ATHU avulu lelu, a bhana dingi valolo ku jimbongo, o ima ia mukuá ndenge. Ene a banza ngó ku kitadi. Ene a zanga kithangana kiavulu mu kusota o jimbongo, mba kulanga o jimbongo jala naju. Athu a mukuá, a londekesa kuila, o kima kia beta-o-kota phala ene, o muiji uâ, o sauidi, mba o ima ia mesena ku muenhu.

1, 2. (a) Ebhi o maka a beta dingi kota? (b) Mukonda diahi o maka enhá ala ni valolo iavulu phala etu?

² Maji sai maka a beta dingi kota, o ima ioso i tua tange kiá ndenge. O maka enhá, a lungu ni kuzangeleka o ungana ua Jihova. Kiene o kima kia beta-o-kota ki tua tokala kuxinganeka. Se ki tu dilange, tu tena kuthandanganha kiavulu ni ibhindamu, ni jiphaxi jetu, ni ku di jimba kuila, o ungana ua Jihova kiene o kima kia beta-o-kota. Se tu zokela o ungana ua Jihova, tua-nda kala polondo phala kutolola o ibhidi i tu dibhana na-iu ku muenhu, ni ku mu zukama dingi.

3. Kiebhi Satanaji kia lokalala o ukexilu ua kutumina ua Nzambi?

³ Satanaji ua lokalala Jihova, mu kuzuela kuila, Jihova ka tokala kutumina. Satanaji ua mesena kubhangesa o athu kubanza kuila, Jihova, Mutuameni uaiibha, ni kuila, ka mesena o mbote ietu. Satanaji ua zuela kuila, o athu eji beta o kusanguluka, se a di tumina mudiâ. (Dimatekenu 3:1-5) Muene ua zuela ue kuila, sé-ku muthu u tena kukolokota mu ufiiele uê kua Nzambi, ni kuila, se muthu u dibhana ni ibhidi iavulu ku muenhu, muene ua-nda bhana dikunda kua Nzambi. (Jobe 2:4, 5) Mu kiki, Jihova ua mu bhana kithangana, phala kulondekesa ku athu oso kuila, tu tena ngó kuzediua ku muenhu se a tu tumina kuala Nzambi, maji se muthu uengi, o muenhu ki u kala ni valolo.

4. Mukonda diahi o maka a lungu ni ungana ua Jihova a tokala ku a batula?

⁴ Mu kidi, Jihova uejiia kuila, Satanaji ua tange makutu. Mu kiki-phe, mukonda diahi Nzambi ua bhana dingi kithangana, phala Diabhu kulondekesa se ua lungu mba kana? O kitambuijilu kia kibhuidisu kiki, kia lungu ni athu oso, kikale ku diulu ki kale mu ixi. (Tanga Jisálamu 83:18.) Adá ni Eva a ditunu o ungana ua Jihova. Sai hanji athu avulu ene mu dituna o ungana ua Jihova. Kiki, ki bhangesa athu a mukuá kubanza kuila, Satanaji ua lungu. Sé kubatula o maka enhá, ki tua-nda tena kukala ni kutululuka kua kidi, ni kukala ni ukamba uambote ni athu oso. Maji kioso kia-nda zangeleka o ungana ua Jihova, athu oso a-nda tambula o muenhu ua kalelaku, bhu kaxi ka utuminu. Mu ngongo ioso mua-nda kala kutululuka.—Efezo 1:9, 10.

5. Kiebhi o maka a lungu ni ungana ua Jihova a lungu ue n’etu?

⁵ O ungana ua Nzambi a-nda u zangeleka, mu kiki, o utuminu ua Satanaji ni ua athu, a-nda u buikisa. O utuminu ua Nzambi bhu kaxi ka Mexiia, ua-nda ditunda kiambote. O athu a fiiele a-nda londekesa kuila, o athu a tena kukolokota mu ufiiele uâ, ni kusuluka mu kuzokela o ungana ua Nzambi. (Izaia 45:23, 24) O kuila tua mesena kukala bhu kaxi ka athu iá? Mu kidi, tua mesena! Mu kiki, tua tokala kutendela kiambote o maka a lungu ni ungana ua Jihova.

6. Kiebhi o kuzangeleka o ungana ua Jihova kua beta-o-kota?

⁶ O kuzangeleka o ungana ua Jihova kua beta-o-kota, o kuzediua kuetu ndenge. Maji kiki, ki kilombolola kuila, o kubhuluka kuetu ki kuala ni valolo, mba Jihova ka tu suu. Kiebhi ki tuejiia o maka enhá?

