1, 2. Kai nge si perlu siukuri alu metenget? (Nen gambar pemena artikel.)

ENGGO sibahas bas artikel si lewat maka ikataken Iblis la patut Jahwe merentah manusia. Ikatakenna ka la adil cara Jahwe merentah janah banci manusia lebih ermeriah ukur adi merentah dirina sendiri. Payo nge e? Cuba bayangkenndu adi manusia merentah dirina sendiri janah nggeluh seh rasa lalap. Banci nge ia lebih ermeriah ukur asangken adi iperentah Dibata? Bicara banci kam nggeluh rasa lalap tapi la iperentah Dibata, banci nge kam lebih ermeriah ukur?

² Ise pe la banci njabap penungkunen e man bandu. Emaka perlu siukuri e alu metenget. Alu bage jelas me banta maka cara Jahwe merentah si mehulina janah metunggung adi sidukung Ia alu bulat ukur. Banci kita tek nandangi si e perban nggo sioge bas Pustaka si Badia. Mari sibahas kai nina Pustaka kerna ngkai maka Jahwe si metunggungna merentah alam semesta.

3. Engkai maka Jahwe si metunggungna merentah kerinana?

³ Jahwe ngenca si erhak merentah alam semesta erkiteken Ia Dibata si Madakuasa ras Si Nepa. (1 Kronika 29:11; Perbahanen Rasul-Rasul 4:24) Bas pengenehenen kerna surga, nina si 144.000, si jadi raja ras Jesus, ”O [Jahwe] Dibata kami Kam me si metunggung ngaloken kemulian, kehamaten ras kuasa. Sabap Kam njadikenca kerina si nasa lit, janah erkiteken peratenNdu nge maka kerina e lit dingen nggeluh.” (Ketangkasen 4:11) Perban Jahwe si nepa kerinana Ia me si metunggungna merentah doni ras surga.

4. Amin gia lit kebebasen guna milih si ibereken banta, ngkai maka labo lit hakta nentang Dibata?

⁴ Labo lit kai pe si itepa Setan. Emaka la lit hakna merentah alam semesta. Setan, Adam, ras Hawa jadi pemberontak paksa nentang hak Jahwe merentah. (Jeremia 10:23) Erhak kin kalak e nulak pemerentahen Jahwe erkiteken lit kebebasen guna milih bas ia? Lang. Kebebasen guna milih mereken hak guna muat pilihen ras keputusen. Tapi, labo mereken hak guna nentang Si Nepa, Jahwe. Emaka, nentang Dibata eme penyalahgunan kebebasen guna milih. Selaku manusia, perlu kel kita pemerentahen ras bimbingen Jahwe.

5. Engkai maka pasti adil keputusan Dibata?

⁵ Ukuri alasen si deban ngkai maka Jahwe si metunggungna merentah. IpakeNa wewenangNa alu cara si mehulina kel. IkatakenNa banta, ”Sabap keleng ateKu tetap kap, dingen Kubahan kai si bujur ras benar. E me perkara si erbahanca meriah ukurKu, Aku [Jahwe] si enggo ngerana.” (Jeremia 9:24) La perlu Jahwe hukum manusia guna nampati Ia erban keputusen si benar. Tapi, itetapkenNa kai si benar. Erpalasken keadilenNa si serta, ibere Jahwe hukum man manusia. Nina pemasmur, ”Keadilen dingen kebujuren kap palas kinirajanNdu.” Emaka tiap undang-undang, pedah Pustaka, ras keputusen si rehna arah Jahwe nari benar kap. (Masmur 89:15; 119:128) Ikataken Setan, Jahwe penguasa si la adil. Tapi, Setan pe la banci erban doni enda dame.

6. Kai nge salah sada alasenna maka lit hak Jahwe merentah?

⁶ Alasen si deban ngkai maka Jahwe si metunggungna merentah alam semesta eme erkiteken mbages kel pemetehNa janah Ia si pentarna. Enda banci siidah paksa ibereNa kiningasupen man AnakNa guna mpepalem penakit si la tertambari dokter si apai pe. (Matius 4:23, 24; Markus 5:25-29) Amin gia bas kita enda mukjizat, tapi bas Jahwe hal biasa. IangkaiNa kerina kerna kulanta janah banci ipepalemNa kerina si mesuinta. Banci ipegeluhNa  kalak mate janah banci ka iolangiNa mara sope terjadi.

7. Engkai maka banci sikataken ndauh pentaren Jahwe asangken ise pe si lit bas doni si iperentah Setan enda?

⁷ Doni si iperentah Setan la banci maba kedamen i bas sada negara bage pe ndameken sada negara ras negara si deban. I bas Jahwe ngenca lit kepentaren guna erban doni enda dame. (Jesaya 2:3, 4; 54:13) Seri penggejapenta bagi rasul Paulus paksa ikatakenna, ”Seh kal tuhu bayakna Dibata! Seh kal tuhu bagesna kepentaren ras pemetehNa! Ise kin ngasup nerangken keputusen-keputusenNa? Ise ngasup ngikuti dalan si idalaniNa?”​—Roma 11:33.

