1, 2. (a) Eaha te parau faufaa roa ˈˈe no te huitaata? (b) No te aha e mea faufaa ˈi teie parau no tatou?

 O TE moni te parau faufaa roa ˈˈe no e rave rahi taata. Ua riro te reira ei manaˈonaˈoraa e ei haapeapearaa na ratou. E pau rahi to ratou taime ia rahi atu â ta ratou moni e ia faaherehere i te moni e vai ra ia ratou. Te parau faufaa roa ˈˈe râ o vetahi atu, o to ratou ïa utuafare, to ratou ea aore ra ta ratou mau fa i roto i te oraraa.

² Te vai ra te hoê parau faufaa roa ˈtu â i te reira. O te haapapuraa ïa i te tiaraa Arii hau ê o Iehova. E mea faufaa roa ia tamau noa tatou i te feruri i te reira. Ia ore tatou ia vai ara, e rahi ta tatou ohipa i tera e tera mahana aore ra e haapeapea tatou no to tatou iho mau fifi a moˈe atu ai ia tatou te parau faufaa roa ˈˈe. Ia paturu tatou i to Iehova tiaraa Arii hau ê, e ohie atu â tatou i te faaruru i te mau fifi o te mau mahana atoa e e piri atu â tatou ia Iehova.

3. Eaha ta Satani mau pariraa i te huru faatereraa a te Atua?

³ Ua faahiti Satani te Diabolo i te uiraa e e tiaraa anei to  Iehova ia faatere mai. Te hinaaro ra Satani ia manaˈo te taata e e Faatere piˈo o Iehova e aita oia e hinaaro ra i te mea maitai aˈe no tatou. Ua faaô Satani i te manaˈo e mea oaoa aˈe te taata ia faatere ratou ia ratou iho. (Gen. 3:1-5) Ua horoa atoa oia i te manaˈo e eita te taata e vai taiva ore i te Atua, ia rahi roa râ te fifi, eita ratou e auraro faahou ia ˈna ei Faatere. (Ioba 2:4, 5) Te vaiiho nei ïa Iehova i te taime no te haapapu e e fifihia te oraraa ia ore te Atua ia faatere mai.

4. No te aha e mea tia ˈi ia faatitiaifarohia te parau o te tiaraa Arii hau ê?

⁴ Ua ite iho â Iehova e pariraa haavare ta te Diabolo. Eaha ïa o ˈna e vaiiho ai ia Satani i te taime no te tamata i te haapapu i to ˈna manaˈo? Mea faufaa te pahonoraa no to te raˈi e to te fenua. (A taio i te Salamo 83:18.) Aita Adamu raua Eva i auraro faahou i te faatereraa a Iehova, e mai reira mai e rave rahi â taata tei na reira atoa. No reira ïa vetahi e nehenehe ai e manaˈo e ua tano te Diabolo. Eita te hau e te auhoêraa mau e tupu ia ore teie parau ia faatitiaifarohia i roto i te feruriraa o te taata e to te melahi. Ua haapapu-anaˈe-hia râ te tiaraa Arii hau ê o Iehova, e ora ïa te taata e te mau melahi atoa i raro aˈe i ta ˈna faatereraa maitai roa a muri noa ˈtu. I reira te hau e vai noa ˈi na te ao taatoa.—Eph. 1:9, 10.

5. Eaha ta tatou e haapapu atu no nia i te tiaraa Arii hau ê?

⁵ E paturuhia te tiaraa Arii hau ê o te Atua. Eita te faatereraa a Satani e te taata e manuïa a haamouhia ˈtu ai te reira. E upootia mai te faatereraa a te Atua na roto i ta ˈna Faatereraa arii Mesia. E haapapu mai te feia taiva ore e e nehenehe te taata e vai hapa ore e e paturu i te faatereraa a te Atua ma te taiva ore. (Isa. 45:23, 24) Te hinaaro ra anei tatou ia ite-atoa-hia tatou i roto i teie feia taiva ore? E! No reira, mea titauhia ia taa ia tatou te faufaaraa mau o teie nei parau.

6. Mai te aha te faufaa o te haapapuraa i te tiaraa Arii hau ê o Iehova?

⁶ Mea faufaa aˈe te patururaa i te tiaraa Arii hau ê o Iehova i to tatou iho maitai. Eiaha râ e manaˈo e e ere to tatou faaoraraa i te mea faufaa aore ra aita Iehova e tâuˈa mau ra ia tatou. Mea nafea tatou i ite ai i te reira?

