1, 2. (a) Ndi mpfuma zipi zitatu zakufunika kakamwe zidatipasa Yahova? (b) Tinadzadinganji mu nsolo uno?

YAHOVA ndi Munthu wakupfuma kakamwe kupiringana onsene kudzulu na pantsi. Pinthu pyonsene ndi pyace. (1 Pya dziko ya Israele 29:11, 12) Mbwenye Yahova ndi wakupasa mwakudzala manja. Tisapereka takhuta kakamwe thangwi iye asatipasa mpfuma zizinji zauzimu! Ndi zipi zinango mwa mpfuma zenezi? Izo zisaphataniza (1) Umambo wa Mulungu, (2) utumiki wathu na (3) undimomwene wakufunika unagumanika m’Mafalace. Mbwenye tingakhonda kucita mphole-mphole, tinakwanisa kuduwala kuti mpfuma zenezi ndi zakufunika kakamwe. Tisafunika kukumbuka kufunika kwazo na kuzifuna kakamwe, ninga pidalonga Yezu, ‘kunakhala mpfuma zanu, mitima yanu isakhalambo kweneko.’—Luka 12:34.

² Tendeni tidinge kuti tinapitiriza tani kuwangisa ufuni na kupereka kwathu takhuta thangwi ya Umambo, utumiki na undimomwene. Mu ndzidzi unacita ife pyenepi, tendeni tinyerezere mwacidikhodikho kuti tinakwanisa tani kufuna kakamwe mpfuma zenezi zauzimu.

3. Ninji pidacita mamuna adalonga Yezu toera kugula mwala? (Onani cithundzithundzi cakutoma.)

³ Lerini Mateo 13:45, 46. Yezu alonga pidacitika na mamuna unango wakuti akhagula na kugulisa magerengeja peno miyala. Ntsiku inango, iye agumana mwala wa ntengo ukulu kakamwe kupiringana miyala yonsene ikhadaona iye kale. Mamuna afuna kakamwe mwala unoyu mbagulisa pyonsene pikhali na iye toera kuugula. Kodi mwala unoyu nee ukhali wakufunika kakamwe kwa iye?

4. Kodi tiri dzololo toera kucitanji thangwi ya Umambo?

⁴ Tisapfundzanji kubulukira mu nsangani udalonga Yezu? Undimomwene wa Umambo wa Mulungu ndi ninga mwala unoyu wakufunika kakamwe. Khala tisafuna kakamwe Umambo ninga mamuna adafuna mwala, tinacita pyonsene pinakwanisa ife toera kupitiriza kucita khundu ya Umambo. (Lerini Marko 10:28-30.) Tendeni tione kuti anthu awiri acita tani pyenepi.

5. Kodi Zakeu akhali dzololo toera kucitanji thangwi ya Umambo?

⁵ Zakeu akhali nyakulipisa misonkho. Iye akhadapfuma thangwi yakuba kobiri za anthu. (Luka 19:1-9) Mbwenye ntsiku inango, Zakeu abva nkhani ya Yezu ikhalonga pya Umambo. Iye akomerwa na pidabva iye mbafuna kucinja umaso wace onsene. Iye alonga: ‘Onani, Mbuya, ine ndinagawira anyakutcerenga pakati nakati pinthu pyanga pyonsene. Pontho pinthu pyonsene pidakwatira ine munthu onsene, ndinambwezera kanai.’ Zakeu abwezera kobiri zikhadakwatira iye anthu mbasiya kukhala munthu wakufuna pinthu pizinji.

6. Ndi macinjo api adacita nkazi unango, pontho thangwi yanji?

⁶ Mu ndzidzi udabva nkazi unango mphangwa za Umambo, mu pyaka pingasi nduli, iye akhacita khundu yakupita m’mabonde nkazi na nkazi. Pontho iye akhali nkulu wa nsoka unaphedzera ufulu wakupita m’mabonde nkazi na nkazi peno mamuna na mamuna. Mbwenye pidapfundza iye Bhibhlya mbaona kufunika kwa Umambo wa Mulungu, adzindikira kuti akhafunika kucinja makhaliro mu umaso wace. (1 Akorinto 6:9, 10) Thangwi yakufuna kwace Yahova, asiya kucita khundu ya nsoka pabodzi na makhaliro ace akupita m’mabonde nkazi na nkazi. Iye abatizwa mu caka 2009, pontho caka cindzace atoma kutumikira ninga mpainiya wa ndzidzi onsene. Iye acinja makhaliro anewa thangwi ufuni wace kwa Yahova ukhali wakuwanga kupiringana pifuno pikhali na iye.—Marko 12:29, 30.

