1, 2. Tiap iku kitai patut pechayaka nama? (Peda gambar ba pun artikel.)

BAKA ke udah dikerandauka ba artikel sebedau tu, Sitan ngumbai Jehovah enda layak merintah mensia. Iya madahka, Jehovah enda merintah enggau lurus, lalu mensia deka lantang agi enti sida merintah diri empu. Kati utai ku Sitan nya betul? Uji gambarka enti mensia ulih merintah diri empu sereta idup belama iya. Kati sida deka lantang agi enti sida diperintah Petara? Kati nuan deka lantang agi enti ulih idup belama iya sereta bibas ari diperintah Petara?

² Nadai seiku orang ulih nyaut tanya nya ke nuan. Tiap iku kitai patut berundingka tanya nya enggau manah. Lalu ulih meda, chara Jehovah merintah nya ti pemadu badas, lalu Iya layak disukung kitai enggau pengabis ati. Kitai ulih pechayaka tu ketegal utai ti dibacha kitai dalam Bup Kudus. Aram  kitai meda utai ti dipadah Bup Kudus pasal hak Jehovah merintah dunya raya.

3. Nama kebuah Jehovah bisi hak nyadi Pemerintah?

³ Semina Jehovah aja ti nyadi Pemerintah dunya raya, laban Iya Petara sereta Penempa ti pemadu bekuasa. (1 Ban. 29:11; SKR. 4:24) Dalam genera pasal serega, sida 144,000 iku ke enggau Kristus nyadi raja madahka: ‘O Jehovah Petara kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.’ (Pem. 4:11) Jehovah nempa semua utai, nya alai Iya bisi hak merintah atas semua orang ti ba dunya tauka di serega.

4. Nama kebuah peluang bibas milih enda ngemendarka kitai angkat ngelaban Petara?

⁴ Sitan nadai nempa nama-nama utai. Nya alai iya nadai hak merintah dunya raya. Sitan enggau dua iku mensia ti keterubah enggai ngasi lebuh sida angkat ngelaban hak Jehovah merintah. (Jer. 10:23) Kati peluang bibas milih ngemendarka sida nulak hak Jehovah merintah? Nadai. Peluang bibas milih ngemendarka orang milih sereta ngaga pemutus, tang enda ngemendarka orang angkat ngelaban Penempa, Jehovah. Amat, angkat ngelaban Jehovah reti nya salah nguna peluang bibas milih. Kitai begunaka Jehovah merintah sereta ngiring kitai.

5. Nama kebuah pemutus ke digaga Petara seruran lurus?

⁵ Pikirka siti agi kebuah Jehovah bisi hak merintah. Iya ngena kuasa Iya enggau chara ti pemadu lurus. Ku Iya madahka: “Aku rindu ngayanka pengerindu enggau pengelurus di dunya tu, laban nya meh utai ti ngasuh ati Aku gaga.” (Jer. 9:24) Jehovah enda begunaka adat mensia nulung Iya mutuska bagi utai ti betul. Tang, Iya netapka standard ke utai ti betul. Lalu Jehovah meri adat ngagai mensia beduduk ba pengelurus Iya ti sempurna. Ku pemasmur madahka: “Perintah Nuan beduduk ba pengelurus enggau atur ti manah.” Nya alai tiap iti adat, prinsip, sereta pemutus ke datai ari Jehovah endang betul. (Mas. 89:14; 119:128) Sitan ngumbai Jehovah nya Pemerintah ti enda lurus. Tang, Sitan empu enda ulih meri pengelurus ngagai dunya.

6. Nama siti da agi kebuah Jehovah bisi hak merintah?

⁶ Siti da agi kebuah Jehovah bisi hak merintah, iya nya Iya ngembuan penemu sereta penemu-dalam kena nyaga dunya raya. Kitai meda tu ari chara Iya meri penau ngagai Anak Iya kena ngeraika penyakit ke enda ulih digeraika lutur. (Mat. 4:23, 24; Mrk. 5:25-29) Taja pan tu kereja ajih ba kitai, tang ba Jehovah ukai. Iya nemu chara tubuh bekereja, lalu tubuh ulih ngeraika diri empu. Jehovah mega ulih ngangkatka orang mati idup baru sereta  nagang pengerusak alam ari nyadi.