8. Uga nge menurutndu kerna cara Jahwe merentah?

⁸ Bagi si nggo sibahas, alu jelas ituriken Pustaka maka Jahwe si metunggungna merentah. Selain si e, icidahken ka ngkai maka Ia Penguasa si mehulina. Salah sada alasenna perban Ia merentah alu kekelengen. Ndeher kel siakap kita ras Jahwe paksa siukuri uga ’demna lias ate ras perkuah ateNa. La sukah merawa, janah icidahkenNa keleng ateNa si mbelin ras kesetianNa si tetap’. (Keluaren 34:6) Meherga kel kita i lebe-lebeNa, janah lebih iangkaiNa cara ngurus kita asangken kita sendiri. Ikataken Iblis maka la ibere Jahwe kai si mehuli man umatNa, tapi e labo tuhu. Situhuna ibere Dibata AnakNa si meherga kel gelah lit arapenta nggeluh rasa lalap.​—Oge Masmur 84:12; Roma 8:32.

9. Janari sieteh maka iperdiateken Dibata kita sekalak-sekalak?

⁹ Keleng kel ate Jahwe umatNa secara kelompok. Tapi iperdiatekenNa ka sekalak-sekalak. Ukuri kai si terjadi nai. Kira-kira telu ratus tahun dekahna, igunaken Jahwe hakim-hakim guna negu-negu bangsaNa janah iberekenNa kemenangen man umatNa. Paksa si e, tetap denga iperdiateken Jahwe umatNa sekalak-sekalak. Contohna, Rut, ia labo kalak Israel. Melala kel si itadingkenna gelah banci jadi umat Jahwe. Iupahi Jahwe ia alu mereken sekalak perbulangen ras anak dilaki. Lebih asa si e, anak Rut jadi salah sada nini bulang Mesias. Janah isuratken Jahwe ka pengalamenna bas Pustaka, bas kitap si make gelarna. Banci nge ibayangkenndu uga perasan Rut paksa nggeluh mulihi janah mpelajari kerna kerina e?​—Rut 4:13; Matius 1:5, 16.

10. Engkai maka banci sikataken pemerentahen Jahwe la kejam?

¹⁰ Pemerentahen Jahwe la kejam. Si patuh man baNa nggejapken kebebasen ras keriahen ukur. (2 Korinti 3:17) Nina Daud kerna Jahwe, ”Kemulian ras kuasa ngkeleweti Ia, gegeh ras keriahen ndemi rumah pertotonNa.” (1 Kronika 16:7, 27) Nina pemasmur Etan, ”O [Jahwe], sangap kal bangsa  si nembah man baNdu alu rende, kiniulinNdu nalsali geluhna. Erkiteken Kam, dem i bas ia keriahen, kiniulinNdu ipujina gedang-gedang wari.”​—Masmur 89:16, 17.

11. Uga carana gelah reh tekna kita maka pemerentahen Jahwe me si mehulina?

¹¹ Reh bagesna siukuri kerna kiniulin Jahwe, reh tekna kita maka pemerentahen Jahwe si mehulina. Setuju kita ras pemasmur si ngataken man Dibata, ”Madin sada wari i bas rumahNdu, asangken seribu wari i bas ingan si deban.” (Masmur 84:11) Jahwe kap si ngerancang ras si nepa kita, emaka ietehNa kai si banci erban meriah ukurta. Alu melumbar ibereNa keperlunta. Kerina si iperentahken Jahwe guna kiniulinta. Amin gia arus kita erkorban, tetap kita ermeriah ukur adi sipatuhi Ia.​—Oge Jesaya 48:17.

12. Kai nge alasen utamanta ndukung hak Jahwe merentah?

¹² Enggo sipelajari i bas Pustaka maka kenca Pemerentahen Kristus si Seribu Tahun, itentang piga-piga kalak pagi hak Jahwe merentah. (Ketangkasen 20:7, 8) Engkai maka kalak e nentang? Paksa si e, ilakoken Setan kai si nggo ilakokenna sedekah enda eme erban manusia gelah mentingken dirina saja. Banci jadi iusahakenna mulihi erban manusia tek maka amin gia la patuh man Dibata banci ia nggeluh rasa lalap. Enda la kel tuhu. Emaka, arus sisungkuni banta, ’Tek nge aku nandangi guak e?’ Adi tuhu keleng ateta Jahwe janah tek kita maka Ia mehuli janah metunggung merentah alam semesta, tentu ciga kel ateta guak si bage. Ateta nggeluh bas pemerentahen Jahwe saja ngenca, si merentah alu kekelengen.

13. Paksa siusih Dibata uga caranta ndukung pemerentahenNa?

¹³ Bagi si nggo sibahas, Jahwe me si metunggungna merentah, janah caraNa merentah si mehulina. Emaka, patut sidukung pemerentahenNa alu bulat ukur. Carana, terus setia man Jahwe janah siusih Ia. Adi silakoken asa ngasupta sue bagi si ngena ateNa, sicidahken maka keleng ateta Ia janah sidukung caraNa merentah.​—Oge Epesus 5:1, 2.

