1, 2. (a) Nkia diambu difwete siwa e sungididi kwa wantu awonso? (b) Ekuma diambu diadi dinina diamfunu kwa yeto?

KUNA kwa wantu ayingi o unu, e nzimbu i lekwa kisundidi o mfunu. Nzimbu kaka beyindulanga yo tokanena. Besadilanga ntangw’au mu vava nzimbu zayingi yovo lunga-lunga e nzimbu bena zau. Kuna kwa wantu ankaka, edi disundidi o mfunu i esi nzo au, vimpi wa nitu yovo mambu mana bazolele vanga muna zingu.

² Vena ye diambu disundidi o mfunu ke mu lekwa yayi ko. E diambu diadi i tundidika kimfumu kia Yave. O tundidika kimfumu kia Yave mfunu kikilu dina. Muna kuma kiaki, tufwete kwamanana sia e sungididi mu diambu diadi. Avo ke tuyikebele ko, tulenda kuyivana mu mambu ma zingu kia lumbu ke lumbu yovo tokana kwayingi mu kuma kia mpasi zeto yo vilakana e kimfumu kia Yave. Avo tuyikamene kimfumu kia Yave, twakubama tukala mu zizidila e mpasi za lumbu ke lumbu yo finama Yave.

3. Adieyi Satana kavova mu kuma kia luyalu lwa Nzambi?

³ Satana wa Nkadi Ampemba wafila mpaka kana vo Yave una ye wisa kia yala. Satana wazola vo wantu bakwikila vo Yave Nyadi ambi ye kazolele ko vo twakala ye zingu kiambote. Satana wavova vo wantu bekala ye zingu kia kiese avo bakiyadidi yau kibeni. (Etuku 3:1-5) Wavova mpe vo ke vena muntu ko olenda songa kikilu kwikizi kwa Nzambi, kadi avo mpasi zisakidi muna zingu, obembola Nzambi nze Nyadi. (Yobi 2:4, 5) Muna kuma kiaki, Yave ovananga ntangwa mu songa vo wantu ke balendi kala ye zingu kiambote ko avo babembwele luyalu lwa Nzambi.

4. Ekuma diambu ditadidi kimfumu kia Yave difwete singikilwa?

⁴ Yave ozeye wo vo mana Nkadi Ampemba kavova maluvunu. Ozevo, ekuma kavanina Satana e ntangwa kasonga kana vo mana kavova maludi yovo maluvunu? E mvutu za kiuvu kiaki zitadidi yeto awonso, kiakala ambasi kuna zulu yovo yeto wantu ova ntoto. (Tanga Nkunga 83:18.) Adami yo Eva babembola e kimfumu kia Yave. Tuka muna kolo kiakina, wantu ayingi belandanga ukolami wau. Ediadi dilenda fila akaka mu yindula vo Nkadi Ampemba ndungidi kena yau. Ekolo e diambu diadi ke diasingikilu ko muna ngindu za wantu ye mbasi, ke valendi kala ye luvuvamu ye kintwadi ko. Kansi, vava kimfumu kia Yave kitundidikwa, awonso bekala kuna nsi a luyalu lwandi yakwele mvu. O nsema wawonso mu luvuvamu ukala.—Efeso 1:9, 10.

5. Aweyi twinina muna diambu ditadidi kimfumu kia Yave?

⁵ E kimfumu kia Nzambi kisinga tundidikwa. O luyalu lwa Satana ye lwa wantu ke lusikila ko, lufwaswa emvimba. Luyalu lwa Nzambi muna nzil’a Kintinu kia Masia lusikila. Akwa kwikizi besonganga e ziku vo wantu balenda kwau sikila ye kwikizi yo yikama luyalu lwa Nzambi. (Yesaya 45:23, 24) Ka lukatikisu ko vo tuzolele kala amosi muna akwa kwikizi awaya. Muna kuma kiaki, tufwete vava bakula o mfunu wa diambu diadi.

