1, 2. (a) By’obuguda ki bisatu ebi tutunga kuruga hali Yahwe? (b) Kiki ekiturukugenda kubazaho omu kicweka kinu?

YAHWE nuwe arukukirayo obuguuda omu iguru n’omu nsi. Buli kintu kyona kye. (1 Ekyebyomubusinge 29:11, 12) Baitu Yahwe agabira buli muntu weena. Kanikitusemeza kurora ngu naitwe atuhaireho eby’obuguda eby’omwoyo! Eby’obuguda binu nibyo biha? Nibitwarramu (1) Obukama bwe, (2) obuheereza bwaitu, hamu (3) n’amananu ag’omuhendo agarukusangwa omu Kigambo kye. Baitu kakuba tutegendereza, obwire nibusobora kuhika nitwebwa ngu ebintu binu by’omuhendo. Nahabweki tusemeriire kwikara nitweyijukya obukuru bwabyo kandi tusemeriire kwongera kubigonza. Kinu kikuru habwokuba Yesu akagamba ngu, “Itungo lyanyu nambere [liri] nomutima gwanyu nuho guikara.”—Luka 12:34.

² Leka turole omulingo tusobora kwikara twine okugonza okugumire kandi nitusiima Obukama, obuheereza, hamu n’amananu. Obu turaaba nitubazaho ebintu binu, cumitiriza ha mulingo osobora kweyongera kubigonza.

3. Omusaija ou Yesu yabalizeho akaba ayetegekere kukora ki habw’eruru emu? (Rora ekisisani ekiri ha kutandika kw’isomo linu.)

³ Soma Matayo 13:45, 46. Yesu obwakaba nayegesa, akakozesa oruganikyo nambere yagambire ngu omusaija omu akaba n’agura kandi n’atunda eruru. Kiro kimu, akazoora eruru ey’omuhendo mwingi kukira eruru zoona ezakaba arozere. Akagigonza muno yacwamu kutunga buli kimu kyona ekyakaba aine nukwo agule eruru egi. Orozere nk’oku eruru enu ekaba eri y’omuhendo haluwe?

4. Obu turaaba nitugonza Obukama, nitwija kukora ki?

⁴ Oruganikyo runu nirutwegesa ki? Nirutwegesa ngu Obukama bwa Ruhanga buli nk’eruru ey’omuhendo. Obu turaaba nitubugonza nk’oku omusaija onu yagondeze eruru, nitwija kwerekesa ebintu byona nukwo tubweteranizeho kandi tubugumireho. (Soma Marako 10:28-30.) Leka tubazeho abantu babiri abayerekeseze ebyabo byona habw’Obukama.

5. Zakayo akaba ayetegekere kukora ki habw’Obukama bwa Ruhanga?

⁵ Zakayo akaba musorooza w’omusoro. Akafooka muguda habw’okugobeza muno abantu. (Luka 19:1-9, NW) Baitu kiro kimu, Zakayo akahurra Yesu n’abazaaho Obukama. Akagonza muno ebi yahuliire kyamuletera n’okugonza kuhinduramu obwomeezi bwe. Akagamba: “Dora, Mukama wange, ninyija kugabira abasege ekicweka kyakabiri eky’itungo lyange, kandi wena ou nagobiize ninyija kumulehera emirundi ena.” Zakayo akagarurra abantu sente ez’akaba abanyagire kandi yaleka omururu.

6. Omukazi omu akahindura ata bwomeezi bwe, kandi habwaki?

⁶ Emyaka y’enyuma, omukazi omu ow’akaba aswire mukazi mugenzi we akahurra amakuru agarukukwata ha Bukama. Kandi omukazi onu akaba nakurra ekitongole ekirukurwanirra obugabe bw’abantu obu kirukuhika ha basaija kuswera abasaija n’abakazi kuswera abakazi. Baitu obu yayegere Baibuli kandi yayetegereza omugaso gw’Obukama bwa Ruhanga, akakyetegereza ngu akaba aine kukora empinduka z’amaani. (1 Abakolinso 6:9, 10) Akagonza muno Yahwe, yacwamu kuruga omu kitongole eky’akaba arumu kandi yaleka omukazi mugenzi we ow’akaba ali nauwe omu buswere. Akabatizibwa omwaka 2009, kandi omwaka ogwahondireho yafooka payoniya ow’akasumi koona. Akakora empindukahinduka zinu zoona habwokuba akagonza Yahwe kukira ebintu ebitarumu.—Marako 12:29, 30.

