1, 2. (a) Nama pekara besai ke ditapi semua mensia? (b) Nama kebuah pekara tu berat ba kitai?

MAYUH orang kemaya hari tu ngumbai, duit nya utai ti beguna bendar. Nya meh utai ti diperunding sereta dikeirauka sida. Sida ngena mayuh awak ngulihka duit tauka nyimpan duit ke dikemisi sida. Sida ke bukai beberatka ruang bilik, pengerai, tauka utai ti deka dijapai sida ba pengidup.

² Bisi pekara bukai ke berat agi ari semua nya. Pekara nya, ngenanka hak Jehovah merintah. Kitai enda tau ngetu beratika pekara tu. Enti kitai enda bejimat, kitai engka kisuk enggau pengidup besehari-hari tauka kelalu irauka penanggul diri nyentukka kitai enda beratika pekara ti berat agi. Enti kitai nyukung hak Jehovah merintah, kitai ulih mutarka penanggul ba pengidup besehari-hari enggau manah agi, lalu kitai deka rapat agi enggau Jehovah.

3. Nama dipadah Sitan pasal hak Petara merintah?

³ Antu Sitan udah nanya sekalika Jehovah bisi hak merintah.  Sitan deka mensia ngumbai Jehovah nya Pemerintah ti enda lurus sereta enggai meri utai ti pemadu badas ke kitai. Sitan madahka, orang deka lantang agi enti sida merintah diri empu. (P-kal. 3:1-5) Iya mega madahka, nadai seiku mensia ke amat taluk ngagai Petara, lalu enti pengidup sida balat tusah, sida deka nulak Petara nyadi Pemerintah sida. (Jop 2:4, 5) Nya alai, Jehovah ngemendarka utai tu nyadi kena nunjukka pengidup deka tusah enti Petara enda nyadi Pemerintah ke semua mensia.

4. Nama kebuah pekara ti bekaul enggau hak Petara merintah enda tau enda diputarka?

⁴ Amat, Jehovah nemu, jaku tuduh Sitan nya bula. Tang nama kebuah Jehovah meri awak ngagai Sitan kena nunjukka utai ku iya nya amat? Saut iya bekaul enggau semua orang ti di serega enggau ba dunya. (Bacha Masmur 83:18.) Adam seduai Hawa nulak hak Jehovah merintah, lalu baka nya mega enggau mayuh orang ke bukai udah nya. Tu tau ngasuh sekeda orang ngumbai utai ku Sitan nya amat. Seagi-agi pekara nya agi ngachau runding mensia tauka melikat, pemaik enggau penyerakup ti bendar enda ulih dijapai. Tang pengudah hak Jehovah merintah ditanka, semua orang deka dipegai Jehovah belama iya. Lalu penyerakup deka bisi di serata dunya raya.—Eps. 1:9, 10.

5. Nama kebuah kitai bisi kaul enggau hak Jehovah merintah?

⁵ Hak Petara merintah deka ditanka, lalu chara merintah ari Sitan enggau mensia deka puntan sereta dibuai. Chara Petara merintah nengah Perintah Messiah deka mujur. Orang ke tetap ati deka nunjukka mensia ulih ngenanka integriti sereta enggau taluk nyukung hak Petara merintah. (Isa. 45:23, 24) Kati kitai deka sama enggau orang ke tetap ati nya? Tentu deka! Nya alai, kitai patut nemu kebuah pekara tu berat amat.

6. Nama kebuah ngenanka hak Jehovah merintah nya berat agi?

⁶ Ngenanka hak Jehovah merintah nya berat agi ari pengelantang kitai. Tang tu ukai reti pengawa nyelamatka kitai enda beguna tauka Jehovah enda ibuhka kitai. Baka ni kitai nemu tu?

7, 8. Nama kebuah ngenanka hak Jehovah merintah deka meri penguntung ngagai kitai?

⁷ Jehovah balat rinduka mensia. Kitai berega amat ba Iya nyentukka Iya meri Anak Iya ngambika kitai ulih idup belama iya. (Jhn. 3:16; 1 Jhn. 4:9) Enti Jehovah enda ngamatka semaya Iya ke kitai jemah ila, Sitan enggau sida bukai ke ngelaban nya betul. Sitan ngumbai Jehovah nya pemula ke ngenan utai ti manah ari mensia, lalu merintah enggau chara ti enda lurus. Sida ke ngelaban ngeleseka semaya Jehovah enggau madahka: “Ni Tuhan kita ke besemaya deka datai? Kenyau ari aki ini kitai udah mati  kelia, semua utai mengkang enda berubah baka lebuh penumbuh dunya!” (2 Pet. 3:3, 4) Tang Jehovah deka ngamatka semaya Diri. Iya udah nentuka pengawa ngenanka hak Iya merintah deka nyengkaum nyelamatka mensia ti ngasi. (Bacha Isaiah 55:10, 11.) Hak Jehovah merintah beduduk ba pengerindu. Nya alai, kitai ulih pechaya, Iya deka seruran rindu sereta ingatka nembiak Iya ti taluk.—P-sut. 34:6.

