1, 2. (α) Καλά τριν πολύτιμους θησαυρούς ντινάς-αμέν ο Ιεχωβά; (β) Σο κα ντικχάς ανταλέ μαθημάστε;

Ο ΙΕΧΩΒΑ ισί ο πιο χουλανό κο σύμπαν. Σαρέ ισί λέσκε. (1 Χρονικών 29:11, 12) Αλλά ο Ιεχωβά ντέλα αντράλ πι γκίσταρ σαριλέντε. Καζόμ μπαρί εκτίμηση τθεράσα σο ντινάς-αμέν μπουτ πι πνευματικέ θησαυρόνταρ! Καλά ισί μερικοί θησαυροί σο ντινάς-αμέν; Ισί (1) η Βασιλεία ι Ντεβλέσκι, (2) αμαρό έργος ντα (3) ο πολύτιμες αλήθειες σο ισί λέσκε Λαφίστε. Άμα όμως να ισινάμ προσεκτικοί, καζόμ νακχέλα ο καιρός μπορεί τι μπιστράς ι μπαρί αξία σο τθερένα ανταλά θησαυροί. Πρέπει τι ντας-αμέν γκοντί λένγκι αξία ντα τι κεράς πιο μπαρί αμαρί αγάπη λένγκε επειδή, σαρ βακερντάς ο Ιησούς, «οτθέ σο ισί τουμαρό θησαυρός, οτθέ κα αβέλ τουμαρό γκι-ντα».—Λουκάς 12:34.

² Ακανά κα ντικχάς σαρ μπορίνασα τι ατσσικιαράς ζουρανί αμαρί αγάπη ντα αμαρί εκτίμηση για τη Βασιλεία, για το έργος ντα για την αλήθεια. Καζόμ κα κεράς-λες ανταβά, σκεφτίνεν σαρ μπορίνενα τουμέν τι μανγκέν πιο μπουτ ανταλά πνευματικοί θησαυροί.

3. Σο ισινέ έτοιμος τι κερέλ ο τζενό κι ιστορία κι Ιησούσκι για τι κινέλ εκ μαργαριτάρι; (Ντικχ ι φωτογραφία σο ισί κι αρχή.)

³ Διαβάνεν Ματθαίος 13:45, 46. Ο Ιησούς βακερντάς ι ιστορία εκχέ τζενέσκι σο κινέλας ντα μπικινέλας μαργαριτάρια. Εκ ντιβές, οντουβά τζενό αρακχλάς εκ μαργαριτάρι σο τθερέλας πιο μπαρί αξία σαρέ κατά γιαβερά μαργαριτάρια σο ντικχλάας. Μανγκέλας αζόμ μπουτ οντουβά μαργαριτάρι σο μπικιντάς σαρέ οντουλά σο τθερέλας για τι κινέλ-λες. Μπορίνενα τι αγαβέν καζόμ σημαντικός ισινέ λέσκε οντουβά μαργαριτάρι;

4. Σο ισινάμ έτοιμοι τι κεράς για τη Βασιλεία;

⁴ Σο μπορίνασα τι σικλιάς κατά ιστορία σο βακερντάς ο Ιησούς; Η Βασιλεία ι Ντεβλέσκι ισί σαρ εκ μαργαριτάρι σο τθερέλα μπαρί αξία. Άμα μανγκάσα-λα αντικάς σαρ μανγκέλας ο μαργαριτάρι οντουβά τζενό, κα αβάς έτοιμοι τι μουκχάς-λεν σαρέ για τι αρχίνας ντα τι συνεχίνας τι υποστηρίνας ι Βασιλεία. (Διαβάνεν Μάρκος 10:28-30) Για τι ντικχάς σαρ κερντέ-λες ανταβά ντούι τζενέ.

5. Σο ισινέ έτοιμος τι κερέλ ο Ζακχαίος για τη Βασιλεία;

⁵ Ο Ζακχαίος γκίντελας φόροι. Αβιλόας χουλανό επειδή λέλας ο λοβέ ι τζενένγκε. (Λουκάς 19:1-9) Όμως εκ ντιβές, ο Ζακχαίος ασουντάς ι Ιησούς τι κερέλ λάφι για τη Βασιλεία. Μπεϊντιντάς αζόμ μπουτ ο λάφια σο ασουντάς σο μανγκλάς τι αλλάνελ σαρί πι ζωή. Βοβ βακερντάς: «Ντικχ! Ο μισά κατά πράγματα σο τθεράβα, Κύριε, κα νταβ-λεν κο τσορορέ, ντα σαρέ οντουλά σο λιντόμ κατά τζενέ, κα νταβ-λεν παλάλ σταρ φαρ πιο μπουτ». Ο Ζακχαίος ντινάς παλάλ ο λοβέ σο λιντάας κατά τζενέ ντα τσσιναντάς τι μανγκέλ μπουτ πράγματα πι νεαυτόσκε.

