၂၁:၃, ၄.
၁၆. ဖဲတၢ်နၢ်ပၢၢ်အသီ ဟဲအိၣ်ထီၣ်အခါ ပကဘၣ်မၤဒ်လဲၣ်.
၁၆ တဘျီတခီၣ် ဘၣ်ဃးဒီးဝံအတၢ်စံးပာ် မ့တမ့ၢ် လံာ်စီဆှံအဆၢတနီၤန့ၣ် တၢ်နၢ်ပၢၢ်အသီဟဲအိၣ်ထီၣ်ဝဲလီၤ. ဖဲတၢ်ဆီတလဲအိၣ်ထီၣ်ဒ်အံၤအခါ ပကဘၣ်ဟံးန့ၢ် တၢ်ဆၢကတီၢ်, မၤလိအီၤဂ့ၤဂ့ၤဒီးဆိကမိၣ်ထံအီၤလီၤ. (မၤတၢ် ၁၇:၁၁; ၁ တံၤမသ့း ၄:၁၅) ပကဘၣ်သ့ၣ်ညါ တၢ်နၢ်ပၢၢ်အလီၢ်လံၤ ဒီးတၢ်နၢ်ပၢၢ်အသီ အတၢ်လီၤဆီလိာ်အသး လီၤတံၢ်လီၤဆဲးလီၤ. လၢတၢ်န့ၣ်အဃိ ပမ့ၢ်မၤလိအီၤလီၤတံၢ်လီၤဆဲးန့ၣ် ပနာ်သ့သပှၢ်ကတၢၢ်လၢ ကကဲထီၣ်နီၢ်သး အတၢ်ထူးတၢ်တီၤလၢပဂီၢ်လီၤ. ပမ့ၢ်ထဲးဂံၢ်ထဲးဘါဒ်အံၤန့ၣ် ဘၣ်မနုၤအဃိ ကဲဘျုးဝဲလဲၣ်.
၁၇, ၁၈. ယွၤအသးစီဆှံ ကမၤစၢၤပှၤဒ်လဲၣ်.
၁၇ ယ့ၣ်ၡူးစံးဝဲလၢ ယွၤအသးစီဆှံန့ၣ် ကမၤစၢၤပှၤဒ်သိး ပကသ့ၣ်နီၣ်ထီၣ်က့ၤ တၢ်လၢပမၤလိတ့ၢ်တဖၣ် န့ၣ်လီၤ. (ယိၤဟၣ် ၁၄:၂၅, ၂၆) သးစီဆှံန့ၣ် မၤစၢၤပှၤလၢ ပတၢ်စံၣ်တဲၤတဲလီၤ တၢ်မၤအပူၤဒ်လဲၣ်. ပကကွၢ်သကိး ဒီပုၢ်ဝဲၢ်ဖံထၢၤ အတၢ်လဲၤခီဖျိလီၤ. ဖဲ ၁၉၇၀ န့ၣ် ဖံထၢၤအသးအိၣ် ၁၉ နံၣ်ဒီးအဝဲလဲၤအိၣ်ဘၣ်လၢ ကီၢ်ဘြံးတၢၣ်အဝဲၤတြၢ်န့ၣ်လီၤ. ဘၣ်တနံၤ ဖဲအလဲၤစံၣ်တဲၤတဲလီၤတၢ်အခါ ထံၣ်လိာ်အသးဒီး ပှၤတဂၤလၢအိၣ်ဒီးခၣ်ဆူၣ်ခၣ်ပွးလီၤ. ဖံထၢၤသံကွၢ်ဝဲ ပှၤတဂၤန့ၣ်လၢ မ့ၢ်အအဲၣ်ဒိးသ့ၣ်ညါအါထီၣ် လံာ်စီဆှံအဂ့ၢ်ဧါ. ဖဲအဝဲသံကွၢ်ဝဲဒ်အံၤအခါ ပှၤတဂၤအံၤကမၢကမၣ်ဝဲဒိၣ်မး