⁸ Ketegal hak Jehovah merintah nya pekara ti berat, ukai reti pengawa nyelamatka kitai enda berat ba Iya. Jehovah amat ibuhka kitai. Kitai patut ingatka utai ti berat agi sereta enggau taluk nyukung hak Jehovah merintah.

9. Nama dipadah Sitan pasal Jop? (Peda gambar ba pun artikel.)

⁹ Endang manah enti kitai bisi runding ti betul pasal hak Jehovah merintah. Kitai ulih nemu tu ari macha bup Jop, siti ari bup mit dalam Bup Kudus ti keterubah iya ditulis. Dia kitai macha pasal Sitan ke ngumbai Jop deka nulak Petara enti Jop balat merinsa. Sitan indah ngasuh Petara merinsaka Jop. Jehovah enggai ngereja nya, tang Iya ngemendarka Sitan nguji Jop enggau madahka: “Semua utai ti dikemisi iya sigi ba jari nuan magang.” (Bacha Jop 1:7-12.) Enda lama udah nya, Jop lenyau orang gaji sereta reta tengkira. Udah nya sepuluh iku anak iya mati magang. Sitan ngaga baka ke Petara ti ngasuh semua penusah besai nya nyadi. (Jop 1:13-19) Udah nya, Sitan ngasuh Jop kena penyakit ti ngemedis sereta kamah. (Jop 2:7) Lalu bini Jop enggau tiga iku pangan iya nyebut utai ti ngemedis sereta enda meransang ati iya.—Jop 2:9; 3:11; 16:2.

10. (a) Baka ni Jop ngayanka integriti iya ngagai Petara? (b) Nama kebuah Jop patut dirara?

¹⁰ Kati utai ku Sitan nya betul? Enda. Taja pan Jop napi penusah ti balat, iya enda nulak Jehovah. (Jop 27:5) Tang, bisi sekali, Jop nyau enda beratika utai ti berat. Iya semina berundingka diri empu aja. Iya majak ngumbai diri nadai ngereja utai ti salah. Jop mega ngasaika diri patut nemu kebuah iya merinsa. (Jop 7:20; 13:24) Kitai engka ulih nemu utai ti diasaika Jop. Tang Jehovah nemu, Jop bisi runding ti salah, lalu Iya ngerara Jop. Baka ni Jehovah ngerara iya?

11, 12. Nama utai ti diasuh Jehovah pelajarka Jop? Nama digaga Jop?

¹¹ Kitai ulih macha utai ti dipadah Jehovah ngagai Jop ba bab 38 ngagai 41 dalam bup Jop. Jehovah enda nerangka kebuah Jop merinsa. Tang, Jehovah deka nulung Jop nemu iya mit amat enti dibandingka enggau Jehovah. Jehovah madah ngagai Jop, bisi pekara ti berat agi ari penusah ke ditapi Jop. (Bacha Jop 38:18-21.) Jaku Jehovah nulung Jop ngemetulka runding diri.

¹² Kati Jehovah enda sinuka Jop ti udah balat merinsa lebuh bejaku baka nya enggau iya? Enda, lalu Jop empu nadai berunding baka nya. Jop nemu, lalu beterima kasihka jaku lalau Jehovah. Jop indah madahka: “Aku malu ke semua utai ti udah disebut aku lalu aku nesal ati lalu ngerabu diri enggau amau enggau abus.” (Jop 42:1-6) Dulu agi ari  nya, seiku lelaki biak ke benama Elihu mega udah nulung Jop ngemetulka runding diri. (Jop 32:5-10) Pengudah Jop mendingka jaku lalau Jehovah lalu ngubah runding diri, Jehovah ngawakka orang bukai nemu Iya lantang ati enggau penetap ati Jop.—Jop 42:7, 8.

13. Baka ni jaku lalau Jehovah nulung Jop pengudah penusah iya nadai agi?

¹³ Jaku lalau Jehovah terus meri penguntung ngagai Jop, taja pan penusah ke ditapi Jop nadai agi. ‘Jehovah merekatka pengidup Jop lebuh iya nyau tuai, lebih agi ari ti terubah.’ Nyau kelama, Jop “bisi tujuh iku anak lelaki enggau tiga iku anak indu.” (Jop 42:12-14) Taja pan Jop sayauka bala anak iya tu, iya tentu agi ngenang bala anak ke udah mati. Lalu iya tentu seruran ingatka semua penusah ti balat ke udah nyadi ba iya enggau sida sebilik. Taja pan Jop nyau nemu kebuah iya napi penusah nya, iya engka berundingka kebuah Petara ngemendarka iya balat merinsa. Enti Jop bisi runding ke baka nya, iya tentu ingatka utai ti udah dipadah Jehovah ngagai iya. Tu tentu udah ngelantangka ati sereta nulung iya bisi runding ti betul.—Mas. 94:19.

