1, 2. (a) Ni mwatsi mukulhu wahi ow’ahambire okwa bandu bosi? (b) Aliwe busana naki oyu ni mwatsi mukulhu?

OKWA bangyi munabwire, esyosente kya kindu kikulhu. Syo bakabera erilengekaniako kutsibu. Obuthuku bwabu obwosi bakabya omw’isondya esyosente kutse omw’ibika ndeke esyo bawithe. N’okwa bandi ekikulhu omwa ngebe yabu w’amaka wabu, amaghalha wabu, kutse n’abandi, by’ebilhubirirwa ebyo bawithe omwa ngebe.

² Aliwe hane owundi mwatsi ow’alengire ebyosi ebyo thwamakaniako ebi. Omwatsi oyo w’ow’erikangania Yehova ko yuli n’ehamuli y’erithabalha. Ni kikulhu erithendileka nahake erighanirya mughulhu wosi okwa mwatsi oyo. Thutholere ithwayitheya, kundi ithwangana yisanga ithwabiriyihwerya omwa mibiiri yethu eya buli kiro, omwa maghaniryo wethu n’ebitsibu byethu, neryo ithw’ibirirwa obukulhu bw’omwatsi oyo. Thwamasighika ehamuli ya Yehova ey’erithabalha, ithukendi thoka erirwanisya n’erighumira ebitsibu byethu omwa ngebe, kandi ithwayithunda hakuhi na Yehova.

3. Sitani akabugha athiki okwa buthabali bwa Nyamuhanga?

³ Sitani abirihakanisya ehamuli ya Yehova ey’erithabalha. Sitani akanza abandu ibalengekania bathi Yehova ni muthabali mubi kandi oyuthesunzira abandu b’ebibuya. Sitani akabya ng’akabugha athi, abandu ibakendibya ndeke bamayithabalhako. (Enzuko 3:1-5) Kandi akabugha athi sihali mundu oyuwangabya muthaleghulha oku Nyamuhanga. Athi omundu wosi-wosi engebe yamamukalira, iniakendi ghana obuthabali bwa Nyamuhanga. (Yobu 2:4, 5) Neryo Yehova akaleka halhabe obuthuku bulebe nuku kiminyikale ndeke ngoku ni bitsibu bisa-bisa ahathe Nyamuhanga ng’omuthabali.

4. Busana naki omwatsi w’oyuwithe ehamuli y’erithabalha nga nindi atholere inialhungulhwa ndeke?

⁴ Yehova anasi ndeke-ndeke ngoku ebya Sitani akabugha ni mabehi. Neryo ibbwa niki ekikaleka inialekereraho obuthuku erilhaba nuku Sitani akanganaye ng’anahikire kutse eyihi? Eky’erisubirya kihambire okwa bosi abali okwa kihugho n’omwa lhubulha. (Soma Esyonyimbo 83:18.) Adamu na Eva mubaghana obuthabali bwa Nyamuhanga, n’abandi bangyi babirikwamako erilhwiririra naho. Ekyo ikyangana leka abandi ibalengekania bathi obo ekya Sitani abugha kihikire. Omwatsi oyu amathendi lhungulhwa ndeke, neryo omwa malengekania w’abandu n’abamalaika imukendi sighalha imune ebibulyo, obuholho n’obughuma isibyendi syabyaho. Aliwe kikendi syabya kyabirikanganibwa ndeke okwa bosi ngoku Yehova yuwithe ehamuli y’erithabalha, abandu abosi bakendi syabya buholho omwa buthabali bwiwe erihika kera na kera. Obuholho bukendi tsogha omwa buhangwa bwosi.​—Abanya Efeso 1:9, 10.

5. Thuwithe lhukwamirwaki omo mwatsi w’ehamuli y’erithabalha?

⁵ Kikendi syaminyikalha ndeke ngoku Nyamuhanga yuwithe ehamuli y’erithabalha, neryo obuthabali bwa Sitani n’abandu ibwalemwa toko-toko n’erilhusibwaho. Erithabalha lya Nyamuhanga erilhabira omwa Bwami bwa Masiya bukendi syasingura. Abaghombe ba Nyamuhanga bakendi syabya ibabirikangania ngoku omundu angana sighalha iniane muthaleghulha oku Nyamuhanga n’erisighika obuthabali bwiwe. (Isaya 45:23, 24) Mbwino thunanzire ithwabya baghuma b’okwa bathaleghulha abo? Ithwe bosi thwanzire! Neryo kwesi, thutholere ithwakilhangira ngoku omwatsi oyu ni mwatsi mukulhu kutsibu.

