1, 2. Ngera el tekoi a kirel a derta er kid el mo ulterekokl a rengul el kirel? (Momes er a siasing er a uchelel a suobel.)

 NGDI uaike el dulsaod er sel mlo merek el suobel, a Diabelong a melekoi el kmo a Jehovah a diak lungil mengedereder er a rechad. Ngmesaod el kmo, a Jehovah a diak el tabesul a omengederederel, me a rechad a bai lmuut el mo dmeu a rengrir a lsekum engdi tir el mengedereder er tir. Me aika el tekingel a Satan, ngmera el tekoi? Ka di molatk er a taem el rechad a di mo tir el mengedereder er tir, e dirrek el mo sebechir el kiei el mo cherechar. Omomdasu, e ngmo dmeu a rengrir el kuk ngaruchei er a longedereder er tir a Dios? E kau, ngmo dmeu a rengum el kiei el mo cherechar el ileakl er a omengederederel a Dios?

² Ngdiak a chad el sebechel el onger aika el ker el kirem. A derta er kid a kirel el di ngii el kerekikl el melatk er tia el tekoi. Seikid e ngmo obeketakl er a rengul el kmo a rolel a longedereder a Jehovah a kot el ungil, e Ngii a dirrek el rredemelel a cherrungel el ulengesuid. Ngulterekokl a rengud el kirel tiang, el okiu a tekoi el dechuiu er a Biblia. Me bo desa el kmo ngerang dmung a Biblia el kirel a llemeltel a Jehovah el mengedereder er a eanged me a chutem.

3. Ngera me ngkmal ngar er ngii a llemeltel a Jehovah el Mengedereder?

³ A Jehovah a ngar er ngii a llemeltel el Mengedereder er a eanged me a chutem, e le ngii a imong el kedidai el Dios e dirrek el Ulemeob. (1 Kronika 29:11; Rellir 4:24) Ngar er a ues el kirel a eanged, e tirke el 144,000 el king el odam er a Kristus a kmo: “Rubak el Dios er kemam! Kau a kirem a klebkall, ma odanges, ma klisiich. Ele kau a mileob a rokui el tekoi, e uleltirakl a tekingem e ng dilubech el mlor ngii a klengar er ngii.” (Ocholt 4:11) Me a Jehovah a mileob a rokui el tekoi, me ngkmal ngar er ngii a llemeltel el mengedereder.

4. Ngera me a ilmekled el melilt a tekoi a diak lebeskid a llemelted el mo omtok er a Dios?

⁴ A Satan a kmal diak a ta el blebelel me ngdiak a llemeltel el mengedereder er a eanged me a chutem. E ngii el Satan me tirke el kot el obekel a dimlak lekengei el mo chederedall er a Jehovah er sera bo lomtok er ngii. (Jeremia 10:23) Me a ilmekled el melilt a tekoi, ngmilsterir a llemeltir el oltngakl er a omengederederel a Jehovah? Ngdiak, e le ilmeklel a chad el melilt a tekoi a msang a techellel a chad me ngmelilt a tekoi el loruul me a lolib el mo meruul, engdi ngdiak lebsa llemeltel el mo omtok er a ngika el Ulemeob el Jehovah. Me ngkmal bleketakl el kmo a lsekum kede mo omtok er a Jehovah, e ngbelkul a kmo kede mekngit lousbech er tia el ilmekled. Me kid a rechad a kmal lousbech a ulekrael er a Jehovah me a omengederederel.

5. Ngera me a tekoi el letib a Dios a rokui el di melemalt?

⁵ Ka molatk er a ta er a uchul me ngkmal llemeltel a Jehovah el mengedereder. Ngousbech er a klisichel el mengedereder el ngar er a cherrungel e melemalt el rolel. Ngdmu er kid el kmo: “Ngak el RUBAK a meruul er sel bekokuii e melemalt el ngar a beluulchad. A ikakid el tekoi a soak.” (Jeremia 9:24) Me a Jehovah a diak lousbech a llecherir a rechad el olengeseu er ngii el kirel a llemalt, e ngbai Ngii a oterekokl a llechul el kirel a llemalt. E dirrek el oltirakl er a cherrungel el llemeltel ngii el Jehovah e ngomesterir a rechad a llechul. A ta er a milluches er a psalm a dilu el kmo: “A rengedem a ulekedechor er a llemalt ma melemalt el kerrekeriil.” Me a rokui el llach me a omellach me a omelilt el mla er a Jehovah el mei a kmal melemalt. (Psalm 89:14; 119:128) A Satan a melekoi el kmo a Jehovah a mekngit el Merreder. Me nguaisei, engdi ngii el Satan a kmal diak el sebechel el toketekii a llemalt er tia el beluulechad.