7. Kintu ki eki tusobora kukora kwikaza okugonza kwaitu okw’Obukama kugumire?

⁷ Baingi omuli itwe tulekere ebintu bingi ebitwakoraga kusobora kweteraniza ha Bukama bwa Ruhanga. (Abarumi 12:2) Baitu obulemu tibukahoire. Titusemeriire kuleka ebintu nk’okugonza itungo rundi okwegomba okuterana omu miringo etasemeriire okucekya okugonza  kwaitu hali Obukama bwa Ruhanga. (Enfumo 4:23; Matayo 5:27-29) Yahwe atuhaire ekintu kindi eky’omuhendo kusobora kutukonyera kwikaza okugonza kwaitu hali Obukama kugumire.

8. (a) Habwaki Paulo yayesere obuheereza bwaitu “ekyobuguda kinu omu bibindi ebiibumba”? (b) Paulo akooleka ata ngu akaba n’agonza muno obuheereza?

⁸ Yesu akatuha omulimo gw’okutebeza n’okwegesa amakuru amarungi ag’Obukama. (Matayo 28:19, 20) Omukwenda Paulo akagamba ngu obuheereza buli nk’eky’obuguda ekirukutwalirwa omu bibindi ebikozerwe omu ibumba. (2 Abakolinso 4:7; 1 Timoseo 1:12) Nitulengesebwa ebibindi eby’ibumba habwokuba tituhikiriire. Baitu amakuru agatutebeza gali nk’eky’obuguda habwokuba nigasobora kuletera itwe hamu n’abatuhuliiriza kutunga obwomeezi obutahwaho. Nikyo Paulo yagambire ngu: “Baitu byona mbikora habw’enjiri, nukwo ngigabaneho n’abandi.” (1 Abakolinso 9:23, NW) Paulo akekamba muno kwegesa abantu ebirukukwata ha Bukama bwa Ruhanga. (Soma Abarumi 1:14, 15; 2 Timoseo 4:2.) Kugonza muno amakuru amarungi nikyo ekyamwekambisize kwikara n’atebeza n’obu baraaba bamuhiganiize muno. (1 Abasesalonika 2:2) Nitusobora kwoleka tuta ngu nitugonza obuheereza nka Paulo?

9. Miringo ki ei tusobora kwolekamu ngu nitugonza obuheereza?

⁹ Ogumu ha miringo Paulo yayolekere ngu akaba n’agonza muno obuheereza nukwo kukozesa buli mugisa gwona ogu yatungaga okutebeza abandi. Naitwe tuli nka Paulo hamu n’Abakristaayo aba kara habwokuba tutebeza abandi amakuru amarungi obu tuba tuli nju ha nju, omu rwijwire, na hona nambere tusanga abantu. (Engeso Ezabakwenda 5:42; 20:20) Tukozesa emiringo yoona kusobora kuhikyaho abantu amakuru amarungi. Obu kirukuba kisobokere, nitusobora kuheereza nk’abapayoniya abakonyezi rundi ab’akasumi koona. Rundi nitusobora kwega orulimi rundi, kugenda omu kiikaro kindi eky’omu ihanga lyaitu, rundi nitusobora n’okugenda omu ihanga erindi nambere hali obwetago.—Engeso Ezabakwenda 16:9, 10.

10. Irene akatunga migisa ki habw’okwekamba omu kutebeza?

¹⁰ Munyaanya itwe omu arukwetwa Irene anyakwikara omu Amerika akaba n’agonza muno kwegesa abantu amakuru amarungi omu rulimi orwa Russia. Nahabweki omu 1993, aketeraniza ha gurupu y’oru Russia omu rubuga rwa New York. Akasumi ako, gurupu egi ekaba ine abatebezi 20 bonka. Hanyuma y’emyaka 20 kurabaho, Irene n’agamba, “Nahati orulimi orwa Russia tindukurubaza kurungi.” Baitu, Yahwe amukonyire uwe n’abatebezi abandi kusobora kutebeza abantu bandi omu rulimi oru. Hali turukubaliza, omu rubuga runu harumu ebitebe mukaaga ebirukukozesa orulimi oru. Irene akegesa abantu baingi Baibuli, kandi 15 halubo bakabatizibwa. Abamu nibahereza nk’Ababeseri, abapayoniya, hamu n’abagurusi. Irene  n’agamba, “Obu ndengaho kutekereza ha bigendererwa ebindi ebinkubaire nimpambya, tiharoho na kimu eki ndukurora ekikundetiire okusemererewa kwingi.” Irene mali atwara obuheereza bwe kuba bw’omuhendo!

