1, 2. (1) Muhakhu taani wasisapo onarweela wa Yehova? (2) Tiheeni nnaalaahu othokororya mmwaha yoola?

YEHOVA Mulipa ooreela a elapo yoothene. Ichu soothene ti sawawe. (1 Matharihelo 29:11, 12) Nyenya Yehova mulipa oovaha wa oothene ahu. Ninnatepa othamalela woona wi onnanivaha muhakhu muncipale woomunepani! Muhakhu owo woomunepani onavolowela (1) Omwene wa Muluku (2) Muteko ahu woolaleerya, ni (3) iparipari sasisapo inaphwanyeya mu Masu awe. Nyenya naahiikasoopa, veelukuluku aya nnahaala ocuwala esisapo ya muhakhu owo. Ti woochuneya otitelela wuupuwelelaka esisapo aya ni waaceererya osivela wahu muhakhu yoowo nthowa nawi Yesu aahiloca “wi oriwo muhakhu anyu, t’oriwo murima anyu.”—Luka 12:34.

² Hankooni vano nthokororye mukhalelo nneeraahu ntitelele olipiha osivela ni othamalela wahu Omwene, muteko woolaleerya ni eparipari. Vaavaa nnathokororyaahu, muupuwelele mukhalelo muneeraanyu mwaaceererye osivela wanyu muhakhu yoowo wasisapo onarweela wa Yehova.

3. Tiheeni mulopwana a niphwanaphwaniho na Yesu eemerenryeiye opaka wi akule nluku nawaarya? (Moone eruku yoopacerya.)

³ Mwaalakhanye Mateu 13:45, 46. Yesu aaloca niphwanaphwaniho vooloca sa mulopwana yoowo aakula ni okuliha maluku awaarya. Nihiku nimoha, owo aahiphwanya nluku nawaarya nasisapo opwaha maluku oothene owo onneiye khalai. Mulopwana owo aatepa okhwela nluku nno ophiyerya otumiha soothene aareiyeno wi akule nluku nawaarya. Apwanne munnawerya waanyiherya esisapo nluku nno naaryaayano wa yoowo?

4. Tiheeni nlakelenlaahu opaka ntakhara Omwene?

⁴ Tiheeni nnahuseryaahu orweela wa niphwanaphwaniho na Yesu? Eparipari ya Omwene wa Muluku enalikana ni nluku nenlo nawaarya. Wakhala wi ninnasivela Omwene wa Muluku hiiha ntoko mulopwana ole aasivenleiye nluku nawaarya, nnahaala okhala ochuna ohiya soothene wi nikhale anamurala a Omwene. (Mwaalakhanye Marko 10:28-30.) Hankooni noone mukhalelo achu eeli yenraayano yeeyo.

5. Tiheeni Sakeu aalakelenleiye opaka ntakhara Omwene?

⁵ Sakeu aari mulipa a muxokho. Owo aatepa ookanyaari nthowa na owiiyerya achu ikhorowa. (Luka 19:1-8) Nyenya vanihikuni, Sakeu aahimwiiwa Yesu alocaka sa Omwene. Owo aasiveliwa vancipale ni yeeyo iiwaleiye nave aahichuna opaka matorokelo moomalela. Owo aaloca: “Pwiya, kinamwavaha alipa òhawa eriyari ya muhakhu aka ni, karimwi kimwiyenre mutxhu, kinammukòkiherya vasese.” Sakeu aahaakookiherya achu ikhorowa nave aahihiya okhala mulipa a nrima.

6. Matorokelo taani muthiyana mmoha aapankeiye, nave ntakhara heeni?

⁶ Vaavaa muthiyana mmoha iiwaleiye sa Omwene iyaakha muculi, owo eera apakaka makupa a okonihana athiyanaru. Owotho aari muhooleli a marehereryo a okonihana alopwanaru. Nyenya vaavaa aamuhuseryeiye Piipiliya nave ahuserya esisapo ya Omwene wa Muluku, ahoona wi aanaphwanela opaka matorokelo matokweene mu okumi awe. (1 Korinto 6:9, 10) Nthowa na omusivela wawe Yehova, owo aahihiya marehereryo nave aahiya meerelo a okonihana athiyanaru. Owo opatisiwe mu eyaakha ya 2009, nave muyakha woocharela, aahipacerya orumeela ntoko piyoneero ookilaatheya. Aahipaka matorokelo yaala matokotoko nthowa nawi omusivela wawe Yehova waari woolipa opwaha nchuno vyakala noohiphwanelela aareiyeno.—Marko 12:29, 30.