7, 8. E nafea tatou e faufaahia ˈi na roto i te haapapuraa i te tiaraa Arii hau ê o te Atua?

⁷ Mea here roa na Iehova i te taata. Inaha, mea faufaa roa hoi tatou no ˈna i horoa mai ai oia i ta ˈna Tamaiti ia roaa ia tatou te ora mure ore. (Ioa. 3:16; Ioa. 1, 4:9) Ahiri aita Iehova i tapea i ta ˈna mau parau fafau no to tatou ananahi, ua tano ïa Satani e te tahi atu mau enemi. Ua pari Satani e e Atua haavare Iehova o te ore e horoa i te mea maitai i te taata, e aita e tano ra ta ˈna faatereraa. Te faaooo nei te mau enemi i te mau parau fafau a Iehova  a na ô ai: “Teihea ˈtura te tau o to ˈna hoˈiraa mai i fafauhia? Mai te mahana i taoto ai to tatou mau tupuna i roto i te pohe, te vai noa nei â te mau mea atoa te huru â te huru, mai te omuaraa mai â i to te Atua poieteraa i te taata.” (Pet. 2, 3:3, 4) E faatupu râ Iehova i ta ˈna mau parau fafau. Ua haapapu oia e te faaoraraa i te feia e auraro ia ˈna, e tuhaa ïa no te parau o te haapapuraa i to ˈna tiaraa Arii hau ê. (A taio i te Isaia 55:10, 11.) Ua niuhia te tiaraa Arii hau ê o Iehova i nia i te here. No reira tatou e papu ai e here noa e e haafaufaa o ˈna i ta ˈna mau tavini taiva ore.—Exo. 34:6.

⁸ Parau mau e mea faufaa roa te parau o te tiaraa Arii hau ê o Iehova, e ere râ te auraa e mea faufaa ore to tatou faaoraraa no ˈna. Te tâuˈa mau ra Iehova ia tatou. Mea titauhia ia manaˈo noa tatou i te mea faufaa roa ˈˈe a turu ai i ta Iehova faatereraa ma te taiva ore.

9. Eaha ta Satani i parau no Ioba? (A hiˈo i te hohoˈa matamua.)

⁹ Mea faufaa ia tano ta tatou huru hiˈoraa i te tiaraa Arii hau ê o Iehova. Ta tatou ïa e ite ra ia taio tatou i te buka o Ioba, hoê o te mau buka Bibilia tei papai-matamua-hia. Ua parau Satani e e faarue Ioba i te Atua ia rahi roa to ˈna mauiui. Ua ani atoa Satani i te Atua ia haamauiui ia Ioba. Aita Iehova i farii, ua vaiiho râ oia ia Satani ia tamata ia Ioba a na ô ai: “Ta ˈna atoa ra mau taoˈa tei to rima ïa.” (A taio i te Ioba 1:7-12.) Ua ere ihora Ioba i ta ˈna mau taoˈa e ua pohe ta ˈna mau tavini. Faaitehia maira oia e ua pohe ta ˈna e ahuru tamarii i roto i te hoê ati. Ua rave o Satani i te reira ia manaˈohia e o te Atua te tumu o teie mau ati. (Ioba 1:13-19) Tairi atura Satani ia Ioba i te hoê maˈi mauiui mau e te faufau. (Ioba 2:7) Hau atu â, ua faaino e ua faatoaruaru mai te vahine iho a Ioba e to ˈna e toru hoa haavare i ta ratou mau parau.—Ioba 2:9; 3:11; 16:2.

10. (a) Mea nafea Ioba i te tapea-noa-raa i to ˈna hapa ore i mua i te Atua? (b) No te aha e mea titauhia ˈi ia faatitiaifarohia Ioba?

¹⁰ Ua tano anei te pariraa a Satani? Aita. Noa ˈtu ua mauiui Ioba no teie mau ati, aita oia i faarue noa ˈˈe ia Iehova. (Ioba 27:5) No te hoê taime poto râ, ua moˈe ia Ioba eaha te mea faufaa roa ˈˈe e ua haapeapea roa oia no ˈna iho. Ua tamau noa oia i te parau e aita oia i rave noa ˈˈe i te tahi hape. Ua manaˈo atoa Ioba e mea tia ia ite oia no te aha oia e mauiui ai. (Ioba 7:20; 13:24) E taa paha ia tatou to Ioba mau huru aau. Ua ite râ Iehova e ua hape te huru hiˈoraa a Ioba i faatitiaifaro ai oia ia ˈna. Mea nafea hoi?

