1, 2. Ki kitsoz sakenn parmi nou bizin sir? (Get zimaz dan koumansman lartik.)

DAN lartik avan, nou ti trouve kouma Satan pretann ki Zeova pa merite diriz bann dimounn. Li dir ki Zeova pa diriz ar lazistis ek ki bann dimounn pou pli ere si zot diriz zot par zotmem. Me eski Satan ena rezon? Sey mazine ki bann dimounn ti kapav diriz zot par zotmem ek viv pou touletan. Eski zot ti pou pli ere ki si Bondie ti diriz zot? Eski twa, to ti pou pli ere si to ti kapav viv pou touletan san okenn direksion ki vinn depi Bondie?

² Personn pa kapav reponn sa bann kestion-la pou twa. Sakenn parmi nou bizin reflesi bien lor sa bann kestion-la. Lerla, li pou kler ki se Zeova ki ena meyer fason pou dirize ek ki Li merite ki nou soutenir Li ar tou nou leker. Nou kapav gagn sa lasirans-la kan nou lir seki ena dan Labib. Anou gete seki Labib dir lor drwa ki Zeova ena pou diriz liniver.

3. Kifer Zeova ena drwa pou diriz liniver?

³ Zeova tousel ki Souverin liniver parski Limem  Bondie Tou-Pwisan ek Kreater. (1 Kronik 29:11; Zistwar Bann Apot 4:24) Revelasion 4:11 dekrir enn vizion kot bann 144,000, setadir bann lerwa ki pou dirize ansam avek Zezi dan lesiel, pe dir: “To dign, Zeova nou Bondie, pou gagn laglwar, loner ek pouvwar, parski to finn kree tou kitsoz, ek akoz to volonte zot existe ek zot finn kree.” (Revelasion 4:11, NW.) Zeova finn kree tou kitsoz, alor Li ena drwa pou diriz lor tou so kreasion, ki li lor later ouswa dan lesiel.

4. Kifer nou liberte pou swazir pa donn nou drwa pou rebel kont Bondie?

⁴ Satan pa finn kree nanye. Alor, li pena okenn drwa pou diriz liniver. Satan ek premie koup imin, Adan ek Ev, finn montre zot insolan kan zot finn rebel kont souverennte Zeova. (Zeremi 10:23) Zot ti ena liberte pou swazir, me eski sa ti donn zot drwa pou rezet dominasion Bondie? Non. Gras-a so liberte pou swazir, enn dimounn ena drwa pou fer bann swa ek pran bann desizion, me sa pa donn li drwa pou rebel kont so Kreater, Zeova. Li kler ki, kan kikenn rebel kont Bondie, li pe mal servi so liberte pou swazir. Antan ki bann imin, nou bizin ki Zeova gid nou ek diriz nou.

5. Kifer eski bann desizion ki Bondie pran zot touletan zis?

⁵ Reflesi lor enn lot rezon kifer Zeova ena drwa pou dirize. Bondie servi so lotorite dan enn fason zis ek parfe. Zeova dir: “Mwa mo Zeova, mo manifeste lamour fidel, lazistis ek ladrwatir lor later, se sa bann kitsoz-la ki mo vremem kontan.” (Zeremi 9:24) Zeova pa bizin bann lalwa ki bann imin inn etabli pou dir Li seki bon ek seki pa bon. Okontrer, se Li ki fixe bann lalwa lor seki bon ek seki pa bon. Ek bann lalwa ki Zeova etabli pou bann imin zot baze lor so lazistis ki parfe. Enn ekrivin Psom ti dir: “To [“dominasion,” NW] finn konstrir lor drwatir ek lazistis.” Alor, sak lalwa, prinsip, ek desizion ki vinn depi Zeova, zot zis. (Psom 89:14; 119:128) Satan pretann ki Zeova Li pa diriz ar lazistis. Me Satan limem pa kapav amenn lazistis dan lemond.

6. Sit enn rezon kifer Zeova ena drwa pou dirize?

⁶ Enn lot rezon kifer Zeova ena drwa dirize, se ki Li ena konesans ek sazes ki bizin pou pran swin liniver. Par exanp, Zeova ti donn so Garson kapasite pou geri bann maladi ki okenn dokter pa ti pou kapav geri. (Matie 4:23, 24; Mark 5:25-29) Mem si nou konsider sa bann gerizon-la kouma bann mirak, pou Zeova sa pa ti bann mirak. Li konpran kouma nou lekor fonksione ek li kapav geri ninport ki maladi. Li kapav fer bann dimounn mor reviv ek osi aret bann katastrof natirel.

7. Kifer Zeova Li pli saz ki ninport kisannla ki dan lemond Satan?

 ⁷ Satan pa kapav amenn lape lor later, ni dan enn pei, ni ant plizir pei. Zis Zeova ki ena lasazes ki bizin pou amenn lape lor later. (Izai 2:3, 4; 54:13) Nou ena mem santiman ki lapot Pol ki ti ekrir: “Konbien larises Bondie li gran! Konbien so sazes ek so konesans profon! Kisannla kapav explik so desizion? Kisannla kapav konpran so plan?”—Romin 11:33.