6. Σο αλλαγές κερντάς εκ τζουβέλ, ντα σόσκε;

⁶ Πριν μερικά μπρεσά, όταν εκ τζουβέλ ασουντάς για τη Βασιλεία, τθερέλας-λεν εκχέ τζουβλιάσαρ. Επίσης ισινέ πρόεδρος σε εκ οργάνωση σο υπερασπίνελας ι τζενέν σο τζάνα μουρσά μουρσέντζαρ ντα τζουβλιά τζουβλίντζαρ. Αλλά όταν διαβαντάς ι Γραφή ντα σικλιλί καζόμ αξία τθερέλα η Βασιλεία ι Ντεβλέσκι, αγαντάς ότι έπρεπε τι κερέλ μπαρέ αλλαγές πι ζωγιάτε. (1 Κορινθίους 6:9, 10) Επειδή μανγκλάς μπουτ ι Ιεχωβάς, νασλί κατά οργάνωση ντα τσσιναντάς ι σχέση σο τθερέλας οντουλέ τζουβλιάσαρ. Μπολντιλί κο 2009, ντα ο γιαβέρ μπρες αβιλί σκαπάνισσα. Κερντάς ανταλά μπαρέ αλλαγές επειδή λάκι αγάπη ι Ιεχωβάσκε ισινέ πιο μπαρί σαρέ κατά μπέτι πράγματα σο μανγκέλας.—Μάρκος 12:29, 30.

7. Σαρ μπορίνασα τι ατσσικιαράς ζουρανί αμαρί αγάπη για τη Βασιλεία ι Ντεβλέσκι;

⁷ Για τι υποστηρίνας ι Βασιλεία ι Ντεβλέσκι, μπουτ τζενέ αμένταρ έπρεπε τι αλλάνας ντιπ αμαρί ζωή. (Ρωμαίους 12:2) Αλλά αμαρό αγώνας συνεχίνελα. Δεν πρέπει τι μουκχάς ούτε κο υλικά πράγματα ούτε κο μπίλατζανε πράγματα ούτε καεκχέ γιαβερέ πραγμάστε τι σουρντιαρέλ αμαρί αγάπη για τη Βασιλεία. (Παροιμίες 4:23· Ματθαίος 5:27-29) Για τι βοηθίνελ-αμέν  τι ατσσικιαράς ζουρανί αμαρί αγάπη για τη Βασιλεία ι Ντεβλέσκι, ο Ιεχωβά ντινάς-αμέν ατζέκ εκ πολύτιμος θησαυρός.

8. (α) Σόσκε βακερντάς ο απόστολος Παύλος ότι αμαρό έργος ισί σαρ εκ «θησαυρός σε πήλινα σκεύη»; (β) Σαρ σικαντάς ο Παύλος ότι μανγκέλας ο έργος;

⁸ Ο Ιησούς ντινάς-αμέν ο διορισμός τι βακεράς ντα τι σικλιαράς ι γιαβερέν ο λατσσέ αμπέρια για τη Βασιλεία ι Ντεβλέσκι. (Ματθαίος 28:19, 20) Ο απόστολος Παύλος βακερντάς ότι ο έργος ισί σαρ εκ «θησαυρός σε πήλινα σκεύη», σαρ ισί ο κχορέ. (2 Κορινθίους 4:7· 1 Τιμόθεο 1:12) Επειδή ισινάμ ατελείς, ισινάμ σαρ οντουλά κχορέ. Αλλά ο έργος σο κεράσα ισί σαρ εκ πολύτιμος θησαυρός επειδή μπορίνελα τι ανέλ ζωή για πάντα αμένγκε ντα οντουλένγκε σο ασουνένα-αμέν. Οτθάρ ο Παύλος βακερντάς: «Κεράβα τα πάντα για τι μπορίναβ τι βακεράβ ο λατσσέ αμπέρια γιαβερένγκε-ντα». (1 Κορινθίους 9:23) Ο Παύλος μαρέλας-πες τι σικλιαρέλ ι γιαβερέν για τη Βασιλεία ι Ντεβλέσκι. (Διαβάνεν Ρωμαίους 1:14, 15· 2 Τιμόθεο 4:2) Η αγάπη σο τθερέλας για το λατσσέ αμπέρια βοηθιντάς-λες τι συνεχίνελ ο έργος ατζέ-ντα όταν τθερέλας μπαρό διωγμός. (1 Θεσσαλονικείς 2:2) Σαρ μπορίνασα τι τθεράς ι αγάπη σο τθερέλας ο Παύλος για το έργος;

