1, 2. (a) Eaa te toru apinga akaperepere no ko mai ia Iehova? (e) Eaa ta tatou ka akamanako i teia atikara?

KO IEHOVA tei apinganui rava atu i te ao katoa e pini ua ke. Nona anake te au mea katoa. (1 Paraleipomeno 29:11, 12) Noatu ra e tu oronga ua to Iehova ki te katoatoa. Mataora tikai tatou e maata te apinga pae vaerua tana i oronga mai no tatou! Eaa teia au apinga? Ko te (1) Patireia o te Atua, (2) angaanga orometua, e te (3) tuatua mou akaperepere i roto i tana Tuatua. Inara me kare tatou e matakite, ka ngaropoina ia tatou te puapinga o teia au apinga i te tuatau ka aereia. Ka anoanoia tatou kia akamaara ua rai i tona puapinga ma te akaoonu atu i te inangaro i te reira no te mea karanga a Iesu e, “te ngai oki i vaioiaʼi to kotou na apinga, ka riro katoa i reira to kotou ngakau.”​—Luka 12:34.

² Ka akara ana tatou akapeea me akaketaketa ua rai i to tatou aroa e te āriki rekareka no te Patireia, te angaanga orometua, e te tuatua mou. Me pera tatou, e akamanako  ana akapeea koe te akaoonu atu i toou inangaro no te apinga pae vaerua.

3. Eaa ta te tangata i roto i ta Iesu tua i rave kia oko i te poe okotai? (Akara i te tutu mua.)

³ E tatau ia Mataio 13:45, 46. Akakite a Iesu i te tua no tetai tangata e oko ra i te poe memeitaki. Tetai rā, kua kitea e ia tetai poe meitaki rava atu i te au poe ke tana i kite ana. No tona inangaro maata i teia poe, kua oko aia i tana apinga pouroa kia rauka mai i te reira. I toou manako, mei teaa rai te puapinga o te poe kiaia?

4. Eaa ta tatou ka puareinga ua i te rave no te Patireia?

⁴ Eaa ta tatou ka apii mai mei ta Iesu tua? Aite rai te tuatua mou o te Patireia o te Atua ki te poe akaperepereia. Me akaperepere tatou i te Patireia mei te tangata rai tei akaperepere i te poe, ka puareinga ua tatou i te akaatinga i te au mea ravarai kia riro mai ei aronga no te Patireia. (E tatau ia Mareko 10:28-30.) Ka akara ana tatou akapeea tetai nga tangata te rave anga i teia.

5. Eaa ta Zakaio i rave no te Patireia?

⁵ E tangata koʼi tero a Zakaio. Kua apinganui aia no te takinga kino i etai ke kia rauka mai te moni. (Luka 19:1-9) I tetai rā, kua akarongo a Zakaio kia Iesu e tuatua ra i te Patireia. Kua reka tikai aia i tana i rongo e kua inangaro i te taui i tona tu. Karanga aia: “E te Atu, i na, e oronga au i te afa i toku nei apinga no te tangata ngere; e i takinga-kino ana au i etai ke i tetai mea ngiti ake, kia taki a ïa taku e akaoki atu nona.” Akaoki a Zakaio i te moni a te tangata e kua akakore atu i te tu noinoi.

6. Eaa te au tauianga ta tetai vaine i rave, e no teaa ra aia i akapera ai?

⁶ Te rongo anga tetai vaine i te Patireia i te au mataiti i topa, te noo kapiti ra aia ki tetai vaine. Pera katoa koia te peretiteni no tetai akaaereanga tei aruaru i te tikaanga no te pirianga tane ki te tane e te vaine ki te vaine. Inara i tona apiianga i te Pipiria e kua kite i te puapinga o te Patireia o te Atua, kua mārama aia e ka anoanoia kia rave i te au tauianga maata i tona oraanga. (1 Korinetia 6:9, 10) No tona inangaro ia Iehova, kua akaruke aia i te reira akaaereanga e kua akamutu i tona pirianga ki tera vaine. Papetitoia aia i te mataiti 2009, e i tera mai mataiti, kua riro mai ei painia tamou. Kua rave aia i teia tauianga no te mea e maata atu tona inangaro ia Iehova i tetai ua atu ona anoano tika kore.​—Mareko 12:29, 30.