ဒီးဆိကမိၣ်ဝဲလၢ ပှၤသးစၢ်တဂၤအံၤသိၣ်လိအီၤ တၢ်မနုၤကသ့လဲၣ်န့ၣ်လီၤ. ပှၤတဂၤအံၤမ့ၢ်ဝဲ ပှၤယူဒၤဖိအရၤဘံလီၤ. ဒီးအဝဲမၤကွၢ်ဖံထၢၤ ခီဖျိသံကွၢ်အီၤလၢ “မ့ၢ်ဒ်န့ၣ် ဖိဒိၣ်ခွါဧၢ, လံာ်ဒၤနံးယ့လးန့ၣ် ပှၤကွဲးအီၤလၢ မနုၤအကျိာ်လဲၣ်.” ဖံထၢၤစံးဆၢက့ၤအီၤလၢ အဆၢတနီၤန့ၣ် “ဘၣ်တၢ်ကွဲးအီၤလၢ ပှၤအၤရၣ်ဖိအကျိာ်လီၤ.” ဖံထၢၤသ့ၣ်နီၣ်ထီၣ်ဝဲလၢ သရၣ်တဂၤန့ၣ် ကမၢကမၣ်ဒိၣ်မး မ့ၢ်လၢဖံတၢၤ သ့ၣ်ညါဝဲတၢ်စံးဆၢအဃိလီၤ. “ယနီၢ်ကစၢ်ကမၢကမၣ်ဒိၣ်န့ၢ် သရၣ်တဂၤအံၤဒံးလီၤ. ယလဲၤသ့ၣ်ညါတၢ်စံးဆၢလၢ ကျဲဒ်လဲၣ်န့ၣ် ယတဲတဘၣ်ဘၣ်. ဖဲယက့ၤလၢဟံၣ်အခါ ယက့ၤကွၢ်ကဒါက့ၤလၢ တၢးထီခိးတၢ်ဒီးပၢၢ်ထီၣ် လၢပှၤထုးထီၣ်အီၤလၢ အပူၤကွံာ်စှၤလါအတီၢ်ပူၤန့ၣ်လီၤ. လၢလံာ်တဖၣ်အံၤအပူၤန့ၣ် ယထံၣ်ဘၣ်တၢ်ဂ့ၢ်တခါလၢ စီၤဒၤနံးယ့လးကွဲးဝဲလံာ်လၢ ပှၤအၤရၣ်ဖိအကျိာ်န့ၣ်လီၤ.” ယွၤအသးစီဆှံန့ၣ် မၤစၢၤပှၤလၢပကသ့ၣ်နီၣ်ထီၣ်က့ၤ တၢ်လၢပမၤလိတ့ၢ်သ့ၣ်တဖၣ်လီၤ. (လူၤကၣ် ၁၂:၁၁, ၁၂; ၂၁:၁၃-၁၅)
၁၈ ပမ့ၢ်အဲၣ်တၢ်မ့ၢ်တၢ်တီလၢ ယွၤသိၣ်လိပှၤတဖၣ်န့ၣ် ပကပာ်လုၢ်ပာ်ပှ့ၤအီၤ ဒီးဆဲးပာ်ဖှိၣ်အါထီၣ်အီၤလၢ ပတၢ်ပာ်ဖှိၣ်အလီၢ်န့ၣ်လီၤ. ပမ့ၢ်ဆဲးမၤဒ်အံၤန့ၣ် ပကအိၣ်ဒီးတၢ်သူၣ်ဆူၣ်သးဆူၣ် ဒ်သိးပကသိၣ်လိပှၤဂၤအဂီၢ်လီၤ.
ပၢၤဃာ်တၢ်လုၢ်ဒိၣ်ပှ့ၤဒိၣ်တက့ၢ်
၁၉. ဘၣ်မနုၤအဃိ ပကဘၣ်ဒီသဒၢ ပနီၢ်သးအတၢ်လုၢ်ဒိၣ်ပှ့ၤဒိၣ်တဖၣ်လဲၣ်.