9. Σαρ μπορίνασα τι σικαβάς ότι μανγκάσα ο έργος ι Ντεβλέσκο;

⁹ Εκ τρόπος σο σικαβέλας πι αγάπη ο Παύλος για το έργος ισινέ ότι σε κάθε ευκαιρία κερέλας λάφι κο γιαβερά. Σαρ ο Παύλος ντα ο πρώτοι Χριστιανοί, αντικάς αμέν-ντα βακεράσα ο λατσσέ αμπέρια κχερ κχερέστε, κο ντρομά, κο πλατείες ντα σαρέ κο τθανά σο μπορεί τι αρακχάς τζενέν. (Πράξεις 5:42· 20:20) Ρόντασα τρόπους τι ασουνέν ο λατσσέ αμπέρια καζόμ πιο μπουτ τζενέ αβέλα-πες. Ντα ίσως μπορίνασα τι λας ο βοηθητικός ή ο τακτικός σκαπανικός. Ή μπορεί τι σικλιάς εκ γιαβέρ τσσιπ, τι τζας κάπου γιαβερτθέ αντρέ αμαρέ τθεμέστε ή εκχέ γιαβερέ τθεμέστε.—Πράξεις 16:9, 10.

10. Σαρ ευλογισάλι η Αϊρίν επειδή μαρντάς-πες τι βακερέλ ο λατσσέ αμπέρια;

¹⁰ Η Αϊρίν, εκ εργένη πφεν κο Ηνωμένες Πολιτείες, μανγκέλας τι βακερέλ ο λατσσέ αμπέρια τζενέντε σο κερένας λάφι ι ρωσική τσσιπ. Οτθάρ, κο 1993 γκιλί σε εκ ρωσικός όμιλος κι Νέα Υόρκη. Αζομάν, οντουβά όμιλος τθερέλας σάντε 20 πφραλέν. Μετά από 20 μπρεσά, η Αϊρίν βακερντάς: «Μέχρι ακανά, να κεράβα μπουτ λατσσές λάφι ρωσικά». Όμως, ο Ιεχωβά βοηθιντάς εμ την Αϊρίν εμ γιαβερέ πφραλέν τι κερέν ο έργος οντουλέ τσσιμπάτε. Ο αποτέλεσμας ισί ότι αντιβές υπαρχίντιβενα σιοβ ρωσικές εκκλησίες κι Νέα Υόρκη. Η Αϊρίν κερντάς μελέτη μπουτέ τζενέν, ντα 15 λένταρ μπολντιλέ. Μερικοί οντουλέ πφραλένταρ ισί Μπεθελίτες, σκαπανείς ντα πρεσβύτεροι. Η Αϊρίν βακερέλα: «Όταν σκεφτίναβα γιαβερά στόχους σο κα μπορίναβας τι τσσουβάβ, καέκ να κα μπορίνελας τι ντελ-μαν πιο μπουτ χαρά». Βα, ντικχέλα πο έργος σαρ εκ θησαυρός!

11. Καλά ισί ο αποτελέσματα όταν συνεχίνασα τι βακεράς ο λατσσέ αμπέρια ατζέ-ντα όταν τθεράσα διωγμός;

