Kotou Tuku Tokotou Loto Ki Te ʼu Koloa Fakalaumalie
“Ko te faʼahi ʼae ʼe tuku ai ʼokotou koloa ʼe toe tuku ai foki mo ʼokotou loto.”—LUKA 12:34.
KATIKO: 153, 104
1, 2. (1) Kotea te ʼu koloa maʼuhiga ʼe tolu ʼe tou maʼu mai ia Sehova? (2) Kotea ʼae ka tou vakaʼi anai ʼi te alatike ʼaeni?
KO SEHOVA ʼae ʼe koloaʼia tokotahi ʼi te ʼatulaulau, koteʼuhi ko meʼa fuli ʼe ʼaʼana. (1 Koloniko 29:11, 12) Pea ko Sehova ʼe lotofoaki ki te hahaʼi fuli. Koia ʼae ʼe tou lotofakafetaʼi ai ki tana fia vaevae mai ʼona koloa fakalaumalie. Kotea ʼihi ʼi te ʼu koloa ʼaia? ʼUluaki, ko te Puleʼaga ʼo te ʼAtua, lua, ko totatou minisitelio, pea tolu leva, ko te ʼu moʼoni maʼuhiga ʼae ʼe tuʼu ʼi tana Folafola. Kaʼe kapau ʼe mole tou tokakaga, ʼe feala pe ʼaki te temi, ke mole kei maʼuhiga te ʼu koloa ʼaia kia tatou. Koia tou manatuʼi tuʼumaʼu te maʼuhiga ʼo te ʼu koloa ʼaia pea ʼe tonu ke tou fakaloloto atu totatou ʼofa ki ai. Koteʼuhi neʼe ui fenei e Sesu: “Ko te faʼahi ʼae ʼe tuku ai ʼokotou koloa ʼe toe tuku ai foki mo ʼokotou loto.”—Luka 12:34.
2 Tou vakaʼi pe ʼe feafeaʼi hatatou taupau ke malohi tatatou fakamaʼuhigaʼi mo tatatou lotofakafetaʼi ʼo ʼuhiga mo te Puleʼaga, te minisitelio pea mo te moʼoni. ʼI tatatou fai te faʼahi ʼaia, tou
metitasio pe ʼe feafeaʼi hatatou fakaloloto totatou ʼofa ki te ʼu koloa fakalaumalie ʼaia.ʼE HAGE TE PULEʼAGA ʼO TE ʼATUA KO HE MATAʼI TOFE MAʼUHIGA
3. ʼI te fakamatala ʼa Sesu, kotea ʼae neʼe loto moʼoni e te tagata ke ina fai moʼo totogi ia te mataʼi tofe? (Vakaʼi te ʼuluaki pāki.)
3 Lau ia Mateo 13:45, 46. Neʼe fakamatala e Sesu ia te hisitolia ʼo ʼuhiga mo te tagata ʼe ina totogi pea mo ina fakatau te ʼu mataʼi tofe. ʼI te tahi ʼaho, neʼe ina maʼu te mataʼi tofe neʼe maʼuhiga age ia ʼi te ʼu mataʼi tofe ʼae neʼe kua sio ki ai. Pea ʼi tana fia maʼu ia te mataʼi tofe, neʼe ina fakatau leva ʼona koloa fuli moʼo totogi ʼo te mataʼi tofe ʼaia. ʼE feala koa ke kotou fakafuafua te maʼuhiga ʼo te mataʼi tofe ʼaia ki te tagata?
Kapau ʼe maʼuhiga kia tatou ia te Puleʼaga ohage pe ko te maʼuhiga ʼo te mataʼi tofe ki te tagata, ʼe tou tali anai ke tou tuku ia meʼa fuli
4. Kotea ʼae ʼe tou lotolelei anai ʼo fai maʼa te Puleʼaga ʼa te ʼAtua?
4 Kotea te ako ʼe feala ke tou taʼofi mai te fakamatala ʼa Sesu? Ko te moʼoni ʼo ʼuhiga mo te Puleʼaga ʼa te ʼAtua, ʼe hage ko te mataʼi tofe maʼuhiga ʼaia. Kapau ʼe maʼuhiga kia tatou ia te Puleʼaga ohage pe ko te maʼuhiga ʼo te mataʼi tofe ki te tagata, ʼe tou tali anai ke tou tuku ia meʼa fuli ke feala ai ke tou liliu ko he hahaʼi ʼo te Puleʼaga ʼo te ʼAtua. (Lau ia Maleko 10:28-30.) Tou vakaʼi pe neʼe fakahoko feafeaʼi te faʼahi ʼaia e he tagata pea mo he fafine.