6. Niki ekikakanganaya ngoku ehamuli ya Yehova ey’erithabalha ni nzumwa ngulhu kutsibu?

⁶ Erikangania ngoku Yehova yuwithe ehamuli y’erithabalha kilengire erisondya etseme eyethu. Aliwe ekyo sikirimanyisaya kithi Yehova syatsomene omulhamu wethu. Ekyo thukakiminya thuthi?

7, 8. Erikanganibwa ly’ehamuli ya Nyamuhanga ey’erithabalha likendi syathughasira lithi?

⁷ Yehova anzire abandu ba kutsibu. Kandi kwenene, thuli b’obughuli embere siwe eribya imwahika okw’ihayo mughalha iwe mwanzwa  nuku thwanga syabana engebe y’erikotha. (Yoane 3:16; 1 Yoane 4:9) Yehova amathendi berererya emilhaghe yiwe ey’obuthuku bw’embere, obo Sitani n’abandi abakamusighika ibakendibya ibahikire. Sitani akabugha athi Yehova ni mubehi oyukabisa okwa bandu biwe kw’ebibuya kandi athi omwa buthabali bwiwe simuli bulingirirania. Abasininguli bakasekerera emilhaghe ya Yehova omw’ibugha bathi: “Mwathalhagha athi akendi syasa kwehi? Abathatha wethu babiriholha, nikwa emyatsi yosi yine ngoku yithulha erilhua okw’ihangikwa ly’ekihugho.” (2 Petero 3:3, 4) Aliwe, Yehova iyo akendi syaberererya emilhaghe yiwe. Abirilhangira athi erikanganibwa ly’ehamuli yiwe y’erithabalha musyabya n’omulhamu w’abandu abakamwowa. (Soma Isaya 55:10, 11.) Ehamuli ya Yehova ey’erithabalha yiseghemere oko lhwanzo. Neryo thunayikethere ngoku syendi syaleka erianza n’erithwalha abaghombe biwe mwa b’obughuli.​—Eriluayo 34:6.

⁸ Yehova eribya iniatsomene kutsibu ehamuli yiwe y’erithabalha sikirimanyisaya kithi syathutsomene. Yehova athutsomene kutsibu. Aliwe thutholere ithwabya ithun’ibukire ekikulhu kutsibu, n’erilholha embere erisighika obuthabali bwa Yehova.

9. Sitani mwabugha athiki oku Yobu? (Lebaya ekisasani ekiri okw’itsuka.)

⁹ Ni kikulhu eribya n’amalengekania awatholere oko mwatsi w’ehamuli ya Yehova ey’erithabalha. Ekyo thukakilhangira omwa kitabu kya Yobu, ekighuma ky’oko bitabu ebyatsuka erihandikwa. Mune omwatsi ow’akakanganaya ngoku Sitani mwabugha athi Yobu amaghalhwa kutsibu, iniakendi ghana Nyamuhanga. Sitani mwasaba na Nyamuhanga athi aleke Yobu aghalhawe. Ekyo Yehova iyo abya isyanga kikolha, aliwe mwalighira Sitani erilengesya Yobu, mwamubwira athi: “Ebyosi awithe biri omo byalha byawu.” (Soma Yobu 1:7-12.) Buthuku buke enyuma w’aho, Yobu mwaherya abaghombe biwe n’ebyosi aby’awithe. Abaana biwe nabu bamaholha olhubi. Sitani mwalengaho erileka kibye nga ni Nyamuhanga oyuwamakolha ebyo. (Yobu 1:13-19) Sitani neryo mwakwamyako eriswirya Yobu y’omo bulhwere obukalire. (Yobu 2:7) Kandi ibbwa ekyakabi, mukali wiwe-wiwe, na banywani biwe basathu mubabya bakamubwira ebikamughunza amani bisa-bisa.​—Yobu 2:9; 3:11; 16:2.

10. (a) Yobu mwakangania athi kw’ali muthaleghulha oku Nyamuhanga? (b) Busana naki Yobu mwayithagha erihabulhwa?

¹⁰ Mbwino ebya Sitani abugha oku Yobu byanabya bihikire? Eyihi. Yobu nomw’anaghalhawa kutsibu, mwathaghana Yehova. (Yobu 27:5) Aliwe, Yobu mwatsuka eryibirirwa ekikulhu kutsibu, amatsomana engebe yiwe. Iyo mwabera eribugha athi syawithe eky’akolire. Kandi Yobu mwayowa iniatholere eriminya ekikaleka iniaghalhwa. (Yobu 7:20; 13:24) Ithwangana yowa Yobu ng’abya ahikire omwa by’abugha. Aliwe Yehova mwalhangira Yobu isyawithe amalengekania awatholere, neryo amamuhabulha. Ekyo mwakikolha athi?

