1, 2. а) Пүткүл инсанийәткә тәсир қилидиған қандақ муһим мәсилә бар? ә) Немишкә бу мәсилә биз үчүн муһим?

БҮГҮНКИ ТАҢДА нурғун адәмләр үчүн пул муһим бир мәсилә. Улар пәқәтла пул һәққидә ойлап, ғәм-тәшвиш қилиду. Адәмләр көпирәк пул тепиш яки қолидики пулни сақлап қелиш үчүн көп вақтини сәрип қилиду. Башқилири болса, аилиси, саламәтлиги яки шәхсий утуқлирини әң муһим дәп һесаплайду.

² Амма булардинму муһим бир мәсилә бар. Бу — Йәһва Худаниң һөкүмранлиғини ақлаштур. Биз бу мәсилини һечқачан есимиздин чиқармаслиғимиз керәк. Пәхәс болмисақ, биз турмуш билән алдираш болуп, өз қийинчилиқлиримиз һәққидә ғәм қилип, бу мәсилиниң қанчилик муһим екәнлигини унтуп қелишимиз мүмкин. Биз Йәһваниң һөкүмранлиғини қоллисақ, күндилик һаятимиздики қийинчилиқларни убданирақ биртәрәп қилип, Худаға йеқинлишалаймиз.

3. Шәйтан Худаниң һөкүмранлиғиға тегишлик немә ейтқан?

³ Шәйтан Иблис Йәһва Худаниң һөкүмранлиқ қилиш һоқуқиға тегишлик мәсилини оттуриға қойди. Шәйтан  адәмләрниң «Йәһва Худа яман һөкүмран вә у адәмләрниң мәнпәитини ойлимайду» дегән ойда болушини халайду. Шәйтан адәмләрниң өзлири һөкүмранлиқ қилса, бәхитлигирәк болиду дәп ейтқан (Яритилиш 3:1—5). Шундақла у һечбир инсан Худаға садақәтмәнлигини сақлалмайду вә бешиға күн чүшсә, Худаниң һөкүмранлиғидин баш тартиду демәкчи болған (Аюп 2:4, 5). Шу сәвәптин, Йәһва Худа униң һөкүмранлиғисиз һәммә мәвҗудат һаятниң қанчилик азаплиқ екәнлигигә көз йәткүзүшигә вақит бәрмәктә.

4. Немишкә һөкүмранлиққа тегишлик мәсилә һәл қилиниши керәк?

⁴ Әлвәттә, Йәһва Худа Шәйтанниң төһмитиниң ялған екәнлигини билиду. Ундақта, У немишкә Шәйтанға ейтқанлирини дәлилләшкә вақит бәрди? Бу мәсилиниң җавави һәм асмандикиләргә, һәм йәрдикиләргә тегишлик (Зәбур 83:18ни оқуң). Адәм ата билән Һава ана Йәһваниң һөкүмранлиғини рәт қилип қилғандин бери көп адәмләрму шундақ қилди. Мошуниңға қарап, бәзилиригә Иблисниң ейтқини тоғра охшайду дегән ой келиши мүмкин. Бу мәсилә биртәрәп қилинмай, инсанлар билән пәриштәләрниң ойида җавапсиз қалса, һәқиқий тинчлиқ вә иттипақ орун алмайду. Лекин Йәһваниң һөкүмранлиқ һоқуқи ақланғандин кейин, һәммиси униң адаләтлик һөкүмранлиғи астида мәңгү яшайду. Шу чағда пүткүл аләмдә тинчлиқ һөкүм сүриду (Әфәсликләргә 1:9, 10).

5. Пүткүл аләмлик һөкүмранлиқ мәсилиси бизгә қандақларчә тегишлик?

⁵ Худаниң һөкүмранлиғи сөзсиз ақлиниду, Шәйтан вә адәмләрниң һөкүмранлиғи болса, үзүл-кесил йоқ қилиниду. Худаниң Мәсиһ башқуридиған Падишалиғи арқилиқ һөкүмранлиғи мәхситигә йетиду. Садақәтмәнликни сақлиған адәмләр Худа һөкүмранлиғиниң тәрипидә болғанлиғини испатлиған болиду (Йәшая 45:23, 24). Сизму шу садақәтмән адәмләрниң арисида болғуңиз келәмду? Буниңға һеч гуман йоқ! Бу мәсилә һәқиқәтән муһим екәнлигини чүшинишимиз керәк.

6. Йәһваниң һөкүмранлиғиниң ақлиниши қанчилик муһим?