14. Nama ulih dipelajarka kitai ari utai ke nyadi ba Jop?

¹⁴ Belematika utai ti nyadi ba Jop ulih nulung ngemetulka runding sereta ngelantangka ati kitai. Bup Jop nya sebagi ari utai ti udah ditulis Jehovah kena “ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.” (Rom. 15:4) Bup nya ngajar kitai ngambika enda kelalu berundingka penusah diri nyentukka kitai enda ulih berunding pasal ngenanka hak Jehovah merintah. Baka Jop, kitai ngayanka diri nyukung hak Jehovah merintah enggau mengkang tetap ati ngagai Iya indah lebuh pengidup kitai tusah.

15. Nama dijapai penetap ati kitai lebuh kitai napi penusah?

 ¹⁵ Utai ke nyadi ba Jop ulih ngelantangka ati kitai laban nya nunjukka penusah ke ditapi kitai ukai reti Jehovah nya ringat ngagai kitai. Penusah meri kitai peluang nyukung hak Jehovah merintah. (J-lam. 27:11) Enti kitai mengkang tetap ati, kitai ngelantangka ati Jehovah, lalu pengadang kitai ke jemah ila deka majak tegap. (Bacha Rome 5:3-5.) Utai ke nyadi ba Jop nunjukka Jehovah “penuh laban penyiru enggau pengasih.” (Jas. 5:11) Enti kitai nyukung hak Jehovah merintah, Iya deka meri kitai upah. Ulih nemu tu nulung kitai “tan natka semua pemerinsa enggau ati ti liat, . . . enggau ati ti gaga.”—Kol. 1:11.

16. Nama kebuah kitai patut ngingatka diri empu, ngenanka hak Jehovah merintah nya berat amat?

¹⁶ Endang amat, engka enda senang deka ngenanka hak Jehovah merintah enti kitai napi penusah ba pengidup. Indah penusah ke mit pan baka ke besai enti kitai kelalu mikirka iya. Nya alai, kitai patut seruran ngingatka diri empu, nyukung hak Jehovah merintah nya berat agi enda ngira nama penusah ke ditapi kitai.

17. Baka ni kisuk ba pengawa ke Jehovah ulih nulung kitai beratika utai ti berat agi?

¹⁷ Mengkang kisuk ba pengawa ke Jehovah ulih nulung kitai ngingatka utai ti berat agi. Ngambika chunto, seiku menyadi Kristian indu ke benama Renee kena penyakit strok, seruran pedis, lalu iya mega bisi penyakit kanser. Lebuh ba sepital, iya nginjil ngagai orang ke gawa dia, ngagai pesakit bukai, sereta ngagai orang ke ngabas pesakit. Bisi sekali, lebuh Renee diau ba sepital pengelama dua setengah minggu, iya ulih nginjil 80 jam. Taja pan Renee nemu diri enda panjai umur, iya seruran ingatka utai ti  berat agi. Nyukung hak Jehovah merintah meri iya pengelantang.

18. Nama dipelajarka kitai ari utai ti ditapi Jennifer bekaul enggau nyukung hak Jehovah merintah?

¹⁸ Kitai mega ulih nyukung hak Jehovah merintah enti kitai mutarka penusah mit ke ditapi kitai ninting hari. Seiku menyadi Kristian indu ke benama Jennifer diau tiga hari ba padang bilun, nganti bilun ke dikena iya pulai. Ketegal penerebai bilun ke deka dikena Jennifer suah dikinsil, iya berasai lelak sereta sunyi. Tang ari ke sinuka diri empu, iya besampi ngagai Jehovah ngambika nulung iya bekunsi berita manah enggau orang bukai ke nganti ba padang bilun. Iya ulih nginjil ngagai mayuh orang sereta nyadung mayuh litaricha. Ku Jennifer madahka: “Aku ngasaika Jehovah merekatka aku taja pan napi penanggul, lalu meri aku chukup pengering kena madahka nama Jehovah enggau chara ti patut.”

19. Nama ulih nulung kitai ngelala bagi penyembah ti bendar?

¹⁹ Semina nembiak Jehovah aja ke amat nemu pemesai reti hak Jehovah merintah. Penemu tu nunjukka bagi penyembah ti bendar. Nya alai, tiap iku kitai patut nentuka diri mengkang nyukung hak Jehovah merintah.

20. Baka ni asai ati Jehovah bekaul enggau semua utai ti digaga nuan kena nyukung hak Iya merintah?

²⁰ Jehovah meda sereta beterima kasih ke semua utai ti digaga nuan kena nyukung hak Iya merintah seraya nuan nyembah Iya enggau tetap ati sereta tan natka penusah. (Mas. 18:25) Artikel pengudah tu deka nerangka mayuh agi kebuah hak Jehovah merintah patut disukung nuan sereta chara nuan ulih nyukung hak Iya enggau mayuh agi.