6. Ngera ta el uchul me a Jehovah a ngar er ngii a llemeltel el mengedereder?

⁶ A ta er a uchul me ngkmal llemeltel a Jehovah el mengedereder a ngar er ngii a llemesel a rengul me a klemedengei er ngii el sebechel lomekerreu er a eanged me a chutem. E tiang a sebeched el mesang er sel rolel er a lebsa Ngelekel a duch er ngii el omekungil a rakt el ngii a tekoi el kmal diak el sebechel a ngii di el toktang el rullii. (Mateus 4:23, 24; Markus 5:25-29) Me alta e aika el tekoi a kmal mengasireng er a osenged, engdi ngdiak el mengasireng er a osengel a Jehovah. Ngii a ungil el medengelii a rolel a loureor a bedenged me ngsebechel el omekungil a ngii di el telemellel. Ngdirrek el kmal sebechel el olekiis er a remla mad, e dirrek el sebechel el torob a ngii di el meklou el telemellel a beluu.

7. Ngoeak a ngera el rolel, e a Jehovah a kuk mellomes a rengul er a ngii di el chad er tia el beluulechad er a Satan?

⁷ A beluulechad el longedereder er ngii a Satan a kmal diak el sebechel el toketekii a budech er a  delongelel a meklou me a mekekerei el beluu. Ngdi ta el Jehovah a ngar er ngii a llemesel a rengul el sebechel el toketekii a budech er tia el beluulechad. (Isaia 2:3, 4; 54:13) Me kede di ua uldesuel a apostol el Paulus er a ledu el kmo: “Kele ng kol meral klou a klungiolel a Dios! E kmal dmolech a llemesel a rengul ma lodengei! Ng techa sebechel el smaod a telbilel? E techa sebechel el mo medenge uchul a lokerang?”​—Rom 11:33.

8. Ngua ngera uldesuem el kirel a omengederederel a Jehovah?

⁸ A Biblia a meketeklii el kmo, a Jehovah a kmal ngar er ngii a llemeltel el mengedereder el uaika el bla desaod. Ngdirrek el meketeklii a uchul me ngkot el ungil el Merreder. E a ta er a uchul, a Ngii el mengedereder el oba bltikerreng. Me kede mengal mo kmeed er ngii sel dodengei el kmo, ngkmal ‘mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng ma blakerreng.’ (Exodus 34:6) Ngdirrek a omerellel el bedulkid a ochotii a blakerreng me a omengull er ngii, e a ulekerreuil el mei er kid a lmuut el ungil er a di lekid el omekerreu er kid. A Diabelong a kmo, a Jehovah a mengreos a ungil el tekoi er a remesiungel, engdi tiang a kmal blulak el tekoi. E le Dios a ulderchii a di ta el Ngelekel el me mad me lebo er ngii a omeltked el mo kiei el mo cherechar.​—Monguiu er a Psalm 84:11; Rom 8:32.

9. Kede mekerang e mo medengei el kmo, a Dios a omekerreu er a derta er kid?

⁹ A Jehovah a kmal betik a rengul er a rechedal el ua ta el cheldebechel. Engdi ngdirrek el kmal semeriar er a rederta el chad. Ka di molatk er a tekoi el dilubech er a irechar. Ngar er a bekord el edei el dart el rak er a uchei, e a Jehovah a uluusbech er a remengeteklel a beluu el mo omekrael er a rengedel, e dirrek el mo mesisiich er a recherrouir. E ngar er a osisiu el taem e ngdirrek el ulemekerreu er a rederta el chad. E a ta er tir a Ruth. Ngikang a dimlak lechad er a Israel, engdi ngmlo imikr a betok el tekoi me bo lsebechel el mengull er a Jehovah. Me a Jehovah a ulemekngeltengat er ngii el milsa bechil me a dirrek el ngelekel. E a ngaruchei er aika el rokui, e ngmlo er ngii a techellel a ngelekel a Ruth el mo chedal a klengelakel er a Mesias. A Jehovah a dirrek el lilechesii a cheldecheduch el kirel a klengar er a Ruth er a chelsel a Biblia, el ngar er a babier el ongkiklii a ngklel. Ngmo uangera uldesuem el kirel sel taem el bo lebekiis a Ruth er a kodall, e bo losuub el kirel aika el rokui el tekoi?​—Ruth 4:13; Mateus 1:5, 16.