11, 12. Eaha ta Iehova i tauturu ia Ioba ia taa? Ua nafea o Ioba?

¹¹ E nehenehe e taiohia i ta Iehova i parau ia Ioba i roto i na pene 38 e tae atu i te 41 o te buka o Ioba. Aita Iehova i faataa ia Ioba no te aha oia i mauiui ai. Ua hinaaro râ Iehova e tauturu ia ˈna ia taa e mea haihai roa oia ia faaauhia i te Atua. Ua faaite oia ia Ioba e te vai ra te tahi mau parau faufaa ˈtu â i to Ioba iho mau fifi. (A taio i te Ioba 38:18-21.) Ua tauturu te mau parau a Iehova ia Ioba ia faatitiaifaro i ta ˈna huru hiˈoraa.

¹² E mea etaeta anei o Iehova i te na reiraraa i te parau ia Ioba tei mauiui iho nei? E ere, e aita o Ioba i manaˈo mai tera. Ua taa ia Ioba te aˈoraa a Iehova e ua  haafaufaa i te reira. Ua farii oia e ua hape oia i te parauraa ˈtu mai tera a na ô atu ai: “Te tatarahapa nei au i raro i te repo e te rehu auahi.” (Ioba 42:1-6) Na mua rii mai, ua tauturuhia Ioba ia faatitiaifaro i to ˈna manaˈo e te hoê taata apî ra o Elihu te iˈoa. (Ioba 32:5-10) I muri aˈe i to Ioba faarooraa i te aˈoraa î i te here a Iehova e i to ˈna tauiraa i ta ˈna huru hiˈoraa, ua faaite Iehova ia vetahi ê e ua mauruuru oia i te taiva ore o Ioba.—Ioba 42:7, 8.

13. Mea nafea paha te aˈoraa a Iehova i te tautururaa ia Ioba i te hoperaa to ˈna mau ati?

¹³ Ua faufaahia â Ioba i te aˈoraa a Iehova i te hoperaa to ˈna mau ati. “Maitai roa aˈera to Ioba hopea i tei mutaaihora ia Iehova.” I muri mai, “toohitu hoi a ˈna pue tamarii tamaroa, tootoru tamahine” i roaa mai. (Ioba 42:12-14) Noa ˈtu e ua here Ioba i teie mau tamarii ta ˈna, mea papu e ua mihi oia i ta ˈna mau tamarii i pohe. E aita atoa paha i moˈe ia ˈna te mau ati i roohia oia e to ˈna utuafare. Mai te peu e ua faaitehia Ioba eaha te tumu oia i roohia ˈi i teie mau ati, ua feruri paha oia e no te aha te Atua i vaiiho ai ia roohia oia i teie rahiraa mauiui. Mai te peu e ua manaˈo Ioba mai tera, ua haamanaˈo paha oia i ta Iehova i parau ia ˈna. Ua tamahanahanahia ïa oia e ua tauturuhia ia tano faahou ta ˈna huru hiˈoraa.—Sal. 94:19.

14. Eaha ta tatou e nehenehe e haapii mai i ta Ioba i faaruru?

¹⁴ E tauturuhia tatou ia faatitiaifaro i to tatou manaˈo e e tamahanahanahia tatou i te feruriruriraa i ta Ioba i faaruru. E tuhaa te buka o Ioba i te mau parau ta Iehova i haapapai “ei haapiiraa ia tatou e ia noaa atoa te tiaturiraa na roto i te faaoromai tamau e te tamahanahanaraa a te mau Papai.” (Roma 15:4) Te haapii mai ra te reira e eiaha e haapeapea roa no to tatou iho mau fifi a ore atu ai e manaˈo faahou i te haapapuraa i te tiaraa Arii hau ê  o Iehova. Mai ia Ioba, te faaite ra tatou i to tatou patururaa i te tiaraa Arii hau ê o Iehova a vai taiva ore noa ˈi ia ˈna noa ˈtu e mea fifi te oraraa.

