1, 2. (a) I upfumi hwapi huno mutengo mukuru hunobva kuna Jehovha? (b) Ticajijenyi pa musoro uu?

JEHOVHA ndi Mukhupuki mukuru maningi mugore no pasi. Zviro zvese mbzake. (1 Kronike 29:11, 12) Jehovha anokova maningi ku vese. Tinobonga maningi ngokuti Jehovha wakatipa upfumi huzinji. Ngohwapi upfumi hwakona? Hunobatanija (1) Umambo hwa Mwari, (2) basa redu ro kucumaira, no (3) zvokadi zvino mutengo mukuru zviri mu Soko rake. Asi kudari tikatama kungwarira, pa kufamba ko nguva tingazokanganwa kuti zvokadi izvi zvino mutengo mukuru maningi. Tinodikana kuramba tecijiceuja mutengo wazvo no kukurisa rudo hwedu kozviri, ngokuti Jesu wakananga kuti, “pano upfumi hwenyu, pondhopo ngopano mwoyo wenyu.”—Luka 12:34.

² Ngativone kuti tingarambisa kudini tino rudo hwakavanga no kubongesera kwakavanga kuno Umambo, basa ro kucumaira no ku cokwadi. Potinovona izvi, rangarijiranyi kuti mungakurisa kudini rudo hwenyu mwega ku upfumi hwo kumujimu uhu.

3. Mwanarume wo pa ndhorondho ya Jesu waida kuitenyi kuitira kuti atenge usanga humwe basi? (Vonanyi pikica yo kutanga.)

³ Verenganyi Mateu 13:45, 46. Jesu wakasumura ndhorondho ngo pamusoro po mwanarume waitenga no kutengesa usanga. Njiku imweni wakawana usanga hwaenga no mutengo mukuru kupinda hwese hwaainga avona. Mwanarume uu wakahudisisa maningi zvokuti wakatengesa zvese zvaainga nazvo kuti ahutenge. Munokwanisa kurangarira kuti usanga hwondohwo hwainga no mutengo wakadini kwaari here?

4. Tinoda kuitenyi ngo ndava yo Umambo?

⁴ Tinojijenyi ngo ndhorondho ya Jesu? Cokwadi co Umambo hwa Mwari cakaezana no usanga uhwo, hwo mutengo mukuru. Kudari tinoda Umambo inga huno mutengo mukuru kupinda usanga hwo mutengo mukuru, tinozoda kuruza zviro zvese kuitira kuti tirambe tiri vatongwi vo Umambo uhwo. (Verenganyi Marco 10:28-30.) Ngativone kuti vandhu vaviri vamweni vakazviitisa kudini.

5. Zakeu wakada kuitenyi ngo ndava yo Umambo?

⁵ Zakeu wainga mushabisi. Iyena wakakhupuka ngo kutorera vandhu mare. (Luka 19:1-9) Asi njiku imweni, Zakeu wakazwa Jesu ecibhuya ngo pamusoro po Umambo. Iyena wakazvidakarira maningi zvokuti wakacinja kamare upenyu hwake. Iyena wakati: “Tenji, ndinopa vamasikini bindikati ro upfumi hwangu. Kudarivo ndakaxaixa ciricese ku mundhu, ndinomuhwirijira rurongomuna.” Zakeu wakahwirija mare yaakatorera vandhu zve wakaregera kuda kuva no makaro.

6. Icinjo japi jakaitwa ngo mwanakaji umweni, zve ngenyi wakajiita?

⁶ Mwanakaji umweni wainga pa rovorano yo mwanakaji no mwanakaji, paakazwa ngo pamusoro po Umambo makore manganani apera. Iyena waingazve mutungamiriri wo cimwe cizwirano caihwira zvitendehwa zvo kurovorana ko mwanarume no mwanarume, mwanakaji no mwanakaji. Asi paaijija Bhaibheri no kuziva mutengo wo Umambo hwa Mwari, wakavona kuti waidikana kuita cinjo jakakura mu upenyu hwake. (1 VaKorinto 6:9, 10) Mwanakaji uu wakasiya cizwirano ciya zve wakapeja rovorano no mwanakaji waaigara naye. Wakabhabhatijwa mu gore ro 2009, zve gore rakatevera, wakava piyona wo nguva jese. Wakaita cinjo huru jakadari ngokuti rudo hwake kuna Jehovha hwaivanga kupinda zvido zvakashata zvaainga nazvo.—Marco 12:29, 30.

