1, 2. Wetin wi ɔl nid fɔ no klia wan? (Luk di pikchɔ nia dis atikul in taytul.)

AS WI bin dɔn lan na di las atikul, Setan bin tɔk se Jiova nɔ fit fɔ rul mɔtalman. I se Jiova nɔ de rul fia wan, ɛn mɔtalman go gladi mɔ if dɛn rul dɛnsɛf. Yu tink se Setan bin rayt? Imajin se mɔtalman de rul dɛnsɛf ɛn dɛn ebul fɔ de sote go. Yu tink se dɛn go gladi pas if Gɔd rul dɛn? Yu tink se yu go gladi if yu de sote go ɛn nɔ de ɔnda Gɔd in rul atɔl?

² Nɔbɔdi nɔ go ansa dɛn kwɛstyɔn dɛn de fɔ yu. Wi ɔl nid fɔ tek tɛm tink bɔt dɛn. Dɔn i go klia se na di we aw Jiova de rul na di bɛst, ɛn i fit fɔ mek wi sɔpɔt am wit ɔl wi at. Wi biliv se na tru bikɔs na dat wi rid na di Baybul. Lɛ wi si wetin di Baybul se bɔt Jiova in rayt fɔ rul di wan ol wɔl.

3. Wetin mek Jiova gɛt di rayt fɔ bi wi Rula?

³ Na Jiova nɔmɔ na di Rula oba di wan ol wɔl, bikɔs na in na di ɔlmayti Gɔd ɛn na In mek ɔltin. (Fɔs Kronikul 29:​11; Di Apɔsul Dɛn Wok [Akt] 4:​24) Insay wan vishɔn we Jɔn bin si na ɛvin, di 144,000 kiŋ dɛn we de rul wit Krays bin se: “Wi Masta ɛn wi Gɔd [“Jiova,” NW]! Yu fit fɔ mek wi fɔdɔm na yu fut, ɛn prez yu, ɛn sho se yu gɛt pawa, bikɔs na yu mek ɔltin ɛn yu mek dɛn ɛn gi dɛn layf bikɔs na dat yu want.” (Rɛvɛleshɔn 4:​11) Na Jiova mek ɔltin, so i gɛt di rayt fɔ rul oba ɔlman, wɛda na dis wɔl ɔ na ɛvin.

4. Wetin mek di fridɔm fɔ disayd wetin wi want fɔ du nɔ gi wi di rayt fɔ tɔn wi bak pan Gɔd?

⁴ Setan nɔ mek natin. So i nɔ gɛt ɛni rayt fɔ rul di wan ol wɔl. Setan ɛn Adam ɛn Iv bin chalenj Jiova in rayt fɔ rul we dɛn tɔn dɛn bak pan am. (Jɛrimaya 10:​23) Yu tink se di fridɔm we dɛn bin gɛt fɔ disayd wetin dɛn want fɔ du, bin gi dɛn di rayt fɔ tɔn dɛn bak pan Jiova? Nɔ, i nɔ gi dɛn da rayt de. Di fridɔm we wi gɛt, de ɛp wi fɔ disayd wetin wi want fɔ du, bɔt i nɔ gi wi di rayt fɔ tɔn wi bak pan Jiova, we mek ɔltin. So we wi tɔn wi bak pan Gɔd, i de sho klia wan se wi dɔn yuz di fridɔm we wi gɛt fɔ disayd wetin wi want fɔ du di rɔng we. As mɔtalman, wi nid Jiova fɔ rul wi ɛn gayd wi.

