1, 2. (a) San ala sama mu sabi? (b) Saide a sani ya pelensipali?

A OMEN sama aini a ten ya e si moni enke a moo pelensipali sani. A soso moni den e pakisei. Den e du ala san den man fu meke moni. Den e meke moiti tu fu den á lasi den gudu fu den. Taawan e si den famii, den gusontu anga den sani di den wani du aini a libi enke a moo pelensipali sani.

² Ma sani á de di pelensipali enke a sabi di sama mu sabi taki a Yehofa abi a leti fu tii hemel anga goontapu. Noiti u mu feegete a sani ya. Ma efu wi á luku bun den sani di wi e du ala dei anga den booko-ede fu a libi sa meke u feegete a moo pelensipali sani. Efu u holibaka gi Yehofa enke u tiiman, u ná o booko wi ede tumisi anga den polobelema fu u. Wi o kon moo koosube a Yehofa tu.

3. San Saatan taki fu a tii di Gadu e tii libisama?

³ Den sani di Saatan Didibii du e soi taki a nai si Yehofa enke a sama di abi a leti fu tii hemel anga goontapu. Saatan wani libisama biibi taki Yehofa a ná wan bun Tiiman. A wani u biibi taki Yehofa nai booko en ede anga u. Saatan wani soi anga a sani ya taki efu libisama tii denseefi, den o moo de koloku (Genesesi 3:1-5). A wani soi tu taki a te sani e go bun fosi da libisama e dini Gadu, ma te sani nai go bun den ná o si Gadu enke den Tiiman (Yopu 2:4, 5). Neen meke Yehofa fika libisama fu tii denseefi fu meke den si san e pasa te den nai aliki en.

4. Saide Yehofa gi Saatan a okasi fu soi efu a abi leti?

⁴ Yehofa sabi taki a lei Didibii e lei. Ma saide a gi Didibii a okasi fu soi efu den sani di a taki a tuu? A sani ya e gi libisama anga den engel a okasi fu si taki Saatan e lei. (Leisi Psalm 83:18.) Adan anga Efa á be wani Yehofa taki gi den moo. Bakaten a omen sama waka a den baka. A sani ya e meke son sama denki taki Didibii abi leti. Solanga libisama anga engel e waka anga a denki taki a ná Gadu mu tii hemel anga goontapu, u ná o poi abi wan bun libi. U ná o poi libi na a wan tu. Ma te Yehofa soi kiin taki neen abi a leti fu tii hemel anga goontapu, da ala sama o saka denseefi neen ondoo. Ala sani o waka bun a hemel anga goontapu.—Efeisesama 1:9, 10.

5. Saide libisama mu sabi sama na a moo bun tiiman fu hemel anga goontapu?

⁵ Dyonson ala sama o sabi taki a Gadu abi a leti fu tii hemel anga goontapu. Den o si kiin taki Saatan anga libisama á poi tii goontapu. Baka dati Yehofa o puu den enke tiiman. Te a Mesiyas Kownukondee di Gadu poti o tii, sani o waka bun a hii goontapu. Den sama di lobi Gadu o soi kiin taki libisama poi dini Gadu winsi san e miti den. Den o holibaka gi Gadu enke den tiiman (Yesaya 45:23, 24). U wani de wan fu den sama ya, neen meke u mu fusutan bun saide Yehofa abi a leti fu tii wi.

6. Fa u mu si a leti di Yehofa abi fu tii hemel anga goontapu?

⁶ A sabi di libisama mu sabi sama abi a leti fu tii, pelensipali moo a abi di u mu abi wan bun libi. Ma a sani  ya á wani taki Yehofa nai booko en ede anga u. Fa u du sabi a sani ya?

7, 8. Sowtu wini wi o fende te Yehofa soi taki neen abi a leti fu tii hemel anga goontapu?

⁷ Ná pikin lobi Yehofa lobi libisama. Neen meke a sende en Manpikin kon dede gi u, fu u sa fende teego libi (Yohanisi 3:16; 1 Yohanisi 4:9). Efu Yehofa á du san a paamisi, da Saatan anga den sama di e holibaka gi en o abi leti. Saatan taki Yehofa a wan leiman, bika ai tapu pasi gi libisama fu fende sani di o tyai wini gi den. A taki Yehofa nai tii bun seefiseefi. Den e soso Yehofa, da den e taki: „A be paamisi u taki a o kon, ma pe a de? We, senten di den afo fu u dede, ala sani tan leti enke fa Gadu be meke den” (2 Peitilisi 3:3, 4). Ma Yehofa o du san a paamisi. Neen meke te a o soi taki neen abi a leti fu tii hemel anga goontapu, a o meke den sama di e aliki en tan a libi. (Leisi Yesaya 55:10, 11.) Yehofa lobi ala den sani di a meke. Neen meke u sabi taki a fu teego a o lobi den sama di e dini en anga den hii ati.—Ekisodesi 34:6.

