1, 2. a) ¿Ima kinsa regalokunatan Dios qowanchis? b) ¿Imamantan kaypi yachasun?

¿PIN lliumantapas aswan qhapaq? Jehová Diosmi. Paypan tukuy imapas (1 Crón. 29:11, 12). Chaymantapas payqa manan maqllachu, aswanmi maki junt’ata tukuy imantapas qokun. Chhayna qoykukuq kasqanraykun qowanchis kinsa regalokunata 1) gobiernonta, 2) predicacionta, 3) cheqaq yachachikuykunata ima. Manachus cuidasun chayqa, manapas chay regalokunata valorasunmanchu jinan kanman. Chay mana pasananpaqqa astawanmi chaykunamanta yachananchis, astawantaq munakunanchispas. Jesuspunin niran: “Maypichus qhapaq kayniykichis kashan, chayllapitaqmi sonqoykichispas kashan”, nispa (Luc. 12:34).

² Kaypin yachasun imaynatas astawan munakusunman Diospa gobiernonta, predicacionta, cheqaq yachachikuykunatapas chayta. Chaykunata yachashananchiskama  allinta piensay imatas ruwanayki chay sumaq regalokunata astawan munakunaykipaq chaypi.

3. ¿Imatan juj runa ruwaran ancha valeq perlata tarispa? (9 paginapi dibujota qhaway.)

³ (Leey Mateo 13:45, 46). Juj kutinmi Jesús willaran perlakunata maskhaq runamanta. Chay runas ancha valeq perlata tarisqa. Chayta rantinanpaqsi tukuy imaymananta vendesqa. Chaytataq ruwaran chayqa maytachá paypaqqa chay perlaqa valeran.

4. ¿Imatan ruwananchis Diospa gobiernonrayku?

⁴ ¿Imaraykun Jesuspa chay willasqanta allinta entiendenanchis? Diospa gobiernonqa chay perla jinan. Sichus noqanchispas chay perla maskhaq runa jina Diospa gobiernonta munakusun chayqa, tukuy imatan ruwasun chay gobiernoman jaykunanchispaq (leey Marcos 10:28-30). Chaytan ruwaranku iskay runakuna, paykunamanta kunan yachasun.

5. ¿Imatan Zaqueo ruwaran Diospa gobiernonrayku?

⁵ Zaqueomanta yachasun. Payqa impuesto cobraq runan karan, chaymantapas runakunaq qolqentan qechuq (Luc. 19:1-9). Diospa gobiernonmanta rimaqta uyarispan ichaqa cambiaran. Chaymi Jesusta niran: “Señor, ima kaqniykunamantapas kuskantan wajchakunaman qopusaq, pimantachus qolqenta qechurani chaymanpas tawa kutitawanraqmi kutichipusaq”, nispa. Chaypi rikusqanchis jina Zaqueoqa suwakusqantan kaqta kutichipuran, manañan qolqe sonqopaschu karan.

6. ¿Imakunatan Rosa ruwaran? ¿Imaraykun chayta ruwaran?

⁶ Kunanqa Rosamanta yachasun. Payqa warmimasinwanmi parejantin jina tiyasqa. Chaymantapas homosexual nisqakunaq presidentanmi kasqa. Juj kutinmi payqa Diosmanta uyarisqa, chhaynapin Biblia estudiayta qallarisqa, chaypin yachasqa Diospa gobiernonman jaykunanpaq imatachus ruwanan karan chayta (1 Cor. 6:9, 10). Chaymi payqa presidenta kayninta saqepusqa, parejanmantapas t’aqakapusqa. Jinan 2009 watapi bautizakapusqa. Kunanqa precursora regularmi kashan. Rikusqanchis jina Jehová Diostan payqa imamantapas masta munakuran (Mar. 12:29, 30).

7. ¿Imakunamantan cuidakunanchis Diospa gobiernonta munakushanallanchispaq?

⁷ Noqanchispas imakunataraqchá saqeranchis Diospa gobiernonraykuqa (Rom. 12:2). Chaywanpas kallpachakushanallanchismi kay pacha qhapaq kaykunata ama munapayananchispaq, qhelli ruwaykunamantapas cuidakunanchispaqwan. Mana chayqa pisiyapunmanmi Diospa gobiernonta munakuyninchis (Prov. 4:23; Mat.  5:27-29). Kunanqa Diospa qowasqanchis juj kaq regalomantañataq yachasun, chaypas yanapawasunmi chay gobiernonta astawan munakunanchispaq.

