1, 2. (a) Bílaʼashdlaʼii haʼátʼíí bidaʼdiiłʼá? (b) Jiihóvah nahaʼáago bóhólníihgi ííshjání ádoolníiłgi haʼátʼíí biniyé ílı̨́įgo baa nitsáhákees?

DÍÍSHJĮ́ĮDI béeso tʼéiyá baa yádaatiʼ, baa nitsáhákees dóó biniinaa bikʼee yínííł dahwiinidzin. Béeso ląʼígo ánáádoolnííł doodaiiʼ tʼáá íídą́ą́ʼ béeso hólónígíí baa hóchįʼ. Náánáłahgo íiyisíí baa yádaatiʼii éí hooghan hazʼą́ągi, atsʼíís átʼéegi, doodaiiʼ haʼátʼíí lá łaʼ deeshłííł dahwiinidzin.

² Ndi aláahdi íiyisíí ílı̨́įgo baa nitsáhákees dooleełii hólǫ́. Éí Jiihóvah nahaʼáago bóhólníihgi ííshjání ádoolnííł. Díí tʼááká baa dayoonééh. Doo bee ádaa áhwiilyą́ą́góó, niheʼiinaʼ siláagi dóó bee achʼįʼ anídahaztʼiʼii tʼéiyá baa nitsíikeesgo béédiyiiʼnah. Jiihóvah nahaʼáago bóhólníihgi bikééʼ siidzı̨́įgo bee achʼįʼ anídahaztʼiʼii bichʼįʼ haʼííníilní, dóó áhánígo Jiihóvah bił niidlı̨́į doo.

3. Séítan éí God hooʼáałgi haʼátʼíí yiłní?

³ Séítan Devil éí Jiihóvah hojooʼáałgo daatsʼí hóhólnííh níigo diné yíniʼ áyiilaa. Éí bílaʼashdlaʼii kódeizdínóodzįįł  nízin, Jiihóvah yeeʼ doo yáʼátʼééhgóó nahaʼáii jílı̨́ índa yáʼádaatʼéehii doo nihá jinízin da. Séítan áníigo éí bílaʼashdlaʼii tʼáá bí ádá dahwéeʼaahgo bił dahózhǫ́ǫ doo. (Genesis 3:1-5) Ałdóʼ áníigo, bílaʼashdlaʼii doo łaʼ tʼáá aaníí ájíníigo God bikééʼ jizı̨́, índa yéigo hachʼįʼ hodiiʼnáahgo God nahaʼáagi bitsʼą́ąjįʼ dashdidoogááł. (Job 2:4, 5) Áko Jiihóvah doo hooʼááłgóogo tʼóó baaʼihgo hwiidooʼaałgo bééhodoozįįł biniyé á hoołʼaʼ.

4. Haʼátʼíí biniyé nahatʼáagi bóhólníihii bééhodoozįįłgo ádoolnííł?

⁴ Séítan kójítʼé hałníigi biyoochʼííd, díí Jiihóvah tʼáá íídą́ą́ʼ bił bééhózin. Séítan ájínínígíí ííshjání ánílééh hodooʼniidgo biniyé Jiihóvah há yee hoołʼaʼ. Áko éí yáʼąąshdi dóó nahasdzáán bikááʼ tʼáá ałtso hináá shı̨́ı̨́ bídéétʼiʼ. (Psalm 83:18 yíníłtaʼ.) Ádam dóó Íiv éí Jiihóvah hooʼáałgi doo jiniizı̨́įʼ da, áádóó ląʼí diné hakééʼdóó ákódaadzaa. Díí kódajiidzaago binahjįʼ Séítan tʼáá aaníí ání hwiidínóodzįįł. Bílaʼashdlaʼii dóó diyingo ndaalʼaʼí díí tʼáadoo binááł hashtʼeelyaagóogo éí kʼé índa łáʼí ídlı̨́ ádin doo. Ndi Jiihóvah nahaʼáago bóhólníihgi ííshjání ályaago éí Bí hooʼáałgo tʼáá ałtso hoolʼáágóó dahináa doo. Yáʼąąshdi dóó nahasdzáán bikáaʼgi hodéezyéelgo ahiih nídooldah.—Ephesians 1:9, 10.

