1, 2. Niki eki buri omwe ahariitwe ashemereire kuba naahamya? (Reeba ekishushani aha kutandika.)

NK’OKU tureebire omu kicweka ekihwaire, Sitaane naagira ngu Yehova tahikire kutegyeka abantu. Naagira ngu Yehova tarikutegyeka omu muringo murungi, kandi ngu abantu bakaagizire okushemererwa baaba nibetegyeka. Kwonka shi Sitaane ahikire? Teera akashushani oreebe ekirikubaasa kubaho abantu baayetegyeka, kandi bakatuuraho ebiro byona. Mbwenu shi nibabaasa kushemererwa munonga kukira baaba nibategyekwa Ruhanga? Kandi iwe noobaasa kushemererwa waatuuraho ebiro byona otarikutegyekwa Ruhanga?

² Tihaine orikubaasa kukugarukiramu ebibuuzo ebi. Buri omwe aine kubiteekateekaho n’obwegyendesereza. Obwo noija kureeba ngu omuringo ogu Yehova arikutegyekamu nigwo gurikukirayo oburungi, kandi tushemereire kumushagika n’omutima gwaitu gwona. Ebi turikushoma omu Baibuli nibibaasa kutuhwera kuhamya ekyo. Ka tureebe eki Baibuli erikugamba ahari Yehova ohikire kutegyeka byona.

3. Ahabw’enki Yehova niwe ahikire kuba Rukira Boona?

³ Yehova niwe Rukira Boona ahakuba niwe Ruhanga ow’obushoboorozi bwona kandi Omuhangi. (1 Obusingye 29:11; Ebyakozirwe 4:24) Omu kworekwa kw’omu iguru, abagabe 144,000 abaraategyeke na Yesu niboorekwa barikugira bati: “Mukama Ruhanga waitu, oshemereire kuhimbisibwa n’okuheebwa ekitiinisa n’obushoboorozi, ahabw’okuba niiwe waahangire byona; ahabw’okukunda kwawe bikahangwa kandi byabaho.” (Okushuuruura 4:11) Yehova akahanga ebintu byona, n’ahabw’ekyo aine obugabe bw’okutegyeka buri kimwe omu nsi n’omu iguru.

4. Ahabw’enki okwecweramu kutarikutuha obugabe bw’okugomera Ruhanga?

⁴ Sitaane tarahangire kintu na kimwe. N’ahabw’ekyo taine bugabe bwona obw’okutegyeka ensi yoona. Sitaane hamwe n’omushaija n’omukazi ab’okubanza bakaba ebihanda obu baahakanisa Yehova ohikire kutegyeka byona. (Yeremia 10:23) Mbwenu shi ahabw’okugira ngu bakaba nibabaasa kwecweramu nikimanyisa ngu bakaba baine obugabe bw’okwanga obutegyeki bwa Yehova? Ngaaha. Okwecweramu nikubaasisa omuntu kutoorana eki arikwenda, beitu kutari kugomera Yehova Omuhangi. Buzima, okugomera Ruhanga nikuba kuri okukoresa kubi obugabe bw’okwecweramu. Itwe abantu nitwetenga obutegyeki bwa Yehova n’obuhabuzi bwe.

5. Ahabw’enki ebi Ruhanga arikucwamu nibiba biri eby’oburingaaniza?

⁵ Teekateeka aha nshonga endiijo ahabw’enki Yehova niwe ahikire kutegyeka. Naakoresa obushoboorozi bwe omu muringo gw’oburingaaniza obuhikiriire. Naatugambira ngu ndi Yehova “okora omu nsi eby’embabazi, eby’oburyo n’eby’okuhikiirira; ahabw’okuba ebyo nibyo nshemerererwa.” (Yeremia 9:24) Yehova tarikwetenga ebiragiro by’abantu kumuhwera kucwamu ekihikire. Omu mwanya gw’ekyo, naataho omutindo gw’ebihikire. Yehova arikwihirira aha buringaaniza bwe obuhikiriire, akaha abantu ebiragiro. Omuhandiiki wa Zaaburi akagira ati: “Okuhikiirira n’amaani niyo misingi y’ekitebe kyawe ky’obukama.” N’ahabw’ekyo ebi Yehova arikucwamu, emisingye, n’ebiragiro ebi arikutuha bihikire. (Zaaburi 89:14; 119:128) Sitaane naagira ngu Yehova ti mutegyeki murungi. Buzima, Sitaane tarikubaasa kureeta oburingaaniza omu nsi.