8. a) ¿Imaraykun Pablo predicacionta compararan ‘t’uru mankapi qhapaq kaywan’? b) ¿Imaynatan Pablo rikuchiran predicacionta munakusqanta?

⁸ Llapanchismi Diospa gobiernonmanta runakunaman willamunanchis, chaytan Jesús kamachiran (Mat. 28:19, 20). Apóstol Pablopas anchatan chayta valoraran, chaymi niran: “T’uru mankakuna jinaña kayku chaypas, chay qhapaq kayqa noqaykupin kashan”, nispa (2 Cor. 4:7; 1 Tim. 1:12). Arí, juchasapakunaña kanchis chaypas, Diospa simintan apashanchis. Chaymi tukuy atisqanchista kallpachakunanchis chay qhapaq kayta runakunaman chayachinanchispaq. Pablopas chaytan ruwaran, chaymi niran: “Tukuy imaymanatan ruwani allin willakuykunarayku, chhaynapi chay willakuykunata lliuman willanaypaq”, nispa (1 Cor. 9:23). Rikusqanchis jina Pabloqa munakuranmi Diosmanta willayta, chaymi tukuy atisqanta ruwaran runakunata yachachinanpaq (leey Romanos 1:14, 15; 2 Timoteo 4:2). Chaymantapas predicacionta munakusqanraykun tukuy imaymanata aguantaran (1 Tes. 2:2). ¿Imaynatan noqanchispas rikuchisunman predicacionta munakusqanchista?

9. ¿Imakunata ruwaspan rikuchisunman predicacionta munakusqanchista?

⁹ Pablo jinan tukuy atisqanchista ruwananchis maypiña kaspapas Diosmanta rimashanallanchispaq. Arí, ñaupa cristianokuna jinan Diosmantaqa willashanallanchis wasin-wasinta, maypichus runakuna kashan chaypi, may purisqanchispi ima (Hech. 5:42; 20:20). Llapa runakunamanmi Diosmantaqa willananchis. Atikuqtinqa yaqapaschá precursor auxiliar otaq precursor regular kasunman. Chaymantapas yaqapaschá juj simita yachasunman, otaq juj nacionta risunman chaypi yanapakuq (Hech. 16:9, 10).

10. ¿Ima bendicionkunatan Irene chaskiran Diospaq tukuy sonqo llank’asqanmanta?

¹⁰ Irenemanta rimasun, payqa Estados Unidosmantan. Rusiamanta jamuq runakunamanmi payqa Diosmanta yachachiyta munasharan. Chaymi 1993 watapi ruso rimaq iñiqmasikuna grupoman ripusqa. Chay tiempopiqa yaqa 20 runakunallas chay grupopi kasqa. 20 wataña chaypi yanapakusharan chaypas manaraqsi allintaraqchu chay simita rimasqa. Chaywanpas 15 runakunatas yanapasqa Diosta servinankupaq. Paykunamanta wakinqa Betelpis llank’ashanku, wakintaq precursorkuna kanku, jujkunataq umalliqkuna kanku. Paymi nin: “Noqaq piensasqayman jinaqa manan imapas kusichisunkimanchu runakunata Diosmanta yachachiy jinaqa”, nispa. Kunanqa Nueva York llaqtapiqa soqta  congregacionkunan kashan ruso rimaypi. Wakin chhayna ruwaqkunatapas Jehová Diosqa yanapashanmi.

11. ¿Imakunan kanqa sasachakuykunaña kaqtinpas tukuy sonqowan predicaqtinchis?

