1, 2. a) ¿Jehová Diosca ima quimsa bendicioncunatataj cushca? b) ¿Cai temapica imataj yachagrinchij?

DIOSTA yallica ni pi mana charinchu. Tucui ima tiyashcapish paipajmi can (1 Crónicas 29:11, 12). Diosca mana mitsashpa cuj Yayami can. Chaimantami paita cꞌuyajcunamanca achca bendicioncunata cushca. ¿Ima bendicioncunatataj cushca? Puntapica shuj Mandanatami churashca. Qꞌuipaca Bibliahuanmi valishca yachaicunata yachachishca. Shinallataj Bibliamanta shujtajcunaman yachachichunmi saquishca. Pero mana cuidadota charishpaca chaicunata cungarishpachari mana valishcata laya ricui callarishun. Chashna ama tucungapajca Dios cushca bendicioncunata achcata valorashpami catina canchij. Jesusca: “Cancunapaj charishcacuna maipimi, cancunapaj shungupish chai yuyaillami canga” nircami (Lucas 12:34).

² Cai quimsa bendicioncunamanta Jehová Diosta ima  shina pagui ninata, chaicunata valorashpa catingapaj imata ruranatami cai temapica yachagrinchij. Caita yachacushpaca Dios cushca bendicioncunata valorashpa catingapaj quiquin imata ruranata yuyai.

3. ¿Cꞌatuj runaca ashtahuan valishca perlata randingapajca imatataj rurarca? (Página 9-pi tiyaj dibujota ricui).

³ (Mateo 13:45, 46-ta leyipai). Jesusca, shuj cꞌatuj runamantami parlarca. Chai runaca achca perlacunatami cꞌatushca randishcapish canga. Pero shuj punllaca ashtahuan valishca perlata tarishpami yallitaj cushicurca. Paica, chai perlata randingapajmi tucui charishcacunata cꞌaturca. Cꞌatuj runapajca chai perlaca achca valishcami carca.

4. ¿Dios churashca Mandana achca valishcata ricuchingapajca imatataj rurana canchij?

⁴ ¿Jesús parlashca runamantaca imatataj yachai tucunchij? Dios churashca Mandanaca chai perla shinami can. Ñucanchijpish chai cꞌatuj runa laya valorashpaca, Diospaj Mandanata apoyangapajmi tucuita huashaman saquishun (Marcos 10:28-30-ta leyipai). Ishqui runacunami chaita rurarca. Paicunamanta yachashun.

5. ¿Dios churashca Mandanamanta uyashpaca Zaqueoca imatataj rurasha nirca?

⁵ Zaqueomanta parlashun. Paica impuestocunata japij runami carca. Shujtajcunata shuhuashpami achcata charij tucurca (Lucas 19:1-9). Dios churashca Mandanamanta Jesús yachachicujta uyashpaca chai Mandana achca valishca cashcatami ricurca. Chaimantami chai rato Zaqueoca: “Mandaj Jesús, ñuca charishcacunamanta chaupita imata mana charijcunaman cusha. Maijancunapajta umashpa shuhuashcataca chuscu cutinhuanmi tigrachisha” nircami. Chashnami charinallapi yuyanata saquirca.

6. a) ¿Rose huarmica ima cambiocunatataj rurarca? b) ¿Imamantataj chaita rurarca?

⁶ Rose shuti huarmimanta parlashun. Paica shujtaj huarmihuanmi enamorarishpa causacurca. Shinallataj pai layallataj causajcunata respetachunmi shuj organizacionpi pushaj carca. Chashna causacushpami Diospaj churashca Mandanamanta uyarca. Qꞌuipaca Bibliata estudiai callarishpaca chai yachaicuna achca valishcatami ricurca. Chaimantami achca cambiocunata rurarca (1 Corintios 6:9, 10). Paica chai huarmihuan purinatapish saquirca, chai organizacionmantapishmi llujshirca. Rose huarmica 2009-pimi bautizarirca, chai huata qꞌuipaca precursora regularmi tucurca. Paica Dios churashca Mandanata apoyasha nishcamanta, Jehová Diosta tucui shunguhuan cꞌuyashcamantami chai mapa ruraicunata saquirca (Marcos 12:29, 30).

