1, 2. Muttu-muttu akaane ebaribari ya eni? (Koona foto eli omaromo.)

NINGA MONELIHU mutoma ovirile, Ddiabo wahiloga wi Yehova kahiyo mulamuleli wapama. Wahiloga wila Yehova kanwodha olamulela n’oderetu, vina attuya anele okala osanzaya agavilamulela anya. Koddi Satana waloga ebaribari? Kobuwela nlogo n’attu kovilamulela anyene akalagawo na mukalakala. Awene agahisanzaya-wene s’olamuleliwa na Mulugu? Koddi weyo, ogahagalala kokalawo na mukalakala, masiki buli wolapelana na Mulugu?

² Kawo muttu onawakulele mavuzo aba. Muttu-muttu onofuniwana otanaalela deretu nivuzona. Vina japama oziwa wi olamulela wa Yehova, kwaderetu nanda onofuna nikamihedho nehu. Ninowodha ononelamo makaniya aba nigengesaga mBibiliani. Ndoweni noone dhinloga Bibilia enlagiha wi ddi Yehova onfwanyela olamulela elabo yotene.

3. Yehova oninfwanyeelela nni okala mulamuleli?

³ Yehova munddimuwa wa elabo yotene sabwa iyene ddili wa guru vina muttanddi. (1 Mapadduwo 29:11; Merelo 4:24) Murumiwi dhahi wahawoona, Akristu 144.000 ali amwene wirimu alogaga: “Nyuwo Nabuya Mulugu wehu muli mwinya, munofwanyela othithimihiwa, orihiwa, vowi mupaddutxa dhetedhene. Dhotene dhinokalawo n’ofuna wenyu.” (Ovuhulela 4:11) Yehova ddili muttanddi wa dhetene dhiliwo, noona okaana ewodhelo y’olamulela dhittanddiliye dha wirimu obe velaboni ya vati.

4. Sabwaya jani ofuru wosakula kunnivaha mperhe womusadduwela Mulugu?

⁴ Satana kattanddile elobo nne modha. Ottiya eji, iyene kana ewodhelo y’olamulela elabo. Satana vamodha na atelani oroma, asakulile anya omusadduwela Yehova n’olamulela waye. (Jeremiya 10:23) Koddi ku ofuru wawa wosakula wattukuleli omusadduwela Yehova n’olamulela waye? Pwadda. Ofuru wosakula ononvaha muttu-muttu, gari yokosa dhosakula dhaderetu, ottiya guru dh’omusadduwela Yehova Muttanddi wa muttuya. Omusadduwela Mulugu mulabihedho wabure wa gari ya ofuru wosakula. Nlogo n’attu ninonfuna Yehova ninga mulamuleli vina namalaga wawa.

5. Dhosakula dha Yehova dhikaleli nni dholigana?

⁵ Koona elobo yina enimutonya Yehova ninga mulamuleli waderetu. Iyene onolabihedha n’oligana olamulela waye. Iyene ononaddela eraga: Miyo ddili “Nabuya onthonga mwilaboni n’okwela, na murima woligana, na murima womyala.” (Jeremiya 9:23) Yehova kanfuna malamulo a attu wila amukamihedhe okosa dholigana. Ottiya eji iyene ohimetxa maddile entonya dhili dholigana. Alabihedhaga enonelo yaye yoligana, Yehova ohita malamulo anasogorhela attu etene. Munasalmo ologa: “Dhomyala na dhofwanyelela, sinlibiha omwene wenyu.” Noona malamulo vina maganoya etene anda wa Yehova boligana. (Masalmo 89:15; 119:128) Satana wela Yehova kahiyo Mulamuleli wapama. Apa enowoneya wila Satana saringele.