7. Tingarambisa kudini tino rudo hwakavanga ku Umambo hwa Mwari?

⁷ Uzinji hwedu takatocinja kamare maponero edu kuitira kuti tive vatongwi vo Umambo hwa Mwari. (VaRoma 12:2) Asi kuhwa kwedu akuzivi kupera. Atidikani kutendera kuti rudo hwedu ku Umambo hurembeswe ngo ciricese, cakadari inga kuda zviro zvo  kunyama kana cido ciricese co zvovatano yakashata. (Mazwi Akangwara 4:23; Mateu 5:27-29) Jehovha wakatipa upfumi humweni hwo mutengo mukuru kuitira kutibesera kuti tirambe tino rudo hwakavanga ku Umambo hwa Mwari.

8. (a) Ngenyi mupostori Pauro wakadanija basa ro kucumaira no kujijisa kuva upfumi huri mu “mbende”? (b) Pauro wakakhombijisa kudini kuti wairida basa iri?

⁸ Jesu wakatipa basa ro kucumaira no kujijisa masoko akanaka ngo pamusoro po Umambo hwa Mwari. (Mateu 28:19, 20) Mupostori Pauro wakasanangura kuti basa ro kucumaira no kujijisa inga upfumi huri mu mbende kana zvijuvi zvo matope. (2 VaKorinto 4:7; 1 Timoti 1:12) Ngo ndava yokuti atizivi kukwana, takaezana no zvijuvi zvo matope. Asi masoko otinocumaira akaezana no upfumi hwo mutengo mukuru ngokuti anoviisa upenyu hucikaperi kotiri no kuna vaya vanotizwa. Ngo zvakaitisa Pauro anange kuti ‘ndinoita bzese ibzi ngo ndava yo vangeri; kuti ndifanere kukovanisa bzakanaka bzaro.’ (1 VaKorinto 9:23) Pauro wakashanda ngo simba kuti ajijise vamweni ngo pamusoro po Umambo hwa Mwari. (Verenganyi VaRoma 1:14, 15; 2 Timoti 4:2.) Rudo hwake ku masoko akanaka hwakamubesera kuti arambe acicumaira pikija waiteverehwa zvakashata maningi. (1 VaTesalònika 2:2) Tingatevejeresa kudini muezaniso wa Pauro wo kuda basa ro kucumaira no kujijisa?

9. Ngojapi njira jimweni jotingakhombija ndijona kuti tinoda kucumaira no kujijisa?

⁹ Njira imwe yaakakhombija ndiyona Pauro kuti waida basa ro kucumaira no kujijisa ngo yokushandisa mukana uriwese kuti abhuye no vamweni. Mukufanana na Pauro no maKristu o kutanga, tinocumairavo masoko akanaka nyumba ngo nyumba, mu ndau jo pambhene no kurikwese hako kotingawana vandhu. (Maitiro o Vapostori 5:42; 20:20) Tinopsaka njira jo kucumaira ndijona ku vandhu vakawanda. Kudari ticikwanisa, tingashanda inga piyona wo besero kana wo nguva jese. Kana tingajija ndimi imweni, kuenda ku ndharaundha imweni yo mu nyika yedu, kana kutoenda ku nyika imweni.—Maitiro o Vapostori 16:9, 10.

10. Irene wakabesereka kudini ngo kucumaira ngo kuvangisira kwese?

¹⁰ Imwe hambzaji icizivi kucada inodanijwa Irene, yo Estadhos Unidhus, yaidakarira kucumaira masoko akanaka ku vandhu vanovereketa ciRusia. Ngokudaro, yakabata no cikwata caibhuya ciRusia mu Dhorobha ro Novha Yorki, mu gore ro 1993. Cikwata ico pa mukuvo wondhowo, cainga no vacumairi vanokwana 20 basi. No padarika 20 o makore, Irene wakananga kudari: “Andito ndovereketa ushoni ciRusia.” Asi, Jehovha waindomubesa no vacumairi vamweni kuti vacumaire vandhu vanovereketa  ndimi yondhoyo. Inga muviyo, ku Dhorobha ro Novha Yorki kuna ungano ndhandhatu jo ciRusia nyamasi uno. Irene wakajija Bhaibheri no vandhu vakawanda, 15 vavo vakabhabhatijwa. Vamweni vakona vari kushandira ku Bheteri, vamweni inga mapiyona zve vamweni inga vakuru vo ungano. Irene wakati: “Pondinorangarija ngo pamusoro po zvido zvimweni zvondaizoteveja, andikwanisi kuvona na cimwe haco caizondiviisira mudakaro.” Irene anoreremeja maningi kucumaira no kujijisa.