7. ¿Dios churashca Mandanata apoyashpa catingapajca imatataj rurana canchij?

⁷ Achcacunaca Dios churashca Mandanata apoyangapajmi achca cambiocunata rurashcanchij (Romanos 12:2). Shinapish mana chaillapi saquirinachu canchij. Ashtahuanpish charinalla yuyaicunapish, mapa munaicunapish Diosmanta ama caruyachichunmi cuidadota charina canchij (Proverbios 4:23; Mateo 5:27-29). Jehová Diosca pai churashca Mandanata apoyashpa  catichunca shujtaj valishca bendiciontami cushca.

8. a) ¿Pabloca imamantataj ‘alli huillaicunataca allpa vasocunapi shinami charicunchij’ nirca? b) ¿Diosmanta huillana valishca cashcataca Pabloca ima shinataj ricuchirca?

⁸ Jesusca alli huillaicunata huillachunmi mandarca (Mateo 28:19, 20). Apóstol Pablopajca Diosmanta huillanaca achca valishcami carca. Chaimantami paica, ‘alli huillaicunataca allpa vasocunapi’ shinami charicunchij nirca (2 Corintios 4:7; 1 Timoteo 1:12). Juchayujcuna cashcamantaca allpa vasocuna shinami canchij. Pero Diosmanta huillashpaca huiñaitami causashun. Ñucanchijta uyajcunapish huiñaitami causai tucunga. Chaita yachashpami Pabloca: “Alli huillaita huillangapaj, chai alli huillaita huillashcamanta ñucapish huillajcunahuan japingapajmi chashna rurani” nirca (1 Corintios 9:23). Pabloca Diosmanta huillanatami achcata munarca. Chaimantami mana shaicushpa gentecunaman huillarca (Romanos 1:14, 15; 2 Timoteo 4:2-ta leyipai). Gentecuna jarcasha nijpipish Pabloca Diosmantami huillashpa catirca (1 Tesalonicenses 2:2). ¿Ñucanchijpish ima shinataj Pablo laya cai tucunchij?

9. ¿Diosmanta huillana valishca cashcata ricuchingapajca imatataj rurai tucunchij?

⁹ Diosmanta huillana valishca cashcata ricuchingapajca Pabloca tucui ladocunapimi huillarca. Ñaupa punllapi Jesusta catijcuna shinallatajmi ima horas cajpipish, maipi cashpapish, huasin huasin rishpapish Diosmanta huillanchij (Hechos 5:42; 20:20). Tucui gentecunaman Diosmanta huillangapaj esforzarishunchij. Por ejemplo, pudishpaca precursores auxiliares o precursores regularesmi cai tucunchij. Shinallataj shujtaj shimitami yachai tucunchij o shujtaj ladopi o shujtaj llajtacunapimi servinaman ri tucunchij (Hechos 16:9, 10).

10. ¿Mana shaicushpa huillashcamantaca Ireneca ima bendicioncunatataj chasquishca?

¹⁰ Estados Unidospi causaj Irene shuti panimanta parlashun. Paica ruso shimita parlaj gentecunamanmi huillasha nirca. Chaimantami 1993-pica Nueva York llajtapi ruso shimita parlaj grupopi servi callarirca. Chaipica 20 publicadorcunallami tiyarca. Casi 20 huatacunata rusopi servishpapish Ireneca: “Rusopi parlanata mana tanto valinichu” ninmi. Shinapish mana shaicushpa huillashcamantami Jehová Diosca Irenetapish, shujtaj huauquicuna panicunatapish achcata bendiciashca. Cunanca Nueva York llajtapica ruso shimipi 6 congregacioncunami tiyan. Ireneca 15 cꞌaricunata huarmicunatami testigo de Jehová tucuchun ayudarca. Maijancunaca betelitas, precursores  o ancianocunami can. Ireneca cashnami nin: “Shujtaj cosascunatachari ruraiman carcani. Pero chaicunata rurashca cashpaca mana cunan laya cushicuimanchu carcani” ninmi. Irenepajca Diosmanta huillanaca yallitaj valishcami can.