7. Nni niwerye hai olipiha osivela wahu Omwene wa Muluku?

⁷ Wi nikhale anamurala a Omwene wa Muluku, ancipale a hiyo noopaka matorokelo moomalela. (Aroma 12:2) Nyenya ekhoco ahu hemanle. Hinnaphwanela ohiya wi osivela wahu Omwene ovololihiwe ni echu vyakala, ntoko osivela ichu soomwiilini naari soochunachuna sa mararuwo. (Masiposipo 4:23; Mateu 5:27-29) Wi anikhaviherye  otitelela olipiha osivela wahu Omwene wa Muluku, Yehova onnanivaha muhakhu mukina wasisapo.

8. (1) Ntakhara heeni murummwa Paulo aahithariha muteko ahu woolaleerya ntoko ‘muhakhu ori mwipiyani sa oloko’? (2) Paulo oonihenrye hai wi aanasivela muteko woolaleerya?

⁸ Yesu oonivaha murici wi nlaleerye ni ohusiha michaka saphaama sa Omwene wa Muluku. (Mateu 28:19, 20) Murummwa Paulo aahithariha muteko yoola ntoko muhakhu ori mwiipiyani sa oloko. (2 Korinto 4:7; 1 Timóteo 1:12) Woona wi naachu oohiphaameya, hiyaano nnalikana ni ipiya seiyo sa oloko. Nyenya michaka nnalaleeryaahu iri ntoko muhakhu wasisapo woona wi sinnakumiherya ekumi yoohimala wa hiyaano ni wa oothene yaale ananiwiriyana. Ti nthowa neni Paulo aalonceiye: “Kinera sothene wa nthowa na Mutxhaka, wi kikawaneno.” (1 Korinto 9:23) Paulo aanalapa mwakuru wi aahusihe akina vooloca sa Omwene wa Muluku. (Mwaalakhanye Aroma 1:14, 15; 2  Timóteo 4:2.) Osivela michaka yaphaama yaahimukhaviherya otitelela olaleerya moohipwacha wiikariwa aakumaneiyeno. (1 Tesalónika 2:2) Nni nimutakiherye hai Paulo osivela wawe muteko woolaleerya?

9. Tisivi siri mikhalelo mikina nneeraahu nooniherye wi ninnasivela muteko woolaleerya?

⁹ Mukhalelo mmoha Paulo oonihenryeiye osivela muteko wa olaleerya waari opharihela elukuluku aakhaleiyeno wi aloce ni akina. Ntoko Paulo ni Akristu oopacerya, hiyaanotho ninnalaleerya michaka saphaama empa ni empa, vanlakani, ni mmapuro vyakala nnaaphwanyaahuvo achu. (Saweriwa T’arummwa 5:42; 20:20) Ninnaavya mikhalelo sa waalaleerya achu oohiyanahiyana waweryeya. Wakhala wooweryeya, akhweya nnanwerya orumeela ntoko piyoneero okhaviherya naari piyoneero ookilaatheya. Naari nnanwerya ohuserya elocelo ekina, othaamela mukuma mukina wa elapo ahu, ophiyerya othaamela elapo ekina.—Saweriwa T’arummwa 16:9, 10.

10. Miphurelo taani Ireni aakhenleiye nthowa na olapa mwakuru alaleeryaka michaka saphaama?

¹⁰ Ireni Murokora mmoha ohitheliwe o Estatu Unitu, aanachuna olaleerya michaka saphaama wa achu yaaloca Erusu. Mu 1993, owo aahivolowa mu nikhuuru na elocelo ya Erusu o epooma ya Nova York. Mu elukuluku yeeyo, nikhuuru nlo yaariwo pahiru alaleeryi 20. Saavinraaya iyaakha 20, Ireni aaloca: “Miyaano nivano nkinaloca phaama Erusu.” Naamwi hiiha, Yehova aahimukhaviherya owo ni alaleeryi akina waalaleerya achu mu elocelo yeeyo. Ntoko yookhumelela, olelo o Epooma ya Nova York iriwo miloko mithanu nammoha sa elocelo ya Erusu. Ireni aahaahusiha Piipiliya achu ancipale, nave 15 a yaawo aapatisiwa. Akina a yaawo anarumeela ntoko Mapetelita, mapiyoneero, ni Atokweene a muloko. Ireni onnaloca, “Kaawuupuwelaka soolakelela  ikina kaahaalaaka othanla, nkinawerya waanyiherya emoha mano yaahaala okiruuhela ohakalala wawaaca.” Mweeparipari, Ireni onnavaha esisapo muteko awe woolaleerya!

