1, 2. San ala u mu fusutan? (Luku a fowtow na a bigin.)

ENKE fa u be si aini a artikel a fesi, Saatan taki Yehofa ná abi a leti fu tii libisama. A taki Yehofa nai tii libisama bun. Libisama o moo abi wan bun libi te den e tii denseefi. Saatan abi leti? Pakisei fa a libi be o de efu libisama be e tii denseefi, da den be e libi fu teego. Den be o moo abi wan bun libi efu Gadu á be e tii den? I be o moo abi wan bun libi efi i be e libi fu teego sondee taki Gadu tii yu?

² Nawan sama poi piki den akisi ya gi i. Ala u mu sidon pakisei den akisi ya bun. A sani ya o meke u si kiin taki a te Yehofa e tii wi, sani e waka bun. Boiti dati wi o fusutan taki neen u mu holibaka gi anga u hii ati. U sa biibi a sani ya, fu di a sikiifi aini Beibel. Meke u luku saide Beibel taki a Yehofa abi a leti fu tii hemel anga goontapu.

3. Saide Yehofa abi a leti fu tii hemel anga goontapu?

³ A Yehofa wawan abi a leti fu tii hemel anga goontapu, bika neen na a Moo Gaan Gadu. Boiti dati neen meke ala sani (1 Koloniki 29:11; Toli 4:24). Aini Openbaring 4:11 wi e leisi san pasa aini wan fisyun. Den 144.000 kownu di o tii anga Yesesi be e taki: „Yehofa wi Gadu, a yu fiti fu kisi ala gaandi, anga gafa anga makiti bika a yu meke ala sani. A di i be wani, neen ede meke den de. A yu meke den” (Openbaring 4:11). A Yehofa meke ala sani, neen meke a abi a leti fu tii ala sama a hemel anga goontapu.

4. Saide a gaandi di wi abi fu du san u wani anga u libi, nai gi u pasi fu taangayesi Gadu?

⁴ Saatan á meke nawan sani. Neen meke a ná abi a leti fu tii hemel anga goontapu. A di en anga den tu fosi libisama be abi taangayesi, meke den sitee anga Yehofa (Yelemiya 10:23). A di Yehofa gi Saatan anga libisama a gaandi fu du san den wani anga den libi, meke den be sa du a sani ya? Nono. Winsi den be sa du san den wani anga den libi, toku den á be abi a leti fu sitee anga Gadu. A sani ya e leli u taki te wan sama e taangayesi Gadu, da dati wani taki a nai wooko bun anga a gaandi di a abi fu du san a wani anga en libi. Enke libisama wi abi Yehofa fanowdu fu tii wi.

5. Saide Gadu e du sani a wan leti fasi ala yuu?

⁵ Meke u luku wan taa sani di e soi taki a Yehofa abi a leti fu tii wi. Ai koboloiki a makiti di a abi a wan bun fasi. A taigi u taki: „Mi a Yehofa, mi na a Gadu di e soi sama bun-ati, di e du sani a wan leti fasi. A mi na a Gadu di e du sani a wan leti fasi a goontapu. A den sani ya mi lobi. A so Yehofa taki” (Yelemiya 9:24). Yehofa ná abi den weiti fu libisama fanowdu fu soi en fa a mu du sani. Neen e soi sama fa den mu du sani a wan leti fasi. Fu di ai du sani a wan leti fasi, meke a gi libisama weiti. A psalm sikiifiman be taki: ’A kownusutuu fi en sete anga leti-du. Ai koti kuutu a wan letifasi tu.’ Neen meke ala den weiti di Yehofa gi u bun (Psalm 89:14; 119:128). Saatan taki Yehofa nai tii a wan leti fasi. Ma toku Saatan seefi á poi meke sani waka a wan leti fasi a goontapu.

6. San a wan fu den sani di e soi taki a Yehofa abi a leti fu tii?

⁶ Wan taa sani di e soi taki a Yehofa abi a leti fu tii wi, a fu di neen sabi fa a mu solugu den sani di de a hemel anga goontapu. Wi e si a sani ya kiin di en Manpikin be e deesi siki sama di a be de a goontapu. A be deesi wantu siki di nawan dataa be poi deesi (Mateyesi 4:23, 24; Malikisi 5:25-29). Anga ala fa wi e si den sani ya enke wonduu, toku Yehofa nai si den enke wonduu.  A sabi fa u sikin meke. A sabi san a mu du fu deesi u. A o meke dedesama kon a libi baka. Boiti dati a o meke sani enke gaan winta, seke doti, anga fuudu á de a goontapu moo.

7. Saide Yehofa koni moo ala den sama fu a goontapu fu Saatan?

⁷ A goontapu fu Saatan á poi meke sama libi na a wan aini wan kondee. A á poi meke den kondee fu goontapu libi na a wan anga denseefi tu. A Yehofa wawan abi a koni fu meke sama libi na a wan (Yesaya 2:3, 4; 54:13). Wi e fusutan saide apostel Pawlesi be taki: „Den belesi, a koni anga a sabi fu Gadu ipi tuutuu. Wi á poi fusutan fa ai kuutu sani. Wi á poi fusutan den pasi fi en tu!”—Romesama 11:33.