11. ¿Jarcaicuna tiyajpipish Diosmanta huillashpa catishcamantaca imataj tucushca?

¹¹ Achca jarcaicuna tiyajpipish Pabloca Diosmanta huillashpami catirca. Ñucanchijpish Pablo laya huillashpaca Diosmanta huillana achca valishca cashcatami ricuchishun (Hechos 14:19-22). Estados Unidos llajtapica 1930 huatamanta 1944 huatacamaca Diosmanta ama yachachichunmi jarcarcacuna. Shinapish chai huauquicuna panicunaca huillanataca mana saquircacunachu. Huillanata ama jarcachunmi achca cutin tribunalcunaman rircacuna. Shuj juiciota ganashcamantaca, 1943-pica huauqui Nathan Knorrca cashnami nirca: “Cai juiciotaca cancunamantami ganashcanchij. Cancuna mana huillashpa catishca cajpica leycunapica imata mana ricuchi pudinchijmanchu carca. Publicadorcuna huillanata mana saquishcamantami ñucanchijta ama llaquichishpa catichun mishashcanchij. Diospaj pueblo sinchita shayarishcamantami ganashcanchij” nircami. Shujtaj llajtacunapipish huauquicuna panicuna huillanata mana saquishcamantami huaquin juiciocunata ganashcanchij. Diosmanta huillanata valorashpaca jarcaicuna tiyajpipish huillashpami catishun.

12. ¿Imatataj rurashpa catina canchij?

¹² Jehová Diosca Bibliamanta yachachichunmi mingashca. Chai mingashcata valorashpaca mana huillana cashcallamanta huillashunchu. Ashtahuanpish tucui gentecunamanmi Diosmanta cabalta yachachina canchij (Hechos 20:24; 2 Timoteo 4:5). Pero, ¿Diosmanta huillacushpaca imatataj yachachina canchij?

13, 14. a) ¿Mateo 13:52-pica Jesusca imamantataj parlarca? b) ¿Diosmanta ashtahuan yachangapajca imatataj rurana canchij?

¹³ “Mana llullaj Diosmi” ñucanchijtaca yachachishca. Pai yachachishcacunamanta parlashun (2 Samuel 7:28; Salmo 31:5). Jehová Diosca mana mitsashpa cuj Yayami can. Chaimantami sumajta yachachin. Cunancamaca Bibliata, publicacioncunata leyishpa, tandanacuicunaman rishpami Diosmanta yachashcanchij. Jesús parlashca shinaca mauca charinacunatapish mushuj charinacunatapish huaquichij shinami Diosmanta achcata yachashcanchij (Mateo 13:52-ta leyipai). Dios yachachishcacunata orota, cullquita shina mashcajpica paillatajmi ashtahuan yachachun ayudanga (Proverbios 2:4-7-ta leyipai). ¿Ima shinataj orota, cullquita shina mashcashun?

¹⁴ Bibliatapish, publicacioncunatapish alli entendingacamami punllanta estudiana canchij. Chashnami mushuj yuyaicunata yachashun (Josué 1:8, 9; Salmo 1:2, 3). Cai revistaca julio de 1879 huatapimi llujshi callarirca. Punta revistapica cashnami nirca: “Diospaj yachaica, shuj sisa achca qꞌuihuacuna chaupipi pacashca shinami can. Pi chai sisata tarisha nishpaca allimi mashcana can. Chai sisata japishpaca mana chaillahuan saquirinachu can. Ashtahuan sisacunatami mashcashpa catina can” nircami. Chaimantami Diosmanta ashtahuan yachangapajca mashcashpa catina canchij, mana ña yachashcallahuan saquirinachu canchij.

15. a) ¿Imatataj “mauca” yachaicuna ninchij? b) ¿Maijan yachaicunataj quiquinpajca ashtahuan valishca can?

¹⁵ Bibliata estudiai callarishpami sumaj valishca yachaicunata tarircanchij. Chaicunataca “mauca” yachaicuna ninchijmi. ¿Imamanta? Callaripica Jehová ñucanchijta rurashcata, cai Allpatapish shuj paraisota ruragrishcatami yacharcanchij. Shinallataj ñucanchijta cꞌuyashcamanta Jesusta cachashpa quishpichishcatami yacharcanchij. Ashtahuanpish Jesús cai Allpata mandashpa llaquicunata tucuchijpi tucuicuna cushilla causanatami yacharcanchij (Juan 3:16; Apocalipsis 4:11; 21:3, 4).