5. Nahatʼáagi bóhólnííhígíí baa hwiinítʼı̨́įgi haitʼéego nihídéétʼiʼ?

⁵ God nahaʼáago bóhólníihgi ííshjání ádoolnííł. Séítan dóó bílaʼashdlaʼii dahojíʼaahgi doo łaʼ dazhdoolíłí da índa tʼóó nahjįʼ kóhodiʼdoolnííł. God nahaʼáago éí Mesáíyah hooʼáałgo bee tʼáá ałtsojįʼ łaʼ hodoonííł. God yikééʼ naazíinii éí God nahaʼáagi doo yitsʼą́ąjįʼ ádaatʼée da dooígi bééhózínígo ádeedoolííł. (Isaiah 45:​23, 24) Ákoósh nihí ałdóʼ ákóniitʼée doo? Aooʼ! Áko lą́ą, díí God nahaʼáagi bóhólnííhígíí bikʼidiʼdootı̨́įłgi ílı̨́įgo átʼé.

6. Jiihóvah nahaʼáagi bóhólnííh bééhodoozįįłgi haitʼéego ílı̨́?

⁶ Jiihóvah nahaʼáagi bóhólnííh bééhodoozįįłgi éí nihił hózhǫ́ biláahdi ílı̨́. Ndi Jiihóvah nihaa joobaʼ dóó yisdáʼiildéehgi ílı̨́įgo átʼé. Díí haitʼéego nihił bééhózin?

7, 8. Jiihóvah nahaʼáagi bóhólnííh bééhodoozįįłgi haitʼéego nihíká adoolwoł?

⁷ Jiihóvah éí bílaʼashdlaʼii ayóóʼáyóʼní. Ayóó daʼniidlı̨́įgo nihaa nitsíkeesgo biniinaa biYeʼ nihá niiníłtı̨́, áko iiná doo ninítʼiʼii nihee hólǫ́ǫ doo. (John 3:16; 1 John 4:9) Jiihóvah ádee haadzííʼ yę́ę tʼáadoo yeʼiilaagóogo éí Séítan dóó Jiihóvah yikʼijįʼ danílínígíí tʼáá aaníí ádaaníi doo. Séítan éí Jiihóvah biyoochʼíidgo yáʼádaatʼéehii bílaʼashdlaʼii yitsʼą́ąjįʼ kwííłʼı̨́ índa doo aheełtʼéégóó nahojiʼá yiłní. Jiihóvah yee ádee hadoodzíiʼii kódeiłníigo tʼóó yá  nidahałtʼiʼ: “Náádeeshdááł, jiníigo nihozhníʼáanii háájíshąʼ ajííyá? Jó, danihizhéʼé yę́ę ałtso dazneeznáádóó wóshdę́ę́ʼ tʼahdii tʼáá ákóhootʼé, hodeeyáádą́ą́ʼ tʼáá ałtsoní ádaalyaadóó wóshdę́ę́ʼ ádaalyaii tʼahdii tʼáá ákódaatʼéego hoolzhish.” (2 Peter 3:​3, 4) Ákódajiníi ndi Jiihóvah yee ádee hadoodzííʼ yę́ę yeʼdoolííł. Jiihóvah hooʼáałgi bóhólníhígíí bééhodoozįįłgi éí bílaʼashdlaʼii akʼeh dahółʼínígíí yisdádookahgi ałdóʼ yił ahíyółtąʼ. (Isaiah 55:10, 11 yíníłtaʼ.) Jiihóvah nahaʼáagi ayóóʼáʼóʼní yee nahaʼá. Áko bá ndaalʼaʼí ayóóʼáyóʼní índa daʼjílı̨́įgo yaa nitsíkeesgi yiniidlą́ą doo.—Exodus 34:6.

⁸ Jiihóvah nahaʼáago bóhólníihgi éí ílíinii átʼé, ndi yisdádiidáałgi nihá yaa nitsíkeesgo átʼé. Ayóó átʼéego nihaa joobaʼ. Jiihóvah nahaʼáagi bóhólníhígíí áłtsé baa nitsíikeesgo bikééʼ siidzı̨́į doo.