7, 8. Mu ukexilu uebhi o kuzangeleka o ungana ua Jihova kua-nda tu bhekela mbote?

⁷ Jihova Nzambi ua tu zolo kiavulu. Mu kidi, tuala ni valolo iavulu ku mesu mê, mukonda dia kiki, muene ua bhana Mon’ê phala tu kale ni muenhu ua kalelaku. (Nzuá 3:16; 1 Nzuá 4:9) Se Jihova ka kumbidila o ima ia tu kanena ku hádia, Satanaji, ni ió a mu zokela a-nda lunga. Satanaji ua zuela kuila, Jihova mukuá makutu, ni kuila, muene ka bhana o ima iambote ku jiselevende jê. Muene ua zuela ue kuila, Nzambi ka tumina  ni kuiuka. O jinguma ene mu xonguena o ikanenu ia Jihova. Ene a zuela exi: “Kizuelu kiê kuila hinu uiza, ki kuebhi? Hanji ki’aia jitata jetu ku kilu, ima ioso ia xalela mu ukalelu uê kala ki ieni’ê kiá tunde bhua matekena ku i bhanga!” (2 Phetele 3:3, 4) Mu kidi, Jihova ua-nda kumbidila o ikanenu iê. O kuzangleka o ungana ua Jihova kua-nda tu bhekela mbote, mukonda, muene ua-nda bhulula o athu a belesela. (Tanga Izaia 55:10, 11.) Jihova u tumina ni henda. Mukonda dia kiki, tu tena kudielela kuila, muene ua-nda londekesa o henda ku jiselevende jê ja fiiele.—Makatukilu 34:6.

⁸ Tuejiia kuila, o kuzangeleka o ungana ua Jihova, kima kia beta-o-kota. Maji kiki, ki kilombolola kuila, Nzambi ka bhana valolo ku ubhulukilu uetu. Mu kidi, Jihova ua tu zolo kiavulu. Tua tokala kuijiia kuila, kima kiambote kuzokela ni ufiiele uoso o ungana ua Jihova.

9. Ihi iambe Satanaji ia lungu ni Jobe? (Tala o foto ia dianga.)

⁹ Tua tokala kukala ni ibanzelu iambote ia lungu ni ungana ua Jihova. Tu tena kuijiia dingi ia lungu ni maka enhá, mu kutanga o divulu dia Jobe. O divulu didi, dia tokala ue ku madivulu a diangele ku a soneka mu Bibidia. O divulu dia Jobe di londekesa o kizukutisu kia Satanaji, kioso kiambe kuila Jobe keji tena kukolokota mu ufiiele uê kua Nzambi, se ua dibhanene ni ibhidii ku muenhu. Satanaji ua bhingi kua Nzambi, phala kulola o kixikanu kia Jobe. Jihova keji tena kubhanga kiki, maji uehela Satanaji kulola Jobe, anga u mu tangela uixi: “Tala, ima ioso iala na-iu, iala bhu maku mé.” (Tanga Jobe 1:7-12.) Mu kusuluka, o jiselevende ja Jobe a a jibha, o jimbote jê joso ja diboto. Mu kusuka-ku, a mu tangela kuila, o kuinhi dia tuana tuê tuafu. Satanaji ua bhangesa Jobe kubanza kuila, Nzambi muéne ua kexile ku mu talesa hadi. (Jobe 1:13-19) Satanaji ua bhekela kua Jobe uhaxi ua bhonzele kiavulu. (Jobe 2:7) O muhatu’ê, ni kitatu kia makamba mê a zuela ima ia mu luualesa kiavulu.—Jobe 2:9; 3:11; 16:2.

10. (a) Kiebhi Jobe kia londekesa o ufiiele kua Nzambi? (b) Mukonda diahi Jobe ua bhingile ku mu kuatekesa?

¹⁰ O kuila Satanaji ua lungile? Kana. Sumbala Jobe ua bhiti ni jiphaxi javulu, muene ka bhana dikunda kua Jihova. (Jobe 27:5) Maji sai kithangana, Jobe ua thandanganhele dingi ni ibhidi iê, ua di jimbi o kima kia betele-o-kota. Muene ua kexile mu zuela kuila, ka bhangele kima kioso-kioso kiaiibha. Jobe ua divu kuma, ua tokalele kuijiia se mukonda diahi ua kexile mu bhita ni jiphaxi javulu ku muenhu. (Jobe 7:20; 13:24) Mu kidi, Jobe ua tale hadi iavulu. Maji né kiki, Jihova uejiidile kuila, Jobe kexile ni ibanzelu iambote. Mukonda dia kiki, ua mu kuatekesa kulungulula o ibanzelu iê. Kiebhi kia bhange kiki?