16. ¿Mushuj yachaicunata alli entendingapajca imatataj rurana canchij?

¹⁶ Huaquinpica shuj profecía ima shina pajtarishcata o shuj verso ima nisha nishcatami ashtahuan alli entendina cashcanchij. Chai yachaicunataca entendingacamami estudiana canchij. Shinallataj chai yachashcapimi cutin cutin yuyana canchij (Hechos 17:11; 1 Timoteo 4:15). Ñaupa entendishcata, mushuj entendishcacunahuan cˈhimbapuranaca allimi can. Pero mushuj yachaicunataca mana jahua jahualla estudianachu canchij. Ashtahuanpish tucuitami alli estudiana canchij. Chashnami chai mushuj yachaicunaca ñucanchijpajca valishca tucunga. ¿Imamantataj chashna estudiana canchij?

17, 18. ¿Diospaj espirituca ima shinataj ayudai tucun?

¹⁷ ‘Diospaj espiritumi imalla yachashcacunataca cutin yuyachinga’ nishpami Jesusca yachachirca (Juan 14:25, 26).  ¿Diosmanta huillacujpica ima shinataj Diospaj espirituca yuyachi tucun? Alli entendingapajca 1970 huatapi Peter ima tucushcata parlashun. Paica 19 huatacunata charishpami Gran Bretaña llajtapi tiyaj Betelpi trabajai callarirca. Shuj punlla Peter huillacushpaca 50 huatayuj runahuanmi parlarca. Peterca: “¿Bibliapi nishcata entendisha ninguichu?” nishpami tapurca. Chai runaca yachachij judiomi carca. Paica: “Maitataj cai huambraca Bibliamanta yachachisha ningayari” yuyashpami Petertaca: “¿Daniel librotaca ima shimipitaj quillcarcacuna?” nishpa tapurca. Peterca: “Huaquin partecunataca arameo shimipimi quillcarcacuna” nircami. Chashna cutichijpica chai runaca mancharishcami saquirirca. ¿Peterca imamantashi alli cutichi tucurca? Huasiman chayashpaca huasha quillacunapi llujshishca Huillaj y ¡Despertad! revistacunatami cutin ricurca. Shuj revistapimi Daniel libro arameo shimipi quillcashcata leyishca carca (Daniel 2:4). Caipi ricushca shinaca Diospaj espiritumi ñaupaman yachashcacunata cutin yuyachi tucun (Lucas 12:11, 12; 21:13-15).

¹⁸ Jehová Dios yachachishcacunata valorashpa catingapaj, paita pagui nishcata ricuchingapajpish ashtahuanmi yachashpa catina canchij. Chashnami shujtajcunaman Diosmanta yachachingapajpish allichirishca cashun.

19. ¿Imamantataj Dios cushca bendicioncunataca cuidana canchij?

¹⁹ Cai yachaipica Jehová Dios yachachishcacuna achca valishca cashcatami ricushcanchij. Shinapish cullquillapi o charinallapi yuyashpaca Dios cushca bendicioncunataca mana valishcata layami ricui callarishun. Ama chaipi urmangapajmi cuidarina canchij. Apóstol Juanca: “Cai pachaca, tucui munaicunandijmi chingaricun” nircami (1 Juan 2:15-17). Chaimantami Dios cushca bendicioncunata valorashpa catingapaj esforzarina canchij.

20. ¿Dios cushca bendicioncunata valorashpa catingapajca imatataj rurana canchij?

²⁰ Dios churashca Mandanata apoyashpa, Diosmanta cushilla huillashpa, Bibliata ashtahuan yachashpa catishunchij. Chashnami jahua pachapi charinacunata huaquichij shina canga. Chaicunataca “shuhuapish mana shuhuanchu, polillapish mana micunchu”. Jesús nishca shinaca: “Charishcacuna maipimi, cancunapaj shungupish chai yuyaillami canga” (Lucas 12:33, 34).