11. Teevi enakhala yookhumelela vaavaa nnatitelelaahu olaleerya moohipwacha wiikariwa?

¹¹ Wakhala wi ninnavaha esisapo muteko ahu woolaleerya, nnahaala okhala ntoko murummwa Paulo ni otitelela olaleerya naamwi niikariwaka. (Saweriwa T’arummwa 14:19-22) Ntoko yootakiherya, variyari va iyaakha sa 1930 ni 1944, annihu o Estatu Unitu yaanatepa wiikariwa. Nyenya awo yaatitelela olaleerya. Vaavaa alamuleli yeerenryaaya waamaaliha, annihu yaahiya o nipuro na othoriha nave yaavootha miyaha mincipale. Mu 1943 munna Knorr aahiloca ovootha omoha weeren’ye o Nipuro Ntokweene na Othoriha o Estatu Unitu. Owo aahiloca wi hiwi okhalevo mwaha waahaala okerihiwa o Nipuro na Othoriha waakhanle wi anna hatitelenle olaleerya. Owo aahaaceererya wi woona wi anna orukurerya elapo yoothene yaahititelela olaleerya, awo yaahooniherya wi wiikariwa hiwi okhumelele phaama. Anna mu ilapo ikina annavootha miyaha ntoko seiya. Aai, osivela wahu muteko woolaleerya horwa oneeriwa ohiyererya olaleerya nthowa na wiikariwa.

12. Tiheeni mulakelenlaanyu opaka?

¹² Wakhala wi ninnavaha esisapo muteko ahu woolaleerya, hinikayawo pahiru wi nikhaleno iwora. Nnahaala opaka echu eri yoothene ophiyerya nnaweryelaahuvo wi nivahe “onamona wa Mutxhaka Waphama.” (Saweria T’arummwa 20:24; 2 Timóteo 4:5) Vano tiheeni nnahaalaahu waahusiha akina? Muthokororye muhakhu mukina onarweela wa Muluku.

13, 14. Masu awi “mmuhakhuni” Yesu aalonceiye mu Mateu 13:52 tiheeni, nave nni nisareihe hai?

¹³ Muhakhu wa neeraru Yehova onanivaheiye iparipari soothene nihusenryaahu. Yehova ehime ya eparipari. (2 Samuwele 7:28; Salumu 31:5) Nave ntoko Tiithi  oovaha, owo onakhwela okawana iparipari seiyo ni hiyaano. Ophiyerya vaava, noohuserya sincipale sa seiyo moorweela wa waalakhanya Masu awe, soolaleeryiwa sahu ni moorweela wa ophwanyeya mmithukumano sa miceche, sa ekulucu, ni mithukumano sahu sa muloko. Vaavaa nnathukumanyaahu iparipari sincipale, nnahaala okhalano yeeyo Yesu iichanneiye “mmuhakhuni [ntatha]” na iparipari “sa hihano ni sa khalai.” (Mwaalakhanye Mateu 13:52.) Yehova onahaala onikhaviherya waaceererya “mmuhakhuni” mwahu wakhala wi ninnaavya iparipari ntoko muhakhu ovithiwe. (Mwaalakhanye Masiposipo 2:4-7.) Nni neereno hai?

¹⁴ Nnaphwanela omuhuserya Piipiliya ni soolaleeryiwa sahu ni opaka otholathola moomaleleya. Eyo enamunikhaviherya ophwanya iparipari “sa hihano”, seiyo nahaasuwenlaahu khalai. (Yosuwa 1:8, 9; Salumu 1:2, 3) Mulipeleli oopacerya aalaleeryiwe mu Yulyu a 1879, aahilikanyiha eparipari ni ethutu yiikichiwe ni makukhu awaaca. Wi muchu awerye ophwanya ethutu mmukhalelo yoowo, onaphwanela otholathola moomalela. Nave amala ophwanya, hanahaala ohakalala wakhala wi ophwannye emoharu. Owo onahaala otitelela waavya wi aphwanye ithutu sincipale. Mmukhalelo mmohamoha, hannaphwanela ohakalala pahiru vaavaa nnaphwanyaahu eparipari emoha. Hiyaano nnaphwanela otitelela waavya iparipari sincipale.

15. Ntakhara heeni nnanwerya wiichana iparipari ikina ntoko “sa khalai” nave tisivi iri soochuneya wa nyuwo?

¹⁵ Vaavaa naapacenryaahu omuhuserya Piipiliya, naahihuserya iparipari sooreera. Nnanwerya wiichana ntoko iparipari “sa khalai” nthowa nawi ti seiyo naapacenryaahu ohuserya. Iparipari taani ikina inaphitaanyerya seiya? Omapacereryo, noohuserya wi Yehova ti mpatusa ahu nave wi ookhalano yoolakelela wa achu. Noohuseryatho wi Muluku oomurumiha mwanawe veelaponi yavathi wi akhwe ntoko yawoopola wi hiyaano nikhale awoopowa wa yoocheka ni okhwa. Nave noohuserya wi Omwene wa Muluku onahaala oviihavo makacamiho oothene veelaponi yavathi nave wi nnanwerya okhalano ekumi yoohimala mmureceleni ni moohakalala.—Yohani 3:16; Wupulula 4:11; 21:3, 4.

