1, 2. (a) Sit trwa trezor spiritiel ki Zeova partaz avek nou. (b) Ki nou pou aprann dan sa lartik-la?

ZEOVA se Personaz pli ris ki existe dan liniver. Tou kitsoz pou Li. (1 Kronik 29:11, 12) Me selman, Li bien zenere ar tou dimounn. Nou bien rekonesan ki Li finn partaz boukou trezor spiritiel avek nou, pa vre? Ki sa bann trezor-la sa? Par exanp, ena (1) Rwayom Bondie, (2) nou minister, ek (3) bann verite ki ena boukou valer ki trouv dan so Parol. Me si nou pa fer atansion, avek letan, nou kapav bliye valer ki sa bann trezor-la ena. Nou bizin kontign rapel valer ki zot ena ek ogmant nou lamour pou sa bann trezor-la, parski Zezi ti dir: “La kot zot trezor ete, lamem zot leker pou ete.”—Lik 12:34, NW.

² Anou gete kouma nou kapav ogmant nou lamour ek nou rekonesans pou Rwayom Bondie, pou nou minister, ek pou laverite. Ek amezir ki nou fer sa, medit lor to sitiasion pou gete kouma to kapav ogmant to lamour pou sa bann trezor spiritiel la.

3. Dan zistwar ki Zezi ti rakonte, ki sa misie-la ti dispoze fer pou aste enn perl?

³ Lir Matie 13:45, 46. Zezi ti rakont zistwar enn misie ki ti aste ek vann bann perl. Enn zour, sa misie-la ti trouv enn perl ki ti ena boukou plis valer ki tou bann perl ki li’nn trouve dan so lavi. Li ti telman anvi gagn sa perl-la, ki li ti vann tou seki li ti ena pou aste li. Sey mazine ki kantite sa perl-la ti ena boukou valer pou li!

4. Ki nou dispoze fer pou Rwayom Bondie?

⁴ Ki leson nou kapav aprann lor zistwar ki Zezi ti rakonte? Nou aprann ki laverite lor Rwayom Bondie li kouma sa perl ki ena enn gran valer la. Si nou kontan Rwayom Bondie parey kouma sa misie-la ti kontan so perl, nou pou dispoze pou abandonn tou pou vinn ek pou res bann sitwayen Rwayom Bondie. (Lir Mark 10:28-30.) Anou get lexanp de dimounn ki ti dispoze fer sa.

5. Ki Zashe ti dispoze fer pou Rwayom Bondie?

⁵ Zashe ti enn kikenn ki ti ramas tax. Li ti vinn bien ris parski li ti manday boukou dimounn. (Lik 19:1-9) Me enn zour, Zashe ti tann Zezi koz lor Rwayom Bondie. Li ti telman kontan seki li ti tande, ki li ti anvi sanze net. Li ti dir: “Ekout mwa, Segner. Mo pou donn lamwatie mo dibien bann pov; e si mo finn kokin dimoun, mo pou rann zot kat fwa plis.” Zashe ti rann larzan ki li ti pran ar bann dimounn ek li ti aret gourma kas.

6. Ki sanzman enn fam ti fer, ek kifer li ti fer sa?

⁶ Ena plizir lane, enn fam ti tann koz lor Rwayom Bondie. Sa lepok-la, li ti enn lesbienn ek li ti ena enn kikenn dan so lavi. Li ti osi prezidan enn lorganizasion ki ti lager pou drwa bann omosexiel. Me amezir ki li ti etidie Labib ek li ti konpran valer ki Rwayom Bondie ena, li ti realize ki li ti bizin fer bann gran sanzman dan so lavi. (1 Korintien 6:9, 10) So lamour pou Zeova ti fer li kit sa lorganizasion-la ek rezet bann pratik omosexiel. Li ti pran batem an 2009, ek lane apre li ti vinn enn pionie permanan. Li ti fer sa bann gran sanzman-la parski so lamour pou Zeova ti pli for ki bann dezir inpir ki li ti ena.—Mark 12:29, 30.

