1, 2. (a) Eaa te maroanga maata tei akakeu i te tangata katoatoa? (e) No teaa ra teia maroanga i puapinga ai kia tatou?

NO TE manganui i teia tuatau, ko te moni te maroanga maata. Ka akamanako ua ratou i te reira. Ka akapou ratou i te taime kia akaputu maata i te moni. No tetai papaki, to ratou maroanga maata koia oki te ngutuare tangata, te oraanga kopapa, me kore ta ratou ka inangaro i te rave ki to ratou oraanga.

² Inara te vaira tetai maroanga tei puapinga atu i teia au mea. Teia maroanga ko te akatikaanga me kore te akapapuanga i to Iehova tu ngateitei. E puapinga tikai auraka tatou e akamutu i te akamou ki runga i teia maroanga. Me kare tatou e matakite, ka varenga ua tatou i te oraanga noa ua nei me kore i to tatou au manamanata e ka ngaropoina ia tatou te mea puapinga. Me turu tatou i to Iehova tu ngateitei, ka rauka ia tatou te akakoromaki i te au manamanata o te oraanga e ka akavaitata atu kia Iehova.

3. Eaa ta Satani i karanga no te tutaraanga a te Atua?

³ Kua ui a Satani te Tiaporo me e tikaanga rai to Iehova kia tutara. Inangaro a Satani i te tangata kia manako e e Tutara kino a Iehova e kare Aia e inangaro i te mea meitaki no tatou. Karanga a Satani e ka mataora atu te tangata me tutara ia ratou uaorai. (Genese 3:1-5) Akaapa katoa aia e kare tetai ua atu tangata e tiratiratu ki te Atua pera katoa me ngata te oraanga, ka akaruke te tangata Iaia ei Tutara no ratou. (Iobu 2:4, 5) No reira kua tuku a Iehova i tetai tuatau kia aere ei akapapu ki te katoatoa e kino te oraanga me kare te Atua e Tutara.

4. No teaa ra i anoanoia ai kia akatikaia te maroanga no te tutara anga?

⁴ Kua kite takere a Iehova e au pikikaa te akaapa anga a te Tiaporo. Eaa i reira aia i akatika ai i tetai tuatau no Satani kia akapapu i tana akaapa anga? No te mea te ō maira te katoatoa, i te rangi e te enua. (E tatau ia Salamo 83:18.) Kua kopae a Adamu raua ko Eva i ta Iehova tutara anga, pera katoa te manganui i muri mai. Penei ka manako tetai pae e e tika rai te Tiaporo. I te tuatau kare teia maroanga e akatikaia i roto i te manako o te tangata e te angera, kare te au e te taokotai e tupu. Inara me akatikaia to Iehova tu ngateitei, ka noo te katoatoa i raro ake i tana tutara anga umere e tuatau ua atu. Ka tupu te au i te ao katoa e pini ua ake.​—Ephesia 1:9, 10.

5. Akapeea tatou te ō anga ki roto i teia maroanga no te tu ngateitei?

⁵ Ka akatikaia to te Atua tu ngateitei, e ka akaateaia te tutara anga a Satani e te tangata. Ka puapingaia te tutara a te Atua na roto i te Patireia o te Mesia. Ka akapapu te aronga akarongo e ka rauka rai i te tangata kia vai tiratiratu e te turu i te tutara anga a te Atua. (Isaia 45:23, 24) Ka inangaro ainei tatou kia riro ei tuanga no te aronga akarongo? No teaa! No reira, ka anoanoia tatou kia mārama mei teaa tikai te puapinga o teia maroanga.

6. Mei teaa te puapinga o te akatikaanga i to Iehova tu ngateitei?

⁶ E puapinga atu te akatikaanga i to Iehova tu ngateitei i to tatou uaorai mataora. Kare te aiteanga e e puapinga kore to tatou akaora anga kia Iehova e kare aia e manako mai ia tatou. Akapeea tatou me kite i teia?

7, 8. Akapeea tatou e puapinga ai me akatikaia to te Atua tu ngateitei?

⁷ Inangaro maata a Iehova i te tangata. Te tika, akaperepere tikai aia ia tatou e kua oronga mai i tana Tamaiti kia rauka ia tatou te ora mutukore. (Ioane 3:16; 1 Ioane 4:9) Naringa kare a Iehova e akatupu i tana au taputou no tatou, ka tano i reira ta Satani e te aronga patoi. Karanga  a Satani e pikikaa a Iehova tei tāpu i te meitaki mei te tangata e te tutara ra ma te tau kore. Kua aviri te aronga patoi i ta Iehova au taputou ma te karanga e: “Teiea ua te aerenga mai nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.” (2 Petero 3:3, 4) Inara ka akatupu a Iehova i tana taputou. Kua akapapu aia e me akatikaia tona tu ngateitei, ka kapiti katoaia mai te akaora anga i te au tangata akarongo. (E tatau ia Isaia 55:10, 11.) Kua akatumuia to Iehova tu ngateitei ki runga i te aroa. No reira papu ia tatou ka aroa e ka akaperepere ua rai aia i tona au tavini tiratiratu.​—Exodo 34:6.