11, 12. Yehova mwawathikya Yobu eriyitheghererya kyahi? Na Yobu mwakithwalha athi?

¹¹ Omwa sura eya 38 erihika okwa ya 41 omwa kitabu kya Yobu mune ebya Yehova abwira Yobu. Yehova mwathasoborera Yobu ekyalekire iniaghalhwa. Aliwe Yehova mwanza Yobu aminye ngoku ni muke kutsibu eriyilinganisya na Nyamuhanga. Mwakangania Yobu ngoku hane omwatsi omukulhu kutsibu kwilhaba eriaghalhwa liwe. (Soma Yobu 38:18-21.) Ebyo Yehova abugha mubyawathikya Yobu erihindulha amalengekania wiwe.

 ¹² Mbwino Yehova eribwira athya Yobu omwa byosi eby’alhabamu mwabya ng’oyuthamutsomene? Eyihi, na Yobu iyuwene-wene mwathalengekania athya. Yobu mwayitheghererya ekyamaleka iniahabulhwa kandi amaligha. Nibya mwabugha athi: “Namaleka ebyosi ebyo, namayiswekera omo lhuthuthu n’omw’ibu.” (Yobu 42:1-6) N’omulhume mulere Elihu nayu anabya iniabirimuwathikya erihindulha amalengekania wiwe. (Yobu 32:5-10) Yobu abere abiriligha erihabulha lya Yehova ery’olhwanzo n’erihindulha amalengekania, Yehova mwaminyisya abandu bosi kw’abiritsemera obuthaleghulha bwa Yobu.​—Yobu 42:7, 8.

13. Erihabulha lya Yehova mulyawathikya lithi Yobu n’omughulhu eriaghalhwa liwe lyabya iryabirihwa?

¹³ Erihabulha erya Yehova aha Yobu mulyalholha embere erimuwathikya n’omughulhu ebitsibu biwe byabya ibyabirihwa. Yehova “mwatsumulha ebiro by’enyuma bya Yobu kwilhaba ebiro by’eritsuka liwe.” Kandi mwathasyabya na “baghalha balinda na bali basathu.” (Yobu 42:12-14) Nomwakine indi Yobu mwanza abandi baana, ahathe erithika-thika abya inianemukandira abaholha. Kandi angabya imwath’ibirirwa ebitsibu ebyosi ebyamuwako n’eka yiwe. Nomwakine indi Yobu angabya imwaminya enzumwa eyaleka iniaghalhwa, angabya iniabya inianemuyibulya ekyaleka Nyamuhanga inialigha athi aghalhawe athya. Yobu amabya inianabya mw’ekirengekanio ekyo, angabya imw’ibuka ebya Yehova amubwira. Kandi byangabya imubyamuhumulikania n’erimuwathikya eribya n’amalengekania awatholere.​—Esyonyimbo 94:19.

14. Omwatsi wa Yobu akathweghesayaki?

¹⁴ Erighanirya okwa byabya oku Yobu lyangana thuwathikya eribya n’amalengekania awatholere n’erithuhumulikania nibya. Ekitabu kya Yobu ni kighuma ky’okwa myatsi eyo Yehova alhangira athi yikahandikawa ‘busana n’erithukangirirya, neryo amasako akathuha eriyitsingirira n’erihanda omuthima ithwathoka eribya n’amaha.’ (Abanya Roma 15:4) Omwatsi oyu akathweghesaya ngoku sithutholere thukatsomana kutsibu ebitsibu byethu  erihika n’okw’ibya ithwanganaleka erilengekania oko mwatsi w’ehamuli ya Nyamuhanga y’erithabalha. Nga Yobu, nethu thukakanganaya ku thukasighika ehamuli ya Yehova ey’erithabalha omw’isighalha ithune bathaleghulha okw’iyo n’omughulhu thuli omwa bitsibu ebikalire.