7. Kouma nou kapav kontign ena enn lamour bien for pou Rwayom Bondie?

⁷ Pou vinn bann sitwayen Rwayom Bondie, boukou parmi nou finn bizin sanz zot lavi net. (Romin 12:2) Me nou bizin kontign lite. Fode pa nou les nanye diminie lamour ki nou ena pou Rwayom Bondie, kouma par exanp, lamour pou bann kitsoz materyel ouswa ninport ki dezir sexiel imoral. (Proverb 4:23; Matie 5:27-29) Pou nou kapav kontign ena enn lamour bien for pou Rwayom Bondie, Zeova finn donn nou enn lot gran trezor.

8. (a) Kifer Pol ti dekrir nou minister parey kouma enn ‘trezor dan bann resipian later’? (b) Kouma Pol ti montre ki li ti kontan so minister?

⁸ Zezi ti donn nou responsabilite pou pres ek pou ansegn bon nouvel lor Rwayom Bondie. (Matie 28:19, 20) Lapot Pol ti dekrir so minister kouma enn trezor ki dan bann resipian ki fer ar later, ouswa ar larzil. (2 Korintien 4:7; 1 Timote 1:12) Parski nou bann dimounn inparfe, nou parey kouma sa bann resipian larzil la. Me mesaz ki nou anonse li kouma enn trezor ki ena enn gran valer parski li kapav fer nou ek bann dimounn ki ekout nou, gagn lavi pou touletan. Se pou sa rezon-la ki Pol ti dir: “Mo fer tou kitsoz akoz bonn nouvel, pou ki mo kapav partaz sa avek lezot.” (1 Korintien 9:23, NW.) Pol ti fer boukou zefor pou ansegn lezot lor Rwayom Bondie. (Lir Romin 1:14, 15; 2 Timote 4:2, NW.) So lamour pou bonn nouvel ti ed li pou kontign prese malgre bann gran persekision ki li ti gagne. (1 Tesalonisien 2:2) Kouma nou kapav ena mem lamour ki Pol ti ena pou so minister?

9. Dan ki diferan fason nou kapav montre nou lamour pou nou minister?

⁹ Enn fason ki Pol ti montre so lamour pou so minister se kan li ti profit tou lokazion ki li ti gagne pou prese. Parey kouma Pol ek bann lezot Kretien dan premie siek, nou osi nou partaz bonn nouvel ar bann dimounn kan nou prese lakaz-lakaz, dan bann landrwa piblik, ek ninport kotsa nou kapav zwenn zot. (Zistwar Bann Apot 5:42; 20:20) Nou rod diferan fason pou pres avek maximum dimounn posib. Si nou kapav, kitfwa nou pou fer pionie tanporer ouswa permanan. Ouswa nou kapav aprann enn lot lang, demenaze pou al servi dan enn lot landrwa dan nou pei, ouswa mem dan enn lot pei.—Zistwar Bann Apot 16:9, 10.

10. Gras-a bann gran zefor ki Irene ti fer pou partaz bonn nouvel, ki bon rezilta li’nn gagne?

¹⁰ Irene, enn ser selibater ki res dan l’États-Unis, ti anvi pres bonn nouvel ar bann dimounn ki koz lang ki koze dan la Russie. Alor, an 1993, li ti al dan enn group ki koz sa lang-la dan lavil New York. Sa lepok-la, ti ena apepre 20 proklamater dan sa group-la. Asterla, sa fer plis ki 20 an ki Irene pe pres dan sa lang-la ek li dir: “Mo touzour pa kapav koz bien lang Ris.” Pourtan, Zeova finn ed li ek bann lezot proklamater pou pres ar bann dimounn dan sa lang-la. Rezilta? Zordi ena sis kongregasion lang Ris dan lavil New York. Irene ti etidie Labib ar boukou dimounn, ek 15 parmi zot inn pran batem. Sertin parmi zot pe servi kouma Betelit, pionie, ek ansien. Irene dir: “Kan mo pans lor bann lezot lobzektif ki mo ti kapav fixe, pena okenn ki ti  kapav fer mwa gagn plis lazwa.” Irene vremem kontan so minister!