6. Ni nshonga ki emwe erikworeka ngu Yehova aine obushoboorozi bw’okutegyeka?

⁶ Enshonga endiijo ahabw’enki Ruhanga ahikire kutegyeka n’okugira ngu aine okumanya n’obwengye bw’okureeberera ebihangirwe. Eki nitukireebera aha maani agu Omwana we yaakoreise kukiza endwara ezi abashaho batarikubaasa kutamba. (Matayo 4:23, 24; Mako 5:25-29) N’obu ebi biraabe biri eby’okutangaaza ahariitwe, ti by’okutangaaza ahari Yehova. Naayetegyereza oku omubiri gurikukora, kandi naabaasa kukiza obumuga bwagwo bwona. Naabaasa kuhimbuura abaafiire, kandi azibire n’ebihikiirizi kubaho.

7. Ahabw’enki Yehova n’omunyabwengye kukira omuntu weena omu nsi ya Sitaane?

 ⁷ Obutegyeki bwa Sitaane tiburikubaasa kureeta obusingye, yaaba omu ihanga nari ahagati y’amahanga agandi. Yehova wenka niwe aine obwengye bw’okureetaho obusingye omu nsi yoona. (Isaaya 2:3, 4; 54:13) Nitwehurira nk’oku entumwa Paulo yaayehuriire obu yaagira ati: “Yeimwe! obutungi bwa Ruhanga, obwengye bwe n’okumanya kwe ka bitaine bugarukiro! Emicwere ye [y’emanja] n’emitwarize ye tibirikubaasa kumanywa!”​—Abarooma 11:33.

8. Niki ekirikukushemeza kurugiirira aha muringo ogu Yehova arikutegyekamu?

⁸ Nk’oku twaheza kureeba, Baibuli neeyoreka gye ngu Yehova niwe aine obugabe bw’okutegyeka. Kandi Baibuli neegaruka eyoreka ahabw’enki niwe Mutegyeki orikukirayo oburungi. Enshonga emwe eri ngu naategyeka omu muringo gwa rukundo. Nitumwirira haihi ahabw’okumanya ngu ni Ruhanga “ow’okusaasira n’embabazi, otarahuka kugira ekiniga, oijwire embabazi n’amazima.” (Okuruga 34:6) Ruhanga naatutwariza omu muringo gw’ekitiinisa. Naatufaho kukira oku turikwefaho. Omuregi naagira ngu Yehova naima ebirungi abaheereza be, kwonka ekyo n’ekishuba. Ruhanga akatuha n’Omwana we ow’omuhendo kugira ngu tugire amatsiko g’okugumaho ebiro byona.​—Shoma Zaaburi 84:11; Abarooma 8:32.

9. Nitumanya tuta ngu Ruhanga naafayo ahari buri omwe ahariitwe?

⁹ Yehova naakunda abantu be boona nk’ekibiina. Kwonka naakunda na buri omwe ahariitwe. Teekateeka aha byabaireho ira. Kumara emyaka nka 300, Yehova akakoresa abaramuzi kwebembera eihanga rye, kandi yaabahwera n’okusingura abazigu baabo. Kumara obwire obwo bwona, Yehova akaba naafayo ahari buri omwe omuribo. Omwe aharibo akaba ari omukazi orikwetwa Ruusi. Akaba atari Mwisraeli, kandi akaba ayefeerereize bingi kuba omuheereza wa Yehova. Yehova akamushuumbusha iba murungi n’omwana w’omwojo. Kwonka ekirikukira ahari ekyo, mutabani wa Ruusi akaba ari omu runyiriri orwarugiremu Mesia. Kandi Yehova akabaasisa ebyafaayo bya Ruusi kuhandiikwa omu Baibuli, omu kitabo ekirikwetererwa eiziina rye. Nooteekateeka ngu Ruusi naija kwehurira ata yaazooka akamanya ebintu ebi?​—Ruusi 4:13; Matayo 1:5, 16.

10. Ahabw’enki turikugira ngu obutegyeki bwa Yehova tiburimu omwaga?

¹⁰ Obutegyeki bwa Yehova ti bw’omwaga. Omu mwanya gw’ekyo, abo abarikumworobera nibaba baine obugabe n’okushemererwa. (2 Abakorinso 3:17) Daudi akagamba ahari Yehova ati: “Ekitiinisa n’obukuru bimwebembeire; amaani n’okushemererwa biri ahi atuura.” (1 Obusingye 16:7, 27) Omuhandiiki wa Zaaburi Esani akahandiika ati: “Abarikumanya eiraka ry’okushemererwa baine omugisha; bagyendera omu mushana gw’amaisho gaawe, ai Mukama. Beesiimira eiziina ryawe eizooba ryona; kandi omu kuhikiirira kwawe nimwo batunguurirwa.”​—Zaaburi 89:15, 16.