11, 12. Jihova ua kuatekesa Jobe kutendela ihi? Ihi ia bhange Jobe?

¹¹ Tu tena kutanga o izuelu ia Jihova kua Jobe mu divulu dia Jobe mu ibatulu 38 ndu 41. Jihova ka jimbulula kua Jobe se mukonda diahi ua kexile mu bhita mu jiphaxi. Mu veji dia kiki, ua mu kuatekesa kutendela kuila, Nzambi ua betele-o-kota, ni kuila, Jobe ka tenene ku di sokesa ni Jihova. Muene ua londekesa kua Jobe kuila, kuexile ima ia mukuá ia betele-o-kota, o jiphaxi jê, ndenge. (Tanga Jobe  38:18-21.) O izuelu ia Jihova ia kuatekesa Jobe kulungulula o ibanzelu iê.

¹² Jihova ua tange o izuelu iii kua Jobe kioso Jobe kia kexile mu bhita mu ibhidi. O kuila muene ka mu londekesa henda? Mu kidi, Jobe ua mono, o henda ia Nzambi. Jobe ua tendela o milongi ia Jihova, ni ku i bhana valolo. Muene ua zuela, uixi: “Nga diela muene, nga dimbuluka mu fufuta ni uthôkua.” (Jobe 42:1-6) A-nde dia Jihova kuzuela ni Jobe, sai diiala a mu ixana Edihu, ua kuatekesa ue Jobe kulungulula o ibanzelu iê. (Jobe 32:5-10) Kioso Jobe kiévu o kitendelesu kia henda kia mu bhana Jihova, muene ua lungulula o ibanzelu iê. Mukonda dia kiki, Jihova ua bhangesa o athu kuijiia kuila, Jobe ua sangulukisa o muxima uê.—Jobe 42:7, 8.

13. Kiebhi o itendelesu ia Jihova ieji kuatekesa Jobe kioso kia bhiti o ibhidi?

¹³ O itendelesu ia Jihova ia kuatekesa Jobe, katé muene kioso kiabhu o ibhidi. “Ngana ua beta kuzediuisa kikexilu kia Jobe kia sukidila, o kia dianga ndenge.” Mu kubhita thembu, muene a mu vualela dingi “sambuadi dia mala ni ahatu kitatu.” (Jobe 42:12-14) Sumbala Jobe ua zolele kiavulu o tuana tua vuala, maji ua kexile ni ngunzu ia tuana tuê tua fuile. Mu kidi, muene ka jimbi o ibhidi ioso ia bhitile ku muiji uê. Né muene se uejiidile o kima kia kexile ku mu bhekela o jiphaxi, muene nange ueji tena ku dibhuidisa se mukonda diahi Nzambi uehela o kuiibha ni hadi. Se ua kexile ni ibanzelu kala iii, Jobe ua tokalele kuxinganeka mu itendelesu ia mu bhanene Jihova. Kubhanga kiki, kueji ku mu suinisa, ni ku mu kuatekesa kukala ni ibanzelu iambote.—Jisálamu 94:19.

14. Ihi i tu tena ku di longa ku musoso ua Jobe?

¹⁴ O kuxinganeka mu maka a bhiti ni Jobe, ku tena ku tu kuatekesa kulungulula o ibanzelu ietu ni ku tu kolokotesa. O divulu dia Jobe di bhanga mbandu ku ima ia tumina Jihova ku i soneka, “phala etu ku di longa, phala mu kinhenge, ni mu kutula o muxima mu kutanga o Mikanda, tu kale ni kudielela.” (Loma 15:4) Kiki, ki tu longa kuila, ki tu tokala kubanza ngó mu ibhidi ietu, ni kujimba  o maka a lungu ni kuzangeleka o ungana ua Jihova. Kála kia bhangele Jobe, tu londekesa kuila tua mu zokela o ungana ua Jihova, mu kukolokota mu ufiiele uetu, né muene kioso ki tu bhita mu ibhidi mba jiphaxi javulu.