7. Tinakwanisa tani kupitiriza kuwangisa ufuni wathu ku Umambo wa Mulungu?

⁷ Toera kucita khundu ya Umambo wa Mulungu, azinji a ife tacita macinjo makulu mu umaso wathu. (Aroma 12:2) Mbwenye nkhondo yathu idzati kumala. Ife nee tisafunika kutawirisa kuti ufuni wathu ku Umambo ufeweswe na cinthu cinango, ninga  kufuna pinthu pyakumanungo peno pifuno pyaulukwali. (Misangani 4:23; Mateo 5:27-29) Toera kutiphedza kupitiriza kuwangisa ufuni wathu ku Umambo wa Mulungu, Yahova atipasa mpfuma inango yakufunika kakamwe.

8. (a) Thangwi yanji mpostolo Paulu afokotoza utumiki wathu ninga ‘mpfuma zakuikhwa n’nkhali za dongo’? (b) Kodi Paulu apangiza tani kuti akhafuna utumiki?

⁸ Yezu atipasa basa yakumwaza na kupfundzisa mphangwa zadidi za Umambo wa Mulungu. (Mateo 28:18, 19) Mpostolo Paulu afokotoza utumiki ninga mpfuma zakuikhwa n’nkhali za dongo. (2 Akorinto 4:7; 1 Timoti 1:12) Nakuti ndife akusowa ungwiro, takhala ninga nkhali zenezi. Mphangwa zinamwaza ife ndi ninga mpfuma zakufunika kakamwe thangwi zinadzatiphedza kukhala na umaso wakwenda na kwenda, pabodzi na ale anatibvesera. Ndi thangwi yace Paulu alonga: ‘Ndinaphata mabasa onsene thangwi ya mphangwa zadidi toera ndizidziwise anango.’ (1 Akorinto 9:23) Paulu aphata basa mwakuwanga toera kupfundzisa anango pya Umambo wa Mulungu. (Lerini Aroma 1:14, 15; 2 Timoti 4:2.) Kufuna mphangwa zadidi kwamphedza toera kupitiriza kumwaza mphangwa mwakukhonda tsalakana kutcingwa. (1 Atesalonika 2:2) Tinatowezera tani citsandzo ca Paulu cakufuna utumiki?

9. Ndi njira zipi zinango zakuti tinakwanisa kupangiza kuti tisafuna utumiki?

⁹ Njira ibodzi idapangiza Paulu kuti akhafuna utumiki ndi kuphatisira mwai onsene toera kupanga anango. Ninga Paulu na Akristu akutoma, ife tisamwaza mphangwa zadidi nyumba na nyumba, mbuto zapakweca na konsene kunagumanika anthu. (Machitiro 5:42; 20:20) Ife tisasaka njira zonsene toera kumwaza mphangwa kuna anthu azinji pingakwanisika. Panango tinakwanisa kutumikira ninga mpainiya wakuphedza peno mpainiya wa ndzidzi onsene. Peno tinakwanisa kupfundza cilongero cinango, kuenda kucisa cinango ca dziko yathu, peno kufuluka kuenda dziko inango.—Machitiro 16:9, 10.

10. Ndi maphindu api adagumana Irene thangwi yakuphata basa mwaphinga toera kumwaza mphangwa zadidi?

¹⁰ Irene, mulongo wakuti adzati kumanga banja wa ku Estados Unidos, akhafuna kumwaza mphangwa zadidi kuna anthu analonga cilongero ca Cirusu. Natenepa, mu caka 1993, iye acita khundu ya nsoka wa cilongero ca Cirusu mu Nzinda wa Nova York. Mu ndzidzi unoyu, kukhali amwazi mphangwa cifupi na 20 basi mu nsoka unoyu. Pakumala pyaka 20, Irene alonga: “Ine nee ndikhakwanisa kulonga mwadidi cilongero ca Cirusu.” Mbwenye Yahova aphedza Irene na amwazi mphangwa anango toera kumwaza mphangwa kuna anthu acilongero ceneci. Ninga maphindu, lero kuna mipingo mitanthatu ya cilongero ca Cirusu mu Nzinda wa  Nova York. Irene apfundzisa Bhibhlya anthu azinji, pontho 15 mwa iwo abatizwa. Anango mwa iwo asatumikira ku Bheteli, anango ndi apainiya na anango ndi akulu a mpingo. Irene alonga: “Ndinganyerezera pifuno pinango toera kupikwanirisa, nee ndisakwanisa kuona cinthu cinango cakutsandzayisa kakamwe kwa ine.” Mwandimomwene, Irene asapasa ntengo utumiki wace!