11. Nitubaasa kwongyera kuhamya tuta ngu obutegyeki bwa Yehova nibwo burikukirayo?

 ¹¹ Oku turikweyongyera kuteekateeka aha burungi bwa Yehova, nikwo turikweyongyera kuhamya ngu obutegyeki bwe nibwo burungi. Nituhurira nk’omuhandiiki wa Zaaburi owaagambire ahari Ruhanga ati: “Ahakuba okumara ekiro kimwe omu bikaari byawe nikikira okumara ebiro rukumi ahandi.” (Zaaburi 84:10) Yehova niwe yaatuhangire, n’ahabw’ekyo naamanya ekirikutureetera okushemererwa. Ahabw’okugira ngu n’efura naatuha bingi kukira ebi turikwetenga. Buri kimwe eki Yehova arikutugambira kukora n’eky’oburungi bwaitu. N’obu twakugira ebi twayefeerereza, butoosha nitwija kushemererwa twayorobera Yehova.​—Shoma Isaaya 48:17.

12. Ni nshonga ki enkuru erikutureetera kushagika Yehova ohikire kutegyeka byona?

¹² Nitwega omu Baibuli ngu bwanyima y’Obutegyeki bwa Yesu obw’Emyaka Rukumi, abamwe nibaija kwanga kwikiriza Yehova ngu niwe ahikire kutegyeka byona. (Okushuuruurwa 20:7, 8) Niki ekirikwija kubareetera kukora ekyo? Omu bwire obwo, Omuregi naija kuteeraho kubeihabeiha abantu kutwaza omu muringo gw’okweyendeza. Kandi ekyo atwire naakikora. Naabaasa kuteeraho kubeihabeiha abantu ngu nibaija kutuuraho ebiro byona batarikworobera Ruhanga. Aga ti mazima. Kwonka twine kwebuuza tuti: ‘Nimbaasa kwikiriza ekishuba nk’ekyo?’ Buzima twaba nitukunda Yehova turikuhamya ngu ni murungi, kandi ngu niwe ahikire kutegyeka byona, obwo ekishuba nk’ekyo nikiija kuba kiri ekirikunugwa ahariitwe. Nitwija kwenda kuguma ahansi y’obutegyeki bwa Yehova, orikutegyeka omu muringo gwa rukundo.

13. Twatooreza Ruhanga ohikire kutegyeka byona ekyo nikyoreka kita ngu nitumushagika?

¹³ Nk’oku twaheza kureeba, Yehova aine obugabe bw’okutegyeka, kandi omuringo ogu arikutegyekamu nigwo gurikukirayo oburungi. Twine kumushagika ahabw’okuba ohikire kutegyeka byona. Nitushagika Yehova twamuhamiraho kandi tukamutooreza. Twakora kyona ekirikubaasika kutwaza nk’oku Yehova arikutwaza, nitworeka ngu nitukunda omuringo ogu arikutegyekamu, kandi ngu nitumushagika.​—Shoma Abaefeso 5:1, 2.

14. Abareeberezi n’emitwe y’amaka nibabaasa kutooreza bata Yehova?

¹⁴ Kuruga omu Baibuli nitwega ngu Yehova butoosha naakoresa amaani ge omu muringo gwa rukundo. Emitwe y’amaka n’abareeberezi abarikukunda Yehova ohikire kutegyeka byona, nibamutooreza batarikukoresa kubi obushoboorozi bwabo. Entumwa Paulo akateeraho munonga kutooreza Ruhanga n’Omwana we. (1 Abakorinso 11:1) Akaba atarikuhemura abandi nari kubagyema kukora ekihikire. Omu mwanya gw’ekyo, akabahiga kukora ekihikire. (Abarooma 12:1; Abaefeso 4:1; Filemooni 8-10) Paulo omu kukora eki, akatooreza Yehova. Twatwariza abandi omu muringo gwa rukundo, nituba nitushagika Yehova ohikire kutegyeka byona.

15. Nitushagika tuta obutegyeki bwa Yehova twaha ekitiinisa abaine obushoboorozi?

¹⁵ Kandi nitushagika obutegyeki bwa Yehova twaha ekitiinisa abo abu ahaire obushoboorozi kandi tukakwatanisa nabo. Twaba tutarikwetegyereza gye eki bacwiremu nari tutarikwikirizana nakyo, nabwo nitubashagika.  Eki nikitaana n’oku ensi erikutwaza, kwonka twaba nitwikiriza obutegyeki bwa Yehova, nikwo tushemereire kutwaza. (Abaefeso 5:22, 23; 6:1-3; Abaheburaayo 13:17) Kandi nitushemererwa, ahabw’okugira ngu Ruhanga naatwendeza ekirikukirayo oburungi.