5. Kotea ʼae neʼe lotolelei ia Sakeo ke ina fai maʼa te Puleʼaga?
5 Ko Sakeo neʼe ko he tagata tanaki tukuhau. Pea neʼe koloaʼia, he neʼe ina kaihaʼa te falā ʼa te hahaʼi. (Luka 19:1-9) Kaʼe ʼi te tahi ʼaho, neʼe logo ia Sakeo ki te talanoa ʼa Sesu ʼo ʼuhiga mo te Puleʼaga. Pea ʼi tana leleiʼia te ʼu manatu ʼae neʼe logo ki ai, neʼe ina fia fetogi ai leva ia tona maʼuli. Neʼe ina ui fenei: “ ʼAliki, ʼe au foaki anai te vaelua ʼo ʼoku koloa ki te kau masisiva, pea ko he meʼa pe ʼa he tahi neʼe au kaihaʼa, ʼe au toe liufaki age anai ʼo liuga fa.” Neʼe liufaki ai e Sakeo te falā ʼa te hahaʼi ʼae neʼe ina kaihaʼa pea neʼe mole kei manumanū leva.
6. Kotea te ʼu fetogi neʼe fai e te fafine? Pea kotea tona tupuʼaga?
6 Kua hili ki ai ni taʼu, ko te fafine neʼe logo ki te moʼoni ʼo ʼuhiga mo te Puleʼaga, kaʼe neʼe faifafine ʼi te temi ʼaia. Neʼe ko te pelesita ʼo te kautahi ʼae ʼe tokaga ki te puipui ʼo natou ʼe faifafine mo faitagata. Kaʼe neʼe ina ako leva ia te Tohi-Tapu pea mo ina iloʼi ia te maʼuhiga ʼo te Puleʼaga ʼa te ʼAtua. Koia neʼe mahino ai neʼe tonu ke ina fai he ʼu fetogi ʼi tona maʼuli. (1 Kolonito 6:9, 10) ʼUhi pe ko tona ʼofa ia Sehova, neʼe mavae ai ʼi te kautahi pea mo ina fakagata ia tana faifafine. Neʼe papitema ʼi te taʼu 2009, pea neʼe pionie katoa ʼi te taʼu pe ʼae neʼe hoa atu ki ai. Neʼe malohi age ia tona ʼofa ia Sehova ʼi te ʼu holi kovi ʼae neʼe ina maʼu. Pea koia ʼae neʼe ina fetogi ai tona maʼuli katoa.—Maleko 12:29, 30.
7. ʼE feafeaʼi hatatou taupau ke malohi tatatou fakamaʼuhigaʼi te Puleʼaga ʼa te ʼAtua?
7 Tokolahi ia tatou neʼe tonu ke tou fai he ʼu fetogi ʼi ʼotatou maʼuli, ke feala ai hatatou liliu ko he hahaʼi ʼo te Puleʼaga ʼa te ʼAtua. (Loma 12:2) Kaʼe ʼe kei hoko atu pe ʼatatou faiga. ʼAua naʼa tou tuku he meʼa ke ina fakavaivaiʼi tatatou fakamaʼuhigaʼi ia te Puleʼaga. Ohage la, ko te fia maʼu koloa peʼe ko te ʼu holi ki te ʼu aga fakalialia. (Taaga Lea 4:23; Mateo 5:27-29) ʼE foaki mai e Sehova ia te tahi koloa maʼuhiga, ke tou taupau ke malohi ai tatatou fakamaʼuhigaʼi tona Puleʼaga.
KO TOTATOU MINISITELIO ʼE INA HAOFAKI TE HAHAʼI
8. (1) He koʼe neʼe fakatatau e Paulo totatou minisitelio ki ‘he koloa ʼe maʼu ʼi he ʼu ipu kele’? (2) Neʼe fakaha feafeaʼi e Paulo ia tana leleiʼia te minisitelio?
