1, 2. (a) Masalah si penting kai nge si mpengaruhi kerina manusia? (b) Engkai maka penting masalah e man banta?

GUNDARI, si pentingna kel akap nterem kalak eme sen. E me si lalap iukurina janah melala kel keri waktuna guna ngayakisa. Si deban, pentingen ka akapna keluargana, kesehatenna, ntah pe sura-surana.

² Lit si pentingen asangken si e kerina. Eme mbuktiken maka Jahwe me si erhak guna merentah. Penting kel gelah la pernah silupaken permasalahen e. Adi la kita metenget, banci kita lupa uga pentingna permasalahen e erkiteken sibuksa nandangi kegeluhenta tep-tep wari ntah pe siukuri kel masalahta. Adi sidukung hak Jahwe merentah, reh ngasupna kita ngadapi masalah i bas kegeluhenta janah reh deherna kita ras Jahwe.

3. Kai si ikataken Setan kerna pemerentahen Dibata?

³ Erbual Setan alu nuriken maka la lit hak Jahwe guna  merentah. Atena gelah iakap manusia maka Jahwe eme Penguasa si la bujur janah la ermediate man manusia. Ikataken Setan, adi manusia si merentah dirina sendiri pasti lebih ermeriah ukur manusia e. (Kejadin 3:1-5) Ikatakenna maka la lit manusia si tuhu-tuhu setia man Dibata. Janah ikataken Setan ka adi mesera kel kegeluhen manusia, labo ia nggit ngakuken Dibata selaku Penguasana. (Jop 2:4, 5) Emaka ibereken Jahwe waktu guna mbuktiken man kerina si nggeluh maka mesera kel kegeluhen manusia adi la kin Dibata si jadi Penguasa.

4. Engkai maka arus idungi permasalahen kerna hak Jahwe guna merentah?

⁴ Tentu, ieteh Jahwe maka labo tuhu tuduhen Setan e. Tapi, ngkai maka ibere Jahwe waktu man Setan guna mbuktiken tuduhenna e? Jabapenna mpengaruhi kerina si nggeluh, subuk i surga bage pe i doni. (Oge Masmur 83:19.) Itulak Adam ras Hawa pemerentahen Jahwe, janah kenca si e nterem si ngikutken kalak e. Enda banci erban piga-piga kalak rukur maka Setan e benar. Sedekah lenga ieteh manusia bage pe malekat jabapen permasalahen e, labo banci lit kedamen ras persadan. Tapi kenca nggo terbukti maka Jahwe nge si erhak merentah, kerina kalak pagi nggeluh rasa lalap i bas pemerentahenNa si luar biasa. Lit me kedamen bas alam semesta.​—Epesus 1:9, 10.

5. Engkai maka kita pe ikut i bas permasalahen e?

⁵ Terbukti me pagi maka Jahwe nge si erhak merentah. Janah terbukti me maka pemerentahen Setan ras manusia gagal janah ikernepken. Pemerentahen Dibata erkelangken Kinirajan Kristus pasti berhasil. Kalak si setia mbuktiken maka banci manusia terus ndukung janah setia man pemerentahen Dibata. (Jesaya 45:23, 24) Nggit nge kita jadi salah sada i bas kalak si setia e? Tentu! Emaka, perlu siangkai uga pentingna permasalahen e.

6. Uga pentingna mbuktiken hak Jahwe merentah?

⁶ Ndauh pentingen mbuktiken hak Jahwe merentah asangken keriahen ukurta. Tapi labo ertina maka keselamatenta la penting ntah pe labo ertina la iperdiateken Jahwe kita. Janari sieteh?

7, 8. Kai gunana banta pembuktin hak Jahwe merentah?

⁷ Keleng kel ate Jahwe manusia. Situhuna, meherga kel akapNa kita emaka ibereNa anakNa gelah banci kita nggeluh si rasa lalap. (Johanes 3:16; 1 Johanes 4:9) Adi la itepati Jahwe janjiNa kerna wari si pepagi, benar me  Setan bage pe pengikutna. Ikataken Setan maka Jahwe e perbual si la nggit mereken kai si mehuli man manusia janah pemerentahenNa la adil. Igombangi penentang e janji Jahwe janah nina, ”Ma kin erpadan [Jahwe] maka Ia reh? I ja dage Ia? Bapa-bapanta enggo mate, tapi kerina bali denga ka nge ras asum doni enda ijadiken!” (2 Petrus 3:3, 4) Tapi pasti itepati Jahwe janjiNa. Janah guna mbuktiken hakNa merentah, ijaminNa maka manusia si patuh pasti iselamatkenNa. (Oge Jesaya 55:10, 11.) Erpalasken kekelengen me Jahwe merentah. Emaka banci kita tek maka lalap nge ikelengi janah iergaiNa umatNa si setia.​—Keluaren 34:6.