6. Adieyi disonganga vo o tundidika e kimfumu kia Yave mfunu kikilu dina?

⁶ O tundidika kimfumu kia Yave disundidi o mfunu ke mu wete dieto ko. Kansi, e diadi ke disongele ko vo luvuluzu lweto ke luna mfunu ko yovo Yave ke kutuvuanga mfunu ko. Aweyi tuzayidi wo?

7, 8. E ntundidik’a kimfumu kia Nzambi nkia nluta dikututwasila?

⁷ Yave otoma zolanga wantu. Muna kuma kiaki, mfunu kikilu tuna kwa yandi. E kiaki i kuma kavanina Mwan’andi kimana twavua moyo a mvu ya mvu. (Yoane 3:16; 1 Yoane 4:9) Avo Yave kalungisi nsilu miandi ko, Satana ye akolami akaka  ndungidi badi kala yau. Satana wavova vo Yave nkwa luvunu kadi mambu mambote keswekanga kwa wantu ye ke nyadi ambote ko. Atantu bevezanga nsilu mia Yave yo vova vo: “O nsilu a ngiz’andi, aweyi? Kadi tuka muna lumbu kina mase meto baleka muna lufwa, mambu mawonso makinu wauna makala kuna lubantiku lwa nsema.” (2 Petelo 3:3, 4) Kansi, Yave osinga lungisa e nsilu miandi. E ntundidik’a kimfumu kiandi itwasa luvuluzu kw’awana bekunlemvokelanga. (Tanga Yesaya 55:10, 11.) Yave mu zola keyadilanga. Muna kuma kiaki, tulenda kala ye ziku vo okwamanana zola yo vua selo yandi yakwikizi o mfunu.—Luvaiku 34:6.

⁸ Kana una vo e ntundidik’a kimfumu kia Yave i diambu disundidi o mfunu, ke disongele ko vo luvuluzu lweto ke luna mfunu ko. Yave okutuvuanga kikilu o mfunu. Tufwete zaya e diambu disundidi o mfunu yo yikama kimfumu kia Yave kuna kwikizi kiawonso.

9. Adieyi Satana kavova mu kuma kia Yobi? (Tala e fwaniswa kuna lubantiku lwa longi.)

⁹ Diambote twakalanga ye ngindu zasikila mu kuma kia kimfumu kia Yave. Tulenda mona o mfunu wa diambu diadi avo tutangidi nkand’a Yobi una vo umosi muna nkanda miantete mia Nkand’a Nzambi miasonekwa. Muna nkanda wau tutanganga dina Satana kavova vo Yobi obembola Nzambi avo omwene mpasi zayingi. Satana wavovesa nkutu Nzambi vo kamwesa Yobi e mpasi. Yave kavanga wo ko, kansi wayambula vo Satana katonta Yobi. Wavova vo: “Yawonso kena yau ina va koko kwaku.” (Tanga Yobi 1:7-12.) Ke vavioka kolo kiayingi ko, Yobi wavidisa ntaudi ye mavua mandi mawonso. I bosi, wawá e nsangu vo wan’andi kumi bafwidi muna sumbula. Satana wazola vo Yobi kayindula vo Nzambi wantwasila e mpasi zazi. (Yobi 1:13-19) Kuna kwalanda, Satana watwasila Yobi kimbevo kiampasi kikilu. (Yobi 2:7) Muna wokesa o mambu, nkaz’a Yobi ye akundi andi atatu bamvovesa mambu mambi mana mankendeleka diaka.—Yobi 2:9; 3:11; 16:2.

10. (a) Aweyi Yobi kasongela kwikizi kiandi muna Nzambi? (b) Ekuma diavavila vo ngindu za Yobi zasingikwa?

¹⁰ Nga Satana ndungidi kakala yau? Ve. Kana una vo Yobi wamweswa mpasi zayingi, kabembola Yave ko. (Yobi 27:5) Kansi, vakala ye ntangwa ina Yobi kavilakana e diambu diasunda o mfunu yo sia sungididi kiasaka muna yandi kibeni. Wakwamanana vova vo kavanga diambu diambi ko. Yobi wazolanga mpe vo kazaya e kuma kamwenanga e mpasi. (Yobi 7:20; 13:24) Nanga tulenda bakula una Yobi kamona. Kansi, Yave wazaya wo vo Yobi ngindu zabendomoka kakala zau yo kunsingika. Aweyi kavangila wo?