11. Ki rezilta nou gagne kan nou kontign prese malgre persekision?

¹¹ Si nou kontan nou minister, nou pou parey kouma lapot Pol ek nou pou kontign prese mem si nou gagn persekision. (Zistwar Bann Apot 14:19-22) Se seki ti ariv nou bann frer dan l’États-Unis ant 1930 ek 1944. Zot ti gagn boukou persekision me zot ti kontign prese. Kan gouvernman ti rod anpes zot prese, nou bann frer ti al devan lakour ek ti gagn viktwar dan boukou case. An 1943, Frer Knorr ti rakont enn viktwar ki nou ti gagne dan Lakour Siprem l’États-Unis. Li ti dir ki pa ti pou ena okenn case pou defann devan sa Lakour-la, si bann frer pa ti kontign prese. Li ti osi dir ki, parski bann frer ek ser ti pe kontign prese partou dan lemond, sa montre ki persekision pa ti ena lefe lor zot. Bann frer dan lezot pei ki ti ena bann case koumsa pou defann ti gagn viktwar zot osi. Wi, nou lamour pou nou minister pa pou fer nou aret prese mem si ena persekision!

12. Ki to bien deside pou fer?

¹² Si nou minister ena valer pou nou, nou pa pou prese zis pou donn enn rapor. Nou pou fer tou seki nou kapav pou rann enn “temwaniaz afon lor bon nouvel.” (Zistwar Bann Apot 20:24, NW; 2 Timote 4:5) Me ki kitsoz nou pou ansegn lezot? Anou get enn lot trezor ki Bondie finn donn nou.

13, 14. Ki ete sa “stor kot met bann trezor” ki Zezi ti mansione dan Matie 13:52, ek kouma nou kapav ranpli li?

¹³ Trwaziem trezor ki Zeova finn donn nou, se tou bann verite Biblik ki nou finn aprann. Zeova Limem Lasours laverite. (2 Samiel 7:28; Psom 31:5) Li osi enn Papa ki bien zenere. Akoz sa, Li anvi partaz  sa bann verite-la avek nou. Nou finn aprann sa bann verite-la kan nou finn lir Labib ek bann piblikasion, ek kan nou finn asiste bann lasanble, ek bann renion sak semenn. Amezir ki nou aprann pli boukou verite Biblik, nou gagn seki Zezi ti apel enn “stor kot met bann trezor” ek ladan, ena bann verite ki “nouvo” ek ki “vie.” (Lir Matie 13:52, NW.) Zeova pou ed nou pou ranpli nou “stor kot met bann trezor” si nou rod bann verite dan mem fason ki nou ti pou rod bann trezor ki’nn kasiet. (Lir Proverb 2:4-7. *) Kouma nou kapav fer sa?

¹⁴ Nou bizin etidie Labib ek nou bann piblikasion regilierman, ek fer bann resers an profonder. Sa pou ed nou pou dekouver bann “nouvo” verite, setadir bann verite ki nou pa ti kone avan. (Zozwe 1:8, 9; Psom 1:2, 3) Premie nimero Latour Degard ki ti paret an Ziliet 1879, ti konpar laverite ar enn fler ki kasiet parmi enn kantite lerb. Pou reisi trouv enn fler koumsa, enn dimounn bizin fer boukou zefor pou rod li. Ek kan li’nn gagn fler-la, fode pa li kontant li zis ar enn sel fler. Li bizin kontign rode ziska li gagn pli boukou fler. Dan mem fason, fode pa nou kontant nou zis ar enn sel verite ki nou’nn dekouver. Nou bizin ena enn gran dezir pou rod ankor pli boukou verite Biblik.

15. Kifer nou kapav konsider sertin verite kouma bann “vie” verite? Parmi sa bann verite-la, lekel ena plis valer pou twa?

¹⁵ Kan nou ti koumans etidie Labib, nou ti aprann enn kantite verite extraordiner. Nou kapav konsider zot kouma bann “vie” verite parski nou finn aprann zot an premie. Ki sa bann vie verite-la sa? Par exanp, nou ti aprann ki Zeova Li nou Kreater ek ki Li ena enn proze pou bann dimounn. Nou ti aprann osi ki Li ti avoy so Garson lor later pou donn so lavi an sakrifis pou ki nou kapav libere ar pese ek lamor. Ek nou ti aprann ki Rwayom Bondie pou tir tou soufrans ek nou pou kapav viv pou touletan lor enn later kot pou ena lape ek boner.—Zan 3:16; Revelasion 4:11; 21:3, 4.