8. Fa yu e si a fasi fa Yehofa e tii?

⁸ Enke fa u be si, Beibel e soi kiin taki a Yehofa abi a leti fu tii wi. Beibel e soi tu taki neen na a moo bun Gadu di sa tii wi. Wan fu den sani di e soi taki neen na a moo bun tiiman, a fu di ai soi u taki a lobi u. Wi o moo lobi en te wi e sidon pakisei fa a abi ’tyali-ati anga switifasi. En ati nai boon gaw. Ai du bun ala yuu. Ai du ala san a taki’ (Ekisodesi 34:6). Den sani di Yehofa e du e soi taki ai lesipeki u. A nai si wi enke soso sani. Ai solugu u bun moo fa wi e solugu useefi. Didibii taki Gadu e kibii bun sani gi u, ma a lei a lei. A moo bun sani di Gadu be abi seefi a gi u fu u sa libi fu teego.—Leisi Psalm 84:11; Romesama 8:32.

9. Fa u du sabi taki Gadu e booko en ede anga ala sama?

⁹ Yehofa lobi a foluku fi en. Boiti dati ai booko en ede anga ala den sama di e dini en. Pakisei fa sani be waka aini a ten di pasa. Wan sani fu dii ondoo yali langa Yehofa be meke wantu man tii a foluku fi en. A be e meke den man ya wini den feyanti fu a foluku fi en. Ma den ten de, Yehofa be e poti pakisei na ala sama. Wan fu den sama ya a Rut. A á be de wan Islayelisama, ma toku a fika ala san a be abi fu dini Yehofa. Yehofa pai en fu a sani di a du. A gi en wan man anga wan manpikin. Boiti dati a manpikin fu Rut toon wan fu den afo fu a Mesiyas. Yehofa meke den sikiifi a toli fu Rut aini wan fu den buku fu Beibel di den e kai Rut. Fa i denki Rut o fii te a o sabi den sani ya di a o kon a libi baka?—Rut 4:13; Mateyesi 1:5, 16.

10. Saide u sa taki Yehofa nai tii a wan ogii-ati fasi?

¹⁰ Yehofa nai tii wi a wan ogii-ati fasi. Den sama di e dini en nai fii enke ai dwengi den, ma anga piisii den e dini en (2 Korentesama 3:17). David be taki fu Yehofa taki: „En a wan Gadu di e fende omen gafa, a gaandi di ai fende bigi. Kaakiti anga piisii de a pe ai tan” (1 Koloniki 16:7, 27). A psalm  sikiifiman Etan be taki: „Den sama di sabi san a wani taki fu bali piisii, de koloku. Yehofa den sama ya e waka anga a faya fi i fesi. A nen fi i e meke den piisii hii dei. A di yu e du sani a wan leti fasi meke den e moo hei.”—Psalm 89:15, 16.

11. San o yeepi u fu biibi taki Yehofa na a moo bun sama di sa tii wi?

¹¹ Te wi e sidon pakisei den bun fasi fu Yehofa, wi o moo si kiin taki neen na a moo bun sama di sa tii wi. Wi e fusutan fa a Psalm sikiifiman be e fii di a taki: „Bika wan kodo dei aini a dyali fi i tempel, bun moo wan dunsu yali a wan taa peesi” (Psalm 84:10). A Yehofa meke u, neen meke a sabi pilisisi san wi abi fanowdu fu de koloku. Ai gi u moo san wi abi fanowdu. Ala den sani di Yehofa taigi u fu du, e tyai wini gi u. Winsi u mu du wantu sani di á makiliki toku wi o piisii te u du san Yehofa taki.—Leisi Yesaya 48:17.

12. Saide u wani Yehofa tii wi?

¹² Beibel e soi taki baka te Yesesi o tii wan dunsu yali, son sama o taanga-yesi Yehofa (Openbaring 20:7, 8). Saide den o du a sani ya? A ten de, kande Saatan o meke moiti fu koli sama fu den du san den wani, enke fa a be du den ten di pasa. Kande a o puubei fu meke sama biibi taki den poi libi fu teego winsi den nai aliki Yehofa. A sani de o de wan gaan lei. Ma toku u mu akisi useefi taki: ’Mi o biibi a lei de?’ Efu u lobi Yehofa tuutuu, efu wi e biibi taki neen na a moo bun sama di sa tii wi, noiti wi o biibi a gaan lei de. U wani Yehofa tii wi, bika a lobi den sama di ai tii.

13. San wi e soi te wi e meke moiti fu waka a Yehofa baka?

¹³ Enke fa u si te anga now, a Yehofa abi a leti fu tii wi. Beibel e soi tu taki neen abi a leti fu tii hemel anga goontapu. Neen u mu holibaka gi. Wi e soi taki wi e holibaka gi en te wi e dini en winsi san e pasa anga te wi e waka neen baka. Te wi e meke moiti fu du sani enke Yehofa, wi e soi taki u lobi en. Wi e soi tu taki u wani a tii wi.—Leisi Efeisesama 5:1, 2.