¹¹ Predicacionta munakusun chayqa Pablo jinan mana imawanpas jark’achikusunchu (Hech. 14:19-22). 1930 watamanta 1944 watakaman Estados Unidospi nishuta predicacionta jark’akuranku. Hermanokunan ichaqa mana jark’achikurankuchu. Aswanmi libre predicanankupaq askha kutita tribunalkunaman riranku. “Tribunal Supremo de Estados Unidos” nisqapi juiciota ganasqankumantan hermano Nathan Knorr niran: “Qankuna Diosmanta willaspa puriqkunatan ‘gracias’ niykichis kay juiciota ganakusqanmanta. Manachus qankuna predicaspa puriwaqchis karan chayqa manan ganasunmanchu karan. Arí, kay juicioqa ganakun Señorpa llaqtan khayna qaqata sayasqanwanmi”, nispa. Kay tiempopipas mana sayk’uspa predicakusqanwanmi chhayna juiciokunata ganakushan. Chhaynaqa Diosmanta willayta munakusun chayqa manan imawanpas jark’achikusunchu.

12. ¿Imata ruwananchispaqmi tukuy atisqanchista kallpachakunanchis?

¹² Sichus predicacionta ancha allin “qhapaq kayta” jina rikusun chayqa manan horata ruwanallapaqchu predicaq lloqsisun. Aswanmi tukuy atisqanchista kallpachakusun “allin willakuykunata allintapuni” willananchispaq (Hech. 20:24; 2 Tim. 4:5). Ichaqa, ¿imamantan jujkunaman yachachisun? Chaytan kunan yachasun.

13, 14. a) ¿Ima allin kaqkunamantan Jesús rimasharan Mateo 13:52 textopi? b) ¿Imatan ruwananchis qhapaq kayninchiskunata otaq yachayninchista astawan yapananchispaq?

¹³ Jesusmi Jehová Diosta niran: “Simiykin cheqaq kaqqa”, nispa (Juan 17:17).  Chay cheqaq yachachikuykunatan Diosqa noqanchisman yachachiwaranchis, chaymi kinsa kaq regalon. Chaymantan kunan yachasun. Yachasqanchis jina Diosqa qoykukuq Diosmi. Chaymi Biblia estudiayta qallarisqanchismantapacha, revistakunapi, asambleakunapi, juñunakuykunapi ima imaymanakunata yachachiwaranchis. Chhaynapin noqanchisqa juñuranchis “mauk’a” qhapaq kaykunata “mosoq” qhapaq kaykunatawan (leey Mateo 13:52). Sichus Diospa siminta astawan maskhasun otaq estudiasun chayqa, astawanmi qhapaq kayninchiskuna yapakunqa (leey Proverbios 2:4-7). Ichaqa, ¿imaynatan chayta ruwasunman?

¹⁴ Chaypaqqa Bibliata, revistakunata iman allinta estudiananchis, tukuy yuyaytan chayman churananchis. Chhaynapin ñaupaqpi mana yachasqanchiskunata yachasun, chaykunataq “mosoq” jina noqanchispaq kanqa (Jos. 1:8, 9; Sal. 1:2, 3). 1879 watapi, julio killapi lloqsimuq Qhawaq revistapin niran: “Cheqaq kaqqa ch’in wayq’opi imaymana qora sonqopi t’ika jinan. Chayta tariyta munanki chayqa tukuy yuyaywanmi maskhanayki. [...] Pallayta munanki chayqa k’umuykunaykin. Ichaqa ama juj t’ikallawanchu contentakuy. [...] Astawan maskhay pallakunaykipaq”, nispa. Chhaynaqa tukuy yuyaywanmi maskhananchis Bibliapi cheqaq yachachikuykunata.

15. a) ¿Imakunatan nisunman “mauk’a yachachikuy” nispa? b) ¿Ima yachachikuymi sonqoykiman chayaran?

¹⁵ Biblia estudiayta qallarishaspaqa imaymana sumaq yachachikuykunatan yacharanchis ¿riki? Chay qallariypi yachasqanchiskunatan nisunman “mauk’a” yachachikuykuna nispa. Chaykunan kashan Jehová Dios kay pachata runakunatapas kamasqanta yachasqanchis, munakuwasqanchisrayku wawan kachamusqanta yachasqanchis, Diospa gobiernon millay kausay tukuchinanta yachasqanchis, kay pachapi munay kausay kananta yachasqanchis ima (Juan 3:16; Apo. 4:11; 21:3, 4).

16. ¿Imatan ruwananchis Bibliamanta ima yachasqanchispas astawan sut’inchakamuqtin?