11. Ngojapi muviyo jotinowana tikaenderera mberi ticicumaira pikija no ticiteverehwa?

¹¹ Kudari tecivona kucumaira no kujijisa kuva upfumi, tinozoezana no mupostori Pauro, toenderera mberi ticicumaira pikija potinoteverehwa. (Maitiro o Vapostori 14:19-22) Inga muezaniso, hama jedu jaiteverehwa maningi ku Estadhos Unidhus, pakati po makore o 1930 no 1944. Asi ajizivi kuregera kucumaira. Utongi pohwaieja kurambisa, hama jedu jakaenda kokeshari ku tiribhunari zve jakawina ndhango jakawanda. Mu gore ro 1943, Hama Knorr vakananga ngo kuwina kumwe kotakaita ku Tiribhunari Huru yo Estadhos Unidhus. Vakananga kuti apacaizova no ndhango yaizoendeswa ku Tiribhunari iyi kudari hama jakaregera kucumaira. Vakanangazve kuti ngokuti hama jo pasi pese jiri kuramba jecicumaira, jiri kukhombija kuti vatevereri avaripi kubudirira. Hama jo nyika jimweni jakawinavo ndhango jo zvo mutemo jakaezana na iji. Hina, rudo hwedu ku basa ro kucumaira no kujijisa ahutenderi kuti kuteverehwa kutiregerese kucumaira.

12. Matema civaringo co kuitenyi?

¹² Potinoreremeja basa iri inga upfumi, atizokayakayi basi ngokuti tinozotara ora ngana pa ripoti. Tinozoita zvese zvotinokwanisa kuti tipe ucapupu hwakaperera hwo “masoko akanaka.” (Maitiro o Vapostori 20:24; 2 Timoti 4:5) Waro tinozojijisenyi vamweni? Ngativone upfumi humweni hunobva kuna Mwari.

13, 14. “Mu upfumi” makanangwa ndi Jesu pa Mateu 13:52 i cinyi, zve tingamuzajisa kudini?

¹³ Upfumi hwocitatu hwaakatipa Jehovha ngo hwo zvokadi zvese zvotakajija. Jehovha ndi Cinyuke co cokwadi. (2 Samueli 7:28; Nduyo 31:6) Inga Baba vanokova, anoda kuti tizivevo zvokadi izvi. Mbhera wari, tajija zvokadi zvakawanda ngo kuverenga Soko rake no mabhuku edu zve ngo kuenda ku magungano o mutundhu, o ndharaunda no mungano jo bviki ngo bviki. Potinosengerera zvokadi zvakawanda maningi, tinozova no zvakadanijwa ndi Jesu kuti “mu upfumi” hwo zvokadi “bzipsa no bzo kare.” (Verenganyi Mateu 13:52.) Jehovha anozotibesera kuti tizaje “mu upfumi” medu kudari tinopsaka zvokadi inga mapsakiro otaizoita upfumi hwakavigika. (Verenganyi Mazwi Akangwara 2:4-7.) Tingazviitisa kudini?

¹⁴ Tinodikana kujija Bhaibheri, mabhuku edu no kupsakisisa mukuvo wese. Izvi zvinozotibesera kuti tipfumbure zvokadi “bzipsa,” zvoticaiziva. (Joxwa 1:8, 9; Nduyo 1:2, 3) Mujeura wo kutanga wo Murindiri, wakabudiswa mu mweji wa Khunguru wo 1879 ngo Cingezi, wakaezanisa cokwadi no ruva rakafukijirika ngo sakuro zinji. Kuti mundhu awane ruva rakadaro, anodikana kuripsakisisa ushoni. Paanoriwana, acaizodakara ngo kuwana rimwe basi. Waizoenderera mberi acipsaka kuti awane maruva akawanda maningi. Ngo njira yakafanana, atidakari potinowana cokwadi cimwe basi. Tinova no cidaka-daka co kuramba tecipsakisisa zvokadi zvakawanda.

15. Ngenyi tingadanija zvokadi zvimweni kuti “bzo kare,” zve i cokwadi capi comunoreremeja maningi?

¹⁵ Potakatanga kujija Bhaibheri, takaziva zvokadi zvinodakajisa. Tinozvidanija kuti zvokadi “bzo kare” ngokuti ngo zvotakatanga kuziva. Ngozvapi zvimwe zvakona? Pa kutanga takajija kuti Jehovha ndi Musiki wedu zve ano cidisiso no vandhu. Takajijazve kuti Mwari wakatuma Mwana wake pasi pano inga muripo wo kujipira kuitira kuti tisujunuke pa ushaishi no rufu. Zve takajija kuti Umambo hwa Mwari hunozopeja matambujiko ese zve tinozopona kwenda no kwenda tina runyararo no mudakaro.—Johani 3:16; Apokalipsi 4:11; 21:3, 4.