14. Fa owluman anga osufamii edeman sa waka a Yehofa baka?

¹⁴ Beibel e soi taki Yehofa e koboloiki en makiti a wan fasi di e soi taki a lobi u. Osufamii edeman anga owluman di lobi Yehofa, o meke moiti fu de enke en. Den ná o du sani a wan ogii-ati fasi. Den ná o fooseli taawan tu. Apostel Pawlesi be e du ala san a be man fu waka a Yehofa anga en Manpikin baka (1 Korentesama 11:1). A á be e gi taawan sen efuso dwengi den fu du san bun. Ma a be e gi den taanga-sikin fu du san bun (Romesama 12:1; Efeisesama 4:1; Fileimon 8-10). Fu di Pawlesi be e du a sani ya meke a be e waka a Yehofa baka. Te wi e soi taawan taki u lobi den, wi e soi taki u wani Yehofa tii wi.

15. Fa wi e soi taki u wani Yehofa tii wi te wi e lesipeki den sama di a gi faantiwowtu?

¹⁵ Wi e soi taki u wani Yehofa tii wi te wi e wooko makandaa anga den sama di a gi faantiwowtu. U mu lesipeki den  tu. Winsi u nai fusutan saide den e du wan sani efuso winsi wi á lobi a fasi fa den kuutu wan toli, toku wi e holibaka gi den. Den sama fu a goontapu ya á de so. Ma fu di u wani Yehofa tii wi meke wi e du a sani ya (Efeisesama 5:22, 23; 6:1-3; Hebrewsama 13:17). Fu di Yehofa e taigi u sani di e tyai wini gi u, meke sani o waka bun efu u du san a taki.

16. Fa den sani di wi e du e soi taki u wani Yehofa tii wi?

¹⁶ Den sani di wi e du e soi efu u wani Yehofa tii wi. Yehofa á poti weiti gi u fu ala sani di u wani du, ma a taigi u fa ai denki. A sani ya e yeepi u fu sabi san u mu du. Yehofa á taigi u finifini sowtu koosi u mu wei anga sowtu koosi wi á mu wei. A wan enkii sani di a taigi u, a fu wei koosi di fiti wan Kotoigi fi en (1 Timotiyesi 2:9, 10). A wani u sidon pakisei fa taawan e si den sani di wi e du (1 Korentesama 10:31-33). Te wi e holi a fasi fa Yehofa e denki a pakisei fosi u du wan sani, wi e soi taki u lobi a fasi fa ai tii.

17, 18. Fa toowpaa sa soi taki den wani Yehofa tii den?

¹⁷ Fa toowpaa sa soi taki den wani Yehofa tii den? Kande a toowlibi á de  enke fa den be denki. Kande sani nai go bun aini a osufamii. Efu a sani de miti den, den sa pakisei fa Yehofa be libi anga den Islayelisama fu fositen. Yehofa be taigi den taki den neen uman, en a den man (Yesaya 54:5; 62:4). A omen leisi a foluku be e du sani di be hati Yehofa. A be de enke a toowlibi fu den anga Yehofa á be e go bun seefiseefi. Toku Yehofa á be e suku fu fika a foluku wantenwanten. Ma a gi den paadon omen leisi. Boiti dati a be e du san a paamisi den.—Leisi Psalm 106:43-45.

¹⁸ Toowpaa di lobi Yehofa mu meke moiti fu waka neen baka. Winsi polobelema de aini a toowlibi, den á mu meke moiti fu booko á toow sondee Beibel gi den pasi. Den sabi taki Yehofa nai si a sani di a man anga uman paamisi na a toow dei enke wan lawlaw sani. A á wani man anga uman paati. A te wan fu den waka fosi a toow sa booko. Bakaten den sa toow baka (Mateyesi 19:5, 6, 9). Te Kelesten e du ala san den man fu sani waka bun aini den toowlibi, den e soi taki den wani Yehofa tii den.

19. San u mu du te u meke wan fowtu?

¹⁹ Ala wi a sondu sama, neen meke son leisi wi e du sani di Yehofa á lobi. Yehofa sabi a sani de, neen meke a meke en Manpikin kon dede gi u. Efu u meke wan fowtu, u mu begi Yehofa fu a gi u paadon (1 Yohanisi 2:1, 2). Pe fu u sidon kusumi fu den fowtu di u meke, a moo betee u meke moiti fu leli wani sani fi en. U wani wi anga Yehofa toon mati, bika ai gi u paadon. Ai yeepi u tu te sani nai go bun fu u sa tan dini.—Psalm 103:3.

20. Saide u mu soi aini a ten ya taki u wani Yehofa tii wi?

²⁰ Aini a nyun goontapu Yehofa o tii ala sama. Yehofa o leli ala sama fu du sani a wan leti fasi (Yesaya 11:9). Ma nownow kaba u sa meke moiti fu sabi fa Yehofa e denki anga fa a wani u tyai useefi. Dyonson nawan sama o akisi enseefi efu Yehofa na a moo bun tiiman. Meke u du ala san u poi aini a ten ya fu aliki Yehofa, fu dini en winsi san e pasa, anga fu waka neen baka. Te wi e du den sani ya wi e soi taki u wani a tii wi.