1, 2. (a) Ni by’omuhendo ki bishatu ebi Yehova atuhaire? (b) Omu kicweka eki nituza kwega ahari ki?

YEHOVA niwe arikukirayo kuba omugaiga omu nsi n’omu iguru. Buri kintu n’ekye. (1 Obusingye 29:11, 12) Kwonka Yehova n’efura aha bantu boona. Ka nitushemererwa munonga ahabw’okugira ngu atuhaire eby’omwoyo bingi eby’omuhendo! Bimwe aha by’omuhendo ebi ni biiha? Nibitwariramu ebi (1) Obukama bwa Ruhanga, (2) obuheereza bwaitu, (3) n’amazima g’omuhendo agari omu Kigambo kye. Kwonka twaba tutegyendesereize, haahinguraho obwire nitubaasa kwebwa ngu ebintu ebi n’eby’omuhendo. Twine kuguma nitweijutsya ngu n’eby’omuhendo, kandi twongyere kubikunda, ahakuba Yesu akagira ati: “Ahu eitungo ryanyu riri, n’omutima gwanyu niho guba.”​—Luka 12:34.

² Ka tureebe oku turikubaasa kuguma nitukunda Obukama bwa Ruhanga, obuheereza bwaitu, tukoongyera kukunda n’amazima. Twaba nitushwijuma enshonga ezi, teekateeka aha ku iwe orikubaasa kwongyera ahari rukundo ei oyiniire eby’omwoyo eby’omuhendo.

3. Omushaija omu kitebyo kya Yesu akaba ayeteekateekire kukora ki kubaasa kugura eruuru emwe? (Reeba ekishushani aha kutandika.)

³ Shoma Matayo 13:45, 46. Yesu akatebya ekitebyo ekirikukwata aha mushaija owaabaire naagura kandi naashubuura eruuru. Eizooba rimwe, akabona eruuru eyaabaire eri ey’omuhendo munonga kukira eruuru zoona ezi yaabaire yaareebireho enyima. Omushaija ogu akakunda munonga eruuru egi yaaguza buri kimwe eki yaabaire aine kuza kugigura. Noobaasa kutebeereza oku eruuru egyo yaabaire eri ey’omutaano ahariwe?

4. Tweteekateekire kukora ki ahabw’Obukama?

⁴ Nitubaasa kwega ki omu kitebyo kya Yesu? Amazima agarikukwata aha Bukama bwa Ruhanga ni nk’eruuru y’omuhendo. Twaba nitukunda munonga Obukama nk’oku omushaija ogwo yaabaire naakunda eruuru, nitwija kuba tweteekateekire kwefeerereza buri kimwe kuba abaraategyekwe Obukama obwo. (Shoma Mako 10:28-30.) Ka tureebe oku abantu babiri baakozire eki.

5. Zakaayo akaba ayeteekateekire kukora ki ahabw’Obukama?

⁵ Zakaayo akaba ari omuhooza. Akaba ari omutungi ahabw’okugira ngu akaba naashomankura esente aha bantu. (Luka 19:1-9) Kwonka eizooba rimwe, Zakaayo akahurira Yesu arikugamba aha Bukama. Akakunda munonga ebi yaahuriire, kandi akaba naayenda kuhindukira kimwe. Akagira ati: “Reeba, Mukama wangye, ekicweka ky’ebintu byangye naaza kukigabira abooro; kandi ou naagobeize weena, nimmuriha kana.” Zakaayo akagarurayo esente ezi yaabaire ayihire aha bantu, kandi yaarekyera aho omururu.

6. Omukazi omwe akakora mpindahinduka ki, kandi ahabw’enki yaazikozire?

⁶ Omukazi omwe obu yaahurira ebirikukwata aha Bukama emyaka mikye enyima, akaba aine omuze gw’okuteerana n’abakazi bagyenzi be. Kandi akaba naakurira ekibiina ekyabaire nikirwanirira obugabe bw’abarikuteerana n’abu barikushushanisa nabo obuhangwa. Kwonka ku yaayegire Baibuli akamanya ngu Obukama bwa Ruhanga n’obw’omuhendo, akeetegyereza ngu aine kukora empindahinduka mpango. (1 Abakorinso 6:9, 10) Ahabwa rukundo ei yaabaire ainiire Yehova, akaruga omu kibiina ekyo yaarekyera n’aho okuteerana n’abakazi bagyenzi be. Akabatizibwa omu 2009, kandi omwaka ogwakuratsireho akaba payoniya ow’obutwire. Akakora empindahinduka mpango ezi, ahabw’okugira ngu rukundo ei yaabaire ainiire Yehova ekaba neekira ebyetengo bye bibi.​—Mako 12:29, 30.