8. Ki to panse lor fason ki Zeova dirize?

⁸ Kouma nou finn trouve, Labib explike dan enn fason bien kler ki Zeova ena drwa pou dirize. Labib dir nou osi kifer Zeova meyer Dirizan ki ena. Enn parmi bann rezon, se parski Li diriz avek amour. Nou santi nou pros ar Li kan nou reflesi kouma Li “enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans.” (Exod 34:6) Bondie tret nou avek dignite ek respe. Li pran nou swin pli bien ki noumem. Satan Lediab koz manti kan li dir ki Zeova pa donn So bann serviter bann bon kitsoz. Bondie finn mem donn nou so Garson ki Li bien kontan pou ki nou kapav ena lespwar pou viv pou touletan.—Lir Psom 84:11, NW; Romin 8:32.

9. Kouma nou kone ki Zeova interes Li ar sak dimounn?

⁹ Zeova kontan so bann serviter antan ki enn group. Me Li interes Li osi boukou ar sak dimounn. Reflesi lor seki ti arive dan lepok Biblik. Pandan apepre 300 an, Zeova ti servi bann ziz pou gid so pep ek fer zot gagn laviktwar lor zot bann lennmi. Selman, pandan tou sa letan-la, Zeova ti kanmem interes Li ar sak dimounn. Anou pran lexanp Rit. Li pa ti enn Izraelit ek li ti abandonn boukou kitsoz pou li kapav vinn enn serviter Zeova. Zeova ti rekonpans Rit ek ti fer li gagn enn mari ek enn zanfan. Me seki pli inportan, garson Rit ti vinn enn anset Lemesi. Zeova ti osi fer ekrir Rit so zistwar dan liv Labib ki port so nom. Mazine ki santiman Rit pou ena kan li pou resisite ek li pou aprann tousala!—Rit 4:13; Matie 1:5, 16.

10. Kifer nou kapav dir ki Zeova pa diriz dan enn fason kriel ek dir?

¹⁰ Zeova pa diriz dan enn fason kriel ek dir. Okontrer, bann dimounn ki obeir Li, zot santi zot lib ek zot zwaye. (2 Korintien 3:17) David ti dir Zeova: “Kot to ete ena dignite ek laglwar: kot to reste ena lafors ek lazwa.” (1 Kronik 16:7, 27) Enn ekrivin Psom ki apel Etann ti ekrir: “Zot bien ere bann dimounn ki loue twa dan lazwa. A Zeova, zot kontign mars avek twa ek zot gagn to faver. Zot zwaye toutlong lazourne akoz to nom, ek zot  gagn laglwar gras-a to lazistis.”—Psom 89:15, 16, NW.

11. Kouma nou kapav gagn plis konviksion ki Zeova Limem meyer Dirizan ki ena?

¹¹ Plis nou medit lor bann kalite ki Zeova ena, plis nou pou gagn konviksion ki Limem meyer Dirizan ki ena. Nou ena mem santiman ki sa ekrivin Psom ki ti dir Zeova: “Enn zourne dan to [“lakour,” NW] li vo plis ki mil zourne dan enn lot landrwa.” (Psom 84:10) Zeova finn kree nou, alor Li konn bien seki nou bizin pou ki nou ere. Li donn nou bien plis ki seki nou bizin. Ek tou seki Zeova demann nou se pou nou prop dibien. Mem si nou bizin fer bann sakrifis, nou pou touletan ere si nou obeir Zeova.—Lir Izai 48:17. *

12. Pou ki rezon prinsipal nou soutenir souverennte Zeova?

¹² Labib explik nou ki pou ena bann dimounn ki pou rebel kont souverennte Zeova apre Regn Mil An Zezi Kris. (Revelasion 20:7, 8) Me kifer zot pou fer sa? Pandan sa letan-la, Satan pou esey fer bann dimounn azir dan enn fason egois. Touletan li finn fer sa. Kitfwa li pou esey konvink bann imin ki zot kapav viv pou touletan san ki zot obeir Zeova. Me sa li inposib! Alor nou bizin demann noumem: ‘Eski mo pou krwar sa mansonz-la?’ Si nou vremem kontan Zeova, ki nou sir ki Li bon, ek ki Li ena drwa diriz liniver, alor nou pou rezet sa mansonz degoutan-la. Nou pou anvi viv zis anba souverennte Zeova, nou Bondie ki diriz avek amour.

13. Kan nou imit Zeova, kouma sa montre ki nou soutenir so souverennte?

¹³ Kouma nou finn trouve, Zeova ena drwa pou dirize ek fason ki Li dirize pli bon ki ena. Li merite ki nou soutenir so souverennte san poursan. Nou soutenir so souverennte kan nou fidel anver Zeova ek kan nou imit Li. Kan nou fer nou maximum pou azir parey kouma Zeova, nou montre ki nou kontan ek ki nou soutenir fason ki Li dirize.—Lir Efezien 5:1, 2.