5. Wetin mek di tin dɛn we Gɔd de disayd kin rayt ɔltɛm?

⁵ Tink bɔt wan ɔda rizin we mek na Jiova gɛt di rayt fɔ rul. I de yuz in pawa fɔ du wetin rayt. I tɛl wi se: “Mi na PAPA GƆD [“Jiova,” NW] we mi lɔv nɔ de shek, a de trit ɔlman di sem, ɛn a de waka tret na dis wɔl; bikɔs na dɛn tin ya de mek a gladi.” (Jɛrimaya 9:​24) Jiova nɔ nid mɔtalman lɔ dɛn fɔ ɛp am fɔ disayd wetin rayt. Bifo dat, i sɛt in yon we fɔ wetin rayt. Bikɔs Jiova na Gɔd we de du wetin rayt, i gi lɔ dɛn to mɔtalman. Wan pan di man dɛn we rayt di Sam buk bin se: “Pipul no yu as udat gud ɛn de rul fia wan.” So ɛni lɔ, lɛsin, advays, ɛn ɛnitin we Jiova disayd na di rayt tin. (Sam 89:​14; 119:​128) Setan bin tɔk se Jiova nɔ de rul fia wan. Bɔt Setan insɛf nɔ ebul mek pipul dɛn du wetin rayt na di wɔl.

6. Wetin na wan rizin we de sho se na Jiova gɛt di rayt fɔ rul?

⁶ Wan ɔda rizin bak we mek Jiova gɛt di rayt fɔ rul, na dat i sabi aw fɔ rul ɛn i gɛt sɛns fɔ kia fɔ di wan ol wɔl. Wi kin si dis bay we i bin gi in Pikin di pawa fɔ mɛn ɔlkayn sik we no dɔktɔ nɔ ebul fɔ mɛn. (Matyu 4:​23, 24; Mak 5:​25-29) Pan ɔl we dɛn tin dɛn ya na mirekul to wi, nɔto mirekul to Jiova. I ɔndastand aw di bɔdi de  wok, ɛn i go mɛn ɛni sik we de insay di bɔdi. I go gi layf bak to di wan dɛn we dɔn day ɛn stɔp tin dɛn lɛk atkwek, ebi ebi ren, ɛn ɔda bad bad tin dɛn.

7. Wetin mek wi go se Jiova gɛt sɛns pas ɛnibɔdi na Setan in wɔl?

⁷ Di wɔl we Setan de rul nɔ go gɛt pis, ilɛk na insay wan kɔntri ɔ bitwin difrɛn kɔntri dɛn. Na Jiova nɔmɔ gɛt di sɛns fɔ briŋ pis na di wɔl. (Ayzaya 2:​3, 4; 54:​13) Wi kin fil lɛk di apɔsul Pɔl we bin se: “Gɔd gɛt bɔku bɔku sɛns we nɔn mɔtalman nɔ gɛt ɛn i sabi ɔltin! Udat ebul ɛksplen wetindu Gɔd mekɔp fɔ du dɛn tin we i de du, ɔ ɔndastand wetin i de du?”—Lɛta Fɔ Rom 11:​33.

8. Aw yu fil bɔt di we aw Jiova de rul?

⁸ As wi bin dɔn lan, di Baybul sho klia wan se na Jiova gɛt di rayt fɔ rul. I sho bak wetin mek na in na di bɛst Rula. Wan rizin na dat i de rul wit lɔv. Wi kin go nia am we wi tink bɔt aw i ‘gud ɛn de sho masi, i nɔ gɛt wam-at, in lɔv nɔ de fel ɛn na Gɔd we pɔsin kin put in op ɛn trɔst pan.’ (Ɛksodɔs 34:​6) Gɔd de trit wi wit ɔnɔ ɛn rɛspɛkt. I bisin bɔt wi pas aw wi bisin bɔt wisɛf. Setan se Jiova nɔ de gi gud tin to In savant dɛn, bɔt dat nɔto tru. Gɔd bin ivin sakrifays in Pikin we i lɛk, so dat wi go gɛt layf we go de sote go.—Rid Sam 84:​11; Lɛta Fɔ Rom 8:​32.