11, 12. Yave wasadisa Yobi mu bakula nkia diambu? Aweyi Yobi kabadikila luludiku kavewa?

¹¹ Tulenda tanga mana Yave kavovesa Yobi muna kapu kia 38 yakuna kapu kia 41 kia nkand’a Yobi. Yave kazayisa Yobi ko e kuma kamwenanga mpasi. Kansi, Yave wazola sadisa Yobi kabakula vo wakete kikilu vana meso ma Nzambi. Yave walonga Yobi vo vakala ye diambu diasunda o mfunu ke  mu mpasi zandi ko. (Tanga Yobi 38:18-21.) E mvovo mia Yave miasadisa Yobi mu singika ngindu zandi.

¹² Nga diambi kavanga o Yave muna vovesa Yobi e mvovo miami avo tuyindwidi e mpasi zawonso kamona? Ve. Yobi ke wau ko kabadikila e diambu diadi. Yobi wabakula longi dia Yave yo zitisa dio. Wavova nkutu vo: “Iyibembwele, yo vilukwa ntima muna mbundukutu yo ntoto ampolo.” (Yobi 42:1-6) Toko dimosi wayikilwanga vo Eleyu, wasadisa mpe Yobi mu singika e ngindu zandi. (Yobi 32:5-10) Vava Yobi kalemvokela luludiku kavewa kwa Yave yo soba e ngindu zandi, Yave wayambula vo akaka bazaya vo wayangalelanga kwikizi kia Yobi.—Yobi 42:7, 8.

13. Aweyi luludiku lwa Yave lwasadisila Yobi vava mpasi zandi zafokoka?

¹³ Luludiku lwa Yave lwakwamanana twasa nluta kwa Yobi kana nkutu vava mpasi zandi zafokoka. ‘Yave wasambula e mbaninu a Yobi lutila lubantiku lua zingu kiandi.’ Kuna kwalanda, wawuta diaka “wana nsambwadi amakala yo wana tatu amakento.” (Yobi 42:12-14) Kana una vo Yobi wazolanga wana awaya, wamonanga mpe viangi kia wan’andi ana bafwa. Nanga kavilakana ko e mpasi zawonso zambwila kumosi ye esi nzo andi. Kana nkutu vo kuna kwalanda Yobi wazaya e kuma kamwena e mpasi, nanga wakiyuvulanga e kuma Nzambi kayambulwila vo kamona mpasi zazina zawonso. Avo Yobi ngindu zazi kakala zau, nanga wasungamena mana Yave kamvovesa. Ediadi nanga diamfiaulwisa yo kunsadisa mu kala ye ngindu zasikila.—Nkunga 94:19.

14. Adieyi tulenda longoka muna mbandu a Yobi?

¹⁴ O badika dina diabwila Yobi dilenda kutusadisa mu singika e ngindu zeto yo kutufiaulwisa. O nkand’a Yobi umosi muna nkanda mina Yave kasonekesa “muna kutulonga, kimana muna luzindalalu lweto ye muna lufiaulwisu lwa Sono, twakala ye vuvu.” (Roma 15:4) Nkanda  wau ukutulonganga vo ke tufwete yindulanga kaka mpasi zeto ko yo vilakana o mfunu wa tundidika kimfumu kia Yave. Nze Yobi, tusonganga vo tuyikamanga kimfumu kia Yave vava tusikilanga ye kwikizi muna yandi kana nkutu muna ntangw’a mpasi.