7. Baka ni Jehovah nya pintar agi ari semua orang ke bisi ba dunya Sitan?

⁷ Dunya ke diperintah Sitan enda ulih ngenataika pemaik, sekalika ba menua tauka entara menua. Semina Jehovah ke bisi penemu-dalam kena mai pemaik ngagai dunya. (Isa. 2:3, 4; 54:13) Kitai ngasaika utai ti diasaika rasul Paul lebuh iya nyebut: ‘Naka meh pemesai pengaya Petara! Naka meh pemintar enggau penalam penemu Iya! Nadai orang tetemuka atur enggau jalai Iya!’—Rom. 11:33.

8. Baka ni asai ati nuan pasal chara Jehovah merintah?

⁸ Baka ke udah ditemu kitai, Bup Kudus enggau terang nunjukka Jehovah bisi hak merintah. Bup Kudus mega nunjukka kebuah Jehovah nya Pemerintah ti pemadu badas. Siti kebuah nya Iya merintah enggau pengerindu. Kitai berasai semak enggau Iya lebuh kitai mikirka Iya nya “kasih sereta siru, lubah ringat, sereta mandangka penetap ati enggau pengerindu ti besai.” (P-sut. 34:6) Petara ngintu kitai enggau manah sereta basa. Iya ibuhka kitai lebih agi ari kitai ke ibuhka diri empu. Sitan madahka, Jehovah ngenan utai ti manah ari bala nembiak Iya, tang tu enda amat. Petara indah meri Anak Iya ti berega ngambika kitai ngembuan pengadang idup belama iya.—Bacha Masmur 84:11; Rome 8:32.

9. Baka ni kitai nemu Petara ibuhka kitai seiku-seiku?

⁹ Jehovah rinduka semua nembiak Iya. Tang Iya mega rindu deka nemu tiap iku kitai. Pikirka utai ke nyadi kelia menya. Kira-kira pengelama tiga ratus taun, Jehovah ngena bala pengulu ngiring nembiak Iya, lalu nulung sida menang ngalahka munsuh. Lalu sepemanjai timpuh nya, Jehovah agi beratika nembiak Iya seiku-seiku. Seiku ari sida nya indu ke benama Rut. Iya ukai bansa Israel, tang iya udah ngelengkaka mayuh utai ngambika ulih nyadi penyembah Jehovah. Jehovah merekatka iya enggau seiku laki sereta anak lelaki. Tang ukai nya aja, anak Rut nyadi seiku ari peturun ke ngadaka Messiah. Jehovah mega udah ngasuh cherita pasal pengidup Rut ditulis dalam Bup Kudus, ba bup mit ke ngangkatka nama iya. Ulih nuan gambarka baka ni asai ati Rut lebuh iya idup baru, lalu nemu pasal utai tu?—Rut 4:13; Mat. 1:5, 16.

10. Nama kebuah kitai ulih ngumbai chara Jehovah merintah enda kasar?

¹⁰ Chara Jehovah merintah enda kasar. Nya alai, orang ke ngasika Iya berasai bibas sereta gaga ati. (2 Kor. 3:17) Ku David madah pasal Jehovah: “Iya endang bemulia sereta bekuasa. Kuasa enggau pengaga ngemenuhka Rumah Sembiang Iya.” (1 Ban. 16:7, 27) Pemasmur Etan nulis: “Beberekat meh orang ke nyembah Nuan ngena lagu, orang ke diau dalam penampak penelap Nuan! Sida rami gaga sepemanjai hari ketegal Nuan, lalu  sida muji Nuan ketegal pemadas Nuan.”—Mas. 89:15, 16.