8 Neʼe tuku mai e Sesu te maʼua ʼae ke tou fakamafola pea mo tou akoʼi ki te hahaʼi ia te logo lelei ʼo te Puleʼaga ʼa te ʼAtua. (Mateo 28:19, 20) Neʼe fakatatau e te apositolo ko Paulo ia te gaue faifakamafola ki he koloa ʼe maʼu ʼi he ʼu ipu kele. (2 Kolonito 4:7; 1 Timoteo 1:12) ʼE tou hage ko he ʼu ipu kele, koteʼuhi ʼe tou agahala. Kaʼe ʼe hage te logo ʼae ʼe tou tala ko he koloa maʼuhiga, koteʼuhi ʼe feala ke maʼu e te hahaʼi ʼae ʼe fakalogo mai ia te maʼuli heʼe gata. Koia ʼae neʼe ui fenei ai e Paulo: “ ʼE au fai ia meʼa fuli ʼuhi ko te logo lelei, ke feala ai haku vaevae mo ʼihi.” (1 Kolonito 9:23) Ko Paulo neʼe faiga malohi ke ina akoʼi te hahaʼi ʼo ʼuhiga mo te Puleʼaga ʼa te ʼAtua. (Lau ia Loma 1:14, 15; 2 Timoteo 4:2.) Neʼe tau ia Paulo mo te ʼu fakataga fakamataku. Kaʼe neʼe hoko atu pe tana faifakamafola ʼuhi ko tana leleiʼia ia te logo lelei. (1 Tesalonika 2:2) ʼE tou lava faʼifaʼitakiʼi feafeaʼi ia te fakamaʼuhigaʼi e Paulo ia te minisitelio?
ʼE hage te logo ʼae ʼe tou tala ko he koloa maʼuhiga, koteʼuhi ʼe feala ke maʼu e te hahaʼi ʼae ʼe fakalogo mai ia te maʼuli heʼe gata
9. ʼE tou lava fakaha feafeaʼi ʼe tou fakamaʼuhigaʼi te minisitelio?
9 Neʼe mole gata ai ia tana fakaha ia fakamaʼuhigaʼi ia te minisitelio. Neʼe ina fakaʼaogaʼi foki ia te ʼu faigamalie fuli moʼo faifakamafola ki te hahaʼi. ʼE tou toe faʼifaʼitakiʼi foki ia Paulo mo te ʼu ʼuluaki Kilisitiano ia ʼaho nei. He ʼe tou tala ia te logo lelei ki te hahaʼi ʼi ʼonatou ʼapi, ʼi te ʼu koga meʼa ʼae ʼe kaugā malie ai te hahaʼi peʼe ko ʼihi atu koga meʼa ʼe feala ke tou maʼu ai natou. (Gaue 5:42; 20:20) Tou faiga ke tou faifakamafola ki te tokolahi ʼi he ʼu aluʼaga kehekehe. Pea kapau ko he faʼahi ʼe tou fealagia, ʼe lelei ke tou toʼo te selevisi pionie vaeluaʼi temi peʼe ko te pionie katoa. Peʼe feala ke tou ako he tahi age lea, peʼe tou olo ki he tahi kolo peʼe ko he tahi fenua ʼo faifakamafola ai.—Gaue 16:9, 10.
10. Kotea te ʼu fua lelei neʼe maʼu e Irene ʼi tana faiga malohi ʼae ke ina tala te logo lelei?
10 Tou vakaʼi te faʼifaʼitaki ʼo te tuagaʼane selipatea ʼi Amelika ʼe higoa ko Irene. Neʼe ina fia fakamafola te logo lelei ki te hahaʼi ʼae ʼe palalau ʼi te lea Fakalusia. Koia ʼi te taʼu 1993, neʼe fakatahi ai mo te kutuga lea Fakalusia ʼi te Kolo ko New York. ʼI te temi ʼaia, neʼe ko te toko 20 kau faifakamafola pe. Neʼe ui fenei e Irene hili ki ai taʼu ʼe 20: “ ʼE mole heʼeki au poto lelei ʼi te palalau ʼi te lea Fakalusia.” Kaʼe ʼaki te tokoni ʼa Sehova mo ʼihi kau faifakamafola, neʼe ina fakaha te logo lelei ʼi te lea ʼaia. Ia ʼaho nei, kua maʼu te ʼu kokelekasio lea Fakalusia ʼe ono ʼi New York. Neʼe lahi ʼana ako Tohi-Tapu pea neʼe papitema te toko 15 ia natou. Ko ʼihi ʼe natou Petelite, mo pionie pea mo tagata ʼafeā. ʼE ui fenei e Irene: “Ka
au fakakaukauʼi atu te ʼu fakatuʼutuʼu ʼae neʼe au fia fai, ʼe mahino ia neʼe mole feala ke au maʼuli fiafia ai.” ʼO ha mai ai, ʼe maʼuhiga moʼoni kia Irene ia tona minisitelio.11. Kotea ʼae ʼe feala ke hoko moka ʼe tou haga faifakamafola logo la te fakataga?