⁸ Situhuna si pentingna kel eme hak Jahwe merentah. Tapi, labo ertina maka keselamatenta la penting man baNa. Ermediate kel Jahwe man banta. Emaka perlu terus siukuri kai si lebih penting janah setia ndukung pemerentahen Jahwe.

9. Kai nina Setan kerna Jop? (Nen gambar pemena artikel.)

⁹ Penting gelah benar caranta rukur kerna hak Jahwe merentah. Enda banci sieteh adi sioge kitap Jop, salah sada kitap si isuratken i bas Pustaka si Badia. I je ikataken Setan maka adi mesangat kiniseran si ialami Jop, itadingkenna me Dibata. Ipindo Setan ka gelah mesera iban Jahwe kegeluhen Jop. La nggit Jahwe ngelakokenca, tapi ipeturutNa iuji Setan Jop, nina, ”Kai si lit i bas ia, genduari i bas kuasandu.” (Oge Jop 1:7-12.) Kenca si e, bene me kerina suruh-suruhen Jop bage pe ertana. Ibegina ka maka ngeri kel perpate sepuluh anakna. Iban Setan tempa-tempa Dibata si erban e kerina. (Jop 1:13-19) Iban Setan ka Jop kena pinakit si seh kel suina janah ciga kel ate. (Jop 2:7) Si parahna, kitik kel ukurna iban ndeharana ras telu temanna si pekulah-kulah.​—Jop 2:9; 3:11; 16:1-2.

10. (a) Uga Jop ncidahken kesetianna man Dibata? (b) Engkai maka perlu ipersingeti Jop?

¹⁰ Payo nge si ikataken Setan e? Lang. Amin gia mesera kel iakap Jop, la pernah itadingkenna Jahwe. (Jop 2:10) Tapi, paksa si e lupa Jop kerna kai si pentingna, janah dirina saja si iukurina. Tetap ikatakenna maka ia la salah. Iakap Jop ka maka lit hakna guna meteh ngkai maka iadapina kiniseran e. (Jop 7:20; 13:24) Banci siangkai uga perasan Jop. Tapi, ieteh Jahwe maka salah cara Jop rukur, maka ipersingetiNa Jop. Uga caraNa?

11, 12. Kai si ate Jahwe iajarkenNa man Jop? Uga tanggapen Jop?

¹¹ Banci sioge kai nina Jahwe man Jop bas kitap Jop bindu 38 seh ku 41. La ituriken Jahwe ngkai maka iadapina kiniseran. Tapi, isampati Jahwe ateNa ia gelah iangkaina uga kitikna ia adi ibandingken ras Dibata. IkatakenNa man Jop maka lit permasalahen si ndauh pentingen asangken masalah Jop. (Ope Jop 38:18-21.) Enda nampati Jop ngobah carana rukur.

¹² Kejam nge Jahwe paksa ikatakenna bage man Jop kenca kerina  kiniseran si iadapina? Lang. Jop pe la erpengakap maka Jahwe kejam. Iangkai Jop janah iergaina pedah Jahwe. Nina Jop, ”Mela kal kuakap kerna kai si enggo kubelasken, erkadiola aku, e maka kundul aku i bas abu dapur ras abu taneh.” (Jop 42:1-6) Sope si e, lit kalak si nguda denga gelarna Elihu, isampatina Jop ngobah carana rukur. (Jop 32:5-10) Ibegiken Jop pedah Jahwe si erpalasken kekelengen janah iobahna carana rukur. Emaka, ipebetehken Jahwe man si deban maka meriah ukurNa nandangi kesetian Jop.​—Jop 42:7, 8.

13. Uga pedah Jahwe banci nampati Jop amin gia nggo lewat ujin si iadapina?

¹³ Erguna denga kel man Jop pedah Jahwe amin pe nggo lewat ujin si iadapina. ”Pasu-pasu si ibereken [Jahwe] man Jop kenca lepas kiniseranna e, lebih pe asangken si nai.” I bas paksana, tubuh me anakna ”pitu dilaki ras telu diberu”. (Jop 42:12-14) Amin gia keleng kel ate Jop anakna e, tapi tedeh kel atena anakna si nggo mate. Banci saja la pernah ilupakenna keadan si la mehuli si pernah terjadi bas ia bage pe keluargana. Janah amin pe ietehna dungna ngkai maka iadapina kiniseran e, banci jadi mamang denga atena ngkai maka ipeturut Dibata iadapina kiniseran si seh kel beratna e. Adi bage perukurenna, banci iingetna kai si nggo iajarken Jahwe bana. Enda banci ngapuli ia janah nampati ia gelah benar carana rukur.​—Masmur 94:19.

