1, 2. Pakhat cio nih zeidah kan zumh awk a si? (A hramthawknak hmanthlak zoh.)

A hmasa capar ah kan i ruah cang bantukin Satan nih Jehovah cu minung uk awkah aa tlak lo tiah a ti. Jehovah nih minung kha ding tein a uk hna lo caah minung nih anmah tein an i uk ahcun a ṭha deuh lai tiah a ti. Satan chimmi cu a hmaan maw? Tahchunhnak ah, minung nih anmah tein an i uk i zungzal in an nung kho hei ti u sih. Pathian uknak nakin an i nuam deuh lai maw? A tlingmi zalonnak le zungzal nunnak kha Pathian sinin na hmuh ahcun naa nuam deuh lai maw?

² Mah biahalnak i a phi cu ahohmanh nih na caah an phi kho lai lo. Mah kong kha pakhat cio nih ṭha tein kan ruah a hau. Mah tikah Jehovah uknak cu a ṭha bikmi a si ti kha a hung fiang lai i kan lungthin dihlak in kan bawmh awk a si. Baibal kan relnak thawngin mah kha kan zumh khawh. Jehovah nih van le vawlei uknak nawl a ngeihmi kong he aa tlaiin Baibal chimmi kha zohhmanh hna u sih.

3. Jehovah cu zeicah cungnung bik si awkah aa tlak?

³ Jehovah cu lianngan bik Pathian le Sertu a si caah van le vawlei ah cungnung bik a si. (1 Chan. 29:11; Lam. 4:24) Vancung langhnak pakhat ah Jesuh he siangpahrang rian a ṭuanṭi dingmi 144,000 nih hitin an ti: “Kan Bawipa le kan Pathian, nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i nangmah duhnak bangin annih cu ser an si i nunnak an ngei.” (Biat. 4:11) Jehovah cu zeizong vialte sertu a si caah van le vawlei ah a ummi vialte cungah uknak nawl a ngei.

4. Zalong tein thimnak nawl nih zeicah Pathian ralchanhnak nawl a kan pek lo?

⁴ Satan nih cun a sermi zeihmanh a um lo. Cucaah van le vawlei ah uknak nawl a ngei lo. Satan le hmasa bik nupa hna cu an hun i porhlaw i Jehovah cungnung bik a sinak kha an ralchanh. (Jer. 10:23) Zalong tein thimnak nawl an ngeihmi nih Jehovah uknak ralchanhnak nawl a pe hna maw? A pe hna lo. Zalong tein thimnak nih mi pakhat kha biakhiahnak le thimnak tuahnak nawl a pek, asinain Sertu, Jehovah kha cu ralchanhnak nawl a pe lo. Pathian ralchanhnak cu zalong tein thimnak nawl ningcang loin hman a si ti cu a fiang. Minung nih cun Jehovah uknak le lamhruainak kan herh.

5. Pathian biakhiahnak hna cu a ding tiah zeicah kan ti khawh?

⁵ Jehovah nih uknak nawl a ngeihnak a dang a ruang pakhat hi zohhmanh. Jehovah nih a nawlngeihnak kha a ding bikmi lam in a hman. Hitin a ti: “Keimah cu BAWIPA ka si i a dong lomi dawtnak kha ka pek hna i vawleicung ah hin biading le dinnak kha ka tuah, hi thil hna hi ka lunglawmhnak an si.” (Jer. 9:24) Jehovah nih a dingmi biakhiahnak tuah awkah minung sermi phunglam a herh lo. Mah canah amah nih a dingmi phunglam hna kha a ser. Mah cungah hrambunh in minung kha nawlbia a pek hna. Salm caṭialtu nih hitin a ti: “Na pennak cu dinnak le biading cungah a hram bunh a si.” Cucaah Jehovah sinin kan hmuhmi nawlbia, phunglam asiloah biakhiahnak hna cu a dingmi an si. (Salm 89:14; 119:128) Satan nih Jehovah cu a ding lomi Uktu a si tiah a ti. Asinain amah Satan nih vawleicung ah dinnak a chuahter kho lo.