6. Txini enlagiha wi Yehova ddinwodha olamulela noligana?

⁶ Elobo yina enlagiha wila Yehova okana ewodhelo yolamulela, jawila iyene okana eziwelo na enonelo ya weeddihana elabo yotene. Ejo enowoneya sabwa wahinvaha Mwanaye guru na ewodhelo ya wavulumutxa aredda akoodda owodhiwa na ang’anga enjene. (Mateu 4:23, 24; Marko 5:25-29) Esi dhikosiliye dhilobo dhonitikiniha, mbweneye Yehova kantikina. Iyene  onoziwa mulabelo wa maningo a muttu vina onowodha ovulumutxa eredda ereddavi. Okaana ewodhelo ya wavenyiha attu mu okwani, vina ya ogomiha dhizini dhetene dh’elabo.

7. Yehova okalelini muziwetxi wapitta etene ali mwilaboni ya Satana?

⁷ Elabo enlamuleliwa na Satana kinsanzaya. Ddi Yehova bahi onna eziwelo yodhana murenddele na osanzaya mwilaboni. (Izaiya 2:3, 4; 54:13) Ndhowe nitanaalele yalogile murumiwi Paulo eraga: “Nyuwo Mulugu, munuwelo gani wa ofuma, ononelamo na thontho yenyu! Dhitadilenyu kadhinfiyedheya, dila dhenyu dhovulumutxana kadhinnoneleyamo!”—Roma 11:33.

8. Onoonamo dhavi olamulela wa Yehova?

⁸ Ninga moonelihu, Yehova txibarene ddina ewodhelo yolamulela. Iyene vina onilagiha enimukosiha okala Mulamuleli woligana. Elobo yoroma jawila iyene onlamulela n’okwela. Ninonfiyedha kakamwe nigobuwela wila iyene ddili “Mulugu wanthebwa, wathagaraga, wovilela, wapama-pama, wowiwananeyana.” (Obudduwa 34:6) Yehova ononeddiha n’oderetu vina nriho. Iyene ononeddiha n’oderetu opitta iyo nanya. Ddiabo wahizivala valogiliye Yehova wela wavitela dhilobo dha deretu abale animulabela. Mulugu onivaha Mwanaye wokweleya, wila aavahe attu njedhelo n’okalawo na mukalakala.—Kengesa Masalmo 84:11; Roma 8:32.

9. Niziwile dhavi wila Yehova onomuzuzumela muttu-muttu wa iyo?

⁹ Yehova onowakwela attu etene ninga nikuru. Masiki dhawene onomukwela muttu-muttu. Kobuwela epadduwile masaka awale. Vyaka matxikwi mararu a mundduni, Yehova wannalabihedha anamattonga, wila asogorhele nlogo vina wanapemberiha mukoddoni na amwiddani awa. Mudhidhi wotene, Yehova waninvaha nikamihedho na vawoka muttu-muttu. Mmodhaya mwa abene ddi Ruti. Iyene kali mukadda Izrayel, vina wahittiya dhilobo dhinjene mundduni wila amulabe Yehova. Yehova wahimureliha Ruti na onvaha mamuni na mwana waderetu. Ottiya eji, mwana wa Ruti, ohikosa epaddi ya ziza mudhile Mesiya. Yehova wahiruma wila nipadduwo na Ruti nilebiwe mu nivuruni na Bibilia, nanda nivuruna nindhana nzina naye. Ruti agavenyihiwa mu okwani nanda aziwa dhetene esi onoziveliwa vaddiddi!—Ruti 4:13; Mateu 1:5, 16.

10. Ninlogela eni wila Yehova kanttonga n’obure?

¹⁰ Mulamulelo wa Yehova kahiyo worutxa. Abale animwiwelela Yehova, anosanzaya n’ottaba. (2 Korinto 3:17) David wahimuloga dhahi Yehova: “Vankala iyene vanodhala txeza, vanothithima, mmusanani mwaye munowoneya guru  na othaba.” (1 Mapadduwo 16:7, 27) Munasalmo mwina Etan oleba: “Ninjavo gari thi nlogo ninziwa outamalani, wedda muwaryani wa kove yenyu Nabuya. Ninothabelavi nzina nenyu, ninogayela omyala wenyu murima.”—Masalmo 89:16, 17.