14. Kai si banci sipelajari arah pengalamen Jop?

¹⁴ Adi siukuri kai si terjadi i bas kegeluhen Jop, enda banci nampati kita ngobah caranta rukur janah banci ngapuli kita. Isuratken Jahwe kitap Jop guna ”ngajari kita gelah erpengarapen erkiteken kesabaren ras pergegeh si ibereken Pustaka si Badia man banta”.  (Roma 15:4) Enda ngajari kita gelah ula masalahta saja lalap siukuri, piah dungna lanai siukuri kerna mbela hak Jahwe merentah. Bagi Jop, sicidahken maka sidukung hak Jahwe merentah alu tetap setia man baNa amin gia i bas paksa ngadapi tentangen.

15. Kai nge ulihna adi megenggeng kita ngadapi masalahta?

¹⁵ Banci kita terapuli arah pengalamen Jop. Jenari sieteh maka adi lit perbebenta labo perban merawa Jahwe banta. Enda mereken kesempaten man banta guna ndukung hak Jahwe merentah. (Kuan-kuanen 27:11) Adi megenggeng kita, meriah akap Jahwe, janah reh paguhna arapenta kerna wari si pepagi. (Oge Roma 5:3-5.) Pengalamen Jop ncidahken maka ”Jahwe e perkuah dingen dem keleng ate”. (Jakup 5:11) Adi sidukung hak Jahwe merentah, iupahiNa kita. Sieteh maka isampati Jahwe kita ”gelah megenggeng i bas kai pe”.​—Kolose 1:11.

16. Engkai maka perlu lalap siinget maka mbela hak Jahwe merentah seh kel pentingna?

¹⁶ Payo, paksa lit masalahta mesera kel siakap guna tetap ngukuri kerna mbela hak Jahwe merentah. Kitik pe masalahta tapi galang kel siakap adi siukuri lalap. Emaka perlu lalap siinget uga pentingna ndukung hak Dibata merentah amin gia uga beratna masalahta.

17. Uga kesibukenta i bas ndahiken dahin Jahwe nampati kita tetap nginget kai si pentingna?

¹⁷ Adi tetap kita sibuk i bas ndahiken dahin Jahwe, enda banci nampati kita nginget kai si pentingna. Contohna, sekalak turang senina si gelarna Renee, kena stroke ras kanker ia, janah mekatep mesui iakapna. Paksa i rumah sakit, erberita ia man kalak si erdahin i je, man pasien si deban, ras  pengunjung. Pernah ka paksa irawat Renee sedekah dua setengah minggu i rumah sakit, lit 80 jam ia erberita. Amin gia ieteh Renee maka ia nandangi mate, la pernah ia lupa kerna kai si pentingna. Ndukung hak Jahwe merentah erban dame pusuhna.

18. Pelajaren kai si banci sidat arah pengalamen Jennifer kerna ndukung hak Jahwe merentah?

¹⁸ Banci ka sidukung hak Jahwe merentah paksa ngadapi masalah si biasa si lit tep-tep wari. Paksa mulih ate turang seninanta Jennifer ku kutana, arus ia nimai teluh wari dekahna i bandara perban lalap penerbangenna itunda. Emaka latih janah melungen kel akapna. Banci saja mekuah atena bana. Tapi ertoto Jennifer man Jahwe mindo penampatNa gelah banci erberita man kalak si paksana nimai i je. Ulihna, banci nterem kalak ijumpaina janah melala iberena oge-ogenta. Nina Jennifer, ”Ipasu-pasu Jahwe kuakap aku amin gia latih kuakap janah ibereNa aku gegeh guna mberitaken gelarNa alu cara si mehuli.”

19. Kai buktina maka umat Jahwe me umat Dibata si tuhu-tuhu?

¹⁹ Umat Jahwe ngenca si tuhu-tuhu ngangkai uga pentingna hak Jahwe merentah. Enda me si mbuktiken ise umat Dibata si tuhu-tuhu. Emaka arus tetap sidukung hak Jahwe merentah.

20. Uga perasan Jahwe kerna kerina si ilakokenndu guna ndukung hakNa merentah?

²⁰ Isedari janah iergai Jahwe kerina si ilakokenndu guna ndukung hakNa merentah asum ilayanindu Ia alu setia janah megenggeng paksa ngadapi perbeben. (Masmur 18:26) Artikel seterusna nuriken terdauhen kerna ngkai maka perlu idukungndu hak Jahwe merentah janah uga carandu ndukungsa.