9. Séítan éí haʼátʼíí níigo Job yá hahaasdzííʼ? (Áłtsé naashchʼąąʼígíí níníłʼı̨́.)

⁹ Jiihóvah nahaʼáagi bóhólníhígíí hazhóʼó níilʼı̨́į doo. Naaltsoos Job biiʼdę́ę́ʼ yíníłtaʼgo bééhózin. Éí biiʼ haneʼgo Séítan éí Job yéigo bichʼįʼ hodiisnáaʼgo, God bitsʼą́ąjįʼ dashdidoogááł hałní. Séítan éí tʼáá ni Job tídílééh yiłní God. Jiihóvah éí doo ákódeeshníił da nízin, ndi Séítan tʼáá hó Job bízhdínóotahgo há yee hoołʼaʼ. Jiihóvah ání: “Bee hólóonii tʼáá ałtso bee nóhólnííh.” (Job 1:7-12 yíníłtaʼ.) Tʼáá íídą́ą́ʼ díí bikééʼdóó Job éí bá ndaalʼaʼí dóó bee hólóonii yę́ę ałtso bitsą́ą́ʼ ńdiilyá. Áádóó haʼáłchíní neeználtʼéego ałtso daneezná hodooʼniid. Séítan éí God áháłʼı̨́ nahalingo áyiilaa. (Job 1:​13-19) Nááʼákóneʼ Séítan éí Job ayóó átʼéego neezgaigo bitsʼíís łóód yaa áyiilaa. (Job 2:7) Tʼóó tséʼédin yá áyiilaa, Job beʼasdzą́ą́ dóó táltʼéego tʼóó ádahoʼdilʼı̨́įgo akʼis saad doo yáʼátʼéehii yee hachʼįʼ hadaasdzííʼ.—Job 2:9; 3:​1-3; 16:2.

10. (a) Job haitʼéego Jiihóvah tʼáadoo nahjįʼ niidiníʼą́ą da? (b) Job haʼátʼíí biniyé hachʼįʼ haʼoodzííʼ?

¹⁰ Séítan ánínígíísh tʼáá aaníí? Ndagaʼ. Azhą́ Job ayóó átʼéego bichʼįʼ nahwiisʼnáaʼ ndi, Jiihóvah tsʼídá tʼáadoo nahjįʼ niidiníʼą́ą da. (Job 27:5) Ndi tʼóó kóníghánjįʼ, Job éí íiyisíí ílíinii baa jiyooznah, tʼáá hó tʼéiyá ádaa tsízdeezkééz. Tʼáadoo yeeʼ íisdzaaí da jiníigo háájídzih. Áádóó haʼátʼíí biniyé shichʼįʼ nahwiiʼná jinízin. (Job 7:20; 13:24) Job nitsíjíkeesígi átʼéego nihí ałdóʼ ákóniitʼée łeh. Ndi Jiihóvah tʼáá íídą́ą́ʼ bił bééhózingo Job doo ákótʼéégóó nitsíjíkees, áko biniinaa bichʼįʼ bee hajoodzííʼ. Haitʼéego bichʼįʼ hajoodzííʼ?

11, 12. Jiihóvah éí haʼátʼíí Job baa ahééh jinízin doogo hoł áyiilaa? Áádóó Job haa jiidzaa?

¹¹ Job 38-41 góneʼ Jiihóvah éí Job bichʼįʼ hajoodzíiʼgi baa haneʼ. Jiihóvah éí Job díí biniinaa nichʼįʼ nahwiiʼná tʼáadoo yidííniid da. Ndi, akʼizhdiʼdootı̨́ı̨́ł biniyé Jiihóvah háká eelwod, God bił ééhózinígiísh tʼáá ałtso nił bééhózin, hałníigo yínahódééłkid. Baa dahwiidínóotʼįįłii dahólǫ́ǫgo átʼé, bee hachʼįʼ nahwiiʼnánígíí biláahgo hałníigo hoł ííshjání ályaa. (Job 38:18-21 yíníłtaʼ.) Jiihóvah kótʼéego hachʼįʼ haadzíiʼgo Job hazhóʼó tsínízdeezkééz.

 ¹² Job ayóó átʼéego hachʼįʼ nahwiisʼnááʼ áádóó Jiihóvah hachʼįʼ haadzíiʼgi, doo joobaʼgoósh ání? Ndagaʼ, Job doo ákwíinízin da. Éí baa ákozhniizı̨́ı̨́ʼ dóó Jiihóvah hachʼįʼ haadzíiʼgi baa ahééh jiniizı̨́ı̨́ʼ. Áko, ádííniidígíí baa shíniʼgo “łeezh dibahí áádóó łeeshchʼiih ádééhéshjáh,” jiní. (Job 42:1-6) Tʼah hodiinaʼdą́ą́ʼ Iiláíhu wolyéego ałdóʼ Job hazhóʼó tsínízdookos biniyé hachʼįʼ haadzííʼ. (Job 32:5-10) Job éí Jiihóvah bibee ayóóʼóʼóʼní yee hachʼįʼ haadzíiʼgo hashtʼeʼ ninázhníkééz. Jiihóvah éí Job doo shitsʼą́ąjįʼ dadiiyáa dago baa shił hózhǫ́ jiníigo baa hojoolneʼ.—Job 42:7, 8. 