⁶ Йәһваниң һөкүмранлиғиниң ақлиниши бизниң шәхсий бәхтимиздинму муһим. Лекин бу бизниң қутулушимизниң муһим әмәс яки Йәһва бизниң ғемимизни ойлимайду дегәнни билдүрмәйду. Буни қәйәрдин билимиз?

7, 8. Худаниң һөкүмранлиғиниң ақлиниши бизгә қандақ пайда әкелиду?

⁷ Йәһва адәмзатни бәк яхши көриду. Униң көз алдида интайин қәдирлик екәнмизки, мәңгү һаят кәчүрүшимиз үчүн, У һәтта Оғлини қурбанлиқ қилди (Йоһан 3:16; Йоһанниң 1-хети 4:9). Йәһва келәчәккә тегишлик вәдисидә турмиса, Иблисниң ейтқини тоғра болуп чиқатти. Шәйтан Йәһва Худани адәмләргә яхши нәрсиләрни бәргүси кәлмәйдиған адаләтсиз һөкүмран вә ялғанчи дәп әйипләйду. Башқиму қарши чиққучилар Йәһваниң вәдилирини мәсхирә қилип: «“Униң вәдиләнгән һазирлиниши қени? Чүнки дуния яритилғандин бери, ата-бовилиримиз өлүм уйқусиға кәткәндин башлап таки һазирғичә һәммә нәрсә шундақла  туридиғу”,— дейишиду» (Петрусниң 2-хети 3:3, 4). Амма Йәһва өзиниң вәдисидә туриду. У һөкүмранлиғиниң ақлинишиға, итаәтчан адәмләрниң қутқузулуши киридиғанлиғиға ғәмхорлуқ қилди (Йәшая 55:10, 11ни оқуң). Йәһва Худаниң һөкүмранлиғиниң асаси — меһир-муһәббәт. Шуңа У садиқ хизмәтчилирини дайим яхши көридиғанлиғиға вә жуқури баһалайдиғанлиғиға һеч гуман қилмаймиз (Чиқиш 34:6).

⁸ Худа һөкүмранлиғиниң муһим мәсилә болғини Униң үчүн қутқузулушимиз анчә муһим әмәс екәнлигини билдүрмәйду. Йәһва бизгә ғәмхорлуқ қилиду. Худаниң һөкүмранлиғини садақәтмәнлик билән қоллишимизниң муһимлиғини әстә тутушимиз керәк.

9. Шәйтан Аюп һәққидә немә деди? (Мақалиниң бешидики рәсимгә қараң.)

⁹ Муқәддәс Язмилардики дәсләпки йезилған китапларниң биридин, Аюп китавидин, Йәһваниң һөкүмранлиғиға тегишлик тоғра көзқарашта болушимиз керәклиги ениқ көриниду. Шу йәрдә биз Шәйтанниң «Аюп қаттиқ җапа тартса, Худадин ваз кечиду» дегән сөзлирини оқуймиз. Шәйтан һәтта Худаға Аюпни азаплашқа тәғдим қилди. Йәһва Худа ундақ қилмиди, бирақ Шәйтанниң Аюпни синишиға йол қоюп: «Мана, униң һәммә нәрсисини сениң қолуңға тутқуздум!»— деди (Аюп 1:7—12ни оқуң). Көп өтмәй, Аюп хизмәтчилири билән мал-мүлкидин айрилди. Андин он балиси вапат болди. Шәйтан мошу азап-оқубәтләрниң һәммисини Худа қилғандәк қилип көрсәтти (Аюп 1:13—19). Буниңдин кейин у Аюпни азаплиқ яра-чирақлар вә жиркиничлик кесәлгә гириптар қилди (Аюп 2:7). Техиму ечинарлиғи, Аюпниң аяли вә үч сахта дости рәнҗитидиған вә көңүл чүширидиған сөзләрни қилип, өлгәнниң үстигә тәпкәндәк болди (Аюп 2:9; 3:11; 16:2).

10. а) Аюп Худаға болған садақәтмәнлигини қандақ көрсәткән? ә) Немишкә Аюпниң көзқаришини түзитиш керәк болди?

¹⁰ Шәйтанниң сөзлири раст болдиму? Яқ. Аюп һәтта қаттиқ азап чәксиму, Йәһвадин үз өрмиди (Аюп 27:5). Лекин бираз вақитқичә неминиң һәқиқәтән муһим екәнлигини есидин чиқирип қойди. У қайта-қайта өзиниң һеч яманлиқ қилмиғанлиғини ейтқан. У өзини азавиниң сәвәвини билишкә лайиқ дәп ойлиған (Аюп 7:20; 13:24). Аюпниң һис-туйғулирини чүшинишкә болиду. Амма Йәһва Аюпниң көзқариши натоғра болғанлиғини билип, уни түзәтти. Қандақларчә?

