1, 2. а) Со ваљани те овел важно секоле манушеске? б) Соске тано важно те поддржина е Јехова сар Најбаро Владетели?

БУТЕ манушенге о паре тане нешто најважно ко живото. Ола мислинена само ко адава сар те заработинен повише паре хем сар те икерен адала паре со иси лен. А јаверенге тане најважна и фамилија, о састипе или о буќа со мангена те овен лен ко живото.

² Ама, иси нешто бут поважно — те докажинел пе кај е Јехова иси ле право те владинел упро са. Никогаш ма те бистра кобор тано важно акава. Ако на пазинаја, о буќа со кераја лен секова диве хем о проблемија со иси амен шај те лен добором бут амаро внимание со ка бистра кобор тано важно те докажинел пе кај е Јехова иси ле право те владинел. Ако поддржинаја е Јехова сар Најбаро Владетели, ка шај те икљова ко крајо е проблеменцар со иси амен хем те ова попаше леа.

3. Со вакерела о Бенг башо адава саво Владетели тано о Девел?

³ О Сатана анѓа ко пучибе дали е Јехова иси ле право  те владинел. О Бенг мангела о мануша те мислинен кај о Јехова тано лошно Владетели хем кај чхинавела лендар нешто шукар. Ов вакерела кај о мануша ка овен побахтале ако владинена коркори (1. Мој. 3:1-5). Исто аѓаар о Бенг вакерела кај нијекх мануш нане чаче те ачховел верно е Јеховаске хем ако аракхљовела ко бут пхаре искушенија, секова мануш ка отфрлинел е Јехова сар Владетели (Јов 2:4, 5). Адалеске, о Јехова мукхела те накхел време те шај те дикхел пе кај о живото бизо Девел нане ле нисави смисла.

4. Соске ваљани те дел пе одговор ко пучибе дали е Девле иси ле право те владинел?

⁴ О Јехова џанела кај адава со вакерела о Сатана нане точно. Тегани, соске мукхља те накхел добором бут време те шај о Сатана пробинела те докажинел пле лафија? Адалеске со о одговор ко е Сатанаскере лафија влијајнела упро са о мануша хем о ангелија. (Читин Псалм 83:18.) О Адам хем и Ева отфрлинѓе е Јехова сар пло Владетели, а пало ленде бут јавера да керѓе адава. Адалеске, несаве мануша шај те мислинен кај о Бенг тано ко право. Са џикоте пучена пе акава пучибе о мануша хем о ангелија, нашти те овел чачутно мир хем јекхипе. Ама, кеда ка докажинел пе кај е Јехова иси ле право те владинел, секој ка прифатинел е Јехова сар Најбаро Владетели ки цело вечност. Ко цело универзум ка овел мир (Еф. 1:9, 10).

5. Која тани амари улога ко пучибе башо е Јеховаскоро право те владинел?

⁵ Е Јеховаскоро право те владинел ка овел оправдимо. Исто аѓаар, ка дикхјол кај о Сатана хем о мануша нашти те владинен шукар, адалеске нане више те владинен. О Девел успешно ка владинел преку о месијанско Царство. Џи тегани, ка овел докажимо кај о мануша шај те поддржинен е Јехова сар Најбаро Владетели хем те ачховен леске верна (Иса. 45:23, 24). Сигурно секој амендар мангела те овел машкар адала верна мануша. Адалеске, никогаш на мангаја те бистра кобор тано важно те докажинел пе кај е Јехова иси ле право те владинел.

6. Кобор тано важно те докажинел пе е Јеховаскоро право те владинел?

⁶ Те докажинел пе кај е Јехова иси ле право те владинел тано бут поважно таро амаро бахталипе. Ама, акава на значинела кај е Јеховаске нане важно дали ка спасина амен или кај на грижинела пе аменге. Соске вакераја акава?

7, 8. Сави корист иси амен таро адава со ка докажинел пе е Јеховаскоро право те владинел?

⁷ О Јехова бут мангела е манушен. Адалеске со сием леске бут важна ов денѓа пле чхаве те шај те живина вечно (Јован 3:16; 1. Јов. 4:9). Ако о Јехова на икерела пе ко пле ветувања со денѓа лен аменге, о Сатана хем о јавера противникија ка овен ко право.  О Бенг вакерела кај о Јехова ховавела, кај владинела неправедно хем гаравела о шукар буќа таро мануша. Несаве противникија асандор вакерена: „Кај тани лескири присутност со ветинѓа ла? Панда откеда муле амаре дада, са о буќа ачхиле иста панда таро време кеда о Девел керѓа е манушен“ (2. Пет. 3:3, 4). Ама, о Јехова ка керел адава со ветинѓа. Ов ка спасинел пле верна слуген соске адава тано поврзимо лескере правоја те владинел. (Читин Исаија 55:10, 11.) О Јехова владинела мангипаја. Адалеске шај те ова сигурна кај ов секогаш ка мангел хем ка ценинел пле верна слуген (2. Мој. 34:6).