⁸ I te mea e e maroanga puapinga maata te akatikaanga i to Iehova tu ngateitei, kare te aiteanga e e puapinga kore to tatou akaora anga kiaia. E oonu to Iehova aroa no tatou. Ka tau tatou kia akamaara ua rai i te mea puapinga e te turu ua rai i ta Iehova tutara anga.

9. Eaa ta Satani i tuatua no Iobu? (Akara i te tutu mua.)

⁹ E mea puapinga kia rauka te manako tau no te tu ngateitei o Iehova. Ka kite tatou i te tumu me tatau i te puka o Iobu, tetai o te puka Pipiria mua tei tataia. I roto i reira ka tatau tatou ta Satani akaapa anga te rokoia anga a Iobu e te mamae, ka akaruke aia i te Atua. Pati katoa a Satani ki te Atua kia takino ia Iobu. Kare a Iehova e rave i teia, mari ra kua tuku ia Satani kia timata ia Iobu i te na ko anga: “I na, ko tana katoa ra, tei to rima ïa.” (E tatau ia Iobu 1:7-12.) Muri akera, kua mate te au tavini o Iobu e kua ngere i tana apinga. E oti kua akarongo aia e kua mate tana au tamariki e tai ngauru i roto i te tumatetenga. Kua akariro a Satani mei te mea e na te Atua i akatupu i teia au tumatetenga. (Iobu 1:13-19) Aru mai, kua ta a Satani ia Iobu ki tetai maki mamae e te viivii. (Iobu 2:7) Tei kino atu, kua akakino te vaine a Iobu e tona au oa pikikaa iaia e kua akataitaia iaia.​—Iobu 2:9; 3:11; 16:2.

10. (a) Akapeea a Iobu te akaari anga i tona tiratiratu ki te Atua? (e) No teaa ra a Iobu i anoano ei te akatikatikaanga?

¹⁰ Kua tano ainei ta Satani akaapa anga? Kare. Noatu to Iobu tumatetenga, kare aia i kopae ana ia Iehova. (Iobu 27:5) Inara no tetai tuatau, kua ngaropoina ia Iobu te mea puapinga e kua manako iaia uaorai. Karanga aia e kare aia i rave ana i te tarevake. Kua manako a Iobu e ka anoanoia kia kite i te tumu i mamae ei aia. (Iobu 7:20; 13:24) Ka mārama meitaki tatou i to Iobu turanga. I na, kua kite a Iehova i to Iobu manako tarevake, e kua akatikatika ia Iobu. Akapeea aia i te rave anga i teia?

11, 12 Kua tauturu a Iehova ia Iobu kia mārama i teaa? Akapeea a Iobu te ariu anga?

¹¹ Ka tatau tatou i ta Iehova i tuatua kia Iobu i roto i te pene 38 ki te 41 i te puka o Iobu. Kare a Iehova i akamārama ana i te tumu o to Iobu mamae. Mari ra, kua inangaro a Iehova i te tauturu iaia kia mārama e e iti ua aia me akaaiteia ki te Atua. Kua apii aia ia Iobu e maroanga puapinga maata tetai i to Iobu uaorai manamanata. (E tatau ia Iobu 38:18-21.) Kua tauturu  te tuatua a Iehova ia Iobu kia akatanotano i tona manako.

¹² E mea tau ainei no Iehova kia tuatua kia Iobu na roto i teia tu i muri ake i tona mamae anga? Kare, kare a Iobu i manako akapera ana. Kua mārama e kua akaperepere a Iobu i ta Iehova akoanga. Karanga katoa aia: “Te akaviivii nei au iaku uaorai, e te tataraara nei au i raro i te one-pueu e te reu.” (Iobu 42:1-6) I mua ake, tauturu katoa tetai mapu tane ko Eliu ia Iobu kia akatanotano i tona manako. (Iobu 32:5-10) I to Iobu akarongo anga ki ta Iehova akoanga aroa e kua taui i tona manako, kua akakite a Iehova ki tetai ke i tona mareka anga i to Iobu tu tiratiratu.​—Iobu 42:7, 8.

13. Akapeea te akoanga a Iehova me tauturu ia Iobu noatu e kua akamutu te au timataanga?

¹³ Kua puapinga rai a Iobu mei ta Iehova akoanga noatu e kua akamutu te au timataanga. “Akameitaki roa akerā Iehova i to Iobu openga i to tona muatangana.” Muri mai, “toko itu oki ana puke tamariki tamaroa, e toko toru tamaine.” (Iobu 42:12-14) Noatu e kua akaperepere a Iobu i tana tamariki, e mea papu kua mii rai aia i tana tamariki i mate. Pera katoa, kare e kore kua maara ua rai aia i te au tumatetenga tei tupu kiaia e tona ngutuare. Noatu e penei kua apii a Iobu i te tumu i tupu ei te au timataanga, penei kua manako rai aia eaa ra te Atua i akatika ai iaia kia mamae maata. Me kua manako akapera aia, ka rauka iaia te akamaara i ta Iehova i tuatua kiaia. Kua riro teia ei akapumaana e te tauturu iaia kia rauka te manako tau.​—Salamo 94:19.