¹⁶ Mayninpiqa astawanmi Bibliapi wakin yachachikuykuna sut’inchakamushan. Chaymi ima yachasqanchispas sut’inchakamuqtinqa allinta chayta estudiananchis, chaypitaqmi piensananchispas (Hech. 17:11; 1 Tim. 4:15). Chaymantapas manan imas cambiashan chayllatachu entiendenanchis aswanpas allintan entiendenanchis imaraykus imapas cambiashan, imaynas chay cambio kashan chayta. Llapa chaykunata allinta entiendesun chayqa qhapaq kaykuna jinan noqanchispaq kanqa. Ichaqa, ¿imapin yanapawasun chayta ruwasqanchis?

17, 18. ¿Imaynatan santo espíritu yanapawanchis?

¹⁷ Jesuspa nisqan jina santo espiritun tukuy ima yachasqanchistapas yuyarichiwanchis (Juan 14:25, 26). ¿Imaynatan chayta ruwan? Chaypaq yachasun 1970 watapi imachus Peterta pasaran chayta. Payqa 19 watallanpiraq kashaspas Gran Bretañapi Betelman jaykusqa. Juj kutinsi payqa wasin-wasinta predicashaspa juj sunkhasapa runawan tupasqa. Chay runaqa judiokunaq umallinsi kasqa,  paytas Peterqa nisqa: “Munawaqchu Bibliamanta yachayta” ,nispa. Chaysi chay runaqa nisqa: “A ver joven niway, ¿ima simipin Daniel libro qelqasqa karan?”, nispa. Jinas Peterqa nisqa “wakinqa arameo rimaypin” nispa. Chayta niqtinsi chay runaqa anchata admirakusqa. Peter kikinmi nin: “Noqapas paymanta aswan admirasqan kasharani, ‘¿imaynapitaq chaytari yacharani?’ nispan nisharani. Chaymi wasiman kutispayqa chayraq lloqsimuq Qhawaq, ¡Rijch’ariy! revistakunata qhawarani. Jujnin revistapin willasqa Daniel libropi wakin capitulokunaqa arameo rimaypi qelqakusqanmanta”, nispa (Dan. 2:4). Chaypi rikusqanchis jina, imakunatachus leeranchis chaytan santo espirituqa yuyarichiwanchis (Luc. 12:11, 12; 21:13-15).

¹⁸ Sichus qhapaq kaykunata jina cheqaq yachachikuyninta waqaychasun chayqa, astawanmi yachayta munasun ñaupaq yachachikuykunata mosoq yachachikuykunatapas, allin preparasqataqmi kasunchis jujkunaman yachachinanchispaqpas. Chaymantapas may agradecesqan kasunchis Diosninchispa yachay qowasqanchismanta.

19. ¿Imaraykun allinta cuidananchis Diosmanta jamuq qhapaq kayninchiskunata?

¹⁹ Satanaspas gobiernasqan pachapas tukuy atisqankutan kallpachakushanku kaypi yachasqanchis kinsantin qhapaq kayninchiskunata qonqachiwananchispaq, chaymi allinta cuidakunanchis. Mana chayqa qolqe maskhayman, munasqanchista ruwayman iman sonqonchis aysaruwasunman. Apóstol Juanpa nisqan jina “kay pacha kausayqa pasashanmi, jinallataq millay munapayayninkunapas” (1 Juan 2:15-17). Chaymi noqanchisqa astawanraq kallpachakunanchis Diosmanta jamuq qhapaq kaykunata munakunanchispaq.

20. ¿Imatan ruwananchis Diospa qowasqanchis qhapaq kaykunata allinta cuidananchispaq?

²⁰ Diospa gobiernonta munakushallay, tukuy sonqoykiwan Diosmanta willashallay, Bibliatapas estudiashallay. Chaykunata ruwanki chayqa ‘janaq pachapin qhapaq kaykunata juñunki’ “chaymanqa manan suwapas chayanchu, manallataqmi chaypiqa thutapas kanchu”. Jesuspa nisqan jina “maypichus qhapaq kayniykichis kashan, chayllapitaqmi sonqoykichispas kashan” (Luc. 12:33, 34).