14. Kouma bann sef fami ek bann ansien kapav imit Zeova?

¹⁴ Labib montre nou ki Zeova touletan servi so lotorite avek amour. Bann sef fami ek bann ansien ki kontan souverennte Zeova pou swiv so lexanp, ek zot pa pou fer dominer ek rod kontrol lavi lezot. Lapot Pol ti fer boukou zefor pou imit Bondie ek so Garson. (1 Korintien 11:1) Li pa ti met lezot malalez ouswa ti fors zot fer seki bon. Okontrer, li ti ankouraz zot avek bonte pou fer seki bon. (Romin 12:1; Efezien 4:1; Filemon 8-10) Kan li ti azir koumsa, Pol ti imit Zeova. Kan nou montre lamour anver lezot, nou soutenir souverennte Zeova.

15. Kouma nou soutenir dominasion Bondie kan nou respekte bann dimounn ki ena lotorite?

¹⁵ Nou osi soutenir dominasion Zeova kan nou respekte ek korper  avek bann dimounn ki Li finn donn lotorite. Mem si nou pa konpran bien ouswa nou pa dakor avek enn desizion ki zot inn pran, kanmem sa nou soutenir zot. Dan lemond, bann dimounn pa azir koumsa, me se koumsa ki nou azir kan nou aksepte Zeova kouma nou Dirizan. (Efezien 5:22, 23; 6:1-3; Ebre 13:17) Lerla nou ere, parski Bondie anvi seki pli bon pou nou.

16. Kouma nou kapav montre ki nou soutenir souverennte Zeova dan bann desizion ki nou pran?

¹⁶ Nou kapav osi soutenir souverennte Zeova dan bann desizion ki nou pran. Zeova pa dir nou seki nou bizin fer dan sak sitiasion. Me Li dir nou kouma Li panse, ek sa ed nou konpran seki nou bizin fer. Par exanp, Zeova pa donn bann Kretien enn lalis linz ki zot kapav ouswa pa kapav mete. Me Li explik nou ki nou bizin abiy dan enn fason dign ek modes parski nou so bann Temwin. (1 Timote 2:9, 10) Li anvi ki nou reflesi lor lefe ki nou bann desizion pou ena lor lezot. (1 Korintien 10:31-33) Kan nou bann desizion baze lor fason panse Zeova, nou montre ki nou kontan ek soutenir fason ki Li dirize.

17, 18. Kouma bann Kretien marye kapav montre ki zot soutenir souverennte Zeova?

 ¹⁷ Anou get enn fason kouma bann Kretien marye kapav soutenir souverennte Zeova. Kitfwa lavi maryaz enn koup pa pe pas kouma zot ti pe atann. Kitfwa mem zot pe gagn bann gro problem. Dan sa sitiasion-la, zot kapav tir bann leson kan zot reflesi lor fason ki Zeova ti tret nasion Izrael dan lepase. Zeova ti dir ki Li ti kouma enn mari pou sa nasion-la. (Izai 54:5; 62:4) Plizir fwa sa nasion-la ti desevwar Zeova. Relasion ki Zeova ti ena avek so pep ti kouma enn maryaz bien difisil. Me Zeova pa ti prese pou abandonn so pep. Okontrer, Li ti kontign pardonn zot a-sak fwa, ek Li ti respekte bann promes ki Li ti fer zot.—Lir Psom 106:43-45.

¹⁸ Bann Kretien marye ki kontan Zeova pou esey imit Li. Mem si ena bann problem dan zot maryaz, zot pa pou rod bann rezon ki pa Biblik pou divors ar zot kamarad. Zot kone ki bann ve maryaz sakre pou Zeova ek ki Li anvi ki mari-fam ‘atase’ ar zot kamarad. Limoralite sexiel se sel rezon Biblik kot enn kikenn kapav divors ar so konzwin ek kot li lib pou remarye. (Matie 19:5, 6, 9) Kan bann Kretien fer tou seki zot kapav pou ki zot maryaz ere, zot soutenir souverennte Zeova.

19. Ki nou bizin fer kan nou fer bann erer?

¹⁹ Nou tou nou inparfe, ek parfwa nou fer bann kitsoz ki desevwar Zeova. Li konpran sa, ek se pou sa rezon-la ki Li finn avoy so Garson pou donn so lavi pou nou. Alor, kan nou fer enn erer, nou bizin demann Zeova pardon. (1 Zan 2:1, 2) Olie ki nou kontign repros noumem akoz bann erer ki nou’nn fer, anou esey tir bann leson ar sa bann erer-la. Nou anvi res pros ar Zeova, ki dispoze pou pardonn nou. Li pou ed nou osi pou geri lor plan spiritiel ek pou kontign servi Li.—Psom 103:3.

20. Kifer nou bizin soutenir souverennte Zeova depi asterla mem?

²⁰ Dan lemond nouvo, tou dimounn pou aksepte dominasion Zeova ek pou aprann so bann prinsip ki zis. (Izai 11:9) Me mem asterla, nou kapav aprann boukou lor so fason panse ek fason ki Li anvi nou azir. Biento, personn pa pou met an dout drwa ki Bondie ena pou dirize. Alor, anou fer tou seki nou kapav pou soutenir souverennte Zeova depi asterla mem, kan nou obeir Li, servi Li avek fidelite, ek fer nou maximum pou imit Li dan tou seki nou fer.