14. Eaa ta tatou ka apii mei te tupuanga o Iobu?

¹⁴ Me akamanako oonu tatou eaa tei tupu kia Iobu, ka tauturu ia tatou kia akatano i to tatou manako e ka akapumaana ia tatou. Ko te puka o Iobu, e tuanga ïa no ta Iehova i akapapa “kia kite tatou; kia rauka to tatou tatari anga, i te akakoromaki e te pumaana o te tuatua i tataia.”  (Roma 15:4) Apii mai te reira e auraka tatou e akamanako ua i to tatou au manamanata e kia akamutu i te manako i te akatikaanga i to Iehova tu ngateitei. Mei ia Iobu rai, ka turu tatou i to Iehova tu ngateitei me vai tiratiratu kiaia noatu e ngata te oraanga.

15. Me tupu te manamanata kia tatou, eaa te ka rauka mai me vai tiratiratu tatou?

¹⁵ Ka akapumaanaia tatou mei tei tupu kia Iobu no te mea me tupu te timataanga kare te aiteanga e kua riri a Iehova ia tatou. Ka riro te au timataanga ei atianga no tatou kia turu i to Iehova tu ngateitei. (Maseli 27:11) Me akakoromaki marie tatou, ka mareka a Iehova e ka ketaketa roa atu to tatou manakonakoanga no te tuatau ki mua. (E tatau ia Roma 5:3-5.) Te akaari maira tei tupu kia Iobu e “kua ki te Atu i te aroa e te takinga-meitaki maata.” (Iakobo 5:11) Me turu tatou i to Iehova tu ngateitei, ka akameitaki aia ia tatou. Ka riro teia ei tauturu ia tatou “kia maata atu te akakoromaki, e te maru anga kia roa, ma te rekareka.”​—Kolosa 1:11.

16. No teaa ra tatou ka akamaara ua rai e e puapinga tikai te akatikaanga i to Iehova tu ngateitei?

¹⁶ E tika e ngata i te akamou ki runga i te akatikaanga i to Iehova tu ngateitei me aro atu tatou i te au manamanata o te oraanga. Ka riro katoa te au manamanata rikiriki ei mea maata me akamanako ua rai i te reira. No reira ka anoanoia kia akamaara ua rai tatou e puapinga maata kia turu i to te Atua tu ngateitei noatu te au turanga ngata.

17. Me rave maroiroi i te angaanga a Iehova, akapeea me tauturu ia tatou kia akamanako i te mea puapinga?

¹⁷ Me rave maroiroi i te angaanga a Iehova, ka tauturu ia tatou kia akamaara i te mea puapinga. Ei akaraanga, tetai tuaine ko Renee kua akamate tona kopapa, kua mamae maata aia e kua tuia e te maki cancer. I roto i te aremaki, kua tutu aere  aia ki te aronga angaanga, te aronga maki, e te aronga atoro ua. I tetai atianga kua noo a Renee i roto i te aremaki e rua e te apa epetoma, e kua tutu aere aia e 80 ora. Noatu e kua kite a Renee e ka mate aia, kare rava aia i akangaropoina i te mea puapinga. Te turu anga i to Iehova tu ngateitei kua apai mai i te au kiaia.

18. Eaa ta te tupuanga o Jennifer e apii maira ia tatou no te turu anga i to Iehova tu ngateitei?

¹⁸ Ka turu katoa tatou i to Iehova tu ngateitei me akakoromaki i te au manamanata rikiriki o te oraanga i te au rā. Tetai tuaine ko Jennifer kua pou e toru rā tona tiakianga i ko i te ngai toanga pairere kia oki ki tona enua. Kua akakoreia te au rere anga pairere e kua roiroi tikai a Jennifer e te maromaroa. Ka rauka ua iaia i te tangi i tona turanga. Mari ra, kua pure a Jennifer kia Iehova no te tauturu kia akakite i te nuti meitaki ki te au patete e tiaki ra. Tei tupu e maata te tangata tana i tuatua atu e kua oronga aere i te puka. Karanga a Jennifer, “Irinaki au e kua akameitaki mai a Iehova iaku noatu teia tupuanga ngata e kua akamaroiroi iaku kia apai i tona ingoa ma te tau meitaki.”

19. Eaa te akataka ra i te aronga akamori mou?

¹⁹ Ko te iti tangata anake o Iehova tei mārama pu tikai i te puapinga o to Iehova tu ngateitei. Te akataka ra teia mārama i te aronga akamori mou. No reira e akapapu tatou tataki tai kia turu ua rai i to Iehova tu ngateitei.

20. Eaa to Iehova manako i taau e rave ra kia turu i tona tu ngateitei?

²⁰ Te kite nei e te akaperepere ra a Iehova i taau e rave ra kia turu i tona tu ngateitei, e te tavini tiratiratu iaia ma te akakoromaki i te au timataanga. (Salamo 18:25) I te atikara ka aru mai ka akamāramaia te tumu i tau ei tatou kia turu i to Iehova tu ngateitei e akapeea me rave tamou i te reira.