11, 12. Худа Аюпқа немини чүшинишкә ярдәмләшти? Аюп буниңға қандақ инкас қайтурди?

¹¹ Йәһваниң Аюпқа ейтқан сөзлири Аюп китавиниң 38—41 баплирида йезилған. Худа Аюпниң азап чекиватқанлиғиниң сәвәвини чүшәндүрмигән. Униң орниға, У өзиниң улуқлиғи билән селиштурғанда, Аюпниң қанчилик кичик екәнлигини чүшәндүргүси кәлди. Худа Аюпқа шәхсий қийинчилиқлиридинму муһимирақ мәсилиләр бар екәнлигини ейтқан (Аюп 38:18—21ни оқуң). Йәһваниң сөзи Аюпқа көзқаришини тоғрилашқа ярдәм бәрди.

 ¹² Йәһва Худаниң тазиму җапа чәккән Аюпқа мошундақ удул мәслиһәт бәргини рәһимсиз болдиму? Әлвәттә, яқ. Аюпму шундақ ойлимиған. Аюп Алланиң мәслиһәтлирини чүшинип, уларни баһалиди. У һәтта: «Мән өзүмдин-өзүм нәпрәтлинимән, шуниң билән мән топа-чаңлар вә күлләр арисида товва қилдим»,— деди (Аюп 42:1—6). Буниңдин авал Елиху исимлиқ яш жигитму униң көзқаришини өзгәртишигә ярдәмләшкән (Аюп 32:5—10). Аюп Худаниң меһир-муһәббәт билән бәргән мәслиһитини қобул қилип, көзқаришини өзгәрткәндин кейин, Йәһва Худа башқиларға униң синақ вақтида садақәтмән қалғанлиғиға рази болғанлиғини билдүрди (Аюп 42:7, 8).

13. Аюпниң қийинчилиқлири аяқлашқандин кейин Йәһваниң мәслиһити униңға қандақ ярдәм бәрди?

¹³ Аюп қийинчилиқларни баштин кәчүрүп болғандин кейинму Йәһваниң мәслиһитидин пайда елишни давамлаштурди. «Пәрвәрдигар Аюпқа кейинки күнлиридә бурунқидин көпирәк бәхит тәғдим қилди». Вақит өтүп, униңда «йәнә йәттә оғул, үч қиз туғулди» (Аюп 42:12—14). Аюп йеңи туғулған балилирини яхши көргән болсиму, лекин вапат болған балилирини сеғинатти. У өзиниң вә аилисиниң бешиға чүшкән азапларни һечқачан унтимиғанду. Кейинирәк Аюп чәккән азаплириниң сәвәвини билгән болсиму, Худа немишкә униң шунчилик азап чекишигә йол қойди дегән ой кәлгәнду. Аюпта мундақ соаллар пәйда болғанда, у Йәһваниң сөзлирини есиға чүшәргәнду. Еһтимал, бу униңға тоғра көзқарашта болушқа ярдәмлишип, тәсәлли бәргән (Зәбур 94:19).

14. Аюпниң үлгисидин қандақ савақ алалаймиз?

¹⁴ Аюп билән болған вақиә һәққидә мулаһизә қилиш бизгиму көзқаришимизни өзгәртишкә вә тәсәлли тепишимизға ярдәм бериду. Аюп китавида  Йәһва «тәсәлли елиш һәм тәқабиллиғимиз түпәйлидин үмүтимиз болуши үчүн, бизниң нәсиһәт қилинишимизға йезилған еди» (Римлиқларға 15:4). Бу вақиә бизни Йәһваниң һөкүмранлиғини ақлашни унтуп қалғидәк, өз қийинчилиқлиримизға бешимиз билән кирип кәтмәсликкә үгитиду. Аюпқа охшаш бизму һәтта қийинчилиқларда садақәтмәнликни сақлаш арқилиқ Йәһваниң һөкүмранлиғини қоллаватқанлиғимизни көрситимиз.

15. Қийинчилиқларға қаримастин садақәтмәнликни сақлишимизниң нәтиҗиси қандақ болиду?