⁸ Иако тано бут важно те докажинел пе е Јеховаскоро право те владинел, адава на значинела кај нане леске важно амен те ова спасиме. О Јехова бут грижинела пе аменге. Ама, ваљани те на бистра која бути тани поважно хем верно те поддржина е Јехова сар Владетели.

9. Со вакерѓа о Сатана башо Јов? (Дикх и слика ко почеток тари статија.)

⁹ Бут тано важно исправно те дикха ко пучибе башо е Јеховаскоро право те владинел. Акава шај те дикха таро лил башо Јов, јекх таро прва лила со сине пишиме ки Библија. Ки лате читинаја сар о Сатана вакерѓа кај ако о Јов цидела бут бари дукх, тегани ов ка иранел думо е Девлеске. О Сатана чак родинѓа таро Јехова те керел о Јов те цидел муке. О Јехова на керѓа адава, ама дозволинѓа е Сатанаске те испитинел е Јове. О Девел вакерѓа леске: „Са со иси ле тано ко тле васта“. (Читин Јов 1:7-12.) Пало кратко време, о Јов нашавѓа пле слуген хем о буќа со сине ле. Тегани, шунѓа кај лескере деш чхаве муле. О Сатана керѓа те дикхјол кај акала неволје авена таро Девел (Јов 1:13-19). Пало адава, о Сатана керѓа о Јов те насваљовел таро јекх бут пхаро насвалипе (Јов 2:7). Те овен о буќа панда полошна, и ромни е Јовескири хем лескере трин ховавне амала бут дукхавѓе ле хем обесхрабринѓе ле пле лафенцар (Јов 2:9; 3:11; 16:2).

10. а) Сар сикавѓа о Јов кај тано верно е Девлеске? б) Соске ваљанѓа о Девел те поможинел ле исправно те дикхел ко буќа?

¹⁰ Дали адава со вакерѓа о Сатана сине чаче? На. Иако о Јов цидинѓа бут муке, ов никогаш на иранѓа думо е Јеховаске (Јов 27:5). Ама, несаво време о Јов бистерѓа сој чаче важно хем мислинела сине само башо пле проблемија. Вакерела сине кај на керѓа ништо лошно хем кај заслужинела те џанел соске цидела асавке муке (Јов 7:20; 13:24). Шај те хаљова сар осетинела пе сине о Јов. Ама, о Јехова џанља кај о Јов дикхела сине погрешно ко буќа хем адалеске поможинѓа леске исправно те дикхел ко буќа. Сар керѓа адава?

11, 12. Сар о Јехова поможинѓа е Јовеске те дикхел исправно ко буќа хем сар реагиринѓа о Јов?

¹¹ Таро 38 џи ко 41 поглавје таро лил башо Јов, шај те читина со вакерѓа о Јехова е Јовеске. О Девел на вакерѓа леске соске цидела адала муке. Наместо адава, мангља те поможинел ле те хаљовел кобор тано тикно ки споредба леа. О Јехова сикавѓа е Јове кај иси буќа кола сој тане бут поважна таро лескере проблемија. (Читин Јов 38:18-21.) Е Јеховаскере лафија  поможинѓе е Јовеске те дикхел исправно ко буќа.

¹² Дали о Јехова на сине обзирно е Јовеа адалеске со керѓа леа лафи ко асавко начин пало са о муке со цидинѓа? На, ни о Јов на мислинѓа аѓаар. Ов халило хем ценинѓа о совет со денѓа ле о Јехова. Чак вакерѓа: „Иранава палал са со вакерѓум, хем кајнава ма“ (Јов 42:1-6). Англедер адава, јекх терно мануш о Елиу исто аѓаар поможинѓа е Јове те дикхел исправно ко буќа (Јов 32:5-10). Кеда о Јов шунѓа е Јеховаскоро совет хем почминѓа исправно те дикхел ко буќа, о Јехова сикавѓа е јаверенге кај тано задоволно адалеа со о Јов ачхило леске верно (Јов 42:7, 8).

13. Сар е Јеховаскоро совет шај поможинѓа е Јовеске кеда завршинѓе лескере муке?

¹³ О совет со добинѓа о Јов таро Јехова користинѓа леске чак кеда завршинѓе лескере муке. О Јехова денѓа бут повише берекетија е Јове пало лескере муке него англедер со сине ле. Пало несаво време, уле ле ефта чхаве хем трин чхаја (Јов 42:12-14). Иако о Јов мангела сине акале чхавен, сигурно фалинена леске сине окола со муле. Хем веројатно никогаш на бистерѓа са о пхаре буќа со случинѓе пе леске хем лескере фамилијаке. Чак ако пало несаво време о Јов халило соске цидинѓа са адала муке, шај пучела пе сине соске о Девел дозволинѓа те мучинел пе добором бут. Ако е Јове сине ле асавке мисле, шај сине те сетинел пе со вакерѓа леске о Јехова. Адава ка утешинел ле сине хем ка поможинел ле те дикхел исправно ко буќа (Пс. 94:19).