7. Nitubaasa kuguma twiniire tuta Obukama bwa Ruhanga rukundo y’amaani?

⁷ Kubaasa kuba bamwe aha barikutegyekwa Obukama bwa Ruhanga, tukahindurira kimwe emitwarize yaitu. (Abarooma 12:2) Kwonka okurwana kwaitu tikukahwaire. Titwine kwikiriza ekintu kyona nk’okukunda ebintu, nari ebyetengo by’okwenda kuteerana kutuubya rukundo ei twiniire Obukama. (Enfumu 4:23; Matayo 5:27-29) Yehova kubaasa  kutuhwera kuguma twiniire Obukama bwe rukundo y’amaani, atuhaire ekintu ekindi eky’omuhendo.

8. (a) Ahabw’enki entumwa Paulo yaagambire aha buheereza bwaitu ‘nk’obutungi oburi omu nyabya z’eibumba’? (b) Paulo akooreka ata ngu naakunda obuheereza?

⁸ Yesu akatuha omurimo gw’okubuurira n’okwegyesa abantu amakuru marungi agarikukwata aha Bukama bwa Ruhanga. (Matayo 28:19, 20) Entumwa Paulo akashoboorora aha buheereza obu nk’obutungi oburi omu nyabya z’eibumba. (2 Abakorinso 4:7; 1 Timoseo 1:12) Ahabw’okugira ngu turi abatahikiriire, turi nk’enyabya z’eibumba ezo. Kwonka obutumwa obu turikubuurira n’obw’omuhendo ahakuba nibubaasa kuturugiramu okutunga amagara agatahwaho n’abo abu turikubuurira bakahurikiza. Niyo nshonga ahabw’enki Paulo yaagizire ati: “Ebyo byona mbikora ahabw’engiri, ngu ntungye aha migisha yaayo” hamwe n’abandi. (1 Abakorinso 9:23) Paulo akakora munonga kwegyesa abandi aha Bukama bwa Ruhanga. (Shoma Abarooma 1:14, 15; 2 Timoseo 4:2.) Okukunda amakuru marungi kikamuhwera kugumizamu naabuurira n’obu araabe yaabaire naahiiganisibwa. (1 Abatesalonika 2:2) Nitubaasa kutooreza tuta Paulo omu kukunda obuheereza bwaitu?

9. Ni miringo ki ei turikubaasa kworekamu ngu nitukunda obuheereza?

⁹ Kandi Paulo akooreka ngu naakunda obuheereza arikukoresa buri mugisha kubuurira abandi. Nka Paulo, Abakristaayo b’omu kyasha ky’okubanza nabo bakabagana amakuru marungi n’abandi barikubuurira enju aha nju, omu myanya erimu abantu baingi, n’ahandi ahu baabaire bashanga abantu. (Ebyakozirwe 5:42; 20:20) Nitusherura emiringo y’okubuurira abantu baingi nk’oku kirikubaasika. Kyaba nikibaasika nitubaasa kuheereza nka baapayoniya abahwezi nari ab’obutwire. Nari nitubaasa kwega orurimi orundi, tuze omu kicweka ekindi omu ihanga ryaitu, nari tuze omu ihanga erindi.​—Ebyakozirwe 16:9, 10.

10. Irene atungire birungi ki ahabw’okukora n’amaani kubagana amakuru marungi n’abandi?

¹⁰ Munyaanyazi-itwe Irene otari mu bushwere orikutuura omuri United States, akaba naayenda kubuurira abantu abarikugamba Orurasha. N’ahabw’ekyo omuri 1993, akaza omu guruupu erikukoresa Orurasha omu rurembo New York. Omu bwire obwo, guruupu egyo ekaba erimu ababuurizi nka 20. Irene bwanyima y’emyaka 20, akagira ati: “Na hati tindikugamba gye Orurasha.” Kwonka, Yehova amuhwereire n’abandi babuurizi kubuurira abantu omu rurimi orwo. Ekirugiremu, hati omu rurembo New York harimu ebibiina mukaaga ebirikukoresa Orurasha. Irene akeegyesa abantu baingi Baibuli, kandi 15 aharibo bakabatizibwa. Bamwe aharibo nibaheereza nk’Ababeseeli, baapayoniya, n’abareeberezi. Irene naagira ati: ‘Ku ndikuteekateeka  aha mirimo endiijo ei naakubaasize kukora, tindikureeba ogwakubaasize kundeetera okushemererwa nk’oku nyine.’ Irene buzima naatwara obuheereza bwe nk’obw’omuhendo!