11. Ninkanela eni ebaribari wila olamulela wa Yehova kwaderetu-wene?

¹¹ Nigatanaalela vaddiddi oderetu wa Yehova, ninele orumeela wila olamulela waye kwaderetu-wene. Ninele omutagiha munasalmo walogile dhahi na Mulugu: “Okala vani venyu siku nimodha bahi, onopitha malabo txikwi.” (Masalmo 84:11) Yehova muttanddi wehu, onoziwa deretu ennisanzayiha. N’okwela waye ononivaha dhetene dhinfunihu. Dhetene dhinnikumbirha Yehova wila nikose, onirela oderetu wehu. Masiki akala onnikumbirha onvaha mukutto, ninele ottaba nigamwiwelela.—Kengesa Izaiya 48:17.

12. Nikamihedhe ttangwi ya nni olamulela wa Yehova?

¹² Nihisunza mBibiliani wi Olamulela wa vyaka Txikwi wa Kristu ogamala, attu enjene anele osadduwela onddimuwa wa Yehova. (Ovuhulela 20:7, 8) Awene anakosele nni ejiya? Mudhidhi obo, Ddiabo onele wakwekwettela attu okala a mukumbela vawa. Iyene onkala okosavi ejene. Iyene vina onowakosiha attu wubuwela wi enowodheya okalawo namukalakala masiki s’olamuleliwa na Mulugu. Eji vina txipo kinakale ebaribari. Noona jaderetu ovivuza, ‘Ddinere orumeela ottambi ninga oku-wene?’ Akala txibarene ninomukwela Yehova, ninorumeela wila ddwaderetu, vina dhosakula dhaye soligana, ottambi ninga oku kunakale rurumutxa. Ninfuna nikalewo n’olamulela wa Yehova bahi, sabwani onlamulela n’okwela.

13. Omutagiha Mulugu onlagiha dhavi wila ninkamihedha ottonga waye?

¹³ Ninga moonelihu, Yehova okaana guru yolamulela vina olamulela waye kwaderetu. Onddimuwa oko onofuna-wene nikamihedho nehu. Omutagiha vina omwiwelela Yehova, ttarho enlagiha wi ninokamihedha onddimuwa waye. Nigakosa guru wila nitanaalele na mubuwelo wa Yehova, ninolagiha vina wila ninokamihedha onddimuwa w’ottonga waye.—Kengesa Éfeso 5:1, 2.

14. Anddimuwa a mulogo na amwazambo animutagiha dhavi Yehova?

¹⁴ Nihisunza mBibiliani wila Yehova onolabihedha guru dhaye n’okwela. Amwazambo vina anddimuwa a mulogo animukwela Mulugu na onddimuwa waye, anomutagiha iyene n’okwela. Murumiwi Paulo kalemana omutagiha Mulugu vina Mwanaye. (1 Korinto 11:1) Iyene kakokela attu eena okosa dhili dhapama. Ottiya eji, n’okwela wanakokomeza vina wanalibiha etene wila alagihe okwela. (Roma 12:1; Éfeso 4:1; Filémoni 8-10) N’eji Paulo wannimutagiha Yehova. Naweddihaga n’oderetu attu eena, ninolagiha vina okamihedha onddimuwa wa Yehova.

15. Ninawodhe dhavi okamihedha ottonga wa Yehova vina abale annisogorhela?

¹⁵ Wawiwelela vina wariha abale attomiwe na Yehova wila anisogorhele, bu mukalelo mwina wolagiha nrhemezo na  onddimuwa wa Yehova. Masiki akala kaninnonelamo masasanyedho akosiwe, obe kaninrumeela malago alogiwe, japama wiwelela. Yeddelo eji ehittiyana na yeddelo ya elabo; iyo nineddihiwa na malamulo a Mulugu oli Mulamuleli wehu. (Éfeso 5:22, 23; 6:1-3; Ahebreu 13:17) Eji enonagalaliha, sabwani Mulugu onnifunana oderetu.