 ¹¹ Άμα ντικχάσα αμαρό έργος σαρ εκ θησαυρός, κα μοιάζας κο απόστολος Παύλος ντα κα συνεχίνας τι βακεράς ο λατσσέ αμπέρια ατζέ-ντα όταν τθεράσα διωγμός. (Πράξεις 14:19-22) Για παράδειγμας, κατά 1930 μέχρι κο 1944, αμαρέ πφραλά κο Ηνωμένες Πολιτείες τθερένας μπαρό διωγμός. Αλλά συνεχιντέ τι βακερέν ο λατσσέ αμπέρια. Όταν ο τζενέ σο τθερένας εξουσία προσπαθιντέ τι τσσιναβέν-λεν, αμαρέ πφραλά γκιλέ κο δικαστήριος ντα κερδιντέ μπουτ δίκες. Κο 1943, κάνα ο πφραλ Νορ κερντάς λάφι για εκ δίκη σο κερδιντάμ κο Ανώτατος Δικαστήριος κο ΗΠΑ, βακερντάς ότι να κα αβέλας καέκ δίκη οντουλέ δικαστηριόστε άμα ο πφραλά να κα συνεχίνενας ο έργος. Επίσης βακερντάς ότι, επειδή ο πφραλά σαρό κο ντουνιάς συνεχιντέ ο έργος, σικαντέ ότι ο διωγμός να τθερέλα επιτυχία. Πφραλά γιαβερέ τθεμέντε-ντα κερδιντέ ασακέ δίκες. Βα, επειδή μανγκάσα ο έργος ατζέ-ντα όταν τθεράσα διωγμός, να τσσιναβάσα τι βακεράς ο λατσσέ αμπέρια.

12. Σο ισινέν αποφασισμέ τι κερέν;

¹² Όταν ντικχάσα αμαρό έργος σαρ εκ θησαυρός, να κα τθεράς αμαρέ γκοντιάτε σάντε καζόμ σαάτια κα γραφίνας. Κα κεράς ο πιο λατσσό σο μπορίνασα για “τι βακεράς ο λατσσέ αμπέρια καζόμ πιο μπουτ ντα πιο λατσσές αβέλα-πες”. (Πράξεις 20:24· 2 Τιμόθεο 4:5) Αλλά σο κα σικλιαράς ι γιαβερέν; Ντικχέν ατζέκ εκ τανό θησαυρός κατά Ντεβέλ.

13, 14. Καβά ισί ο «θησαυροφυλάκιος» σο βακερντάς ο Ιησούς κο Ματθαίος 13:52, ντα σαρ πφεράσα-λες;

¹³ Ο τρίτος θησαυρός σο ντινάς-αμέν ο Ιεχωβά ισί ο αλήθειες σο σικλιλάμ. Σαρέ ο αλήθειες αβένα κατά Ιεχωβά. (2 Σαμουήλ 7:28· Ψαλμός 31:5) Σαρ Ντατ σο ντέλα αντράλ πι γκίσταρ, μανγκέλα τι ντελ-αμέν ανταλά αλήθειες. Μέχρι ακανά, σικλιλάμ  μπουτ αλήθειες λέσκε Λαφίσταρ, κατά έντυπα σο τθεράσα, κατά συνελεύσεις ντα κατά συναθροίσεις σο αβένα κάθε εβδομάδα. Καζόμ σικλιάσα ατζέ πιο μπουτ αλήθειες, κα τθεράς οντουβά σο βακερντάς ο Ιησούς: εκ «θησαυροφυλάκιος» σο τθερέλα «πουρανέ ντα νεβέ» αλήθειες. (Διαβάνεν Ματθαίος 13:52) Ο Ιεχωβά κα βοηθίνελ-αμέν τι πφεράς αμαρό «θησαυροφυλάκιος» άμα ρόντασα για αλήθειες σαρ κα ρόνταας για θησαυρούς σο ισί γκεραντέ. (Διαβάνεν Παροιμίες 2:4-7) Σαρ κεράσα-λες ανταβά;

¹⁴ Πρέπει τι διαβάνας συχνά ι Γραφή ντα αμαρέ έντυπα ντα τι ρόντας λατσσές για τι αγαβάς-λεν. Ανταβά κα βοηθίνελ-αμέν τι αρακχάς «νεβέ» αλήθειες, σο να τζανάας πριν. (Ιησούς του Ναυή 1:8, 9· Ψαλμός 1:2, 3) Η πρώτη Σκοπιά, σο νικίστιλι κο Ιούλιος 1879, βακερντάς ότι η αλήθεια μοιάζελα με εκ λουλούδι σο ισί γκεραντό αντρέ κο τσαριά. Για τι αρακχέλ κάποιος εκ ασακό λουλούδι, πρέπει τι ρόντελ λατσσές. Ντα όταν κα αρακχέλ-λες, δεν πρέπει τι σταματίνελ. Πρέπει τι συνεχίνελ τι ρόντελ, για τι αρακχέλ ατζέ πιο μπουτ. Αντικάς αμέν-ντα, όταν αρακχάσα εκ αλήθεια, δεν πρέπει τι σταματίνας. Πρέπει τι συνεχίνας τι ρόντας αντράλ αμαρέ γκίσταρ για τι αρακχάς ατζέ πιο μπουτ αλήθειες.