15. Obuthaleghulha bwethu n’omwa mughulhu thuli omwa bitsibu bukaberererayaki?

¹⁵ Omwatsi wa Yobu angana thuhumulikania kundi akakanganaya ngoku ithwe eribana ebitsibu sikirimanyisaya kithi Yehova athuhitheneko. Ebitsibu bikathuha akaghisa k’erikangania ku thukasighika ehamuli ya Yehova ey’erithabalha. (Emisyo 27:11) Thukabya thwamayiyinia buthaleghulha, thukatsemesaya Yehova, neryo n’amaha wethu iniaghuma. (Soma Abanya Roma 5:3-5.) Omwatsi wa Yobu akakanganaya ngoku Yehova “ni w’erighanyira kutsibu, kandi akaghanyira abandu,” kutse eribakwira olhukeri. (Yakobo 5:11) Thwamasighika ehamuli ya Yehova ey’erithabalha, akendi syathuhemba. Eriminya ekyo likaleka ithwathoka “eriyiyinia omwa myatsi yosi n’eriyibombeka.”​—Abanya Kolosai 1:11.

16. Busana naki thutholere ithwabya ithunemuyibukya ngoku ni kikulhu erisighika ehamuli ya Yehova ey’eribalha?

¹⁶ Ni kwenene, ikyangana kalha erihira amalengekania w’okwa hamuli ya Nyamuhanga ey’erithabalha omughulhu thuli omwa bitsibu. Nibya n’ebitsibu bike-bike byanganabya nga binene-binene thwamabirengekaniako kutsibu. Neryo kwesi thutholere ithwabya ithunemuyibukya ngoku ni kikulhu erisighika ehamuli ya Nyamuhanga ey’erithabalha nomuthwanga bana ebitsibu ebiri bithi.

17. Eriyihwerya omwa mubiiri wa Yehova lyanga thuwathikya lithi erihira amalengekania okwa ky’omughaso?

¹⁷ Eriyihwerya omw’ikolera Yehova irikendi thuwathikya eribya ithunasi ekikulhu. Ng’eky’erileberyako, mwali wethu oyuk’ahulhawa mwa Renee mwasanyarara, ekindu ekyamuhira omwa bulhumi bunene, kandi iniakwire  n’ekansa. Abere iniane omwa sipatara, iniakabya inianemuthulira abakamuthambira, abandi balhwere n’abakasyamulebaya. Buthuku bughuma, mwanaghunza omwa sipatara mw’esyowiki ibiri n’embindi, amathulira esyosaha 80. Nomwakine indi Renee abya inianasi kw’akayaholha, mwath’ibirirwa omwatsi mukulhu. Erisighika ehamuli ya Yehova ey’erithabalha mukyaleka iniayowa buholho.

18. Omwatsi wa Jennifer akathweghesayaki okw’isighika ehamuli ya Yehova y’erithabalha?

¹⁸ Nibya n’omwa mughulhu w’ehitsibu hike-hike omwa ngebe ithwangana kangania ku thukasighika ehamuli ya Yehova ey’erithabalha. Mwali wethu oyukahulhawa mwa Jennifer mwaghunza ebiro bisathu iniane okwa kisahu ky’endege akalinda eyikendi musubya eka. Abere alinda ndambi isihali endege eyikaghenda, Jenniffer mwalhuha n’eriyowa ng’ali omwa mbwera. Angana thwiremu eriyitsomana n’eriyikubirania. Aliwe omwakanya k’ekyo, Jennifer mwasaba Yehova amuwathikaye athoke erithulira abandi abo ali nabo okwa kisahu. Mwayisanga iniamabirikania n’abandu banene n’erighaba bitabu bingyi. Jennifer mwabugha athi, “Munowa Yehova iniamanyitsumulha nomunanabya omwa mibere eyikalire n’erimba akaghalha k’erikania okwa lina liwe omwa nzira eyitholere.”

19. Ni kyahi ekikaminyikalhaya abaramya b’okwenene?

¹⁹ Abema ba Yehova basa babakayitheghereraya obukulhu bw’ehamuli ya Yehova y’erithabalha. Omwatsi oyo akaminyikalhaya abaramya b’okwenene. Kwesi ithwe bosi thutholere ithwalhangira thuthi thukasighika ehamuli ya Yehova y’erithabalha.

20. Yehova akayowa athi okwa byosi ebya wukakolha busana n’erisighika ehamuli yiwe y’erithabalha?

²⁰ Yehova analholire akaghalha ako wukahiraho erisighika ehamuli yiwe y’erithabalha wukamukolera kandi iwunemughumira n’ebitsibu. (Esyonyimbo 18:25) Omwatsi owakakwamako akendi soborera buuli ekikaleka iwabya iwutholere erisighika ehamuli ya Yehova y’erithabalha kandi ngoku wanga yongera erikolha ekyo.