9. Aw wi no se Gɔd bisin bɔt wi wan bay wan?

⁹ Jiova lɛk ɔl in pipul dɛn ɛn i bisin bɔt dɛn wan bay wan. Tink bɔt wetin bin apin trade trade. Fɔ lɛk tri ɔndrɛd ia, Jiova bin de yuz jɔj dɛn fɔ gayd in pipul dɛn ɛn mek dɛn win dɛn ɛnimi dɛn pan fɛt. Te to dis tɛm Jiva de stil pe atɛnshɔn to in pipul dɛn wan bay wan. Wan pan dɛn pipul dɛn ya na wan uman we nem Ruth. In nɔto bin Izrɛlayt, ɛn i bin lɛf bɔku tin dɛn biɛn fɔ mek i go bi Jiova in savant. Jiova bin blɛs am wit man ɛn wan bɔypikin. Bɔt di blɛsin we pas ɔl na dat, Ruth in pikin bin de na di famili layn usay di Mɛsaya kɔmɔt. Jiova bin mek dɛn rayt Ruth in stori na di Baybul, insay wan buk we gɛt in nem. Imajin aw Ruth go fil we i go gɛt layf bak ɛn lan bɔt ɔl dɛn tin ya.—Ruth 4:​13; Matyu 1:​5, 16.

10. Wetin mek wi go se Jiova nɔto wikɛd rula?

¹⁰ Jiova nɔto wikɛd rula. Di wan dɛn we de obe am go fil fri ɛn gɛt gladi at. (Sɛkɛn Lɛta Fɔ Kɔrint 3:​17) Devid bin tɔk bɔt Jiova se: “Nain gɛt ɔl ɔna ɛn pawa; trɛnk ɛn gladi de usay i de.” (Fɔs Kronikul 16:​7, 27) Itan na bin wan ɔda man we rayt di Sam buk. I bin se: “PAPA GƆD [“Jiova,” NW], pɔsin we dɔn lan fɔ siŋ prez to yu gɛt blɛsin; dɛn pipul we de du wetin yu want, gɛt blɛsin. Yu de mek dɛn at swit ɛvride; dɛn de gladi se yu na PAPA GƆD we gud to dɛn.”—Sam 89:​15, 16.

11. Wetin go mek wi biliv tranga wan se di we aw Jiova de rul na di bɛst?

 ¹¹ Di mɔ wi tink bɔt aw Jiova gud, na di mɔ wi go gri se na in na di bɛst Rula. Wi go fil lɛk wan pan di man dɛn we rayt di Sam buk we tɛl Gɔd se: “Waŋren de insay PAPA GƆD in os bɛtɛ pas wan tawzin de na ɔda say.” (Sam 84:​10) Na Jiova mek wi, so i no wetin go mek wi gɛt gladi at. I de gi wi pas wetin wi nid. Ɛnitin we Jiova aks wi fɔ du na fɔ wi yon gud. Ivin if wi lɛf bɔku tin dɛn biɛn fɔ wok fɔ Jiova, wi go gladi ɔltɛm if wi obe am.—Rid Ayzaya 48:​17.

12. Wetin na di men rizin we mek wi fɔ sɔpɔt Gɔd se na in gɛt di rayt fɔ rul?

¹² Wi lan na di Baybul fɔ se afta di Wan Tawzin Ia we Krays go rul, sɔm pipul dɛn go tɔn dɛn bak pan di we aw Jiova de rul. (Rɛvɛleshɔn 20:​7, 8) Wetin go mek dɛn du dat? Na bikɔs da tɛm de, Setan go tray fɔ mek pipul dɛn du wetin dɛn want. Na dat i bin dɔn de du ɔltɛm. I go tray fɔ ful pipul dɛn fɔ se dɛn go de sote go ilɛksɛf dɛn nɔ obe Jiova. Dis nɔ go ɛva bi tru. Bɔt wi fɔ aks wisɛf dis kwɛstyɔn, ‘A go biliv dis kayn lay?’ If wi rili lɛk Jiova ɛn wi biliv tranga wan se i gud, ɛn i gɛt di rayt fɔ rul di wan ol wɔl, dat go mek wi rili et da kayn lay de. Wi go want fɔ de ɔnda Gɔd we de rul wit lɔv.