11. Ni harugamu ki twagumizamu nitubuurira n’obu haakuba hariho okuhiiganisibwa?

¹¹ Twaba nitutwara obuheereza bwaitu nk’obw’omuhendo, nitwija kuba nk’entumwa Paulo, kandi tugumizemu nitubuurira n’obu twakuhiiganisibwa. (Ebyakozirwe 14:19-22) Nk’eky’okureeberaho, ahagati y’omwaka 1930 na 1944, ab’eishe-emwe omuri United States bakaba nibahiiganisibwa munonga. Kwonka bakagumizamu nibabuurira. Kwonka ab’obushoboorozi ku baataireho kuzibira ab’eishe-emwe, bakaza omu macwero g’emanja kandi bakasinga emanja nyingi. Omuri 1943, Ow’eishe-emwe Knorr akagamba aha businguzi bumwe obu twatungire omu icwero ry’emanja erikuru erya U.S. Akagira ngu hakaba hatarikwija kubaho enshonga y’okureeta omu icwero ry’emanja eryo ku ogire ngu ab’eishe-emwe tibaragumiizemu nibabuurira. Akoongyeraho ngu ahabw’ab’eishe-emwe kugumizamu nibabuurira omu nsi yoona, bakooreka gye ngu okuhiiganisibwa tikurikusingura. Ab’eishe-emwe omu mahanga agandi nabo basingire emanja nk’ezi. Buzima, rukundo ei twiniire obuheereza bwaitu neetuhwera kutaikiriza okuhiiganisibwa kuturemesa kubuurira.

12. Omaririire kukora ki?

¹² Twaba nitutwara obuheereza bwaitu nka bukuru, titurikwija kuguma nitwerarikirira munonga aha shaaha ezi twine kuhandiika aha ripoota yaitu. Nitukora kyona ekirikubaasika kujurira gye ebirikukwata aha makuru marungi. (Ebyakozirwe 20:24; 2 Timoseo 4:5) Kwonka shi niki eki turaayegyese abandi? Yetegyereze eky’omuhendo ekindi kuruga ahari Ruhanga.

13, 14. Ni “ibiikiro” ki eri Yesu yaagambireho omuri Matayo 13:52, kandi nituriijuza tuta?

¹³ Eky’omuhendo ekya kashatu eki Yehova atuhaire n’amazima goona agu twegire.  Yehova niwe bukomooko bw’amazima. (2 Samueli 7:28; Zaaburi 31:5) Kandi Yehova Tataitwe efura, naakunda kubagana naitwe amazima aga. Hati twayegire amazima maingi turikushoma Ekigambo kye n’ebitabo byaitu, n’okuza omu nteerane empango n’eza buri saabiiti. Ku turikuguma niturundaana amazima, nitwija kugira eki Yesu yaayetsire ‘eibiikiro’ ry’amazima ‘amasya n’aga ira.’ (Shoma Matayo 13:52.) Yehova naija kutuhwera kwijuza ‘eibiikiro’ ryaitu ery’eby’omuhendo, twaguma nitusherura amazima nk’abarikusherura eby’omuhendo ebisherekirwe. (Shoma Enfumu 2:4-7.) Ekyo nitukikora tuta?

¹⁴ Twine kwega Baibuli n’ebitabo byaitu butoosha, kandi tukora n’okucondooza. Eki nikiija kutuhwera kumanya amazima amasya, agu tubaire tutarikumanya. (Yoshua 1:8, 9; Zaaburi 1:2, 3) Omunaara gw’Omurinzi ogwabandize kushohozibwa Okwamushanju 1879, gukagyeragyeranisa amazima n’ekimuri ekyesherekire omu mwata mwingi. Omuntu kubaasa kubona ekimuri nk’ekyo, aine kukisherura n’obwegyendesereza. Kandi yaaheza kukibona, tashemereire kumarwa na kimwe kyonka. Ashemereire kugumizamu naasherura kubona bingi. Omu muringo nigwo gumwe, titushemereire kumarwa twaheza kutunga amazima gamwe gonka. Tushemereire kuba tweteekateekire kugumizamu nitusherura agandi maingi.

15. Ahabw’enki amazima agamwe nitugeeta ‘aga ira,’ kandi ni gaahi agu orikutwara nk’ag’omuhendo?

¹⁵ Ku twatandikire kwega Baibuli, tukeega amazima g’omuhendo. Nitubaasa kugeeta amazima ‘aga ira’ ahabw’okugira ngu nigo twabandize kwega. Amazima gamwe ahari aga ni gaahi? Omu kutandika, tukeega ngu Yehova niwe Muhangi kandi ngu ainiire abantu ekigyendererwa. Kandi tukeega ngu Ruhanga akoohereza Omwana we omu nsi kuba ekitambo kugira ngu tubaase kucungurwa omu kibi n’okufa. Ekindi tukeega ngu Obukama bwa Ruhanga nibwija kuhezaho okubonabona kwona, kandi ngu nitwija kutuura omu nsi ebiro byona twine obusingye n’okushemererwa.​—Yohaana 3:16; Okushuuruurwa 4:11; 21:3, 4.

