1, 2. (a) Mi vialte cungah huham a ngeimi a biapimi kong cu zeidah a si? (b) Mah kong cu zeicah kan caah a biapit tuk?

TUCHAN mi tampi caah tangka cu a biapi tukmi a si. Mah cu biapi ah an chiahmi le an lungre an i theihpimi kong a si. Tangka tampi kawlnak le an ngeihmi i khonnak ah an caan tampi an hman. Cheukhat nih cun an innchungkhar, an ngandamnak le an hlawhtlinnak hna kha biapi bik ah an chiah.

² Mah vialte nakin a biapi deuh tukmi a kong pakhat a um. Mah cu Jehovah cungnung bik a sinak fianternak kha a si. Mah kong cu a biapi tukmi a si caah zeitikhmanh ah philh hna hlah u sih. Kan i ralrin lo ahcun mah kong a biapitnak philh tiangin nifa kan nunnak caah kan rian a tam tuk kho asiloah kanmah pumpak buaibainak kongah kan lungre a thei tuk kho. Jehovah cungnung bik a sinak kha kan bawmh ahcun nifate kan tonmi buaibainak hna kha ṭha tein kan tawnghtham khawh lai i Jehovah he zong kan i naih deuh lai.

3. Pathian uktu a sinak he aa tlaiin Satan nih zei bia dah a chim?

³ Jehovah nih uknak nawl a ngeihnak kong he aa tlaiin Satan Khuachia nih biahalnak a chuahter. Jehovah cu a ding lomi Uktu a si i kan caah a ṭha bikmi kha a kan thuhkanh tiah Satan nih ruahter a kan duh. Minung nih anmah tein an i uk ahcun an i nuam deuh lai tiah Satan nih a ti. (Gen. 3:1-5) Pathian cungah ahohmanh zumhawktlak tein an um lai lo i a harmi thil sining an ton ahcun Jehovah kha an Uktu in an hlawt lai ti zongin a ti. (Job 2:4, 5) Cucaah Pathian Uknak a um lo ahcun harnak kan tong lai timi biatak langhternak caah Jehovah nih a caan a awnhmi a si.

4. Cungnung bik sinak kong he aa tlaiin zeicah tawnghtham a herh?

⁴ Satan sualpuhnak cu a hmaan lo ti kha Jehovah nih a hngalh. Cu a si ah zeicah Satan kha a sining langhternak caah a caan a pek? A phi cu van le vawlei i a ummi kip he aa pehtlaimi a si caah a si. (Salm 83:18 rel.) Adam le Evi nih Jehovah uknak kha an ralchanh i mah caan thawkin midang tampi zong nih an ralchanh ve. Cucaah mi cheukhat nih Satan sualpuhnak cu a hmaan men lai tiah an ruah khawh. Minung asiloah vancungmi hna lungthin chungah mah kong tawnghtham a si lo ahcun daihnak le lungrualnak taktak a um kho lai lo. Asinain Jehovah cungnung bik a sinak fianter a si hnuah cun Jehovah i a ṭha tukmi a uknak tangah mikip zungzal in an um kho lai. Mah tikah van le vawlei ah daihnak a um lai.—Efe. 1:9, 10.

5. Jehovah cungnung bik a sinak langhternak ah zeitindah kan i tel?

⁵ Satan le minung uknak cu an sung cikcek lai i hloh an si lainak thawngin Pathian cungnung bik a sinak cu fianter a si te lai. Messiah Pennak thawngin Pathian uknak cu a hlawh a tling lai. Minung nih zumhfek tein Pathian uknak an bawmh khawh ti kha zumhfekmi hna nih an langhter lai. (Isa. 45:23, 24) Mah zumhfekmi hna lakah tel kan duh maw? Kan duh. Cucaah mah kong a biapitnak kha hngalhthiam a hau.

6. Jehovah cungnung bik a sinak fianternak cu zeitluk in dah a biapit?

⁶ Jehovah cungnung bik a sinak fianternak cu kanmah nuamhnak nakin a biapi deuh tuk. Asinain kan khamhnak cu a biapi lo asiloah Jehovah nih zei ah a kan rel lo tinak a si lo. Mah kha zeitindah kan hngalh khawh?