11. Birungi ki ebirugamu obu tugumizamu kutebeza n’omu bwire bw’okuhiganizibwa?

¹¹ Obu turaaba nitutwara obuhereza bwaitu kuba bw’omuhendo, nitwija kuba nk’omukwenda Paulo nitweyongera kutebeza n’omu bwire bw’okuhiganizibwa. (Engeso Ezabakwenda 14:19-22) Ekyokurorraho, hagati y’omwaka 1930 n’omwaka 1944, abagenzi baitu omu Amerika bakahiganizibwa muno. Baitu batalekeho kutebeza. Ab’obusobozi obu balengereho kubatanga, abagenzi baitu bakagenda omu kooti kandi basinga emisango nyingi. Omu 1943, Ow’oruganda Knorr akabazaho ogumu ha misango ei twasingire omu Kooti Enkuru eya Amerika. Akagamba ngu tihakubaireho emisango yona ey’okutwara omu kooti kakuba ab’oruganda balekereho kutebeza. Kandi akongera yagamba ngu kakuba ab’oruganda balekereho kutebeza, kyakwolekere ngu basingwirwe. Ab’oruganda omu mahanga gandi nabo basingire emisango nk’enu. Amananu gali, obu turaaba nitugonza obuheereza, tikurukwija kuleka okuhiganiza kutulemesa kutebeza.

12. Kiki eky’omaliriire kukora?

¹² Obuturaaba nitutwara obuheereza bwaitu kuba kintu kikuru, tikirukwija kugenda kutebeza n’ekigendererwa ky’okukora kwonka esaaha ezi turahandiika ha repoti. Nitwija kukora kyona ekirukusoboka “okumanyisa enjiri eyembabazi eza Ruhanga.” (Engeso Ezabakwenda 20:24; 2 Timoseo 4:5) Baitu kiki eki turayegesa abantu? Tekereza ha ky’obuguda kindi eki Ruhanga atuhaire.

13, 14. ‘Lyahu’ro’ ki eri Yesu akaba n’abazaaho omu Matayo 13:52, kandi tuliijuza tuta?

¹³ Eky’obuguda ekyakasatu eki Yahwe atuhaire nugo amananu goona agatwegeseze. Yahwe  nuwe Ndugirro y’amananu goona. (2 Samuiri 7:28; Zabuli 31:5) Kandi n’agonza kugabana naitwe amananu ganu habwokuba ali Taata omugabi. Bingi muno ebi twegere kuraba omu kusoma Ekigambo kye, ebitabu eby’omwiru omwesigwa, hamu n’enso’rokano enkooto n’ez’ekitebe. Obu turaikara nitukanyisa amananu ganu, nitwija kutunga ‘elyahu’ro’ ly’amananu ‘amahyaka n’amakuru’ nk’oku Yesu yagambire. (Soma Matayo 13:52.) Yahwe n’aija kutukonyera kwijuza ‘elyahu’ro’ lyaitu kakuba amananu tugaserra nk’oku omuntu aserra eky’obuguda ekiserekerwe. (Soma Enfumo 2:4-7.) Eki nitusobora kukikora tuta?

¹⁴ Twine kusoma Ekigambo kya Ruhanga, Baibuli n’ebitabu by’omwiru omwesigwa buli kiro kandi tuseruliirize kurungi. Kinu nikiija kutukonyera kuzoora amananu ‘amahyaka’ agatubaire tutarukumanya. (Yosuha 1:8, 9; Zabuli 1:2, 3) Omunaara gw’Omulinzi ogw’okubanza ogwaturukiibwe okwezi kwa Julaayi omu 1879 gukalengesaniza amananu n’ekyakyo ekinyakuli hagati omu kisaka. Omuntu kusobora kukizoora, asemeriire kuserra kurungi. Kandi kakuba akizoora, tasemeriire kugarukira hali eki kyonka. Aine kweyongera kuserra ebindi. Nikyo kimu naitwe, tutagarukira ha kwega amananu agarukukwata ha kintu kimu kyonka. Tusemeriire kwikara twine ekihika ky’okwega amananu agarukukwata ha bintu bingi.

15. Habwaki tusobora kugamba ngu ebimu ha bintu ebi twayegere ‘bikuru,’ kandi nibiha eby’okira kugonza?

¹⁵ Obu twatandikire kwega Baibuli, tukega amananu agarukukwata ha bintu ebirungi. Amananu ago nitusobora kugamba ‘makuru’ habwokuba nugo twabandize kwega. Omu mananu agatwayegere hakaba harumu ki? Ha kubanza, tukega ngu Yahwe nuwe Muhangi waitu kandi ngu aine ekigendererwa habw’abantu. Tukongera twayega ngu Yahwe akatuma Omwana we omu nsi kuhayo obwomeezi bwe nk’ekyonzira nukwo tulekerwe kuruga omu kibi n’okufa. Kandi tukega ngu Obukama bwa Ruhanga nibwija kumaraho okubonabona kwona nukwo tusobole kwikara omu nsi ebiro byona tuli omu businge n’omu kusemererwa.—Yohana 3:16; Okusuku’rwa 4:11; 21:3, 4.