11. Tinagumana maphindu api tingapitiriza kumwaza mphangwa mwakukhonda tsalakana kutcingwa?

¹¹ Tingapasa ntengo utumiki wathu, tinadzakhala ninga mpostolo Paulu mbatipitiriza kumwaza mphangwa ngakhale titcingwe. (Machitiro 14:19-22) Mwacitsandzo, nkati mwa pyaka 1930 na 1944, abale na alongo athu a ku Estados Unidos akhatcingwa kakamwe. Mbwenye iwo apitiriza kumwaza mphangwa. Pidayesera mautongi toera kuakhondesa, abale athu afikisa nkandzo unoyu ku thando yakutonga miseru mbawina kazinji kene. Mu caka 1943, M’bale Knorr alonga kuwina kubodzi kudakhala na ife ku Thando Ikulu Yakutonga Miseru ku Estados Unidos. Iye alonga kuti nee mbatidaenda kasuma ku thando ineyi khala abale na alongo nee akhapitiriza kumwaza mphangwa. Iye alongambo thangwi ya pyenepi, kuti abale na alongo azinji pa dziko yonsene akupitiriza kumwaza mphangwa, mwakukhonda tsalakana kutcingwa kwawo. Abale na alongo m’madziko anango awinambo miseru ninga ineyi. Inde, kufuna kwathu utumiki nee kunaticitisa kusiya kumwaza mphangwa thangwi yakutcingwa.

12. Kodi muli wakutonga toera kucitanji?

¹² Tingapasa ntengo utumiki wathu, nee tinadzudzumika basi ene na malipoti anafuna kupereka ife. Tinadzacita pyonsene pinakwanisa ife toera ‘kupereka umboni wa mphangwa zadidi.’ (Machitiro 20:24; 2 Timoti 4:5) Mphapo ninji pisafunika ife kupfundzisa anango? Tendeni tidinge mpfuma inango ya Mulungu.

13, 14. Ndi mpfuma ipi idalonga Yezu pa Mateo 13:52, pontho tinacitanji toera kuithimizira?

¹³ Mpfuma yacitatu idatipasa Yahova ndi undimomwene onsene unapfundza ife. Yahova ndi Pfuli ya undimomwene. (2 Samwele 7:28; Masalmo 31:5) Pontho ninga Baba wakupasa mwakudzala manja, iye asafuna kutidziwisambo undimomwene unoyu. Mpaka lero, tapfundza undimomwene uzinji mukuleri Bhibhlya, mabukhu athu, kugumanika pa misonkhano ya gawo, ya cisa na ya mpingo. Tingagumanya undimomwene uzinji, tinadzakhala na ‘mpfuma’ za undimomwene ‘zipswa na zakale’ ninga pidalonga Yezu. (Lerini Mateo 13:52.) Yahova anadzatiphedza toera kuthimizira ‘mpfuma’ zathu tingasaka undimomwene ninga munasaka ife mpfuma zakubisika. (Lerini Misangani 2:4-7.) Tinacita tani pyenepi?

¹⁴ Tisafunika kupfundza Bhibhlya na mabukhu athu ndzidzi onsene na kufufudza mwacidikhodikho. Pyenepi pinadzatiphedza toera kugumana undimomwene “upswa,” wakuti nee tikhaudziwa. (Yoswa 1:8, 9; Masalmo 1:2, 3) Revista yakutoma ya Ncenjezi, idabuluswa mwezi wa Julho caka 1879, yalandanisa undimomwene na maluwa akuphimbirwa na tsanga. Toera kugumana maluwa ninga anewa, munthu asafunika kuasaka mwacidikhodikho. Pontho angaagumana, nee asakomerwa basi ene kukhala na ibodzi. Iye asafunika kupitiriza kusaka toera kugumana maluwa mazinji. Munjira ibodzi ene, nee tisakomerwa thangwi yakugumana undimomwene ubodzi basi. Tisafunika kukhala na cifuno cakupitiriza kusaka undimomwene uzinji kakamwe.

15. Thangwi yanji tinalonga kuti undimomwene unango ndi “wakale,” pontho ndi upi wakufunika kakamwe kwa imwe?

¹⁵ Tingatoma kupfundza Bhibhlya, tinadzindikira undimomwene unango wakufunika. Panango tinaulonga kuti ndi “wakale” thangwi taupfundza kale pakutoma. Ndi upi undimomwene unoyu? Pakutoma, tapfundza kuti Yahova ndi Nciti wathu, pontho ali na cifuniro kuna anthu. Tapfundzambo kuti Mulungu atuma Mwanace pa dziko yapantsi mbafa ninga ntsembe yaciomboli toera kutiombola ku madawo na kufa. Pontho tapfundza kuti Umambo wa Mulungu unadzamalisa nyatwa zonsene mbatikhala kwenda na kwenda pa dziko yapantsi, mwantendere na mwakutsandzaya.—Jwau 3:16; Apokalipse 4:11; 21:3, 4.