¹⁵ Аюпниң үлгиси бизгә қандақ тәсәлли бериду? Униңдин биз қийинчилиқларға дуч кәлгинимиз Йәһва бизгә нарази болғанлиғини билдүрмәйдиғанлиғини чүшинимиз. Синақлар Йәһваниң һөкүмранлиғини қоллашқа мүмкинчилик бериду (Пәнд-нәсиһәтләр 27:11). Садақәтмәнлик билән сәвир-тақәт көрсәтсәк, Йәһвани хурсән қилимиз вә келәчәккә болған үмүтимиз мустәһкәмлиниду (Римлиқларға 5:3—5ни оқуң). Аюп билән болған вақиәдин Йәһваниң «өз сезимлиридә интайин юмшақ вә рәһимдил» екәнлигини көримиз (Яқуп 5:11). Шуңа Йәһваниң һөкүмранлиғини қоллисақ, у бизни мукапатлайду. Буни билиш бизгә «хурсәнлик билән узақ сәвирчан» болушқа ярдәм бериду (Колосилиқларға 1:11).

16. Йәһваниң һөкүмранлиғини қоллаш қанчилик муһим екәнлигини немишкә есимизға селип турушимиз керәк?

¹⁶ Дәрһәқиқәт, қийинчилиқларға дуч кәлгәндә Худа һөкүмранлиғиниң ақлинишини дайим әстә тутуш асан әмәс. Әгәр көп ойлап кәтсәк, кичиккинә мәсилиниң өзи тағдәк болуп көриниду. Шуниң үчүн, әһвалимиз кәскинлишип кәтсиму, Йәһваниң һөкүмранлиғини қоллашниң қанчилик муһим екәнлигини дайим есимизға селип турушимиз керәк.

17. Йәһваниң хизмитидә бәнт болушимиз қандақларчә неминиң муһим екәнлигини унтумаслиққа ярдәм бериду?

 ¹⁷ Йәһваниң хизмитидә бәнт болушимиз неминиң һәқиқәтән муһим екәнлигини унтумаслиққа ярдәм бериду. Мәсилән, Рене исимлиқ қериндишимизниң бешиға қан кетип, ағримиған күни болмиған, у рак кесили билән күришәтти. Дохтурханида болған вақтида у шу йәрдики хизмәткарларға, бемарлар билән уларни йоқлиғанларға гувалиқ берәтти. Бир қетим Рене дохтурханида икки йерим һәптә болғанда 80 саат вәз қилған. У өлидиғанлиғини билсиму, неминиң һәқиқәтән муһим екәнлигини унтумиған. Йәһваниң һөкүмранлиғини қоллиғанлиғи Ренениң көңлини хатирҗәм қилған.

18. Дженнифер билән болған вақиә Йәһваниң һөкүмранлиғини қоллаш һәққидә немигә үгитиду?

¹⁸ Биз күндилик турмушта кичик қийинчилиқларға учриғандиму, Йәһваниң һөкүмранлиғини қоллалаймиз. Мәсилән, Дженнифер исимлиқ қериндишимиз өйигә бериш үчүн үч күн аэропортта қонди. Аэропланниң сәпәрлири кәйни кәйнидин бекар қилинип, Дженнифер тазиму һерип, өзини ялғуз қалғандәк һис қилди. У өзини аяшниң орниға Йәһваға дуа қилип, күтүватқан башқа адәмләргә хуш хәвәрни ейтишқа ярдәм сориди. Нәтиҗидә, у көп адәмләргә гувалиқ қилип, нурғун әдәбиятларни тарқатти. Дженнифер: «Мошу қийинчилиққа қаримастин, Йәһва мени бәрикәтләп, исмини лайиқ түрдә мәдһийиләшкә йетәрлик күч бәргәнлигини һис қилдим»,— деди.

19. Һәқиқий ибадәт қилидиғанларни немә пәриқләндүриду?

¹⁹ Йәһваниң һөкүмранлиғи қанчилик муһим екәнлигини пәқәт униң хәлқи чүшиниду. Буни чүшиниш һәқиқий ибадәт қилғучиларни пәриқләндүридиған бәлгү. Һәрбиримиз Йәһваниң һөкүмранлиғини қоллаватқанлиғимизға көз йәткүзишимиз керәк.

20. Йәһва һөкүмранлиқ һоқуқини қоллаватқанлиғимизға қандақ қарайду?

²⁰ Йәһва садиқ хизмәт қилғанлиғимизни, қийинчилиқларға бәрдашлиқ бәргинимизни вә униң һөкүмранлиғини җасурлуқ билән қоллиғанлиғимизни байқайду һәм баһалайду (Зәбур 18:25). Келәрки мақалидә Йәһваниң һөкүмранлиғи немишкә қоллишимизға лайиқ екәнлиги вә буни қандақ қилалайдиғанлиғимиз муһакимә қилиниду.