13. Aw wi de sɔpɔt di we aw Gɔd de rul we wi falamakata am?

¹³ As wi bin dɔn lan, na Jiova gɛt di rayt fɔ rul ɛn di we aw i de rul na di bɛst. I rili fit fɔ mek wi sɔpɔt am. Wi de sɔpɔt di we aw i de rul bay we wi kɔntinyu fɔ de biɛn am ɛn falamakata am. We wi du wi bɛst fɔ du tin di we aw Jiova want, wi de sho se wi lɛk am ɛn wi de sɔpɔt di we aw i de rul.—Rid Lɛta Fɔ Ɛfisɔs 5:​1, 2.

14. Aw ɛlda dɛn ɛn di wan dɛn we de bifo di famili go falamakata Jiova?

¹⁴ Wi dɔn lan frɔm di Baybul se ɔltɛm Jiova de yuz in pawa di kayn we we de sho se i lɛk wi. Di wan dɛn we de bifo di famili ɛn di ɛlda dɛn we lɛk di we aw Jiova de rul, go falamakata am. Dɛn nɔ go trit pipul dɛn bad ɔ jɔs de kɔntrol dɛn aw dɛn want. Di apɔsul Pɔl bin tray tranga wan fɔ falamakata Gɔd ɛn in Pikin. (Fɔs Lɛta Fɔ Kɔrint 11:​1) I nɔ bin de mek ɔda pipul dɛn fil bad ɔ fos dɛn fɔ du wetin rayt. Bifo dat, i bin de tek tɛm ɛnkɔrej dɛn fɔ du wetin rayt. (Lɛta Fɔ Rom 12:​1; Lɛta Fɔ Ɛfisɔs 4:​1; Faylimɔn 8-10) We Pɔl bin de du dis, i bin de falamakata Jiova. We wi trit ɔda pipul dɛn wit lɔv, wi de sɔpɔt di we aw Jiova de rul.

15. Aw wi go sɔpɔt di we aw Jiova de rul bay we wi sho rɛspɛkt fɔ di wan dɛn we de oba wi?

¹⁵ Wi go sɔpɔt bak di we aw Jiova de rul we wi sho rɛspɛkt ɛn wok togɛda wit di wan dɛn we i dɔn put oba wi. Ilɛksɛf wi nɔ ɔndastand ɔ gri wit wetin dɛn disayd, wi fɔ stil sɔpɔt dɛn. Pipul dɛn na di wɔl nɔ de du dis, bɔt na dat wi fɔ du fɔ sho se wi want fɔ mek Jiova rul wi. (Lɛta Fɔ Ɛfisɔs 5:​22, 23; 6:​1-3; Di Ibru Pipul Dɛn 13:​17) Dɔn wi go gladi bikɔs Gɔd want di bɛst fɔ wi.

16. Aw di tin dɛn we wi de disayd fɔ du de sho se wi de sɔpɔt di we aw Gɔd de rul?

 ¹⁶ Wi go sɔpɔt bak di we aw Jiova de rul bay wetin wi de disayd fɔ du. Jiova nɔ gi wi lɔ fɔ ɔltin we de mit wi na layf. Bifo dat, i tɛl wi aw i de tink. Dis ɛp wi fɔ ɔndastand wetin wi fɔ du. Fɔ ɛgzampul, Jiova nɔ gi Kristian dɛn list we de sho wetin dɛn fɔ du ɔ wetin dɛn fɔ wɛr. Bifo dat, i ɛksplen se wi we na in Witnɛs dɛn, fɔ drɛs fayn ɛn di we we go mek pipul dɛn rɛspɛkt wi. (Fɔs Lɛta To Timoti 2:​9, 10) I want mek wi tink bɔt aw di tin dɛn we wi de disayd fɔ du go afɛkt ɔda pipul dɛn. (Fɔs Lɛta Fɔ Kɔrint 10:​31-33) We wi disayd fɔ du tin di we aw Jiova de tink, wi de sho se wi lɛk am ɛn wi de sɔpɔt di we aw i de rul.