7, 8. Pathian cungnung bik a sinak fianternak nih zeitindah ṭhatnak a kan pek lai?

⁷ Jehovah nih minung kha a kan dawt tuk. A caah kan sunglawi tuk i zungzal nunnak kan hmuh khawh nakhnga a Fapa a kan pek. (Johan 3:16; 1 Johan 4:9) Jehovah nih a biakam a tlinter lo ahcun Satan le a dang ralchanhtu hna cu an hmaan tinak a si lai. Jehovah cu minung sinin thilṭha a thupmi, lih  a chimmi le a ding lomi uktu a si tiah Satan nih sual a puh. Ralchanhtu pawl nih Jehovah biakam kha capo ah an saih i hitin an ti: “‘Ka ra ṭhan lai,’ tiah bia aa kam a si lo mei? Atu khuazei ah dah a um kun? Kan pupa hna cu an thi diam cang, sihmanhsehlaw thil cu vawlei ser ri in a si bantukin pei a si peng ko hi.” (2 Pet. 3:3, 4) Asinain Jehovah nih a biakam ningin a tuah zungzal lai. Cungnung bik a sinak fianternak ah nawlngaimi minung pawl khamhnak zong i tel dingin Jehovah nih a tuah lai. (Isaiah 55:10, 11 rel.) Jehovah cungnung bik a sinak cu dawtnak cungah hram aa bunh. Cucaah zumhfekmi a salle kha a zungzal in a dawt hna lai i a sunsak hna lai ti kha kan zumh khawh.—Ex. 34:6.

⁸ Jehovah cungnung bik a sinak cu a biapi tuk, mah ruangah kan khamhnak cu Jehovah caah a biapi lo tinak a si lo. A tak ti ahcun Jehovah nih a kan dawt tuk. Cucaah Jehovah uktu a sinak kong a biapitnak le zumhfek tein bawmhnak kha biapi bik ah kan chiah zungzal a hau.

9. Job kong he aa tlaiin Satan nih zeidah a chim? (A hramthawknak hmanthlak zoh.)

⁹ Jehovah cungnung bik a sinak he aa tlaiin a hmaanmi lungput ngeih cu a biapi tuk. Mah kha a hmasa bik ah ṭialmi, Job Baibal cauk relnak thawngin kan hngalh khawh. Job nih a fakmi harnak a ton ahcun Pathian a hlawt lai tiah Satan nih sual a puhmi kha kan hmuh. Job kha Pathian theng nih harnak pek ding hmanhin Satan nih a rak tukforh. Jehovah nih cutin a rak tuah lo nain Job hneksak awkah Satan kha a rak awnh i hitin a ti: “A ngeihmi vialte cu nangmah kut chungah a um.” (Job 1:7-12 rel.) Mah hnu tlawmpal ah Job nih a salle le a ngeihmi thil vialte a rak sung. Cun a fale pahra an thi dih ti thawng kha a theih. Mah thil vialte a tonmi cu Pathian ruangah a si bantukin Satan nih a rak tuah. (Job 1:13-19) Mah lengah Job kha a fakmi le fih a nungmi zawtnak a inter. (Job 2:7) A nupi le a hawi ṭhalo pathum chimmi bia nih Job cu a lung a fahter chin i a lung a donghter chin.—Job 2:9; 3:11; 16:2.

10. (a) Job nih Pathian cung a zumhfeknak kha zeitindah a rak langhter? (b) Job cu zeicah remh a rak herh?

¹⁰ Satan sualpuhnak cu a hmaan maw? A hmaan lo. Job cu a fak tukmi harnak hna a ing ko nain Jehovah kha zeitikhmanh ah a hlaw bal lo. (Job 27:5) Asinain chikkhat cu Job nih a biapi tukmi kong kha a philh i amahle amah kha biapi tuk ah aa chia. Zei palhnak hmanh ka tuah lo tiah a chim peng. Cun harnak a innak a ruang hmanh kha biahalnak a rak tuah. (Job 7:20; 13:24) Job a intuarnak kha kan hngalhthiam khawh. Asinain Job nih a hmaan lomi lungput a ngeih kha Jehovah nih a hngalh i a rak remh. Zeitindah a rak remh?