16. Nituba twine kukora ki oku turikwetegyereza amazima g’omu Baibuli kwahindurwamu?

¹⁶ Obumwe, oku turikwetegyereza obunabi bwa Baibuli nari ekyahandiikirwe nikubaasa kuhindurwamu. Ekyo kyabaho, nikiba kiri kikuru kutwara obwire kwega enyetegyereza ensya, kandi okagiteekateekaho. (Ebyakozirwe 17:11; 1 Timoseo 4:15) Nituba tutarikwenda kwetegyereza entaaniso eri ahagati y’enyetegyereza enkuru n’ensya kyonka, beitu twine n’okuta omutima aha nshoboorora yoona ey’enyetegyereza ensya. Okushwijuma ebintu omu muringo nk’ogu nikiija kutuhwera kwongyera aha mazima ga Baibuli agari omu ibiikiro ryaitu. Ahabw’enki kiri kirungi ahariitwe kuteeraho tutyo?

17, 18. Omwoyo gurikwera nigubaasa kutuhwera guta?

¹⁷ Yesu akeegyesa ngu omwoyo gwa Ruhanga ogurikwera nigubaasa kutuhwera kwijuka ebintu ebi twayegire enyima. (Yohaana 14:25, 26) Eki nikibaasa kutuhwera kita twaba nitubuurira amakuru marungi? Teekateeka aha kyabaire aha w’eishe-emwe Peter. Omuri 1970, akaba aine emyaka 19, kandi nibwo yaabaire atandikire kuheereza aha Beseeli omuri Britain. Peter akaba naabuurira enju aha nju reero yaahika aha nju  y’omushaija w’ekireju. Akabuuza omushaija ogwo yaaba naayenda kwetegyereza Baibuli. Omushaija ogwo akaba ari omwegyesa omu diini y’Abayudaaya, kandi kikamutangaaza kureeba ngu omwojo muto akaba naateekateeka ngu naabaasa kumwegyesa Baibuli. Omushaija ogwo kubaasa kugyeza Peter, akamubuuza ati: “Mbwenu mwojo wangye, ekitabo kya Danieli kikaba kihandiikirwe mu rurimi ki?” Peter akagarukamu ati: “Ekicweka kyakyo kikaba kihandiikirwe omu Rusiria.” Peter naijuka ngu omushaija ogwo “akatangaara kureeba ngu nkaba nimmanya eky’okugarukamu, kwonka niinye naakizireyo kutangaara munonga! Nkamanya nta eky’okugarukamu? Ku naagarukire omuka, kandi nkashwijuma Omunaara gw’Omurinzi na Awake! ez’ameezi ag’enyima, nkashangamu ekicweka ekirikushoboorora ngu ekitabo kya Danieli kikahandiikwa omu Rusiria.” (Danieli 2:4) Buzima, omwoyo gurikwera nigubaasa kutuhwera kwijuka ebi twashomire tukata omu ibiikiro ryaitu enyima.​—Luka 12:11, 12; 21:13-15.

¹⁸ Twaba nitukunda amazima agu turikwega agarikukwata ahari Yehova, nitwija kuguma nitugoongyera omu ibiikiro ryaitu. Twaguma nitweyongyera kukora tuti, nitwija kuba twetebeekaniise kwegyesa abandi.

19. Ahabw’enki twine kurinda eby’omuhendo eby’omwoyo?

¹⁹ Omu kicweka eki, twayega oku kiri kikuru ahariitwe kutwara eby’omuhendo eby’omwoyo nka bikuru. Kwonka twine kwegyendesereza kutaikiriza Sitaane n’ensi ye kutuubya rukundo ei twiniire eby’omuhendo ebi. Twaba tutegyendesereize, nitubaasa kuhugibwa emirimo y’esente nyingi, okwenda kuba omu mbeera nungi, nari ekyetengo ky’okwenda kworeka ebintu ebi twine. Entumwa Yohaana naatwijutsya ngu ensi egi n’ebyayo nibaija kuhwaho. (1 Yohaana 2:15-17) Niyo nshonga ahabw’enki twine kuguma nitusiima eby’omuhendo eby’omwoyo kandi tukabirinda.

20. Omaririire kukora ki kubaasa kurinda eby’omuhendo eby’omwoyo?

²⁰ Ba oyeteekateekire kureka ekintu kyona ekirikubaasa kutuubya rukundo ei oyiniire Obukama bwa Ruhanga. Ba omaririire kubuurira oine omujinya, kandi otareka kukunda obuheereza. Gumizamu noosherura amazima ga Baibuli. Waaguma nookora ebi, noija kwebiikira ‘eitungo omu iguru eritahwaho, ahu omushuma atahika, n’obu haakuba ahu ekiyenje kitashiisha. Ahakuba ahu eitungo ryanyu riri, n’omutima gwanyu niho guba.’​—Luka 12:33, 34.