6. Jehovah nih uknak nawl a ngeihnak a dang a ruang pakhat cu zeidah a si?

⁶ Jehovah nih uknak nawl a ngeihnak a dang a ruang pakhat cu van le vawlei zohkhenhnak he aa tlaiin hngalhnak le fimnak a ngeih caah a si. Tahchunhnak ah, siibawi te nih an damh khawh lomi zawtnak hna damter khawhnak ṭhawnnak kha Pathian nih a Fapa a pek. (Matt. 4:23, 24; Mar. 5:25-29) Mah cu kan caah khuaruahhar thil an si ko nain Jehovah caah cun a si lo. Kan pum rianṭuanning hna kha ṭha tein a hngalh i a rawkmi vialte kha a damter khawh dih.  Mithi kha a thawhter khawh hna i leiser ral zong kha a kham khawh.

7. Jehovah fimnak cu Satan ukmi hi vawlei fimnak nakin zeitindah a ṭhat deuh?

⁷ Satan ukmi hi vawlei nih ramkhat le ramkhat karlak ah a ummi ralchanhnak hna kha a tawngtham kho lo. Jehovah fimnak lawnglawng nih vawleicung ah daihnak a chuahter khawh. (Isa. 2:3, 4; 54:13) Hitin a chimmi Paul bantukin kan intuar ve ko lai: “Pathian hi a va rum hringhran dah! A fimnak le a hngalhnak hi an va thuk hringhran dah! Biakhiahnak a tuahmi hi aho nih dah a sullam an purh khawh lai? A thil tining hi aho nih dah an hngalh khawh lai?”—Rom 11:33.

8. Jehovah ukning kha zeitindah na hmuh?

⁸ Kan hngalh cang bantukin Jehovah cu uknak nawl a ngei ti kha Baibal nih fiang tein a langhter. Cun a ṭha bik Uktu a sinak a ruang zong kha a langhter. A ruang pakhat cu dawtnak in a ukmi hi a si. Amah cu “zaangfahnak le velngeihnak in a khatmi Pathian a si, amah cu fawi tein a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian cu a si “ timi kong kan ruah tikah amah he kan i naih deuh. (Ex. 34:6) Pathian nih upatnak le hmaizahnak in a kan pehtlaih. Kanmahle kanmah kan i zohkhenh khawhmi nakin ṭha deuh in a kan zohkhenh khawh. Jehovah nih a salle kha thilṭha a thuhkanh hna tiah Satan nih a ti, asinain mah cu lihbia a si. Pathian nih zungzal nunnak kan hmuh khawh nakhnga a sunglawi tukmi a Fapa hmanh kha a kan pek.—Salm 84:11; Rom 8:32 rel.

9. Pathian nih pakhat cio hi a kan zohkhenh ti kha zeitindah kan hngalh?

⁹ Jehovah nih a mi hna kha an phu ningin a zohkhenh hna. Asinain pakhat cio zongin a zohkhenh hna. Hlanlio i a cangmi kong hi ruathmanh. Jehovah nih a mi pawl lamhruai awk le an ral pawl tei awkah biaceihtu pawl kha kum zathum chung hrawng a rak hman hna. Mah caan chung zongah Jehovah nih pakhat cio kha a rak zohkhenh hna. Mah lak i pakhat cu Ruth a si. Anih cu Israel miphun a si lo nain Jehovah biak awkah thil tampi a rak hlawt. Jehovah nih va le fapa a peknak thawngin thluachuah a pek. Mah lengah a fapa cu Messiah hringsortu pakhat a hung si. Baibal ah Ruth tuanbia kong aa ṭialnak cauk kha amah Ruth min in auh a si. Ruth nih a thawhṭhan tikah mah kong hna a hun hngalh lai i aa nuamh lai ning khi ruathmanh.—Ruth 4:13; Matt. 1:5, 16.

10. Jehovah uknak nih mi a ṭemṭawn lo tiah zeicah kan ti khawh?

¹⁰ Jehovah uknak nih mi kha a ṭemṭawn lo. Mah canah zalonnak le nuamhnak a hmuhter hna. (2 Kor. 3:17) David nih hitin a chim: “Upatnak le lianngannak cu a hmaiah an um, ṭhawnnak le lawmhnak cu a hmun chungah an um.” (1 Chan. 16:7, 27)  Salm caṭialtu Ethan nih hitin a ṭial: “Hla in nangmah an biami cu lunglawm an si, na zaangfahnak ceunak chung a ummi cu lunglawmmi an si. Nangmah thawngin chun nitlak an i lawm i na ṭhat ruangah nangmah cu an in thangṭhat.”—Salm 89:15, 16.