16. Tiheeni nnaphwanelaahu opaka vaavaa onakhalaayavo otorokeya mu wiiwexexa wahu iparipari sa Piipiliya?

¹⁶ Mu ilukuluku ikina, wiiwexexa wahu sooloherya sa Piipiliya naari soorepa akhweya onamutorokeya. Vaavaa eyo eneereyaaya, ti yookhweleya omaliha elukuluku nihuseryaka nave nuupuwelelaka matorokelo yaawo. (Saweriwa T’arummwa 17:11; 1 Timóteo 4:15) Tahi wi pahiru nnachuna osuwela ichu sookhweleya vooloca sa ohiyana orivovo variyari va wiiwexexa wakhalai ni wahiihaano, nyenya hiyaano nnachunatho osuwela phaama miyaha seiyo sinakhaviherya wiiwexexa yoowo wahiihaano. Ohuserya mmukhalelo yoowo enahaala weeriha wi iparipari sahiihaano ipake makupa mu othanla wahu iparipari sa Piipiliya. Ntakhara heeni oryaaya waphaama wa hiyo wiilipiserya hiiha?

17, 18. Munepa waweela onanikhaviherya hai?

¹⁷ Yesu oohusiha wi munepa waweela onahaala onikhaviherya wuupuwelela ichu nihusenryaahu khalai. (Yohani 14:25, 26) Oni onikhaviherya hai vaavaa nnalaleeryaahu michaka saphaama? Muthokororye yootakiherya ya munna Petro. Mu 1970, owo aarino iyaakha 19 sa oyariwa nave ampaceraru  orumeela o Peteli ya Krapretanya. Petro alaleeryaka empa ni empa aahimphwanya mulopwana awunnuwelavo apweto. Petro aahimukoha mulopwana yoowo waakhanle wi aanachuna omwiiwexexa Piipiliya. Mulopwana owo aari muhusiha a malamulo, nave aanyeenyeya nthowa na mmiravo ochuna omuhusiha Piipiliya. Achunaka omweererya Petro, muhusiha owo aahimukoha: “Mmiravo we, elocelo taani ephariheliwe wi arempwe liivuru a Taniyeli?” Petro aahaakhula: “Makupa makina arempwe mu Aramaiko.” Petro onnuupuwela: “Muhusiha aahitikhiniheya woona wi kaahisuwela naakhulo—nyenya haatikhinihen’ye ni mukhalelo aka! Kaasuwenle hai naakhulo? Vaavaa kaakookenlaaka owaani kaahitholathola mu Mulipeleli ni Despertai! a miyeeri saavinre, nave kaaphwanya mwaha waaloca wi liivuru a Taniyeli aarempwe mu elocelo ya Aramaiko.” (Daniyeli 2:4) Mweeparipari, munepa waweela onnanikhaviherya wuupuwelela ichu naalakhannyaahu nave nihela mmuhakhuni mwahu.—Luka 12:11, 12; 21:13-15.

¹⁸ Wakhala wi ninnasivela iparipari nihusenryaahu orweela wa Yehova nave nnathamalela, nnahaala ochuna okhapelela mmuhakhuni mwahu. Weerano yeeyo moohihiyererya, nnahaalatho okhala ooreheryeya waahusiha akina.

19. Nni nikhapelele hai muhakhu ahu woomunepani?

¹⁹ Mmwaha yoola noohuserya ti mwawiihai oryaaya woochuneya wa hiyo ovaha esisapo muhakhu woomunepani. Nyenya nnaphwanela okhalano ephoole wi niheemererye wi Satana ni elapo ela sivololihe osivela wahu muhakhu yoola. Wakhala wi hanniikasoopa, nnahaala olekecheya ni ichu ntoko yoororomeliha ya okhalano muteko onaliva ikhorowa sawaaca, oloha nikhalaka phaama, naari wiikusererya mookhalani. Murummwa Yohani oonilopola wi elapo enamvira vamoha ni minkhela saya. (1 Yohani 2:15-17) Ti nthowa neni nnaphwanelaahu otitelela othamalela ni okhapelela muhakhu ahu woomunepani.

20. Tiheeni mulakelenlaanyu weera wi mukhapelele muhakhu anyu?

²⁰ Mwiilipiserye okhooca echu vyakala yeeyo yaahaala oceecheiha osivela wanyu Omwene wa Muluku. Mukhale oolakelela olaleerya mwamvai, nave muhiyeleele osivela wanyu muteko woolaleerya. Mutitelele waavya iparipari sa Piipiliya. Vaavaa munapakaanyu yeeyo munahaala ohelaka “muhakhu wohimala wirimu, weiwo mpava ohinaphiyeiyewo, nave owese ohinalyayawo. Woona wi oriwo muhakhu anyu, t’oriwo murima anyu.”—Luka 12:33, 34.