13. Job hachʼįʼ nahwiisʼnááʼdóó bikʼijįʼ Jiihóvah hachʼįʼ haadzííʼ yę́ęgi haitʼéego háká eelwod?

¹³ Job hachʼįʼ nahwiisʼnááʼdóó bikʼijįʼ, Jiihóvah yee hachʼįʼ hahaasdzííʼ yę́ę háká análwoʼgo hodeeshzhiizh. Jiihóvah yee hakʼihadlíí nítʼééʼ yę́ę biláh átʼéego yee hakʼinááhasdliʼ. Éí hayeʼ tsostsʼid índa hatsiʼ tááʼ nááhásdlı̨́ı̨́ʼ. (Job 42:12-14) Díidígíí haʼáłchíní ayóóʼájóʼní, hatsʼą́ą́ʼ ádaadin yę́ę ayóó átʼéego bíhojisááh. Áádóó ayóó átʼéego atíhoʼdiilyaaígíí doo baa hoyooʼnééh átʼée da. Azhą́ biniinaa atíhoʼdiilyaaígíí hoł bééhoozin shı̨́į ndi, biniyé hachʼįʼ nahwiisʼnáaʼgi God tʼóó yee hoołʼaʼ shı̨́ı̨́ jiniizı̨́ı̨́ʼ. Job kótʼéego tsízdeezkéezgo éí Jiihóvah áhodííniid yę́ę bééjílniih doo. Díí binahjįʼ haʼjólníigo bee hashtʼe tsínízdookos.—Psalm 86:17.

14. Haʼátʼíí Job bitsʼą́ą́dóó bídahwiidiilʼááł?

¹⁴ Job ábiʼdoolʼįįdgi baa nitsíikeesgo éí hashtʼe ntsídiikos dóó haʼííníilníigo ánihósin doo. Naaltsoos Job ałdóʼ łahdóó Diyin Bizaad biiʼ Jiihóvah nihá niiníʼą́ągo “nanihinitin biniyé bee akʼedaʼashchı̨́, áko éí binahjįʼ chánah daniidlı̨́įgo hadaʼííníilní, áko nihił chodahooʼı̨́į doo.” (Romans 15:4) Naaltsoos Job yee naʼnitingo éí bee nihichʼįʼ anídahaztʼiʼii tʼéiyá baa nitsídeiikeesgo Jiihóvah nahaʼáagi bóhólnííh  bééhodoozįįł yę́ęgi béédiyiiʼnah. Job nahalingo, azhą́ nihichʼįʼ hodiiʼnáah ndi Jiihóvah nahaʼáago bóhólníihgi bikééʼ siidzı̨́įgo doo bitsʼą́ąjįʼ dah didiidáał da.

15. Achʼįʼ nahwiiʼná biiʼ chʼíniidzáago niheʼoodląʼ binahjįʼ haʼátʼíí bee łaʼ yiłʼı̨́?

¹⁵ Job ábiʼdoolʼįįdgi binahjįʼ haʼííníilníigo ánihósin, háálá nihichʼįʼ hodiiʼnáahgo éí Jiihóvah doo nihichʼįʼ báháchįʼgo átʼı̨́į da. Achʼįʼ hodiiʼnáahgo éí Jiihóvah nahaʼáago bóhólníihgi bikééʼ daatsʼí siidzı̨́į dooleełgi bee nihá ashjaʼáyiiłʼįįh. (Proverbs 27:11) Haʼííníilníigo achʼįʼ nahwiiʼná biiʼ chʼíniidzáago éí Jiihóvah bił honiilzhǫ́ǫgo íilyaa doo, áádóó náásgóó ił chohooʼı̨́ bidziil íidoolííł. (Romans 5:3-5 yíníłtaʼ.) Job ábiʼdoolʼįįdgi binahjįʼ Jiihóvah aa aʼááh nízin índa joobaʼgo bídahwiilʼą́ą́ʼ. (James 5:11) Jiihóvah nahaʼáago bóhólníihgi bikééʼ siidzı̨́įgo éí nihikʼihodoodliił. Áko díí baa ákoniidzingo éí “tʼáá ałtsojįʼ hadaʼíínółní áádóó nízaadgóó dziilí bee hadaʼíínółníigo nihił dahózhǫ́ǫ doo.”—Colossians 1:11

16. Jiihóvah nahaʼáagi bóhólnííh bééhodoozįįłgi ílíinii átʼé, áko haʼátʼíí biniyé bénéiilniih doo?

¹⁶ Achʼįʼ nahwiiʼnáago Jiihóvah nahaʼáagi bóhólnííh bééhodoozįįłgi íiyisíí baa nitsíjíkees dooleełgi nanitłʼah łeh. Áłtsʼísígo bee achʼįʼ anáhóótʼiʼii tʼéiyá baa nitsíikeesgo ayóó áníłtso nahalin yileeh. Éí bąą díí tʼáá ahą́ą́h bénéiilniih doo. Éí azhą́ nihichʼįʼ nidahwiiʼnáa ndi God nahaʼáago bóhólníihgi bikééʼ siidzínígi ílíinii átʼé.