7. Akapeea tatou me akaketaketa i to tatou inangaro i te Patireia o te Atua?

⁷ Kia riro ei aronga no te Patireia o te Atua, kua rave te maata anga ia tatou i te  au tauianga i roto i te oraanga. (Roma 12:2) Inara kare i akamutu ake te reira. Auraka tatou e tuku i to tatou inangaro no te Patireia kia akaparuparuia e tetai ua atu tumu, mei te anoano i te apinga pae kopapa e te ainga tau kore. (Maseli 4:23; Mataio 5:27-29) Kia vai ketaketa ua to tatou inangaro i te Patireia o te Atua, kua oronga mai a Iehova i tetai atu apinga akaperepere.

8. (a) No teaa ra a Paulo i akataka ai i te angaanga orometua “i taua apinga nei i te ariki karakaraea nei”? (e) Akapeea a Paulo te akaari anga i tona inangaro no te angaanga orometua?

⁸ Kua oronga mai a Iesu i te apainga kia tutu aere e te apii i te nuti meitaki o te Patireia o te Atua. (Mataio 28:19, 20) Kua akataka mai te apotetoro ko Paulo i te angaanga orometua ei apinga oko maata i roto i te ariki karakaraea. (2 Korinetia 4:7; 1 Timoteo 1:12) No to tatou tu apa ua, aite rai tatou ki te ariki karakaraea. Ko te karere ta tatou e tutu aere nei, aite rai ki te apinga oko maata no te mea ka oronga mai i te ora mutukore no tatou e te aronga tei akarongo mai. No reira a Paulo i karanga ai: “No te evangelia i peraʼi au, kia rauka katoa iaku i ta te evangelia ra.” (1 Korinetia 9:23) Kua angaanga maroiroi a Paulo i te apii i te Patireia o te Atua ki tetai ke. (E tatau ia Roma 1:14, 15; 2 Timoteo 4:2.) Riro tona inangaro no te nuti meitaki ei tauturu iaia kia tutu aere noatu te takinokino anga pakari. (1 Tesalonia 2:2) Akapeea tatou me aru i to Paulo inangaro no te angaanga orometua?

9. Eaa tetai au ravenga ka akaari tatou i te inangaro no te angaanga orometua?

⁹ Tetai mataara ta Paulo i akaari i tona inangaro i te angaanga orometua koia te taangaanga i te au atianga ravarai kia tuatua ki tetai ke. Mei ia Paulo e te au Kerititiano mua, ka akakite tatou i te nuti meitaki ki te tangata mei tera are ki tera are, te ngai tangata, e tetai ua atu ngai ka kitea ratou. (Angaanga 5:42; 20:20) Ka kimi ravenga tatou i te tutu aere ki te tangata e manganui. Me ka rauka, penei ka tavini tatou ei painia tauturu me kore ei painia tamou. Penei ka apii tatou i te reo ke, ka neke ki tetai ngai ke, me kore ki te enua ke.​—Angaanga 16:9, 10.

10. Eaa te puapinga tei rauka ia Irene no te angaanga pakari i te akakite i te nuti meitaki?

¹⁰ Ko Irene, e tuaine kare i akaipoipo i Marike, kua inangaro aia i te akakite i te nuti meitaki ki te iti tangata Rutia. No reira i te 1993, kua piri aia ki tetai pupu reo Rutia i New York City. I tera tuatau, e 20 ua rai papuritia i roto i tera pupu. E 20 mataiti i muri mai, karanga a Irene, “Kare rai au e kite meitaki i te tuatua reo Rutia.” Noatu ra, kua tauturu a Iehova iaia e te au papuritia kia tutu aere ki te tangata i tera reo. Tei tupu mai, e ono putuputuanga reo Rutia i New York City i teia rā. E maata te tangata tei apii i te Pipiria kia Irene, e e 15 tei papetitoia. Tetai pae ia ratou te tavini nei i Betela, ei au painia tamou e ei aronga pakari. Karanga a Irene, “Me akamanako au i te au akakoroanga ke taku ka aruaru atu, i toku manako kare atu e mea ke te ka apai mai i te mataora kiaku.” Akaperepere maata a Irene i tana angaanga orometua!