15. E kwikizi kieto aweyi kilenda kutusadisila vava tukalanga mu mpasi?

¹⁵ E mbandu a Yobi ilenda kutufiaulwisa kadi isonganga vo e mpasi tumonanga ke zisonganga ko vo Yave makasi katufungidi. E mpasi zikutuvananga e lau dia yikama kimfumu kia Yave. (Ngana 27:11) Vava tuzizidilanga e mpasi ye kwikizi kiawonso, tuyangidikanga Yave yo siamisa e vuvu kieto kia kusentu. (Tanga Roma 5:3-5.) E mbandu a Yobi ikutusonganga vo “Yave nkwa walakazi wayingi ye nkenda.” (Yakobo 5:11) Avo tuyikamene kimfumu kiandi, Yave okutusenda. O zaya e diambu diadi dikutusadisanga mu “zizidila mawonso kuna kiese.”—Kolosai 1:11.

16. Ekuma tufwete sungamenanga vo o tundidika kimfumu kia Yave mfunu kikilu dina?

¹⁶ Vava tuna mu mpasi, dilenda kala diampasi mu sia e sungididi muna kimfumu kia Yave eki kifwete tundidikwa. Kana nkutu mambu makete tulenda mo mwena vo mampwena avo nkumbu miayingi tuyindulanga mo. Muna kuma kiaki, tufwete sungamenanga o mfunu wa yikama kimfumu kia Nzambi kana nkutu nkia mpasi tunuananga zau.

17. O kuyivana muna salu kia Yave aweyi dilenda kutusadisila mu sia sungididi muna diambu disundidi o mfunu?

¹⁷ O kuyivana muna salu kia Yave dilenda kutusadisa mu sungamena e diambu disundidi o mfunu. Kasikil’owu, mpangi mosi ankento una ye nkumbu a Renee, wabakama kimbevo kia volo. Mpasi zayingi kamonanga mu kuma kia kimbevo kiaki. Wabakama mpe kimbevo kia câncer. Ekolo kakala kuna lupitalu, wasilanga umbangi  kwa awana basadilanga muna lupitalu, kwa mbevo zankaka ye kwa awana bankingulanga. Vava kakala tumingu tole ye ndambu kuna lupitalu, Renee wasila umbangi mu tezo kia 80 lwa ola. Kana una vo wazaya wo vo fwa kefwa, kavilakana ko dina diasunda o mfunu. O yikama kimfumu kia Yave diansadisa mu kala ye luvuvamu.

18. E nona kia mpangi Jennifer adieyi kitulongele mu diambu ditadidi yikama kimfumu kia Yave?

¹⁸ Tulenda mpe yikama kimfumu kia Yave vava tuzizidilanga e mpasi za zingu kia lumbu ke lumbu. Mpangi mosi una ye nkumbu a Jennifer, lumbu tatu kaviokesa vana yanzala kia bakila ndeki yadi kunata kuna nsi andi. Wau vo e ndeki ke yalwakanga ko, mpangi Jennifer watokana kikilu yo mona kinsona. Ediadi diafwana kumfila mu kuyimwena e nkenda. Kansi, mpangi Jennifer wasamba kwa Yave kimana kansadisa kasila umbangi kwa akaka ana bavingilanga e ndeki. Wayantika sila umbangi kwa wantu yo kaya yinkanda-nkanda yayingi. Mpangi Jennifer wavova vo: “Yamona vo Yave wansambula kikilu kana una vo mu mpasi yakala. Wampana nkuma mu sadila e lau diadi mu samuna e nkumbu andi.”

19. Nki kiswaswanesanga asambidi akieleka?

¹⁹ Nkangu a Yave kaka ubakulanga o mfunu wa kimfumu kia Yave. O umbakuzi wau uswaswanesanga asambidi akieleka. Muna kuma kiaki, konso muntu mu yeto kafwete songanga vo oyikamanga kimfumu kia Yave.

20. Aweyi Yave kemonanga muna mawonso ovanganga mu yikama kimfumu kiandi?

²⁰ Yave omonanga yo yangalela mawonso ovanganga mu yikama kimfumu kiandi ekolo okunsadilanga ye kwikizi kiawonso yo zizidila e mpasi. (Nkunga 18:25) E longi dilanda, disasila e kuma ofwete yikamena kimfumu kia Yave ye una olenda kio yikamena una ufwene.