15. Σόσκε μπορίνασα τι βακεράς ότι μερικές αλήθειες ισί “πουρανέ”, ντα καλά αλήθειες τθερένα πιο μπαρί αξία τουμένγκε;

¹⁵ Όταν αρχισάλαμ τι διαβάνας ι Γραφή, σικλιλάμ μερικές μπουτ σουκάρ αλήθειες. Κα μπορίναας τι βακεράς ότι ισί “πουρανέ” επειδή οντουλά ισί ο πρώτες αλήθειες σο σικλιλάμας. Καλά ισί μερικές ανταλένταρ; Κι αρχή, σικλιλάμ ότι ο Ιεχωβά ισί αμαρό Δημιουργός ντα ότι τθερέλα εκ σκοπός ι τζενένγκε. Σικλιλάμ επίσης ότι ο Ντεβέλ μπουτσσαντάς πι Τσσαβές κι πφουβ τι μερέλ αμένγκε σαρ λύτρος για τι ελευθερώντιβας κατά αμαρτία ντα κατά μεριπέ. Ντα σικλιλάμ ότι η Βασιλεία ι Ντεβλέσκι κα νασκιαρέλ σαρέ αμαρέ βάσανα ντα ότι κα μπορίνας τι τζουβντιάς για πάντα κι πφουβ με ειρήνη ντα ευτυχία.—Ιωάννης 3:16· Αποκάλυψη 4:11· 21:3, 4.

16. Σο πρέπει τι κεράς όταν αβέλα-πες εκ αλλαγή κο τρόπος σο αγαβάσα εκ αλήθεια κατά Γραφή;

¹⁶ Μερικές φορές, μπορεί τι αβέλ εκ αλλαγή κο τρόπος σο αγαβάσα εκ προφητεία ή εκ εδάφιος σο ισί κι Γραφή. Όταν αβέλα-πες ανταβά, ισί σημαντικός τι αρακχάς χρόνος για τι διαβάνας ντα τι σκεφτίνας λατσσές ι αλλαγή σο αβιλί. (Πράξεις 17:11· 1 Τιμόθεο 4:15) Να ερεσέλα σάντε τι αγαβάς ο μπαρέ διαφορές σο υπαρχίντιβενα κι αλλαγή, αλλά πρέπει τι ντας προσοχή κο λεπτομέρειες-ντα. Άμα κα κεράς-λες ανταβά, σίγουρα κα τσσουβάς οντιά νεβί αλήθεια ι Γραφιάκι κο θησαυροφυλάκιος σο τθεράσα. Σόσκε ισί λατσσό αμένγκε τι κεράς ασακέ προσπάθειες;

17, 18. Σαρ μπορίνελα ο άγιος πνεύμας τι βοηθίνελ-αμέν;