15. Kioso ki tu bhita ni ibhidi, o ufiiele uetu u tu kuatekesa kubhanga ihi?

¹⁵ O ima ia bhiti ni Jobe, i tena ku tu kolokotesa, mukonda i tu longa kuila, o ibhidi i tu bhita na-iu, ki i londekesa kuila, Jihova ka tu zolo. O izukutisu i tu bhana kithangana kia kuzokela o ungana ua Jihova. (Jisabhu 27:11) Kioso ki tu kolokota mu ufiiele uetu, tu sangulukisa o muxima ua Jihova, mukonda dia kiki, tu kala dingi ni kidielelu ku ima ia tu kanena Nzambi. (Tanga Loma 5:3-5.) O ima ia bhiti ni Jobe, ilondekesa kuila, “o Ngana ua vula o kukuatela henda ni kulendukila.” (Tiiaku 5:11) Se tu zokela o ungana ua Jihova, muene ua-nda tu besoala kiavulu. Kuijiia o ima iii, kua-nda tu kuatekesa “kukolokota mu ima ioso, ni kuxididika.”—Kolose 1:11.

16. Mukonda diahi tua tokala kukolokota kuxinganeka kuila, o ungana ua Jihova kiene o kima kia beta-o-kota?

¹⁶ Mu kidi, kioso ki tu dibhana ni ibhidi ku muenhu, nange kibhonza kiavulu kuxinganeka mu ungana ua Jihova. Se tu thandanganha kiavulu ni ibhidi ietu, tua-nda mona o ibhidi iofele kala ionene. Mukonda dia kiki, tua tokala kuxinganeka ithangana ioso kuila, o kuzokela o ungana ua Nzambi, kuene o kima kia beta-o-kota, né muene kioso ki tu bhita mu ibhidi iavulu.

17. Kiebhi o kukalakala ni nguzu ioso mu sidivisu ia Jihova, ku tu bhangesa kuxinganeka mu kima kia beta-o-kota?

¹⁷ O kukalakala ni kusuina kuoso mu sidivisu ia Jihova, kua-nda tu kuatekesa kulembalala o kima kia beta-o-kota. Mu kifika, sai phange a mu ixana Renee, ua kuata uhaxi ua uôngo, muene ua kexile ue ni ndolo iavulu mu mukutu, ni uhaxi ua ka mukuá ua bhonzele ku u saka. Kioso kia kexile mu inzo ia kusaka, muene ua bhana umbangi ku akalakadi,  ku jihaxi ja mukuá, ni ku athu akexile mu a kunda. Kioso Renee kia bhangele semana jiiadi ni kaxaxi mu inzo ia kusaka, muene ua bhange 80 a ji ola mu kuboka o njimbu. Sumbala Renee uejidiile kuila ueji fua, maji ka jimbi o kima kia beta-o-kota ku muenhu. O kuzokela o ungana ua Jihova kua kexile ku mu bhekela kutululuka kua kidi.

18. Ihi i tu longa o musoso ua Jennifer ia lungu ni kuzokela o ungana ua Jihova?

¹⁸ Tu tena kuzokela ue o ungana ua Jihova, kioso ki tu dibhana ni ibhidi ia kizuua ni kizuua. Sai phange a mu ixana Jennifer, ua bhiti izuua itatu mu kididi kia ku kuata o kiphululu, mu kingila o kiphululu phala kuvutuka kubhata. Kioso kia zuela kuila, o kiphululu ki kieji tuka, Jennifer ua thandanganha kiavulu, ua divu kiaiibha. Hinu muene ua di kuata mukôndo. Maji mu veji dia kiki, Jennifer ua sambe kua Jihova, phala ku mu kuatekesa kuboka o njimbu iambote, kioso kia kexile mu kingila mu kididi kia iphululu. Muene ua bhana umbangi ku athu avulu, ua bhana madivulu avulu. Jennifer uambe: “Sumbala nga fikisa ukexilu uengi ua kuboka, maji nga mono kuila, Jihova ua ngi kuatekesa ni ku ngi bhana o nguzu phala kuximana o dijina diê.”

19. Ihi i londekesa kuila tu abhezi a kidi a Nzambi?

¹⁹ O mundu ua Jihova uene ngó, uejiia kiambote o valolo ia ungana ua Jihova. O kuijiia kuku, kulondekesa se a nanhi o abhezi a kidi. Mukonda dia kiki, etu enioso tua tokala kusota kuijiia ni kidi kioso kuila, tua-nda suluka mu kuzokela o ungana ua Jihova.

20. Kiebhi Jihova kia divua mu ioso i u bhanga phala kuzokela o ungana uê?

²⁰ Jihova u mona anga u bhana valolo, mu ioso i u bhanga phala kuzokela o ungana uê, kioso ki uia ni ku mu sidivila ni kukolokota ku izukutisu. (Jisálamu 18:25) O milongi ia-nda kaiela, ia-nda jimbulula kuila eie ua bhingi kuzokela o ungana ua Jihova, ni kiebhi ki u tena kuzokela o ungana uê.