⁸ A sabi di sama mu sabi taki a Yehofa abi a leti fu tii pelensipali. Ma a sani ya á wani taki a nai booko en ede anga a yeepi di a mu yeepi wi fu fende teego libi. Yehofa e booko en ede anga u. Toku wi á mu feegete a moo pelensipali sani. Boiti dati, u mu holibaka gi Yehofa enke u tiiman.

9. San Saatan taki fu Yopu? (Luku a fowtow na a bigin.)

⁹ A de taanga fanowdu fu holibaka gi Yehofa enke u tiiman. Wi e si a sani ya kiin te u leisi Yopu, wan fu den fosi buku fu Beibel. Wi e leisi aini a buku ya taki Saatan be taki efu tesi miti Yopu, a ná o dini Gadu moo. Saatan be akisi Gadu fu Gadu seefi du ogii anga Yopu. Ma noiti Gadu be o du a sani de, neen meke a gi Saatan pasi fu tesi Yopu. A taigi Saatan taki: „I sa du san i wani anga ala den sani fi en.” (Leisi Yopu 1:7-12.) Baka makandaa Yopu lasi en gudu, den futuboi fi en, anga ala den tin pikin fi en di a be lobi. Saatan be wani Yopu denki taki a Gadu e du ogii anga en (Yopu 1:13-19). Baka dati Saatan meke wan takuu siki kisi Yopu (Yopu 2:7). San moo ogii, a di Yopu uman anga den dii mati fi en bigin taigi en hati sani di be e meke a fii booko-saka.—Yopu 2:9; 3:11; 16:2.

10. (a) Fa Yopu soi taki a á gwe fika Yehofa? (b) Saide a be de fanowdu fu Yehofa poti Yopu a pasi?

¹⁰ Saatan be abi leti di a taki Yopu be o fika Yehofa di ogii be o miti en? Nono. Winsi fa omen sowtu ogii miti Yopu, a á gwe fika Yehofa (Yopu 27:5). Ma wan pisiten Yopu be feegete a moo pelensipali sani. A be bigin poti pakisei neen seefi. A be e taki naamo taki a á du nawan ogii. Yopu  be wani sabi namonamo saide den sani ya be e miti en (Yopu 7:20; 13:24). Wi e fusutan pikinso fa Yopu be e fii. Ma toku, Yehofa be sabi taki Yopu á be e denki bun, neen meke a poti en a pasi. Fa a du a sani ya?

11, 12. Fa Yehofa yeepi Yopu? San Yopu du?

¹¹ Den sani di Yehofa taigi Yopu sikiifi aini a Beibel buku Yopu kapitel 38 te anga kapitel 41. Yehofa á taigi Yopu saide tesi be e miti en. Ma a be wani soi Yopu taki a bigi omen toon moo en. Yehofa soi Yopu taki sani de di pelensipali moo den booko-ede fi en. (Leisi Yopu 38:18-21.) Den sani di Yehofa taki, yeepi Yopu fu kengi a fasi fa a be e denki.

¹² A tyali á be e kisi Yehofa fu den sani di miti Yopu di a taigi Yopu den sani ya? Nono. Yopu á be e si enke Gadu nai booko en ede anga en. A fusutan san Yehofa be leli en. A be e bigi gi en tu taki Yehofa be poti en a pasi. A taki: „Mi e begi i gaantangi, feegete san mi be taki baa. Luku fa mi sidon a doti aini asisi fu soi i taki a sani di mi du e hati mi” (Yopu 42:1-6). Fosi Yehofa taki anga Yopu, wan man den kai Elihu be yeepi en fu a kengi a fasi fa a be e denki tu (Yopu 32:5-10). Yopu aliki di Gadu poti en a pasi, a kengi a fasi fa a be e denki. Di Yopu du a sani ya, Yehofa meke taawan si taki a be e piisii anga en fu di a holidoo.—Yopu 42:7, 8.

13. Fa den sani di Yehofa taigi Yopu be yeepi en bakaten?

¹³ Den sani di Yehofa leli Yopu yeepi Yopu bakaten tu. „Yehofa belesi Yopu moo fa a be belesi en fosi.” Bakaten „a meke seibin manpikin anga dii umanpikin tu” (Yopu 42:12-14).  Winsi fa Yopu be lobi den pikin ya, toku a be musu e angii fu den taawan di dede. Boiti dati a á feegete den sani di miti en anga en osufamii. Winsi Yopu be kon sabi saide den sani be miti en, toku kande a be e akisi enseefi saide Gadu fika en fu a pina so. Efu Yopu be e pakisei den sani ya, da kande a be e membee den sani di Yehofa be taigi en tu. A sani ya be o yeepi en fu denki enke fa Yehofa e denki.—Psalm 94:19.