11. Jehovah cungnung bik a sinak cu a ṭha bik ti kan zumhnak kha zeitindah kan ṭhanter khawh?

¹¹ Jehovah ṭhatnak kong kan ruah deuhdeuh tikah a uknak cu a ṭha bik ti kha kan zumh chinchin lai. Hitin a chimmi Salm caṭialtu bantukin kan intuar ve lai: “Na biakinn chungah nikhat um cu hmun dang i ni thongkhat um nakin a ṭha deuh.” (Salm 84:10) Jehovah cu a kan sertu a si caah kan i nuamh khawh nakhnga zeidah a herh ti kha ṭha tein a hngalh. Kan herhmi nak tam deuh hmanhin a kan pek. Jehovah nih a kan halmi vialte cu kanmah ṭhatnak caah a si. Mah ca ṭhatnak kan hlawt hmanhah Jehovah nawl kan ngaih ahcun kan i nuam zungzal lai.—Isaiah 48:17 rel.

12. Jehovah cungnung bik a sinak kan bawmhnak a ruangpi cu zeidah a si?

¹² Khrih Kum Thongkhat Uknak a dih hnuah mi cheukhat nih Jehovah cungnung bik a sinak cu an ralchanh rih lai ti kha Baibal in kan hngalh. (Biat. 20:7, 8) Mah nih zeidah a chuahter lai? Mah tikah mi nih mah zawnruahnak lungput an langhter nakhnga Satan cu aa zuam lai. Satan cu cutin aa zuam zungzal. Jehovah nawl ngaih loin zungzal in kan nung kho ko tiah mi kha zumhter awkah aa zuam. Mah cu a hmaan lomi bia a si. Asinain ‘Cu bantuk lihbia kha ka zum maw?’ tiah kan i hal awk a si. Jehovah kha kan dawt taktak i van le vawlei uknak nawl a ngeimi a si ti kha kan zumh ahcun cu bantuk lihbia hna cu kan caah fihnung an si lai. Dawtnak in a ukmi, Jehovah i a uknak tang lawngah um kha kan duh lai.

13. Jehovah kan i zohchunh tikah cungnung bik a sinak kha zeitindah kan bawmhmi a si?

¹³ Kan hngalh cang bantukin Jehovah cu uknak nawl a ngeimi a si i a ukning zong a ṭha bikmi a si. Cungnung bik a sinak kha lungthin dihlak in bawmh awkah aa tlak. Jehovah cungah zumhawktlak tein kan um i amah kan i zohchunh tikah cungnung bik a sinak kan bawmhmi a si. Thil sining hna kha Jehovah duh ningin kan tawnghtham ahcun Jehovah uknak kha kan duh i kan bawmh ti kan langhtermi a si.—Efesa 5:1, 2 rel.

14. Khrihfa upa le chungkhar lu hna nih Jehovah kha zeitindah an i zohchunh khawh?

¹⁴ Jehovah nih a nawlngeihnak kha dawtnak in a hman zungzal ti kha Baibal in kan hngalh. Jehovah uknak a duhmi chungkhar lu le Khrihfa upa pawl nih cun Jehovah kha an i zohchunh lai i puarhrangpi in asiloah a uk in an uk hna lai lo. Lamkaltu Paul cu Pathian le a Fapa i zohchunh awkah fakpi in aa zuam. (1 Kor. 11:1) Midang kha a mawhchiat hna lo i a hmaanmi thil tuah awkah a hnek zong a hnek hna lo. Mah canah a hmaanmi thil tuah awkah nem tein a forh hna. (Rom 12:1; Efe. 4:1; File. 8-10) Mah cu Jehovah kha aa zohchunhmi a si. Midang kha dawtnak he kan pehtlaih hna tikah Jehovah cungnung bik a sinak kan bawmh a si.

15. Nawlngeimi hna upatnak thawngin Jehovah uknak kha zeitindah kan bawmh khawh?

¹⁵ Jehovah nih nawlngeihnak a pekmi hna kha kan upat hna i anmah he rian kan ṭuanṭinak thawng zongin Jehovah uknak kha kan bawmh khawh. Biakhiahnak pakhat he  aa tlaiin ṭha tein kan hngalhthiam lo asiloah kan hna a tlak lo hmanhah kan bawmh khawh ko. Vawlei mi nih cun cutin an tuah lo nain kannih tu nih cun Jehovah kha kan Uktu in kan cohlan caah cutin kan tuah. (Efe. 5:22, 23; 6:1-3; Heb. 13:17) Pathian nih kan caah a ṭha bikmi kha a duh caah nuamhnak kan hmu.