11, 12. Jehovah nih Job kha zeidah hngalhthiam awkah a rak bawmh? Job nih zeitindah a rak lehrulh?

¹¹ Jehovah nih Job sinah a chimmi bia hna kha Job Baibal cauk dal 38 in 41 ah kan hmuh khawh. Job nih harnak a tonnak a ruang kha Jehovah nih a chim lo. Mah canah Pathian he tahchunh ahcun zeihmanh a si lonak kha hngalhthiam awkah Jehovah nih a rak bawmh. Job nih a tonmi harnak nakin a biapi deuh tukmi a kong a um ti kha a rak cawnpiak. (Job 38:18-21 rel.) Jehovah bia nih Job kha a lungput i thlen awkah a rak bawmh.

 ¹² Job nih harnak tampi a ton hnuah Jehovah nih cu bantukin a chimhhrinhmi cu dawtnak a ngeih lomi a si maw? A si lo, amah Job zong nih cutin a ruat lo. Job nih Jehovah ruahnak cheuhnak kha a hngalhthiam i a sunsak. “Cucaah keimahle keimah cu kaa hua i leidip le vutcam lakah ṭhu in kaa ngaihchih” ti hmanhin a rak ti. (Job 42:1-6) A hmasa ah mino Elihu zong nih Job kha a ruahnak i remh awkah a rak bawmh ve. (Job 32:5-10) Job nih Jehovah ruahnak cheuhnak kha a ngaih i a lungput aa thlen hnuah Jehovah nih Job zumhfehnak nih a lung a lawmhternak kong kha midang a hngalhter hna.—Job 42:7, 8. 

13. Harnak a tonmi a dih hnu hmanhah Jehovah chimhhrinhnak in Job cu zeitindah ṭhatnak a hmuh khawh?

¹³ Harnak a tonmi a dih hnu hmanhah Jehovah ruahnak cheuhnak in Job cu ṭhatnak a hmu. “BAWIPA nih Job cu a chan a donghlei kha a thawklei nak khan thluachuahnak tam deuh in a pek.” A hnuah “fapa pasarih le fanu pathum zong a ngeih hna.” (Job 42:12-14) Job nih mah a fale hi a dawt tuk ko hna lai nain a thimi a fale zong a ngai tuk hna lai ti cu a fiang ko. Cun harnak an tonmi vialte zong kha a philh kho theng lai lo. Job nih harnak a tonnak a ruang kha a hngalh hnu hmanhah mah tluk khan harnak tonnak nawl Pathian nih zeicah a ka awnh hnga tiah a ruat rih men ko lai. Job nih cu bantuk ruahnak hna a ngeih hmanhah Jehovah chimhhrinhnak zong kha aa cinken ko lai. Mah nih hnemhnak a pek lai i a hmaanmi lungput ngeih awkah a bawmh lai.—Salm 94:19.

14. Job kong in zeidah kan cawn khawh?

¹⁴ Job tonmi kong ruahnak nih a hmaanmi lungput ngeih awk le hnemhnak hmuh awkah a kan bawmh khawh. “Lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga . . . kanmah cawnpiaknak caah” ṭialmi Jehovah thawchuah hnawhmi Cathiang lakah Job cauk cu aa tel ve. (Rom 15:4) Mah nih  Jehovah cungnung bik a sinak fianternak kong ruah khawh ti lo tiangin kanmah buaibainak kong lawng ruah awk a si lo ti kha a kan cawnpiak. Job bantukin harnak kan ton tik hmanhah zumhfek tein kan um zungzalnak thawngin Jehovah cungnung bik a sinak kan bawmh kha langhter hna u sih.