16. Dhosakula dhinkosihu dhinlagiha dhavi wila ninokamihedha ottonga wa Yehova?

¹⁶ Dhosakula dhapama dhinkosihu, dhinokamihedha ottonga vina onddimuwa wa Yehova. Yehova kannivaha malamulo oweddihana makani-makanivi. Mbwenye iyene onivaha yubuwelo. Eji enonikamihedha otanaalela enakosihu. Motagiha, Yehova kanavaha Akristu lista na dhilobo dhinfwanyelani okosa obe ohikosa. Ottiya eji, onowavaha moonelo wowabala woligana ninga emeleli aye. (1 Timóteo 2:9, 10) Yehova onfuna wila nubuwele wi dhosakula dhehu dhinowapatta attu ena. (1 Korinto 10:31-33) Nigakosa dhosakula dhiniwanana na mubuwelo wa Mulugu, ninokamihedha onddimuwa waye.

17, 18. Atelani ankamihedha dhavi onddimuwa wa Yehova?

¹⁷ Kobuwela mukalelo onkamihedha atelani a Akristu onddimuwa wa Yehova. Awene txino onogumanana makattamiho  ahajedhani opadduwa. Mudhidhi mwina ankala makattamiho orutxa. Eji egapadduwa, awene anopurelamo wubuwela mukalelo waweeddihile Yehova ana Izrayel wale. Yehova wahiviloga ninga mamuni wa nlogo nttile. (Izaiya 54:5; 62:4) Nlogo ntti nahimunyimula Yehova dila dhinjene. Mandano aana nlogo ntti na Mulugu akala ninga matelo angwaddeya na makattamiho. Mbwenye Yehova kamaguveli ogwadda mandano aye na nlogo na Izrayel. Iyene wali womala na wale wi alevelele vina avirihemo dholibela dhakoseliye.—Kengesa Masalmo 106:43-45.

¹⁸ Atelani a Akristu animukwela Yehova, anokosa guru dhomutagiha. Awene agagumanana makattamiho anokosa kukuttu wi agomihe mowiwanana na monelo wa Bibilia. Anoziwa wila Yehova onoriha nipikirhelo na matelo amagilani, nanda onfuna wila mamuni “ahimmwale” mwadhiye. Akala mmodhayávo onokosa mararuwo, mukwaye okana sabwa yommwala namararuwaya, vina agafuna podi otelana na muttu mwina. (Mateu 19:5, 6, 9) Atelani agakosa guru eli yotene wila eddihe matelo awa mowiwanana na efunelo ya Yehova, anokamihedha onddimuwa waye.

19. Txini enakosihu nigakosa yottega?

¹⁹ Notene n’attu ottega, noona dila dhina ninokosa dhilobo dhinimunyimula Yehova. Iyene onoziwa ejuwene, noona onivaha Yezu ninga yobolo. Nigakosa yabure nikumbirhe nlevelelo na Yehova. (1 Joau 2:1, 2) Ottiya wubuwelaga vaddiddi yottega ekosilihu, japama osunzana elobo. Ninfiyedhe Yehova wi anilevelele vina anikamihedhe omulabelavi.—Masalmo 103:3.

20. Ninkamihedhela nni ottonga onddimuwa wa Yehova?

²⁰ Mwilaboni eswa attu etene anele olamuleliwa na Yehova vina anele osunza dila dhaye dholigana. (Izaiya 11:9) Mbwenye ovanene ninosunza mukalelo onooniye vina onfuniye wila neddihe dhilobodha. Kawo viina onasadduwele olamulela waye. Oromana ovanene, nikose guru wila nikamihedhe onddimuwa wa Yehova, modhela omwiwelela, omulabela na nroromelo, oku nikosaga guru wila nimutagihe mwa dhetene dhinkosihu.