16. Kiki eki tusemeriire kukora obu harukuba haroho ekihindwirwemu omu nyegesa yaitu?

¹⁶ Obwire obumu, haroho obu batuha okwetegereza kuhyaka okurukukwata ha bunabbi bwa Baibuli rundi ha kyahandiikirwe. Kakuba kibaho, tusemeriire kutamu amaani kwega ekintu ekihindwirwemu n’okukicumitirizaho nukwo tukyetegereze. (Engeso Ezabakwenda 17:11; 1 Timoseo 4:15) Tutagarukira ha kumanya kwonka enyahukana eri hagati y’enyegesa enkuru n’empyaka, tufeyo n’okwetegereza omu bwijwire buli kimu ekigambirweho omu nyegesa empyaka. Okwesomesa okwa mulingo gunu nikwija kutukonyera kuta enyegesa empyaka omu lyahurro lyaitu ery’amananu. Habwaki tusemeriire kutamu amaani ganu goona?

17, 18. Omwoyo ogurukwera nigusobora kutukonyera guta?

¹⁷ Yesu akagamba ngu omwoyo gwa Ruhanga nigusobora kutukonyera kwijuka ebintu ebi twayegere kara. (Yohana 14:25, 26) Ekintu kinu nikisobora kutukonyera kita obu turukuba nitutebeza amakuru amarungi? Tekereza ha kyokurorraho eky’ow’oruganda arukwetwa Peter. Omu 1970, akaba aine emyaka 19 kandi ebiro bike enyuma  akaba atandikire kuheereza ha Beseri eya Bungereza. Peter obwakaba n’atebeza nju ha nju, akatangaana omusaija w’ebireju bingi. Akakaguza omusaija onu obwaraaba n’agonza kwegesebwa Baibuli. Omusaija onu ow’akaba ali mwegesa w’Abayudaaya akahunirra muno kurora ngu omusigazi omuto akaba n’agonza kumwegesa Baibuli. Akakaguza Peter ekikaguzo kinu nukwo amulenge: “Musigazi, ekitabu kya Danieri kikahandikwa omu rulimi ki?” Peter akamugambira ngu, “Ekicweka kimu kikahandikwa omu Orwaramu.” Peter n’agamba ngu “Omusaija onu akahunirra kurora ngu nkaba manyire eky’okugarukamu ekihikire. Baitu kandi nyowe kikampuniriza n’okukiraho kurora ngu nkaba manyire eky’okugarukamu ekihikire! Eky’okugarukamu nkakimanya nta? Obu nagarukire omu ka nakebera Omunaara gw’Omulinzi hamu na Awake! eby’enyuma, nkasangamu ekicweka ekikaba nikisoborra ngu ekitabu kya Danieri kikahandikwa omu Rwaramu.” (Danieri 2:4) Mali omwoyo ogurukwera nigusobora kutukonyera kwijuka ebintu ebi twasomere twateka omu lyahurro lyaitu.—Luka 12:11, 12; 21:13-15.

¹⁸ Obu turaaba nitugonza amananu Yahwe Ruhanga agarukutwegesa kandi nitugasiima, nitwija kwikara nitugongera omu lyahurro lyaitu elyʼamananu. Obu turaikara nitukora tuti, nitwija kwikara twetekanize kwegesa abantu.

19. Habwaki tusemeriire kulinda kurungi eby’obuguda byaitu eby’omwoyo?

¹⁹ Omu kicweka kinu, turozere omulingo kiri kikuru kutwara eby’obuguda byaitu nk’ebintu ebikuru. Baitu tusemeriire kwegendereza kurora titwaikiriza Setani n’ensi ye kucekya okugonza kwaitu okw’eby’obuguda binu. Kakuba tuterinda, haroho ebintu bingi ebisobora kutuhugura. Nk’ekyokurorraho, nibasobora kutunihiza omulimo gwa sente nyingi, nitusobora kwegomba obwomeezi obw’okwejarabya, rundi nitusobora kugonza kwoleka itungo eri twine. Omukwenda Yohana natwijukya ngu ensi enu n’ebintu eby’erukuha biri haihi kuhwaho. (1 Yohana 2:15-17) Enu niyo ensonga habwaki tusemeriire kwikara nitusiima kandi nitulinda eby’obuguda eby’omwoyo.

20. Kiki eky’omaliriire kukora kusobora kulinda kurungi itungo lyawe ery’omwoyo?

²⁰ Oikale oyetegekere kwerekesa ekintu kyona ekisobora kucekya okugonza kwawe okw’Obukama bwa Ruhanga. Malirra omu mutima gwawe okwekamba kutebeza n’okurwanirra okugonza kwawe okw’obuheereza kurora tikwaceka. Ikara n’otamu amaani kwetegereza amananu ag’omu Baibuli. Kinu nikiija kukukonyera kwekorra “itungo eryomu iguru eritahwaho, nambere omusuma atai’ra haihi, nobwekuba enyenje okusiisa. Baitu itungo lyanyu nambere [liri] nomutima gwanyu nuho guikara.”—Luka 12:33, 34.