16. Tisafunika kucitanji khala pana macinjo akubvesesa kwathu undimomwene wa Bhibhlya?

¹⁶ Midzidzi inango, panango kubvesesa kwathu profesiya ya Bhibhlya peno lemba kunacinjwa. Pyenepi pingacitika, tisafunika kusaka ndzidzi toera kupfundza na kunyerezera mwacidikhodikho macinjo anewa. (Machitiro 17:11; 1 Timoti 4:15) Ife nee tisafunika kudziwa basi ene kusiyana kwa kubvesesa kwakale na kwa cincino, mbwenye tisafunika kupfundza mwadidi pinthu pizinji pyakubvesesa kupswa. Kupfundza kweneku kunadzatiphedza kudzindikira kuti undimomwene upswa usacita khundu ya undimomwene wa Bhibhlya. Thangwi yanji tisafunika kuwangisira kucita pyenepi?

17, 18. Kodi nzimu wakucena unatiphedza tani?

¹⁷ Yezu apfundzisa kuti nzimu wa Mulungu unakwanisa kutiphedza toera kukumbuka pinthu pidapfundza ife kale. (Jwau 14:25, 26) Thangwi yanji pyenepi pinatiphedza  pakumwaza mphangwa zadidi? Tendeni tidinge citsandzo ca m’bale anacemerwa Peter. Mu caka 1970, iye akhali na pyaka 19 pyakubalwa mbatoma kutumikira ku Bheteli ya ku Britanya. Peter akhamwaza mphangwa nyumba na nyumba mbagumana mamuna unango wakuti nee akhacinga ndebvu zace. Iye abvundza mamuna unoyu khala asafuna kupfundza Bhibhlya. Mamuna unoyu akhali Muyuda, pontho adzumatirwa thangwi yakuphembwa na m’phale toera kupfundza Bhibhlya. Toera kuyesera Peter, iye abvundza: “M’phalewe, bukhu ya Dhanyeli yalembwa mu cilongero cipi?” Peter atawira: “Khundu inango ya bukhu ineyi yalembwa mu Ciaramaki.” Peter asakumbuka kuti mamuna unoyu “adzumatirwa na ntawiro udapereka ine—mbwenye tayu ninga pikhanyerezera ine! Ndadziwa tani ntawiro unoyu? Pidaenda ine kunyumba ndafufudza marevista a Ncenjezi na Despertai! a miyezi ya nduli, mbandigumana nsolo ukhafokotoza kuti bukhu ya Dhanyeli yalembwa mu Ciaramaki.” (Danyele 2:4) Mwandimomwene, nzimu wakucena unakwanisa kutiphedza toera kukumbuka mphangwa zidaleri ife mbitithimizira mpfuma zathu zakale.—Luka 12:11, 12; 21:13-15.

¹⁸ Tingafuna undimomwene unapfundzisa Yahova na kupereka takhuta, tinadzafuna kuthimizira mpfuma zathu. Tingacita pyenepi kazinji kene, tinakhala akukhunganyika toera kupfundzisa anango.

19. Thangwi yanji tisafunika kutsidzikiza mpfuma zathu zauzimu?

¹⁹ Mu nsolo uno, tapfundza kuti tisafunika kupasa ntengo mpfuma zauzimu. Mbwenye tisafunika kucita mphole-mphole toera tikhonde kutawirisa Sathani na dziko ino kufewesa ufuni wathu ku mpfuma zenezi. Tingakhonda kucita mphole-mphole, tinakwanisa kudzudzumiswa na pinthu ninga kupikirwa basa yakutambira kobiri izinji, manyerezero akukhala na umaso wadidi, peno kugaya thangwi ya pinthu pyathu pyakumanungo. Mpostolo Jwau asatikumbusa kuti mwakukhonda dembuka dziko ino na pinthu pyayo pyonsene pinadzafudzwa. (1 Jwau 2:15-17) Na thangwi ineyi, tisafunika kupasa ntengo mpfuma zathu zauzimu na kuzitsidzikiza.

20. Kodi muli akutonga kucitanji toera kutsidzikiza mpfuma zanu zauzimu?

²⁰ Khalani akutonga toera kucalira pinthu pyonsene pyakuti pinakwanisa kufewesa ufuni wanu ku Umambo wa Mulungu. Khalani akutonga toera kumwaza mphangwa mwaphinga, pontho lekani kuluza cifuno cakucita pyenepi. Pitirizani kufufudza undimomwene wa Bhibhlya. Mungacita pyenepi, munadzakoya ‘mpfuma kudzulu, kwakuti nee zinadzabiwa na mbava nee kudyiwa na ucenje. Thangwi kunakhala mpfuma zanu, mitima yanu isakhalambo kweneko.’—Luka 12:33, 34.