16. Ebi turikucwamu nibyoreka bita ngu nitushagika Ruhanga ohikire kutegyeka byona?

¹⁶ Kandi nitubaasa kushagika obutegyeki bwa Ruhanga kurabira omu bi turikucwamu. Yehova tarikutuha ekiragiro ahari buri nshonga yoona. Kureka naatugambira emiteekateekyere ye. Eki nikituhwera kwetegyereza eki tushemereire kukora. Nk’eky’okureeberaho, Yehova tarikuha Abakristaayo omushororongo gw’ebiragiro ebirikukwata aha bi baine kujwara n’ebi bataine kujwara. Omu mwanya gw’ekyo, naashoboorora ngu twine kujwara omu muringo oguringaniire kandi ogurikutuhaisa ekitiinisa nk’Abajurizi be. (1 Timoseo 2:9, 10) Naayenda ngu tuteekateekye aha ku ebi turikucwamu birikukwata aha bandi. (1 Abakorinso 10:31-33) Twacwamu kurugiirira aha ku Yehova arikuteekateeka, nitworeka ngu nitukunda omuringo ogu arikutegyekamu kandi ngu nitumushagika.

17, 18. Abari omu bushwere nibabaasa kworeka bata ngu nibashagika Yehova ohikire kutegyeka?

¹⁷ Reeba omuringo gumwe ogu Abakristaayo abari omu bushwere barikubaasa kushagika Yehova ohikire kutegyeka byona. Abamwe obushwere bwabo nibubaasa kuba  butari nk’oku baabaire nibateekateeka. Nangwa nibabaasa kuba baine n’oburemeezi bw’amaani. Kyaba kiri kityo, nibabaasa kuteekateeka aha ku Yehova yaatwariize eihanga rya Israeli erya ira. Yehova naayegambaho nk’owaabaire ari ibabo. (Isaaya 54:5; 62:4) Eihanga eryo rikareebya Yehova emirundi mingi. Omukago gwabo na Yehova gukaba guri nk’okuba omu bushwere bugumire. Kwonka Yehova akaba atarikurahuka kubarugaho. Omu mwanya gw’ekyo, emirundi mingi akaba abasaasira, kandi aguma naijuka ebi yaabaraganiise.​—Shoma Zaaburi 106:43-45.

¹⁸ Abakristaayo abari omu bushwere abarikukunda Yehova nibateeraho kumutooreza. Obushwere bwabo n’obu bwakuba burimu oburemeezi, tibarikuburugamu omu muringo ogurikuhenda emisingye ya Baibuli. Nibamanya ngu Yehova naatwara endagaano y’obushwere nka nkuru, kandi naayenda ngu omushaija n’omukazi we ‘bagume’ kumwe. Kurugiirira aha Byahandiikirwe, obushambani nibwo bwonka oburikubaasa kureetera omuntu kugaitururwa, reero akagira obugabe bw’okugaruka kutaaha omu bushwere. (Matayo 19:5, 6, 9) Abakristaayo baakora kyona ekirikubaasika kureetera obushwere bwabo kusingura, nibaba nibashagika Yehova ohikire kutegyeka.

19. Tushemereire kukora ki twakora enshobe?

¹⁹ Twena turi abatahikiriire, kandi obumwe nitukora ebigwire tureebya Yehova. Eki naakimanya, niyo nshonga ahabw’enki yaahaireyo ekitambo kya Kristo. N’ahabw’ekyo twakora enshobe, twine kushaba Yehova kutusaasira. (1 Yohaana 2:1, 2) Omu mwanya gw’okuguma nituhurira kubi ahabw’enshobe zaitu, twine kwegyera aha nshobe ezo. Nitwenda kuguma haihi na Yehova, orikwija kutusaasira kandi akatuhwera kwebwa enaku tukagumizamu nitumuheereza.​—Zaaburi 103:3.

20. Ahabw’enki twine kushagika Yehova ohikire kutegyeka byona hati?

²⁰ Omu nsi ensya buri omwe naija kutegyekwa Yehova, kandi ayegye emihanda ye ehikiriire. (Isaaya 11:9) Kwonka na hati nitubaasa kwega bingi aha miteekateekyere ye n’oku arikwenda tukore ebintu. Juba tihaine orikwija kuhakanisa obugabe bwa Ruhanga obw’okutegyeka. Mbwenu ka tukore kyona ekirikubaasika kushagika Yehova ohikire kutegyeka byona, tumuheereze omu bwesigwa, kandi tuteereho kumutooreza omu buri kimwe eki turikukora.