17, 18. Aw maredman ɛn mareduman dɛn go sho se dɛn de sɔpɔt Jiova se na in gɛt di rayt rul?

¹⁷ Tink bɔt wan we aw Kristian dɛn we mared go sɔpɔt di we aw Jiova de rul. Sɔntɛm, di mared-os nɔ go bi di we aw dɛn tink se i fɔ bi. Dɛn go de ivin gɛt siriɔs prɔblɛm dɛn. If na so i bi, dɛn go bɛnifit bay we dɛn tink bɔt aw Jiova bin de trit di Izrɛlayt dɛn trade. Jiova bin tan lɛk maredman to in pipul dɛn. (Ayzaya 54:​5; 62:​4)  Di Izrɛlayt dɛn bin de mek Jiova in at pwɛl pasmak. Dat bin tan lɛk we prɔblɛm kin de na mared-os. Bɔt Jiova nɔ bin giv ɔp kwik kwik wan pan di Izrɛlayt dɛn. Bifo dat, i bin de fɔgiv dɛn bɔku bɔku tɛm ɛn i bin kip in prɔmis we i mek to dɛn.—Rid Sam 106:​43-45.

¹⁸ Kristian dɛn we mared we lɛk Jiova kin tray fɔ falamakata am. Ivin if prɔblɛm dɛn de na dɛn mared-os, dɛn nɔ de luk fɔ we dɛn we nɔ gri wit wetin di Baybul se fɔ ɛnd dɛn prɔblɛm. Dɛn no se Jiova de tek di vaw we pɔsin de mek we i mared, as sɔntin we rili siriɔs, ɛn i want maredman ɛn mareduman fɔ ‘de togɛda.’ Di wangren rizin we di Baybul gi we go mek maredman ɛn in wɛf dayvɔs ɛn dɛn fri fɔ mared ɔda pɔsin, na we wan pan dɛn go du mami ɛn dadi biznɛs wit ɔda pɔsin. (Matyu 19:​5, 6, 9) We Kristian dɛn du ɔl wetin dɛn ebul fɔ mek dɛn mared-os las, dɛn de sɔpɔt Jiova se na in gɛt rayt fɔ rul.

19. Wetin wi fɔ du we wi mek mistek?

¹⁹ Wi ɔl nɔ pafɛkt, ɛn sɔntɛnde, wi kin du tin we de mek Jiova in at pwɛl. I no dis, na dat mek i sɛn in Pikin fɔ kam day fɔ wi. So we wi mek mistek, wi fɔ beg Jiova fɔ mek i fɔgiv wi. (Jɔn In Fɔs Lɛta 2:​1, 2) Wi nɔ fɔ jɔs fil bad bɔt wi mistek, wi fɔ tray fɔ lan frɔm am. Wi want fɔ kɔntinyu fɔ de nia Jiova, we go fɔgiv wi, ɛp wi fɔ fil fayn, ɛn ɛp wi fɔ kɔntinyu fɔ sav am.—Sam 103:​3.

20. Wetin mek na naw wi fɔ sho se na Jiova gɛt di rayt fɔ rul?

²⁰ Insay di nyu wɔl, ɔlman go de ɔnda Gɔd in rul ɛn dɛn go lan in we dɛn we rayt. (Ayzaya 11:​9) Bɔt ivin rayt naw, wi go lan mɔ bɔt aw i de tink ɛn aw i want wi fɔ du tin. I nɔ go te igen, nɔbɔdi nɔ go chalenj Gɔd in rayt fɔ rul. So lɛ wi du ɔl wetin wi ebul naw fɔ sho se na Jiova gɛt di rayt fɔ rul bay we wi de obe am, wɔship am fetful wan, ɛn tray fɔ du wi bɛst fɔ falamakata am pan ɔl wetin wi de du.