14. Uga carana pertua bage pe kepala keluarga banci ngusih Jahwe?

¹⁴ Enggo sipelajari bas Pustaka maka lalap ipake Jahwe kuasaNa alu kekelengen. Kepala keluarga ras pertua si tutus ndukung hak Jahwe merentah pasti iusihna Jahwe janah la kejam ntah pe ngatur. Iusahaken rasul Paulus ngusih Dibata ras AnakNa. (1 Korinti 11:1) La ipermelakenna kalak ntah pe ipaksana ngelakoken si benar. Tapi, alu mehuli iiahkenna kalak e ngelakokenca. (Roma 12:1; Epesus 4:1; Pilemon 8-10) Alu bage, iusih Paulus me Jahwe. Adi perbahanenta man kalak erpalasken kekelengen, eme buktina sidukung hak Jahwe merentah.

15. Sidukung pemerentahen Jahwe adi sihamati kalak si ibereNa tanggung jabap. Uga caranta nghamatisa?

¹⁵ Sidukung ka pemerentahen Jahwe alu ngergai janah nggit kerja sama ras kalak si ibereNa tanggung jabap. Amin la kita setuju ntah pe la siangka ngkai  sada keputusen si iban kalak e, tetap sidukung ia. Beda kel kita ras jelma si nterem, perban tetap kita patuh man Jahwe i bas situasi kai pe erkiteken nggo sialoken Ia jadi Penguasanta. (Epesus 5:22, 23; 6:1-3; Heber 13:17) Adi bage banci kita ermeriah ukur erkiteken si mehulina nge ate Jahwe si ibereNa banta.

16. Uga keputusenta ncidahken maka sidukung hak Dibata merentah?

¹⁶ Banci ka sidukung pemerentahen Dibata arah keputusenta. La ibere Jahwe peraturen-peraturen khusus si ngatur kita i bas kerina hal bas geluhta. IturikenNa banta kerna cara Ia rukur. Enda nampati kita meteh kai si arus silakoken. Contohna, la ibere Jahwe daftar kerna uis si uga si banci ntah pe si la banci sipake. Tapi, ijelaskenNa maka sikap janah metunggung min peruista selaku SaksiNa. (1 Timotius 2:9, 10) AteNa siukuri kai pengaruh keputusenta man kalak. (1 Korinti 10:31-33) Adi keputusenta sentudu ras cara Jahwe rukur, sicidahken maka sikelengi Ia janah sidukung caraNa merentah.

17, 18. Uga kalak si nggo erjabu ncidahken maka idukungna hak Jahwe merentah?

¹⁷ Ukuri kerna cara kalak Kristen si nggo erjabu banci ndukung hak Jahwe merentah. Banci saja la bagi si  ibayangken kalak e keadan perjabunna. Banci jadi mberat kel masalah si iadapina. Adi bage, erguna kel adi iukurina kerna perbahanen Jahwe man bangsa Israel mbarenda. Jahwe bali bagi sekalak perbuleangen man umatNa. (Jesaya 54:5; 62:4) Rusur kel ikecewaken bangsa e Jahwe, emaka e banci ipeseri ras sada perjabun si melala masalahna. Tapi, labo minter itadingken Jahwe kalak Israel. Malahen, lalap ialemiNa janah itepatiNa janjiNa.​—Oge Masmur 106:43-45.

¹⁸ Kalak Kristen si nggo erjabu si ngkelengi Jahwe erusaha ngusih Ia. Amin gia melala masalah bas jabuna, labo idaramina jalan keluar si la sentudu ras Pustaka. Ietehna maka serius kel padan perjabun i lebe-lebe Jahwe janah ate Jahwe tetap min ”ersada” ia duana. Sada ngenca alasen bas Pustaka maka banci simulihen janah banci ka erjabu mulihi eme erlua-lua. (Matius 19:5, 6, 9) Adi iusahaken kalak Kristen gelah perjabunna berhasil, enda ertina idukungna hak Jahwe merentah.

19. Kai si arus silakoken adi siban kesalahen?

¹⁹ Kerina kita la serta, janah megati siban Jahwe kecewa. Perban iangkaiNa e, ibereNa Kristus guna nebus kita. Emaka, paksa silakoken kesalahen, arus sipindo gelah ialemiNa kita. (1 Johanes 2:1, 2) Asangken terus kitik ukurta tarun ngukuri kesalahenta, sibanlah e jadi pelajaren. Rembak ateta terus ras Jahwe, si nggit ngalemi ras nampati kita gelah lanai silakoken kesalahen si seri janah tetap ngelayani Ia.​—Masmur 103:3.

20. Engkai maka arus sidukung hak Jahwe merentah gundari?

²⁰ Bas doni si mbaru, kerina manusia iperentah Jahwe janah mpelajari dalan-dalanNa si benar. (Jesaya 11:9) Tapi gundari pe melala si banci sipelajari kerna cara Jahwe rukur gelah banci siban keputusen si benar. Kentisik nari, lanai bo lit si nentang hak Dibata merentah. Emaka, gundari nari siusahakenlah ndukung hak Jahwe merentah alu patuh man baNa, setia ngelayani Ia, janah ngusih Ia i bas kerina perbahanenta.