11. Baka ni kitai tau andal agi ke chara Jehovah merintah nya ti pemadu badas?

¹¹ Bendar agi kitai belematika pemadas Jehovah, kitai deka andal agi ke chara Iya merintah nya ti pemadu badas. Kitai ngasaika utai ti diasaika pemasmur ke madah ngagai Petara: “Sehari dalam Rumah Nuan manah agi ari seribu hari ba endur bukai.” (Mas. 84:10) Jehovah nempa sereta ngaga kitai, nya alai Iya amat nemu utai ke deka ngasuh kitai lantang ati. Iya enggau gerah jari meri utai lebih ari ti diguna kitai. Semua utai ti diasuh Jehovah kereja kitai endang ke pemanah kitai empu. Taja pan kitai patut ngelengkaka sekeda utai, kitai deka seruran lantang ati enti kitai ngasika Jehovah.—Bacha Isaiah 48:17.

12. Nama batang kebuah kitai nyukung chara Jehovah merintah?

¹² Ari Bup Kudus kitai nemu, pengudah Seribu Taun Kristus Merintah, sekeda orang deka angkat ngelaban hak Jehovah merintah. (Pem. 20:7, 8) Nama ke ngasuh sida ngelaban? Maya nya, Sitan nguji deka ngasuh orang bisi ulah ti semina berundingka diri empu aja. Iya udah suah ngereja nya. Iya nguji deka ngasuh orang pechayaka diri ulih idup belama iya enggau enda ibuh ngasika Jehovah. Tu utai ti bula. Tang kitai patut nanya diri empu, ‘Kati aku deka pechayaka utai ti bula baka nya?’ Enti kitai amat rinduka Jehovah, lalu pechaya Iya endang manah sereta bisi hak merintah dunya raya, kitai tentu begedika pemula nya. Kitai semina deka idup di baruh perintah Jehovah ke merintah enggau pengerindu.

13. Baka ni kitai nyukung chara Petara merintah enti kitai neladan Iya?

¹³ Baka ke udah ditemu kitai, Jehovah bisi hak merintah, lalu chara Iya merintah endang pemadu badas. Chara Iya merintah patut disukung kitai enggau pengabis ati. Kitai nunjukka diri nyukung enti kitai taluk ngagai Jehovah sereta neladan Iya. Lebuh kitai enggau naka ulih ngereja utai nitihka chara Jehovah, kitai nunjukka diri rindu sereta nyukung chara Iya merintah.—Bacha Epesus 5:1, 2.

14. Baka ni bala tuai gempuru enggau tuai bilik ulih neladan Jehovah?

¹⁴ Ari Bup Kudus kitai nemu, Jehovah seruran ngena kuasa Iya enggau chara ti bisi pengerindu. Bala tuai bilik enggau tuai gempuru ke rinduka chara Jehovah merintah deka neladan Jehovah sereta enda kasar tauka deka bekuasa atas diri sebilik enggau orang bukai. Rasul Paul bebendar deka neladan Petara sereta Anak Iya. (1 Kor. 11:1) Paul enda ngemaluka orang bukai tauka ngansak sida ngereja utai ti ngena. Tang, iya enggau manah ati meransang sida ngereja utai ti ngena. (Rom. 12:1; Eps. 4:1; Plm. 8-10) Enggau ngereja tu, Paul neladan Jehovah. Lebuh kitai ngintu orang bukai enggau pengerindu, kitai nyukung chara Jehovah merintah.

15. Baka ni kitai nyukung chara Jehovah merintah enti masa orang ke udah diberi kuasa?

¹⁵ Kitai mega nyukung chara Jehovah merintah enti masa sereta bekerejasama enggau orang ke udah diberi Iya kuasa. Taja pan kitai enda entu meretika tauka setuju enggau pemutus ke digaga sida, kitai agi nyukung sida. Orang ba dunya nadai  ngereja tu, tang tu meh utai ti dikereja kitai enti nerima Jehovah nyadika Pemerintah kitai. (Eps. 5:22, 23; 6:1-3; Heb. 13:17) Lalu kitai ulih lantang ati, laban Jehovah dekaka utai ti pemadu badas ke kitai.