16. Ngozvapi zvotinodikana kuita pakaitwa cinjo yo kuzwisisa kwedu zvokadi zvo Bhaibheri?

¹⁶ Kuzwisisa kwedu uphorofita hwo Bhaibheri kana imwe vhesi nguva jimweni kungacinjwa. Pozvinoitika, tinodikana kutora mukuvo kuti tijije zvacinjwaro no kuzvirangarijira. (Maitiro o Vapostori 17:11; 1 Timoti 4:15) Atidikani kuzwisisa basi musiyano mukuru uri pakati po kuzvisisa kokare no kupsa, asi tinodikanazve kupurukirisisa cimwe nga cimwe co zvinobatanijwa pa kuzwisisa kupsa. Kujija no ubhasopa kwakadaro kunotinyindisa kuti cokwadi cipsa ciri kuva divi ro zvokadi zvotiri kuhengera. Ngenyi zvakanaka kotiri kuti tivangisire kudaro?

17, 18. Mujimu mucena unotibesesa kudini?

¹⁷ Jesu wakajijisa kuti mujimu wa Mwari unotibesera kuceuja zviro zvotakajija. (Johani 14:25, 26) Ungatibesesa kudini potinonga ticicumaira masoko akanaka? Vonanyi zvakaitika no hama inodanijwa kuti Pita. Mu gore ro 1970, wainga no makore 19 zve wainga wabva kutanga  kushandira pa Bheteri ku Graa-Bheretanya. Pita waicumaira nyumba ngo nyumba zve wakawanana no mwanarume ano ndebvu, ano ndanga iri pakati po 40 no 60 o makore. Iyena wakabvunjisa si mwanarumewo waida kuzwisisa Bhaibheri. Mwanarumewo wainga rabhi wo ciJudha zve aazivi kuzvitenda kuti waizojijiswa Bhaibheri ngo mujaha. Kuti aeje Pita, rabhi uu wakamubvunjisa kudari: “Mufanewe, bhuku ra Dhanieri rakatahwa ngo ndimi yapi?” Pita wakadavira kuti “divi ravo rakatahwa ngo ciAramaiko.” Pita anoceuja eciti: “Rabhi wiya wakakahamara ngokuti ndaiuziva mupinguro. Asi inini ndakakahamara maningi kupinda iyena! Ndakauzivisa kudini mupinguro? Pondakaenda kumuzi, ndovona marevhista Murindiri no Mukai! kubvira o mweji jo sure, ndakawana musoro umwe unodurujira kuti bhuku ra Dhanieri rakatahwa ngo ciAramaiko.” (Danieli 2:4) Hina, mujimu mucena unotibesera kuti ticeuje masoko otakaverenga no kuadira kare mu upfumi hwedu.—Luka 12:11, 12; 21:13-15.

¹⁸ Kudari tinoda zvokadi zvotinojija zvicibva kuna Jehovha zve tiri kubonga ngo ndava yazvo, tinozoda kuramba ticizviengejera mu upfumi hwedu. Patinoramba teciita kudaro, tinoendereravo mberi tecijizwa kunasiririka kuti tijijise vamweni.

19. Ngenyi tinodikana kujivirira upfumi hwedu hwo kumujimu?

¹⁹ Pa musoro uu, tajija kuti kureremeja upfumi hwo kumujimu kunosisira maningi kotiri. Tinodikana kungwarira ushoni kuti titame kutendera kuti Sathana no nyika ino zvirembese rudo hwotinahwo no upfumi uhu. Kudari tikatama kungwarira, tinozokangaijwa ngo zviro zvakadari inga cipikihwa co kuwana basa rinowanisa mare yakawanda, murangariro wo kuva no upenyu hwo kugarisika no cido co kutatija zviro zvo kunyama zvotinazvo. Mupostori Johani wakaticeuja kuti nyika ino no zvese zvainopa, zvinozopera sasambi. (1 Johani 2:15-17) Ngo iyo ndava kuti tinodikana kuramba tecibonga ngo upfumi hwedu hwo kumujimu no kuhujivirira.

20. Matema civaringo co kuitenyi kuitira kujivirira upfumi hwenyu hwo kumujimu?

²⁰ Ivanyi no cido co kuregera ciricese cingarembesa rudo hwomunahwo no Umambo hwa Mwari. Temanyi civaringo co kucumaira ngo kuvangisira zve mucaruza rudo hwomunahwo no basa ro kucumaira no kujijisa. Rambanyi mucipsaka zvokadi zvo Bhaibheri. Pomunoita izvi, munoengejera “upfumi ucingaperi mugore, mucikagumi mbava, honye aifunthi. Ngokuti pano upfumi hwenyu, pondhopo ngopano mwoyo wenyu.”—Luka 12:33, 34.