14. Со шај те сикљова таро адава со случинѓа пе е Јовеске?

¹⁴ Адава со ка размислина башо буќа со случинѓе пе е Јовеске, шај те поможинел амен те дикха исправно ко буќа хем те дел амен утеха. О лил башо Јов тано дело таро извештаија со о Јехова мукхља те овен пишиме „баши амари поука, хем иси амен надеж соске е Девлескоро лафи дела амен сила хем поможинела амен  те издржина“ (Рим. 15:4). Таро акава лил сикљоваја кај на ваљани добором бут те мислина ко амаре проблемија со ка бистра кобор тано важно те докажинел пе е Јеховаскоро право те владинел. Исто сар о Јов, амен да поддржинаја е Јехова сар Најбаро Владетели аѓаар со ачховаја леске верна ко пхаре да ситуацие.

15. Саво тано о резултати кеда ачховаја верна е Јеховаске ко неволје?

¹⁵ О искуство е Јовескоро утешинела амен адалеске со сикавела кај о неволје со иси амен на значинена кај о Јехова тано хољамо упри аменде. О неволје дена амен прилика те поддржина е Јехова сар Најбаро Владетели (Изр. 27:11). Кеда верно издржинаја, радујнаја е Јехова хем амари надеж овела позорали. (Читин Римјаните 5:3-5.) Е Јовескоро искуство сикавела кај „о Јехова тано пхердо сочувство хем милост“ (Јак. 5:11). Ако поддржинаја е Јехова сар Владетели, ов ка наградинел амен. Акава поможинела амен те издржина, те ова стрплива хем бахтале (Кол. 1:11).

16. Соске секогаш ваљани те сетина амен ко адава кобор тано важно те докажинел пе е Јеховаскоро право те владинел?

¹⁶ Кеда иси амен проблемија ко живото шај полокхе те бистра кобор тано важно те докажинел пе кај е Јехова иси ле право те владинел. Чак о тикне проблемија шај те дикхјон аменге бут баре ако бут мислинаја ки ленде. Адалеске, секогаш ваљани те сетина амен ко адава кобор тано важно те поддржина е Јехова сар Најбаро Владетели бизи разлика саве проблемија иси амен.

17. Сар адава со ка ова зафатиме ки служба е Јеховаске поможинела амен те на бистра сој чаче важно?

¹⁷ Кеда сием зафатиме е службаја, адава поможинела амен те на бистра сој тано чаче важно. На пример, јекх пхен со викинела пе Рене, сине ла мозочен удар, сине ла стално дукха хем  исто аѓаар сине ла рако. Џикоте сине ки болница, ој проповединела сине адаленге со керена бути адари, е пациентенге хем околенге со авена сине ки посета. Јекх пути, кеда и Рене ачхили дујтекваш курке ки болница, ој проповединѓа 80 саатија. Адава со поддржинѓа е Јехова сар Најбаро Владетели, денѓа ла мир.

18. Со шај те сикљова тари Џенифер?

¹⁸ Шај исто аѓаар те поддржина е Јехова сар Најбаро Владетели кеда иси амен потикне проблемија. Јекх пхен со викинела пе Џенифер аџикерѓа трин диве авиони ко аеродром те шај те иранел пе кхере. Некобор авионска летија јекх пало јекх сине откажиме хем адалеске ој сине бут уморно. Ама, наместо те мислинел само ки пли пхари ситуација, ој молинѓа пе е Јеховаске те поможинел ла те проповединел е манушенге со аџикерена сине ко аеродром. Проповединѓа буте манушенге хем денѓа бут литература. И Џенифер вакерела: „Иако сиум сине ки пхари ситуација, о Јехова благословинѓа ман хем денѓа ман сила те вакерав башо лескоро анав“.

19. Која тани јекх разлика машкар и чачутни хем и ховавни религија?

¹⁹ Само е Јеховаскоро народо хаљовела кобор тано важно те докажинел пе кај е Јехова иси ле право те владинел. Акаја тани јекх разлика машкар и чачутни хем и ховавни религија. Адалеске секој јекх амендар ваљани те дел пестар са те шај те поддржинел е Јехова сар Најбаро Владетели.

20. Сар дикхела о Јехова ко са адава со кераја те шај поддржинаја ле сар Најбаро Владетели?

²⁰ О Јехова дикхела хем ценинела са адава со кераја те шај поддржинаја ле сар Најбаро Владетели џикоте служинаја леске верно хем издржинаја неволје (Пс. 18:25). Ки јавер статија ка дикха соске о Јехова заслужинела те поддржина ле сар Владетели хем ко саво начин шај те кера адава панда повише.