11 ʼE tou hage anai ko te apositolo ko Paulo, mo kapau ʼe tou fakamaʼuhigaʼi totatou minisitelio. Pea ʼe tou hoko atu anai tatatou faifakamafola tatau aipe pe ʼe tou tau mo te fakataga. (Gaue 14:19-22) Ohage la, ʼi te taʼu 1930 ʼo kaku ki te taʼu 1944, neʼe fakamataku te fakataga ʼae neʼe tau mo ʼotatou tehina ʼi Amelika. Kaʼe neʼe natou haga faifakamafola aipe. ʼI te faigaʼi ʼae e te ʼu pule taki ke fakagata tanatou gaue, neʼe fai e te ʼu tehina tanatou tagi ki te telepinale. Pea neʼe lahi te ʼu faifakamau neʼe natou malo ai. ʼI te taʼu 1943, neʼe talanoa ia te tehina ko Knorr ki te faifakamau neʼe tou malo ai ʼi te Telepinale Lahi ʼo Amelika. Neʼe ina ui ai, ka na pau la neʼe tuku e te ʼu tehina tanatou faifakamafola, ʼe mahino ia neʼe mole hoko he ʼu faifakamau. Kaʼe ʼe kei hoko atu pe e te ʼu tehina tanatou faifakamafola ʼi te malamanei katoa, ʼo ha mai ai, neʼe mole he fua ʼo te ʼu fakatagata ʼaia. ʼO toe feia pe ki ʼihi tehina ʼi te tahi ʼu fenua neʼe natou malo ʼi te ʼu faifakamauʼaga. ʼEi, ʼe mole tou fakagata anai tatatou faifakamafola ʼuhi ko te fakataga, koteʼuhi ʼe maʼuhiga kia tatou totatou minisitelio.
12. Kotea ʼae kua kotou fakatotonu ke kotou fai?
12 Kapau ʼe maʼuhiga kia tatou totatou minisitelio, ʼe mole tou tokakaga pe anai ki ʼotatou hola. Kaʼe ʼe tou fai anai ia meʼa fuli ʼe tou lavaʼi moʼo “fakamoʼoni katoa ki te logo lelei.” (Gaue 20:24; 2 Timoteo 4:5) Kotea koa ʼae ka tou akoʼi ki te hahaʼi? Tou vakaʼi te tahi koloa neʼe foaki mai e te ʼAtua.
TE ʼU MOʼONI MAʼUHIGA ʼAE ʼE TOU AKO
13, 14. Kotea te “koloa” ʼae neʼe talanoa ki ai Sesu ia Mateo 13:52? Pea ʼe tou fakalahi feafeaʼi anai?
13 Neʼe foaki mai e Sehova te tahi koloa maʼuhiga, ko te ʼu moʼoni fuli ʼae ʼe tou ako. Ko 2 Samuele 7:28; Pesalemo 31:6) Pea ʼe ina fia vaevae te ʼu moʼoni ʼaia mo tatou, koteʼuhi ʼe ko he Tamai lotofoaki. Kua lahi te ʼu moʼoni kua tou ako, ʼaki tatatou lau ia tana Folafola mo ʼatatou tohi, mo tatatou kau ki te ʼu fakatahi lalahi pea mo te ʼu fono. Ka lahi tatatou tanaki ia te ʼu moʼoni, ʼe tou maʼu ai anai te “koloa” ʼo te ʼu moʼoni ʼae neʼe talanoa ki ai ia Sesu, ia “te ʼu meʼa foʼou pea mo te ʼu meʼa ʼafeā.” (Lau ia Mateo 13:52.) ʼE tokoni mai anai Sehova ke tou fakalahi ʼotatou “koloa” mo kapau ʼe tou kumi te ʼu moʼoni ohage ko te kumi ʼo he ʼu koloa ʼe fufu. (Lau ia Taaga Lea 2:4-7.) ʼO feafeaʼi?