15. Eaha te tupu ia faaoromai tamau tatou ma te taiva ore i roto i te fifi?

¹⁵ E nehenehe ta Ioba i faaruru e tamahanahana mai no te mea te faaite mai ra te reira e, ia roohia tatou i te ati, e ere roa ˈtu no te mea ua riri Iehova ia tatou. E ravea te mau ati no tatou ia paturu i to Iehova tiaraa Arii hau ê. (Mas. 27:11) Ia faaoromai tamau tatou ma te taiva ore, e mauruuru Iehova ia tatou, e e puai atu â to tatou tiaturiraa no ananahi. (A taio i te Roma 5:3-5.) Te faaite mai ra ta Ioba i faaruru e “e Atua here rahi Iehova e te aroha hamani maitai.” (Iak. 5:11) Ia paturu tatou i to Iehova tiaraa Arii hau ê, e haamaitai mai oia ia tatou. Na te reira e tauturu ia tatou “ia faaruru maite na roto i te faaoromai e te oaoa.”—Kol. 1:11.

16. No te aha mea titauhia ˈi ia haamanaˈo tatou i te faufaa rahi ia haapapu i te tiaraa Arii hau ê o Iehova?

¹⁶ Parau mau, e ere iho â i te mea ohie ia manaˈo noa i te haapapuraa i te tiaraa Arii hau ê o Iehova ia faaruru tatou i te mau fifi o te oraraa. Ia tamau tatou i te manaˈo i te mau fifi rii, e nehenehe tatou e faarahi i te reira. Mea titauhia ïa ia haamanaˈo noa tatou i te faufaa rahi ia paturu i te tiaraa Arii hau ê o te Atua noa ˈtu te mau fifi ta tatou e faaruru.

17. E nafea tatou e tauturuhia ˈi ia manaˈo noa i te mea faufaa roa ˈˈe ia tamau tatou i te apiti i te ohipa a Iehova?

¹⁷ E tauturuhia tatou ia manaˈo i te mea faufaa roa ˈˈe ia tamau tatou i te apiti i te ohipa a Iehova. A hiˈo na i te tuahine Renee, ua mauiui noa oia no te mea ua mau te hoê uaua i roto i to ˈna roro e ua roo-atoa-hia oia i te maˈi mariri ai taata. I te  fare maˈi, ua poro oia i te feia rave ohipa, i te tahi atu feia maˈi e te feia i haere mai e hiˈo ia ratou. Ia Renee i faaea e piti hebedoma e te afa i te fare maˈi, ua poro oia e 80 hora. Ite noa â Renee e e pohe oia, aita i moˈe ia ˈna te mea faufaa roa ˈˈe. No to ˈna patururaa i te tiaraa Arii hau ê o Iehova i roaa ˈi ia ˈna te hau.

18. Eaha ta te fifi i farereihia e Jennifer e haapii mai ra no nia i te patururaa i te tiaraa Arii hau ê o Iehova?

¹⁸ E nehenehe atoa tatou e paturu i te tiaraa Arii hau ê o Iehova ia farerei tatou i te mau fifi rii o te mau mahana atoa. E toru mahana to te hoê tuahine, o Jennifer te iˈoa, faaearaa i te tauraa manureva a tiai ai i te manureva no te hoˈi i ǒ ˈna. Ua hepohepo roa o ˈna i te faaoreraahia tera e tera revaraa, e ua moˈemoˈe roa oia. Eita e ore e ua haapeapea oia no ˈna iho i te haamataraa. Tera râ, ua pure Jennifer ia tauturu mai Iehova ia faaite i te parau apî oaoa ia vetahi ê a tiai ai i reira. E rave rahi taata ta ˈna i poro e ua pûpû atu oia e rave rahi papai. Ua parau Jennifer, “Ua ite au i te haamaitairaa a Iehova noa ˈtu teie fifi, e ua horoa mai oia i te puai ta ˈu i hinaaro no te amo i to ˈna iˈoa ma te haafaufaa i to ˈu taime.”

19. E nafea e itehia ˈi te feia e haamori mau ra i te Atua?

¹⁹ O te nunaa anaˈe o Iehova te taa maitai ra i te faufaa o to Iehova tiaraa Arii hau ê, a itehia ˈi te feia e haamori mau ra i te Atua. Ia faaoti papu ïa tatou tataitahi e tamau i te paturu i to Iehova tiaraa Arii hau ê.

20. Eaha to Iehova huru aau i ta outou atoa e rave no te paturu i to ˈna tiaraa Arii hau ê?

²⁰ E tâuˈa mai e e haafaufaa Iehova i ta outou atoa e rave no te paturu i to ˈna tiaraa Arii hau ê a tavini ai outou ia ˈna e a faaoromai tamau ai outou i te ati ma te taiva ore. (Sal. 18:25) E faataa ˈtu â to muri nei tumu parau no te aha mea tia ˈi ia paturu outou i to Iehova tiaraa Arii hau ê e e nafea outou e paturu atu â ˈi i te reira.