10. Ngera me kede medengei el kmo, a omengederederel a Jehovah a diak lemeringel?

¹⁰ Ngkmal diak lemeringel a omengederederel a Jehovah, ngbai kmal luchul a ilmokl me a deurreng el mo er tirke el rokui el olengesenges er Ngii. (2 Korinth 3:17) A David a milsaod el kirel a Jehovah el kmo: “Ng bliull er a klebkall ma klengarbab, e sel le ngar ngii a mui er a klisiich ma deurreng.” (1 Kronika 16:7, 27) E a Ethan el ta er a milluches er a psalm a kmo: “Ng dmeu a rengrir tirkel chad el mengull el meluluuch er kau el olab a chelitakl, el tirkel kiei er a llemesel a blekokuii er kau. Ng kau a uchul me ng dmeu a rengrir el tal sils e oldanges er kau el klungiolem a uchul.”​—Psalm 89:15, 16.

11. Ngmekerang e mo ulterekokl a rengud el kmo, ngkot el ungil a omengederederel a Jehovah?

¹¹ A cherengel a taem el dosuub el kirel aike el ungil el blekerdelel a Jehovah, e ngmengal mo ulterekokl a rengud el kmo ngkot el ungil a  omengederederel. Me kede mo ua uldesuel a ta er a milluches er a psalm el dilu el kmo: “A tal sils el de ngar a Templo er kau a kuk ungil er a tal telael sils el de ngar a ngodech el basio!” (Psalm 84:10) Me a Jehovah a ngike el ulemeob er kid, me ngkmal el ungil medengei el kmo ngera el tekoi a rullid el mo dmeu a rengud. Ngkmal imis el bekururau e le ngmeskid a lmuut el betok er aike el dousbech. Me a ngii di el tekoi el soal a bo doruul a di mo uchul a klungioled. Me a tekoi el dechoit el kirel a omesiunged me ngdi mo uchul a deuil a rengud a lsekum kede mera el olengesenges er Ngii.​—Monguiu er a Isaia 48:17.

12. Ngera kot el ngarbab luchul me ngkired lolengeseu el melisiich er a llemeltel a Jehovah el mengedereder?

¹² Ngokiu a Biblia e kede suubii el kmo a uriul er a Ta el Telael el Rak el Omengederederel a Kristus, e a rebebil a mo omtok er a llemeltel a Jehovah el mengedereder. (Ocholt 20:7, 8) Ngera rulleterir el mo uaisei? Sel taem, e a Diabelong a lmuut el mo melasem el meruul a uldesuir a rechad el di mo melatk er a di tir, e tiang a dimla omerellel a Satan. Nglmuut el mo melasem el mengeuid a uldesuir a rechad me te mo omdasu el kmo ngsebechir el diak lolengesenges er a Jehovah e melemolem el kiei el mo cherechar. E tiang a kmal blulak el tekoi, engdi ngungil a bo dolatk el kmo, ‘Ngak, ak kongei el mo oumerang er tia el blulak?’ A lsekum e ngmera el betik a rengud er a Jehovah, e oumerang el kmo ngar er ngii a llemeltel el mengedereder er a eanged me a chutem, e kede ulterekokl el kmal ouketui er tia el blulak el tekoi. E le ngkmal soad el mo kiei el chederedall er a Jehovah el ngike el mengedereder el loba bltikerreng.

13. Kede mekerang e olengeseu el melisiich er a llemeltel a Dios el mengedereder sel doukerebai er ngii?

¹³ Me kede mla suubii el kmo ngkmal ngar er ngii a llemeltel a Jehovah el mengedereder, e dirrek el rolel a longedereder a kot el ungil. Me ngkmal rredemelel a nguu a cherrungel el ulengesuid. Kede olengeseu er ngii el oeak sel leblak a rengud el mo er Ngii, e doukerebai er ngii er a bek el taem. Kede dirrek lochotii el kmo ngbetik a rengud er a Jehovah, e soad lolengesenges er a omengederederel, sel debo er a tkurrebab el sebeched el meruul a tekoi el uai Ngii.​—Monguiu er a Efesus 5:1, 2.