17. Jiihóvah bá oonishgi wołí bee íitʼı̨́įgo haitʼéego aláahdi ílíinii baa nitsíikeesgo ánihósin doo?

¹⁷ Jiihóvah bá oonishgi wołí bee íitʼı̨́įgo aláahdi ílíinii baa nitsíikeesgo ánihósin doo. Nihisister Renee wolyéego ayóó átʼéego bitsʼíís bichʼįʼ anáhóótʼiʼ silı̨́įʼgo tʼáá ahą́ą́h dazhneezgai. Azeeʼálʼı̨́įdi jizdáago, ákwíí nidaalnishígíí,  dóó azeeʼálʼı̨́įgi bił níjíiztánígíí, dóó ákwíí nídaakahígíí Diyin Bizaad bee bił náhojilnih. Łah azeeʼálʼı̨́įgi naaki damóodóó naʼałnííʼ hwee azlı̨́ı̨́ʼ, ákwíí 80 ahééʼílkidgo Diyin Bizaad baa nahojisneʼ. Azhą́ hweʼiinaʼ ndootʼihgo hoł bééhózin ndi, íiyisíí baa nitsáhákees dooleełígíí tʼáadoo bééjiyooznah da. Jiihóvah nahaʼáago bóhólníihgi bikééʼ jizı̨́įgo bee hashtʼezhdítʼé.

18. Jennifer baa haneʼgi Jiihóvah nahaʼá bikééʼ asdzı̨́įgi haitʼéego bitsʼą́ą́dóó naʼnitin?

¹⁸ Tʼáá ákwíí jı̨́ ádaałtsʼísígo bee achʼįʼ anídahaztʼiʼii dahólǫ́ǫ ndi Jiihóvah nahaʼáago bóhólníihgi tʼáá bikééʼ siidzı̨́į doo. Nihisister Jennifer wolyéego éí hooghangóó nízdeesdzáhą́ą chidí naatʼaʼí biih nijilyeed yę́ę cancel áńdayiilʼįįh. Chidí naatʼaʼí nídanidaahígi tááʼ hwiiską́, áko ádahozdeesłááʼ. Tʼáadoo shíká oolyeedí da jinízingoda ádaa tsízdidookos. Ndi, Jiihóvah bichʼįʼ sozdoolzin, shíká anilyeed, diné kwii nidaakaiígíí nizhónígo haneʼ bee bił nidahodeeshnih nisin, bizhdííniid. Ńtʼééʼ ląʼí diné bił nahojisneʼgo naaltsoos ląʼí nijizniiʼ. Kójíní, “Azhą́ díí nanitłʼah ńtʼéeʼ ndi Jiihóvah shikʼihasdliʼ índa adziilii yee shaa joozbaʼgo bízhiʼ yáʼátʼéehgo bá áshłaa.”

19. Tʼáá aaníí dahodísinii ídlı̨́įgi haʼátʼíí bee bééhózin?

¹⁹ Jiihóvah bidineʼé tʼéiyá éí God nahaʼáago bóhólníihgi ayóó ílı̨́įgo yaa ákodanízin. Díí binahjįʼ bee bééhózingo éí tʼáá aaníí dahodísinii ádaatʼı̨́. Áko éí bąą tʼááłáʼí niitínígo Jiihóvah nahaʼáago bóhólníihgi bikééʼ siidzı̨́į doo.

20. Jiihóvah nahaʼáago bóhólníihgi tʼáá ałtsojįʼ bikééʼ siidzı̨́įgo haitʼéego nihá yaa nitsíkees?

²⁰ Jiihóvah nahaʼáago bóhólníihgi tʼáá ałtsojįʼ bikééʼ siidzı̨́įgo nihá yaa ákonízin dóó bił nilı̨́. (Psalm 18:25) Jiihóvah nahaʼáago bóhólníihgi haʼátʼíí biniyé bikééʼ asdzı̨́į dooígi dóó haitʼéego éí yéigo bikééʼ asdzı̨́į dooígi díí bikééʼdóó łaʼ baa ídahwiidiilʼááł.