14. San a toli fu Yopu e leli u?

¹⁴ Efu wi e teke ten pakisei san miti Yopu, a sani de o yeepi u fu kengi u denki. A o gi u taanga-sikin tu. Yehofa meke sama sikiifi a toli fu Yopu aini Beibel fu „leli u wan sani. Den sani ya e yeepi u fu holidoo, den e meke u fende toosutu aini a Wowtu fu Gadu tu. Na a sani de o meke wi abi howpu” (Romesama 15:4). Ai leli u taki wi á mu e booko wi ede anga den polobelema fu u te da u feegete taki na a sabi di sama mu sabi taki a Yehofa abi a leti fu tii, na a moo pelensipali sani. Te wi e holidoo te tesi e miti u, wi e soi taki wi e si Yehofa enke u tiiman leti enke Yopu.

15. Sowtu wini wi e fende te u holidoo?

¹⁵ A toli fu Yopu e gi u taanga-sikin, bika ai soi taki a ná boon Yehofa ati e boon a wi meke tesi e miti u. Te tesi e miti u, wi abi a okasi fu soi taki wi e holibaka gi Yehofa (Odo 27:11). Te wi holidoo wi e meke Yehofa piisii. Boiti dati u biibi e kon moo taanga. (Leisi Romesama 5:3-5.) A toli fu Yopu e soi taki „Yehofa lobi sama tuutuu. A abi tyali-ati tu” (Yakowbesi 5:11). Efu wi e si Yehofa enke u tiiman a o belesi u. Efu u holi a sani de  a pakisei a o gi u taanga-sikin fu „holidoo anga pasensi, anga ala piisii”.—Kolosesama 1:11.

16. Saide wi á mu feegete fu holibaka gi Yehofa, a Gadu di abi a leti fu tii?

¹⁶ U sabi taki ala sama mu sabi taki a Yehofa abi a leti fu tii. Ma te tesi e miti u, a á makiliki fu holi a sani ya pakisei. Pikinpikin sani seefi u sa si enke gaan polobelema efu wi e poti pakisei a den tumisi. Neen meke winsi sowtu polobelema e miti u, wi á mu feegete saide u mu holibaka gi Yehofa, a Gadu di abi a leti fu tii.

17. Saide u ná o feegete a moo pelensipali sani te wi e du ala san u man gi Yehofa?

¹⁷ Te wi e du ala san u man aini a olikanisâsi, u ná o feegete a moo pelensipali sani gawgaw. A omen sani miti wan sisa den e kai Renee. Buulu be naki en, en sikin be e hati en, boiti dati a be abi kanker. Di a be de na ati-osu, a be e peleiki gi den sama di be e wooko ape, den taa siki sama anga den sama di be e kon na a ati-osu. Wan leisi di a tan na ati-osu tu wiki anga afu, a peleiki 80 yuu. Winsi fa Renee be sabi taki a be o dede, tokuso noiti a feegete a moo pelensipali sani. A holi di a be e holibaka gi Yehofa, a Gadu di abi a leti fu tii, be e meke a fii bun.

18. Fa a toli fu Jennifer e soi u san na a moo pelensipali sani?

¹⁸ U sa soi tu taki wi holibaka gi Yehofa, a Gadu di abi a leti fu tii te pikinpikin polobelema e miti u. Wan sisa den e kai Jennifer be wakiti opalani dii dei langa a wan peesi pe sama e teke opalani. A omen leisi den taigi en taki a opalani di mu tyai en, ná o kon moo. A sani ya be meke Jennifer bigin fuka. Ma pe fu a sidon booko en ede, a begi Yehofa fu a yeepi en fu peleiki gi den taa sama di be e wakiti opalani. A peleiki gi omen sama. A paati omen buku tu. Jennifer taki: „Mi si taki Yehofa belesi mi aini a muliki ten de. A gi mi a kaakiti di mi be abi fanowdu fu gi en nen gaandi.”

19. San a wan fu den sani di e soi sama abi a tuu biibi?

¹⁹ Na a foluku fu Yehofa wawan e fusutan saide a de taanga fanowdu fu holibaka gi Yehofa enke u tiiman. A sani ya e soi taki a wi abi a tuu biibi. Neen meke ala u mu soi taki a Yehofa wi e si enke u tiiman.

20. Fa Yehofa e fii te a si fa wi e holibaka gi en?

²⁰ Ai bigi gi Yehofa te a si fa wi e holibaka gi en winsi tesi e miti u. Ai teke en fu bigi te a si fa wi e holidoo (Psalm 18:25). A taa artikel o soi saide u mu holibaka gi Yehofa anga fa u sa holibaka gi en.