Sehova ʼe ko te Matapuna ʼo te moʼoni. (14 ʼE tonu ke tou ako tuʼumaʼu te Tohi-Tapu mo ʼatatou tohi pea mo fai he ʼu fekumi ʼe loloto. ʼE tou maʼu ai anai he ʼu moʼoni “foʼou.” (Sosue 1:8, 9; Pesalemo 1:2, 3) ʼI te ʼuluaki Tule Leʼo ʼae neʼe ta ʼi Sulio 1879, neʼe fakatatau te moʼoni ki he fisiʼi teu neʼe taʼotaʼo e te vao kovi. Koia ʼae ʼe tonu ai ke kumi fakalelei e ia ʼae ʼe ina fia maʼu he fisiʼi teu feia. Pea ʼi te temi leva ʼae kua ina maʼu ai, ʼe tonu anai ke ina toe hoko atu tana fekumi ke ina maʼu ʼihi atu fisiʼi teu. ʼO toe feia pe, kapau ʼe tou maʼu ia he moʼoni, ʼe tonu ke tou haga hoko atu tatatou kumi ʼihi atu ʼu moʼoni ʼaki te fiafia.
15. He koʼe ʼe feala ke tou ui ko ʼihi moʼoni ko he ʼu moʼoni “ ʼafeā”? Pea ko te ʼu moʼoni fea ʼae ʼe maʼuhiga tafito kia koutou?
15 ʼI tatatou kamata ako ia te Tohi-Tapu, neʼe tou ako ai te ʼu moʼoni fakaofoofo. Koia, ʼe feala pe hatatou fakahigoaʼi te ʼu moʼoni ʼaia, ko te ʼu moʼoni “ ʼafeā.” Kotea te ʼu moʼoni ʼaia? ʼI te kamata, neʼe tou ako ai, ko Sehova ko totatou Tupuʼaga pea ʼe ʼi ai tana fakatuʼutuʼu maʼa te tagata. Neʼe tou toe ako foki, neʼe fekauʼi mai e te ʼAtua ia tona ʼAlo ki te kele ke haʼu ʼo foaki tona maʼuli ko he sakilifisio. ʼAki te sakilifisio ʼaia, kua feala ai ke tou ʼateaina mai te agahala mo te mate. Neʼe tou toe ako ai foki, ʼe pulihi anai e te Puleʼaga ʼa te ʼAtua ia te ʼu mamahi fuli. Pea ʼe feala hatatou maʼuʼuli tokalelei mo fiafia ʼi te kele ʼo talu ai.—Soane 3:16; Fakaha 4:11; 21:3, 4.
16. Kotea ʼae ʼe tonu ke tou fai moka fetogi he ʼu fakamahino Fakatohi-tapu?
16 ʼI ʼihi temi, ʼe ʼi ai te ʼu fetogi ki tatatou mahino ʼo ʼuhiga mo he lea fakapolofeta peʼe ko he vaega Tohi-Tapu. Ka hoko mai te aluʼaga ʼaia, ʼe maʼuhiga ke tou toʼo he temi ke tou mahino ai ki te ʼu fetogi ʼaia pea mo tou metitasio ki ai. (Gaue 17:11; 1 Timoteo 4:15) ʼE mole tonu pe ke tou mahino ki te kehekehe ʼo te fakamahino ki muʼa atu pea mo te fakamahino foʼou. Kaʼe ʼe tonu foki ke tou vakaʼi te ʼu agaaga fuli ʼo te fakamahino foʼou. Kapau ʼe tou ako fakalelei ia te fakamahino foʼou, ʼe tou hilifaki anai ia te moʼoni foʼou ʼaia ki te ʼu moʼoni Fakatohi-tapu ʼae kua tou ako. He koʼe ʼe fua lelei anai kia tatou te ʼu faiga ʼaia?
17, 18. ʼE tokoni feafeaʼi mai ia te laumalie maʼoniʼoni?