16. Baka ni pemutus ke digaga kitai ulih nunjukka diri nyukung chara Jehovah merintah?

¹⁶ Kitai mega ulih nyukung chara Jehovah merintah ari pemutus ke digaga kitai. Jehovah enda meri pesan ti nyemetak ngagai kitai ke tiap iti gaya utai ba pengidup. Tang Iya madah ngagai kitai chara Iya berunding. Iya nulung kitai nemu utai ti patut digaga. Ngambika chunto, Jehovah nadai meri orang Kristian lis gari ke patut enggau ke enda patut dikena. Tang Iya madahka, kitai patut penumbas iya sereta manah enti nyadi Saksi-Saksi Iya. (1 Tim. 2:9, 10) Iya deka kitai mikirka baka ni pemutus kitai bekaul enggau orang bukai. (1 Kor. 10:31-33) Lebuh kitai ngaga pemutus ti nitihka chara Jehovah berunding, kitai nunjukka diri rindu sereta nyukung chara Iya merintah.

17, 18. Baka ni orang ke berumah-tangga ulih nunjukka diri nyukung hak Jehovah merintah?

¹⁷ Peratika siti chara orang Kristian ke berumah-tangga ulih nyukung hak Jehovah  merintah. Rumah tangga enda entu mujur baka ti dikedekaka seduai iya. Seduai iya indah bisi penusah ti besai. Enti pia, seduai iya tau bulih penguntung ari berundingka chara Jehovah ngintu bansa Israel kelia. Jehovah ngambarka Diri Empu baka seiku laki ke nembiak Iya. (Isa. 54:5; 62:4) Bansa Israel suah ngenusahka ati Jehovah. Kaul nya baka rumah tangga ke bisi penusah. Tang Jehovah enda beguai ngelengkaka bansa Israel. Iya suah ngampun sida lalu ngamatka semaya Iya enggau sida.—Bacha Masmur 106:43-45.

¹⁸ Orang Kristian ke berumah-tangga ti rinduka Jehovah nguji neladan Iya. Taja pan bisi penusah ba rumah tangga, sida enda ngiga chara ti enda sejalai enggau Bup Kudus ngambika ulih sarak. Sida nemu ba Jehovah semaya jadi melaki-bini nya hal ti berat, lalu Iya dekaka laki enggau bini “begulai” enggau pangan diri. Bup Kudus madahka, semina ulah seks ti kamah ke ulih ngasuh orang tau sarak, lalu bibas jadi enggau orang bukai. (Mat. 19:5, 6, 9) Lebuh orang Kristian enggau naka ulih deka ngemujurka rumah tangga sida, sida nyukung hak Jehovah merintah.

19. Nama patut digaga kitai lebuh ngereja penyalah?

¹⁹ Semua kitai enda sempurna, lalu kekadang kitai ngereja utai ti ngenusahka ati Jehovah. Iya nemu tu, nya kebuah Iya nyediaka Kristus nyadika tebus. Nya alai, lebuh kitai ngereja penyalah, kitai patut minta Jehovah ngampun kitai. (1 Jhn. 2:1, 2) Ari ke berasai tusah ati enggau penyalah ke digaga kitai, kitai patut belajar ari penyalah nya. Kitai deka mengkang semak enggau Jehovah, ke deka ngampun, sereta nulung kitai kering baru ba pengarap lalu terus nyembah Iya.—Mas. 103:3.

20. Nama kebuah kitai patut nyukung hak Jehovah merintah ari diatu?

²⁰ Ba dunya baru, semua orang deka diperintah Jehovah sereta deka belajarka jalai Iya ti lurus. (Isa. 11:9) Indah diatu kitai ulih belajar mayuh pasal chara Iya berunding sereta baka ni Iya deka kitai mutarka penusah nya. Enda lama agi, nadai orang deka nanya hak Petara merintah. Nya alai, aram meh semua kitai ari diatu enggau naka ulih nyukung hak Jehovah merintah enggau ngasika Iya, nyembah Iya enggau tetap ati, sereta enggau naka ulih neladan Iya dalam semua utai ke dikereja kitai.