11. Eaa te ka tupu me tutu aere tatou noatu te takinokino anga?

 ¹¹ Me akaperepere tatou i te angaanga orometua, ka riro tatou mei ia Paulo rai i te tutu aere noatu te takinokino anga. (Angaanga 14:19-22) Ei akaraanga, mei te mataiti 1930 ki te 1944, kua takinokino pakariia to tatou au taeake i Marike. Noatu ra kua tutu aere ratou. Te tauta anga te aronga mana taoonga i te tāpu ia ratou, kua apai te au taeake ia ratou ki te akavaanga e kua re. I te 1943, taiku mai te Taeake Knorr i tetai autuanga i roto i te akavaanga i U.S. Supreme Court. Karanga aia e kare e oroanga i roto i teia Akavaanga naringa te au taeake i akamutu i te tutu aere. Karanga katoa aia no te mea e maata te au taeake takapini i teianei ao tei tutu ua rai, akapapu ratou e kare te takinokino anga e puapingaia. Kua autu katoa te au taeake i te enua ke i te akavaanga mei teia te tu. Ae, no to tatou inangaro i te angaanga orometua kare tatou e akamutu i te tutu aere noatu te takinokino anga.

12. Eaa taau ka tauta i te rave?

¹² Me akaperepere tatou i te angaanga orometua, kare tatou e manata eia ora ta tatou ka tata i runga i to tatou ripoti. Ka rave tatou i te ka rauka ia tatou ‘kia akakite ua atu i te evangelia.’ (Angaanga 20:24; 2 Timoteo 4:5) Eaa ta tatou ka apii ki etai ke? Akamanako i tetai akaou apinga akaperepere no ko mai i te Atua.

13, 14 Eaa te “putunga” ta Iesu e akataka maira ia Mataio 13:53, e akapeea tatou me akaki i te reira?

¹³ Te toru o te apinga akaperepere ta Iehova i oronga mai koia oki te tuatua mou pouroa ta tatou i apii. Ko Iehova te Tumu o te tuatua mou. (2 Samuela 7:28; Salamo 31:5) Ei Metua oronga ua, ka inangaro  aia ia tatou kia apii i teia tuatua mou. Tae mai ki teia rā, e maata ta tatou i apii na te tatau anga i tana Tuatua e ta tatou au puka, e te tae anga ki te uruoaanga, te akaputuputuanga, e te au uipaanga i te epetoma. Me akaputu tatou i teia au tuatua mou, ka rauka ia tatou ta Iesu i kapiki e “putunga” tuatua mou, “te apinga ou e te apinga taito.” (E tatau ia Mataio 13:52.) Ka tauturu a Iehova ia tatou kia akaki i to tatou “putunga” apinga me kimi marie tatou i te tuatua mou mei te mea e te kimi ra i te apinga uunaia. (E tatau ia Maseli 2:4-7.) Akapeea tatou me rave i teia?

¹⁴ Ka anoanoia kia apii putuputu i te Pipiria e te au puka e kia rave i te kimikimi anga. Ka tauturu teia ia tatou kia kite i te au tuatua mou “ou,” koia oki te tuatua mou kare tatou i kite ake. (Iosua 1:8, 9; Salamo 1:2, 3) Te makatini mua o Te Punanga Tiaki, neneiia ia Tiurai 1879, akaaiteia te tuatua mou ki te tiare uunaia i roto i te ngangaere. E kitea ai te tiare, ka anoanoia kia kimi matatio i te reira. Me rauka mai te reira, kare e rava ua te tiare okotai. Ka kimi aere aia kia kitea te au tiare e manganui. Pera katoa, kare e rava ua te apii i te tuatua mou okotai. Ka tau tatou kia kimi ua rai i te au tuatua mou kia mārama.

15. No teaa ra tatou ka kapiki ei i tetai au tuatua mou e “apinga taito,” e ko teea i teia taau e akaperepere ra?

¹⁵ Te akamataanga tatou i te apii i te Pipiria, kua apii tatou i te au tuatua mou manea. Penei ka kapiki tatou i te reira e au tuatua mou “taito,” no te mea ko te reira te mea mua ta tatou i apii. Eaa teia au tuatua mou? Mea mua, kua apii tatou e ko Iehova Tei Anga mai e eaa tona akakoroanga no te tangata. Apii katoa tatou kua tono mai te Atua i tana Tamaiti ki te enua nei kia mate ei atinga oko ei akaora ia tatou mei te ara e te mate. E tetai kua apii tatou na te Patireia o te Atua e takore i te mamae e ka ora tatou e tuatau ua atu i te enua nei ma te au e te mataora.​— Ioane 3:16; Apokalupo 4:11; 21:3, 4.