¹⁷ Ο Ιησούς σικλιαρντάς ότι ο πνεύμας ι Ντεβλέσκο μπορίνελα τι βοηθίνελ-αμέν τι ντας-αμέν γκοντί πράγματα σο σικλιλάμας κο παρελθόν. (Ιωάννης 14:25, 26) Σαρ μπορίνελα τι βοηθίνελ-αμέν ανταβά όταν βακεράσα ο λατσσέ αμπέρια; Σκεφτίνεν ι εμπειρία εκχέ πφραλέσκι σο βακερένας λέσκε Πίτερ. Κο 1970, ισινέ 19 μπρεσένγκο ντα αρχισάλο τι υπηρετίνελ κο Μπέθελ κι Βρετανία. Ο Πίτερ ισινέ κο έργος κχερ κχερέστε ντα αρακχλάς εκχέ τζενές τσσορέντζαρ, περίπου 50 μπρεσένγκο. Πουτσλάς οντουλέ τζενές άμα κα μανγκέλας τι αγαβέλ ι Γραφή. Οντουβά τζενό ισινέ ραβίνος, δηλαδή Εβραίος παπάζι, ντα ξαφνιασάλο σο εκ τερνό αμντίνελας ότι κα σικλιαρέλας-λες κατά Γραφή. Για τι  δοκιμάνελ τον Πίτερ, ο ραβίνος πουτσλάς: «Για βάκερ μάνγκε, μο τσσαβό, καλέ τσσιμπάτε γραφισάλο ο Βιβλίος του Δανιήλ;» Ο Πίτερ βακερντάς: «Εκ μέρος λέσκο γραφισάλο κι αραμαϊκή τσσιπ». «Ο ραβίνος», βακερέλα ο Πίτερ, «σαστισάλο σο τζανάβας ι απάντηση, αλλά να σαστισάλο πιο μπουτ μάνταρ! Σαρ αβέλας-πες τι τζανάβ ι απάντηση; Όταν βουρτισάλομ κχερέ ντα ντικχλόμ ο περιοδικά Σκοπιά ντα Ξύπνα! σο νικίστιλεας ο μασεκά σο νακχλέ, αρακχλόμ εκ θέμας σο εξηγίνελας ότι εκ κομμάτι κατά βιβλίος του Δανιήλ γραφισάλο κι αραμαϊκή τσσιπ». Βα, ο άγιος πνεύμας μπορίνελα τι βοηθίνελ-αμέν τι ντας-αμέν γκοντί πράγματα σο διαβαντάμ κο παρελθόν ντα τσσουντάμας-λεν αντρέ κο θησαυροφυλάκιος σο τθεράσα.—Λουκάς 12:11, 12· 21:13-15.

¹⁸ Άμα μανγκάσα ο αλήθειες σο σικλιάσα κατά Ιεχωβά ντα εκτιμίνασα-λεν, κα μανγκάς τι συνεχίνας τι τσσουβάς γιαβερά-ντα αλήθειες κο θησαυροφυλάκιος σο τθεράσα. Καζόμ πιο μπουτ κεράσα-λες ανταβά, αζόμ πιο έτοιμοι κα νιωθίνας τι σικλιαράς γιαβερέν.

19. Σόσκε πρέπει τι αρακχαβάς αμαρέ πνευματικούς θησαυρούς;

¹⁹ Ανταλέ μαθημάστε, σικλιλάμ καζόμ σημαντικός ισί τι τθερέν μπαρί αξία αμένγκε ο πνευματικοί θησαυροί. Πρέπει όμως τι αβάς μπουτ προσεκτικοί για μα τι μουκχάς ι Μπενγκές ντα ανταλέ ντουνιάς τι σουρντιαρέν ι αγάπη σο τθεράσα ανταλέ θησαυρόνγκε. Άμα να κα προσοχίνας, κα μπορίναας τι χουχάντιβας πραγματένταρ σαρ ισί τι κεράς εκ μπουτί σο κα νικαβάς λάταρ μπουτ λοβέ, τι μπορίνας τι τζουβντιάς εκ χουλανί ζωή ή τι μανγκάς τι κεράς φιγούρα ι πραγματένγκε σο τθεράσα. Ο απόστολος Ιωάννης ανέλα αμαρέ γκοντιάτε ότι ανταβά ντουνιάς ντα σαρέ οντουλά σο ντέλα ατζεχάνικ κα χασάρντιβεν. (1 Ιωάννη 2:15-17) Οτθάρ, πρέπει τι συνεχίνας τι σικαβάς εκτίμηση για το πνευματικοί θησαυροί σο τθεράσα ντα τι αρακχαβάς-λεν.

20. Σο ισινέν αποφασισμέ τι κερέν για τι αρακχαβέν τουμαρέ πνευματικούς θησαυρούς;

²⁰ Τι αβέν έτοιμοι τι μουκχέν σο-ντα κα μπορίνελας τι σουρντιαρέλ τουμαρί αγάπη για τη Βασιλεία ι Ντεβλέσκι. Τι αβέν αποφασισμέ τι κερέν λάφι ι Ντεβλέσκε αντράλ τουμαρέ γκίσταρ ντα ποτές μα τι χασαρέν τουμαρί αγάπη για το έργος. Συνεχίνεν τι ρόντεν αλήθειες σο ισί κι Γραφή. Καζόμ κερένα-λες ανταβά, κα γκίντεν «θησαυρούς κο ουρανός, οτθέ σο ο τσορά να τζάνα ούτε ο σκόρος καταστραφίνελα. Επειδή οτθέ σο ισί τουμαρό θησαυρός, οτθέ κα αβέλ τουμαρό γκι-ντα».—Λουκάς 12:33, 34.