16. Pathian cungnung bik a sinak kan bawmh kha kan biakhiahnak in zeitindah kan langhter khawh?

¹⁶ Biakhiahnak kan tuah tik zongah Pathian cungnung bik a sinak kha kan bawmh khawh. Jehovah nih thil sining pakhat kip caah cuset khaset timi nawlbia a kan pe lo. Mah canah a ruahning tu kha a kan chimh. Mah nih kan tuah awk a simi thil kha hngalhthiam awkah a kan bawmh. Tahchunhnak ah, Khrihfa a simi nih zeidah nan i hruk awk a si i zeidah nan i hruk awk a si lo timi cazin kha Jehovah nih a kan pe lo. Mah canah aa tlakmi le zohdawhmi in i thuamh awk a si kha a langhter. (1 Tim. 2:9, 10) Kan biakhiahnak nih midang zeitindah a hnorsuan khawh hna ti zong ruahter a kan duh. (1 Kor. 10:31-33) Kanmah duhnak cungah si loin Jehovah duhnak le ruahnak cungah hrambunh in biakhiahnak kan tuahnak thawngin a uknak kan duh le kan bawmh kha kan langhter khawh.

17, 18. Nuva hna nih Jehovah cungnung bik a sinak an bawmh kha zeitindah an langhter khawh?

¹⁷ Aa ṭhiummi Khrihfa hna nih Jehovah  cungnung bik a sinak an bawmh khawhning lam pakhat hi ruathmanh. An innchungkhar cu an i ruahchan bantukin a si men lai lo. Buaibainak nganpipi hmanh an ngei men lai. Cutin a si ahcun Jehovah nih hlanlio Israel mi a rak pehtlaih hnaning an ruahnak thawngin ṭhatnak an hmu kho. Jehovah nih amahle amah kha a miphun caah va bantuk ka si tiah a ti. (Isa. 54:5; 62:4) A miphun nih atu le atu a ngaih an chiatter. Mah cu harnak in a khatmi chungkhar pakhat bantuk a si. Asinain Jehovah cu Israel mi cungah a lung a dong colh lo. Atu le atu a ngaihthiam hna i a biakam ningin a tuah zungzal.—Salm 106:43-45 rel.

¹⁸ Jehovah a dawmi chungkhar hna nih Jehovah kha an i zohchunh. An innchungkhar ah buaibainak a um hmanhah Baibal lamhruainak he aa ralkahmi lam in an tawngtham lo. Jehovah caah ṭhitum biakamnak cu a biapi tuk i pakhat le pakhat i “fon” hna seh ti a duh kha an hngalh. Nupa sualnak tuah lawngah Baibal ningin i ṭhen khawh a si i innchunghawi dang ngeih khawh a si. (Matt. 19:5, 6, 9) An innchungkhar hlawh a tlin nakhnga a si khawh chungin an i zuamnak thawngin Jehovah cungnung bik a sinak kha an bawmh.

19. Palhnak kan tuah tikah zeidah kan tuah awk a si?

¹⁹ Kan dihlak in mitlinglo kan si caah a caan ah Jehovah a ngaih a chiatter hngami thil kan tuah tawn. Mah kha a hngalh caah Jehovah nih Khrih tlanhnak man a kan pek. Cucaah palhnak pakhat kan tuah fatin Jehovah sinah ngaihthiamnak kan hal awk a si. (1 Johan 2:1, 2) Kan palhnak ruangah ngaihchiat lawng si loin fimnak tu kan i lak awk a si. A kan ngaithiam hngami le a kan bawm hngami Jehovah he naih tein um in biak zungzal kha kan duh.—Salm 103:3.

20. Jehovah cungnung bik a sinak kha atu in zeicah kan bawmh awk a si?

²⁰ Vawlei thar ah mi vialte cu Jehovah uknak tangah an um lai i a dingmi a lam kha an cawn lai. (Isa. 11:9) Asinain Jehovah ruahning le a duhning kha atu hmanhin kan cawn khawh. A rauhhlan ah Pathian nih uknak nawl a ngeihmi kong he aa tlaiin ahohmanh an lung a hring ti lai lo. Cucaah Jehovah nawl kan ngaihnak, zumhfek tein a rian kan ṭuannak le amah i zohchunh dingin a si khawh chung kan i zuamnak thawngin Jehovah cungnung bik a sinak kha atu in bawm hna u sih.