15. Harnak kan ton tikah zumhfek tein kan ummi nih zeidah a chuahter?

¹⁵ Job hmuhtonnak nih hnemhnak a kan pek khawh, zeicahtiah harnak kan tonmi cu Jehovah a thin kan hunter caah a si lo ti kha mah nih a langhter. Harnak kan tonmi nih Jehovah cungnung bik a sinak bawmhnak caanṭha a kan hmuhter. (Ptb. 27:11) Zumhfek tein kan um tikah Jehovah lung kan lawmhter i hmailei kan i ruahchannak cu a fek chin. (Rom 5:3-5 rel.) Job hmuhtonnak nih “Bawipa cu zaangfahnak le zawnruahnak in a khatmi a si” ti kha a langhter. (Jeim 5:11) Cucaah Jehovah nih cungnung bik a sinak a bawmmi vialte laksawng a pek hna lai ti kha kan zumh khawh. Mah hngalhnak nih ‘zeizong vialte kha lungsau thinfual in inkhawh’ awkah a kan bawmh lai.—Kol. 1:11.

16. Jehovah cungnung bik a sinak fianternak cu a biapi tuk ti kha zeicah kan i cinken a herh?

¹⁶ Buaibainak hna kan ton tikah Jehovah cungnung bik a sinak fianternak kong biapi ah chiah cu a har kho men. A hmemi buaibainak hmanh kha kan ruah tuk ahcun a nganmi in kan hmuh khawh men. Cucaah zei bantuk a harmi thil kan ton hmanhah Pathian cungnung bik a sinak bawmh cu zeitluk in dah a biapit ti kha kan i cinken zungzal a hau.

17. Jehovah rian ah rian i tamternak nih a biapi taktakmi cung i lungthin chiah awkah zeitindah a kan bawmh khawh?

¹⁷ Jehovah rian ah rian i tamter zungzalnak nih a biapi tukmi kong kha i cinken awkah a kan bawmh khawh. Tahchunhnak ah, unaunu Renee cu a hun zeng i cancer  zawtnak zong a ngei. Siizung a um chungah cuka ah rian a ṭuanmi hna, mizaw dang hna le a rak lengmi hna sinah phung a chim. Voikhat cu zarhhnih le a cheu chung siizung a kai lioah suimilam 80 chung phung a chim. Renee nih ka thi lai ti a hngalh ko nain a biapi taktakmi thil kha a philh bal lo. Jehovah cungnung bik a sinak a bawmhnak nih daihnak a hmuhter.

18. Jennifer hmuhtonnak nih Jehovah cungnung bik a sinak bawmhnak he aa tlaiin zeidah a kan cawnpiak?

¹⁸ Nifa kan tonmi buaibainak hmetete kan tawnghtham tik zongah Jehovah cungnung bik a sinak kha kan bawmh khawh. Unaunu Jennifer cu innlei kirnak caah vanlawng dinhnak hmun ah nithum chung a hngah. Vanlawng cu pakhat hnu pakhat in an thawn lengmang caah a lung a rawk tuk i a li zong a leng. Cun a ngaih zong a hun chia. Asinain Jennifer nih vanlawng dinhnak hmun ah a hngak vemi midang sin thawngṭha chim khawh awkah rak ka bawm tiah Jehovah sinah thla a cam. Cucaah mi tampi sinah phung a chim khawh i cauk zong tampi a pek hna. Jennifer nih hitin a ti: “A harmi thil sining ka tong ko nain Jehovah nih thluachuah a ka pek i aa tlakmi lam in a min ka thanh khawh nakhnga thazaang a ka pek.”

19. Zeinihdah a hmaanmi amah a biatu an si kha a langhter?

¹⁹ Jehovah miphun lawng nih Jehovah cungnung bik a sinak a biapitnak kha ṭha tein an hngalh. Mah nih a hmaanmi amah a biatu an si kha a langhter. Cucaah kan dihlak in Jehovah cungnung bik a sinak kha bawmh zungzal a hau.

20. Cungnung bik a sinak bawmh awkah na tuahmi vialte kha Jehovah nih zeitindah a hmuh?

²⁰ Jehovah cungnung bik a sinak bawmh awkah zumhfek tein a rian na ṭuanmi le harnak na inkhawhmi vialte kha Jehovah nih a hngalh i a sunsak. (Salm 18:25) Jehovah cungnung bik a sinak kha zeicah bawmh awk a si i zeitindah bawmh khawh a si ti kha a hnu capar nih a fianter lai.