17 Neʼe akoʼi mai e Sesu, ʼaki te laumalie ʼo te ʼAtua ʼe tou lava manatuʼi te ʼu meʼa ʼae neʼe tou ako ʼi muʼa atu. (Soane 14:25, 26) ʼE hoko feafeaʼi te aluʼaga ʼaia moka tou fakamafola te logo lelei? Tou vakaʼi te faʼifaʼitaki ʼo te tehina ʼe higoa ko Peter. ʼI te taʼu 1970, neʼe taʼu 19 pea neʼe ko tana hoki kamata gaue pe ʼaia ʼi te Petele ʼo Pilitania. Neʼe faifakamafola ia Peter ʼi te ʼu ʼapi pea neʼe felaveʼi mo te tagata ʼe kaukava kua matuʼa. Neʼe ina kole ki te tagata pe ʼe fia mahino ki te Tohi-Tapu. Kaʼe neʼe punamaʼuli te tagata he neʼe ko te tupulaga ia ʼae ʼe ina fia akoʼi age ia te Tohi-Tapu. Pea tahi neʼe ko he takitaki ʼo te lotu Fakasutea. Neʼe ina fia ʼahiʼahiʼi ai ia Peter, ʼo ina fai te fehuʼi ʼaeni: “ ʼIo, kaʼe neʼe tohi koa la te tohi ʼo Taniela ʼi te lea fea?” Neʼe tali fenei age e Peter: “Neʼe ʼi ai te koga ʼo te tohi ʼo Taniela neʼe tohi ʼi te lea Fakaalamea.” Neʼe ui fenei e Peter: “Neʼe punamaʼuli ia te takitaki lotu Sutea ʼi taku iloʼi ia te tali. Kaʼe neʼe au toe punamaʼuli foki mo au. Neʼe au maʼu feafeaʼi te tali? Neʼe au toe liliu ki fale ʼo vakaʼi ia Te Tule Leʼo pea mo te Réveillez-vous ! ʼo te ʼu mahina ki muʼa atu. Pea neʼe au maʼu te alatike ʼe fakamahino ai, ko Taniela neʼe faitohi ʼi te lea Fakaalamea.” (Taniela 2:4) ʼEi, ʼe lava tokoni mai te laumalie maʼoniʼoni ke tou manatuʼi te ʼu manatu ʼae neʼe kua tou lau mo tou tanaki ki ʼotatou koloa ʼae kua tou maʼu.—Luka 12:11, 12; 21:13-15.
18 Kapau ʼe maʼuhiga kia tatou te ʼu moʼoni ʼae ʼe tou ako mai ia Sehova mo tou lotofakafetaʼi ki ai, ʼe tou fia hilifaki tuʼumaʼu anai te ʼu moʼoni ʼaia ki totatou koloa. Pea ka tou haga fai te faʼahi ʼaia, ʼe lahi anai totatou fiafia he ʼe kua feala hatatou akoʼi niʼihi.
KOTOU PUIPUI ʼOKOTOU KOLOA
19. He koʼe ʼe tonu ke tou puipui totatou koloa fakalaumalie?
19 ʼI te alatike ʼaeni, neʼe tou mahino ai ki te maʼuhiga ʼo te ʼu koloa fakalaumalie. Kaʼe tou tokakaga naʼa mole kei maʼuhiga te ʼu koloa ʼaia kia tatou ʼuhi ko Satana mo tona malama. Kapau ʼe mole tou nonofo tokaga, ʼe feala pe ke fakaleluʼi tatou. Ohage la, ko te foaki mai ʼo he gaue ʼe totogi lelei, peʼe ko te fia maʼuli koloaʼia, peʼe ko te fakahaha ʼo te ʼu koloa ʼae ʼe tou maʼu. Neʼe fakamanatu mai e te apositolo ko Soane, kua vave puli pe ia te malama ʼaeni mo te ʼu meʼa fuli ʼae ʼe ina foaki. (1 Soane 2:15-17) Koia ʼae ʼe tonu ai ke tou lotofakafetaʼi tuʼumaʼu pea mo tou puipui totatou koloa fakalaumalie.
20. Kotea ʼae ka tou fakatotonu anai ke tou fai moʼo puipui ʼotatou koloa fakalaumalie?
20 Tou lituʼa kia meʼa fuli ʼae ʼe feala ke puli ai te maʼuhiga ʼae kia tatou ʼo te Puleʼaga ʼa te ʼAtua. Tou toʼo te tonu ʼae ke tou faifakamafola mo he faʼafai, pea ke tou leleiʼia tuʼumaʼu totatou minisitelio. Tou haga kumi ia te ʼu moʼoni Fakatohi-tapu. Kapau ʼe tou fai feia, ʼe tou tanaki anai hotatou ʼu “koloa ʼi selo ʼe mole maumau, ʼae ʼe mole fakaovi ki ai he tagata kaihaʼa pea mo kaina e he ʼu kiʼi manu. Koteʼuhi ko te faʼahi ʼae ʼe tuku ai [ʼotatou] koloa ʼe toe tuku ai foki mo [ʼotatou] loto.”—Luka 12:33, 34.