16. Ki nou bizin fer kan ena bann sanzman dan fason ki nou konpran bann verite Biblik?

¹⁶ Parfwa, kapav ena bann sanzman dan fason ki nou konpran enn profesi ouswa enn verse Biblik. Kan sa arive, li inportan ki nou pran letan pou etidie sa sanzman-la ek medit lor la. (Zistwar Bann Apot 17:11; 1 Timote 4:15) Nou bizin bien konpran bann gran diferans ki ena ant ansien ek nouvo fason ki nou ti konpran enn verite. Me, nou bizin osi pran kont bann ti detay ki ena dan nouvo fason ki nou konpran sa verite-la. Kan nou etidie an profonder koumsa, sa nouvo verite-la pou form parti dan nou koleksion bann verite Biblik. Kifer li bon ki nou fer sa zefor-la?

17, 18. Kouma lespri sin kapav ed nou?

¹⁷ Zezi ti ansegne ki lespri sin Bondie kapav ed nou pou rapel bann kitsoz ki nou finn aprann dan lepase. (Zan 14:25, 26) Kouma sa kapav ed nou kan pe pres bonn nouvel? Anou gete seki ti ariv enn frer ki apel Peter. An 1970, li ti ena 19 an ek li ti fek koumans so servis dan  Béthel l’Angleterre. Peter ti pe pres lakaz-lakaz ek li ti zwenn enn misie ki ti ena enn labarb ek ki ti ena anviron 50 an. Li ti demann misie-la si li ti pou kontan konpran Labib. Sa misie-la ti enn rabin Zwif, ek li ti gagn sok parski enn zenes ti panse ki li ti pou kapav ansegn li Labib. Sa misie-la ti anvi teste Peter. Li ti demann Peter: “Alor mo garson, dan ki lang liv Daniel inn ekrir?” Peter ti reponn: “Enn parti sa liv-la inn ekrir an Arameen.” Rabin-la ti etone ki Peter ti konn sa repons-la. Me Peter ti plis etone ki li. Peter dir: “Me kouma mo ti konn sa repons-la mwa? Kan mo ti rant lakaz, mo ti al verifie dan bann dernie nimero Latour Degard ek Réveillez-vous ! ek mo ti trouv enn lartik ki ti explike ki liv Daniel ti ekrir an Arameen.” (Daniel 2:4, NW, not) Wi, lespri sin kapav ed nou pou rapel bann kitsoz ki nou finn lir dan lepase ek ki nou finn met dan nou “stor kot met bann trezor.”—Lik 12:11, 12; 21:13-15.

¹⁸ Si nou kontan bann verite ki nou aprann ar Zeova ek ki nou ena rekonesans pou zot, nou pou anvi kontign azout zot dan nou “stor kot met bann trezor.” Plis nou fer sa, plis nou pou santi nou pare pou ansegn lezot.

19. Kifer nou bizin protez nou bann trezor spiritiel?

¹⁹ Dan sa lartik-la, nou finn aprann kouma li inportan ki nou akord enn gran valer nou bann trezor spiritiel. Me nou bizin fer bien atansion pou pa les Satan ek so lemond diminie lamour ki nou ena pou sa bann trezor-la. Si nou pa fer atansion, nou riske les nou detourne par bann kitsoz kouma par exanp, promes pou gagn enn travay kot gagn boukou larzan, dezir pou amenn enn lavi bien konfortab, ouswa lanvi pou fer letalaz ar nou bann dibien materyel. Lapot Zan rapel nou ki sa lemond-la ek tou seki li ofer pou disparet biento. (1 Zan 2:15-17) Se pou sa rezon-la ki nou bizin kontign ena rekonesans pou nou bann trezor spiritiel ek protez zot.

20. Ki to bien determine pou fer pou protez to bann trezor spiritiel?

²⁰ Res determine pou rezet tou kitsoz ki kapav diminie to lamour pou Rwayom Bondie. Pres avek zel ek zame pa perdi to lamour pou to minister. Kontign rod bann verite Biblik. Kan to fer sa, to pou ogmant to “trezor dan lesiel, kot okenn voler pa kapav vini, ni okenn ti bebet pa kapav manze. Parski la kot to trezor ete, lamem to leker osi pou ete.”—Lik 12:33, 34, NW.