16. Eaa ta tatou ka rave me taui to tatou mārama anga i te tuatua mou Pipiria?

¹⁶ I tetai taime, ka taui to tatou mārama anga i te totou Pipiria me kore irava. Me tupu teia, e mea puapinga kia akanoo i te taime no te apii i te mārama ou e kia akamanako oonu. (Angaanga 17:11; 1 Timoteo 4:15) Eiaa tatou e mārama ua i te tuke i rotopu i te mārama anga taito e te mea ou, mari ra ka anoanoia kia akara meitaki i te au akakite anga rikiriki o te mārama ou. Ka akapapu teia e ka riro te tuatua mou ou ei tuanga i roto i ta tatou putunga tuatua mou Pipiria. No teaa ra i meitaki ei kia rave i te reira?

17, 18 Akapeea te vaerua tapu me tauturu ia tatou?

¹⁷ Apii a Iesu e ka tauturu te vaerua o te Atua ia tatou kia akamaara i te au mea ta tatou i apii. (Ioane 14:25, 26) Akapeea teia te tauturu anga ia tatou me tutu aere i te nuti meitaki? Akamanako i tei tupu ki tetai taeake ko Peter. I te 1970, e 19 ona mataiti e koi akamata akera aia i te tavini i ko i te Betela i Peritane. Te tutu aere ra a Peter mei tera are ki tera are e kua aravei i tetai tangata uruuru vaa. Ui aia ki teia tangata e me ka inangaro aia kia mārama i te Pipiria. E rabi ngati Iuda teia  tangata, e kua poitirere aia e kua manako teia mapu ka rauka i te apii i te Pipiria kiaia. Ei timata ia Peter, kua ui te rabi, “E taku tamaiti, eaa te reo i tataia ai te puka o Daniela?” Karanga a Peter, “Kua tataia tetai au tuanga i te reo Arama.” Maara ia Peter, “Poitirere te rabi kua kite au i te pauanga​—inara e maata atu toku poitirere! Akapeea au i kite ei i te pauanga? Kua oki au ki te kainga e kua akara i Te Punanga Tiaki e te makatini Awake! no te au marama i topa, e kua kite mai au i tetai atikara tei akamārama e kua tataia a Daniela i te reo Arama.” (Daniela 2:4) Ae, ka tauturu te vaerua tapu ia tatou kia akamaara i te au manako ta tatou i tatau tei akaputuia ki roto i ta tatou putunga apinga.​—Luka 12:11, 12; 21:13-15.

¹⁸ Me akaperepere i te au tuatua mou no ko mai ia Iehova e me āriki i te reira, ka akaputu ua rai tatou i te reira ki roto i ta tatou putunga apinga. Te maata atu i te rave i teia, ka papa i reira tatou i te apii i tetai ke.

19. No teaa ra tatou ka paruru ei i ta tatou apinga pae vaerua?

¹⁹ I teia atikara, kua apii tatou i te puapinga kia akaperepere i te au apinga pae vaerua. Inara kia matakite tatou auraka e akatika ia Satani e tona ao kia akaparuparu i to tatou inangaro i te au apinga akaperepereia. Me kare tatou e matakite, penei ka akaanga keia tatou e te au apinga mei te angaanga moni maata, te moemoea o te oraanga apinganui, e te akatietie i ta tatou apinga. Akamaara mai te apotetoro ko Ioane ia tatou e te ngaro ke nei teianei ao e ta te reira ka oronga mai. (1 Ioane 2:15-17) Ko teia te tumu ka tau kia āriki rekareka i te au apinga pae vaerua e kia paruru i te reira.

20. Eaa taau ka rave kia paruru i taau apinga pae vaerua?

²⁰ Kia puareinga ua i te akaatinga i tetai ua atu apinga te ka akaparuparu i toou inangaro no te Patireia o te Atua. Tauta kia tutu maroiroi, e auraka e ngere i te inangaro no te angaanga orometua. Kimi ua rai i te au tuatua mou Pipiria. Me pera koe, te akaputu ra koe i te “apinga kare e pou ki runga i te rangi, i te ngai e kore e taea e te keia, e kare e pou i te uu. Te ngai oki i vaioiaʼi to kotou na apinga, ka riro katoa i reira to kotou ngakau.”​—Luka 12:33, 34.