၁၉ လၢတၢ်မၤလိအံၤအပူၤ ပမၤလိဘၣ်လၢ ပကဘၣ်ပၢၤဃာ် နီၢ်သးအတၢ်ထူးတၢ်တီၤန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ဘၣ်ဆၣ် မုၣ်ကီၤလံၢ်ဒီး ဟီၣ်ခိၣ်လၢ အပၢဝဲအံၤ ကမၤတံာ်တာ်ပှၤ ဒ်သိးပသုတပာ်လုၢ်ပာ်ပှ့ၤ နီၢ်သးအတၢ်ထူးတၢ်တီၤတဖၣ် လၢၤတဂ့ၤအဂီၢ်လီၤ. လၢတၢ်န့ၣ်အဃိ ပမ့ၢ်တပလီၢ်ပသးဘၣ်န့ၣ် ပကအဲၣ်ဒိးမၤတၢ်ဖံးတၢ်မၤလၢ အန့ၢ်ကျိၣ်န့ၢ်စ့အါအါ, ပကအဲၣ်ဒိးအိၣ်ဘီၣ်အိၣ်ညီ မ့တမ့ၢ် ပကပာ်ထီၣ်ထီသးခီဖျိ လၢပတၢ်ထူးတၢ်တီအိၣ်အါအါအဃိလီၤ. တၢ်မၢဖိယိၤဟၣ် ဟ့ၣ်ပလီၢ်ပှၤလၢ တယံာ်ဘၣ်န့ၣ် ဟီၣ်ခိၣ်ဒီးတၢ်အိၣ်လၢအပူၤတဖၣ် ကဟါမၢ်ကွံာ်ခဲလၢာ်လီၤ. (၁ ယိၤဟၣ် ၂:၁၅-၁၇) လၢတၢ်န့ၢ်အဃိ ပကဘၣ်ပာ်လုၢ်ပာ်ပှ့ၤ ပနီၢ်သးအတၢ်ထူးတၢ်တီၤဒီး ဒီသဒၢအီၤလီၤ.
၂၀. နကဒီသဒၢနနီၢ်သး အတၢ်ထူးတၢ်တီၤအဂီၢ် မ့ၢ်နပာ်လီၤနသး ဂၢၢ်ဂၢၢ်ကျၢၤကျၢၤဒ်လဲၣ်.
၂၀ ဆၢကတီၢ်ခဲအံၤ တၢ်လၢကမၤစှၤလီၤ ပတၢ်အဲၣ်ယွၤအဘီအမုၢ်န့ၣ် ပကဘၣ်ပာ်တ့ၢ်ကွံာ်အီၤ တဘျီဃီလီၤ. အိၣ်ဒီးတၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤတက့ၢ်. တဘၣ်ပျဲလီၤစၢ်နသးလၢ တၢ်စံၣ်တဲၤတဲလီၤတၢ်မၤအဂီၢ်တဂ့ၤ. နမ့ၢ်မၤဒ်န့ၣ်န့ၣ် မ့ၢ်ဒၣ်နပာ်ဖှိၣ် န “တၢ်လုၢ်ဒိၣ်ပှ့ၤဒိၣ်လၢ အလၢာ်တသ့ဘၣ်လၢမူခိၣ်, ဖဲတၢ်ဘျၣ်တသုးဘူးဘၣ်အသးဘၣ် ဒီးတၢ်အဃၢ်တအီၣ်ဘၣ်” အီၤဘၣ်န့ၣ်လီၤ. ဒီး “ဖဲသုတၢ်လုၢ်ဒိၣ်ပှ့ၤဒိၣ်အိၣ်ဝဲအလီၢ်န့ၣ် သုသးကအိၣ်ဝဲဖဲန့ၣ်လီၤ.”—လူၤကၣ် ၁၂:၃၃, ၃၄.