14. Ngmekerang e mo sebechir a remechuodel me a rebdelul a telungalek el oukerebai er a Jehovah?

¹⁴ Kede suubii lokiu a Biblia el kmo, a Jehovah a di blechoel el ousbech er a klisichel el okiu a bltikerreng. Me tirke el bdelul a telungalek me a remechuodel er a ongdibel el betik a rengrir er a omengederederel a Jehovah a mo oukerebai er ngii, me ngdiak el meringel a tekingir e di lorrimel er a rechad. A apostol el Paulus a mle blak a rengul el oukerebai er a Dios me a Ngelekel. (1 Korinth 11:1) Ngdimlak lomekrur er a rebebil me a lechub e lorrimel er tir el mo meruul a llemalt. Ngbai mle blak a rengul el melisiich er tir el mo meruul a llemalt. (Rom 12:1; Efesus 4:1; Filemon 8-10) Me a omerellel a mera el uluukerebai er a Jehovah. Me ngdi osisiu, sel doruul a tekoi el oba bltikerreng e kede olengeseu el melisiich er a llemeltel a Jehovah el mengedereder.

15. Kede mekerang e olengeseu el melisiich er a omengederederel a Jehovah sel dolengesenges er tirke el mla moterekokl er tir a dereder?

¹⁵ Kede dirrek el olengeseu el melisiich er a llemeltel a Jehovah el mengedereder el okiu sel dolengesenges er tirke el mla moterekokl er tir a dereder. El mo lmuut er a taem el diak a ungil klemedengei er kid me a lechub e ngdiak dekengei er a omelilt el bla lerellii, me kid a di kired el olengesenges er tir. E a beluulechad a kmal diak lekengei er tia el uldasu, engdi kid a kongei el meruul el uaisei sel dekengei er a Jehovah me ngmo Merredeled. (Efesus 5:22, 23; 6:1-3; Hebru 13:17) Seikid e ngmo dmeu a rengud e le Dios a kmal soal aike el tekoi el di mo uchul a klungioled.

16. Ngmekerang a tekoi el doruul e ochotii el kmo, kede olengeseu el melisiich er a llemeltel a Jehovah el mengedereder?

 ¹⁶ Ngdirrek el sebeched el olengeseu el melisiich er a llemeltel a Jehovah el mengedereder el okiu aike el tekoi el dolilt el mo meruul. A Jehovah a diak lomeskid a llach el kirel a bek el blekeradel er a klengar er kid. Ngbai di ouchais er kid er a uldesuel. E tiang a ngosukid el mo ungil el melilt a tekoi el doruul. El ua tiang, a Jehovah a diak loluches er a kemanget el babier el mesaod el kirel a rolel a doubail me a lechub e ngua ngera el bail a kired el oubail. Ngbai smodii el kmo kid el Sioning er Ngii a uchul me ngkirel a biled el mo ungilbesul, e mo uchul a odanges el mo er ngii. (1 Timothy 2:9, 10) Ngsoal a lak dobes el kmo, a tekoi el dolilt el mo meruul a ngar er ngii a lerellii er a uldesuir a rebebil. (1 Korinth 10:31-33) Me sel doruul a tekoi el oltirakl er a rolel a lomdasu a tekoi a Jehovah, e kede ochotii el kmo ngbetik a rengud er ngii, e soad lolengeseu el melisiich er a llemeltel el mengedereder.

17, 18. Te mekerang a rebechiil el chad e ochotii el kmo, te olengeseu el melisiich er a llemeltel a Jehovah el mengedereder?

¹⁷ Ka molatk er a ta er a rolel, e ngsebechir a rebechiil el Kristiano el olengeseu el melisiich er a llemeltel a Jehovah el mengedereder. A rechad el mo bechiil a locha mle ngodech a uldesuir el kirel a chebechiielir er a uchei er a bo lebechiil. Te locha dirrek el mo chelebangel a meklou el mondai er a chelsel a chebechiielir. A lsekum e ngmo uaisei, e ngsebechir el ngmai a klungiolir sel lolatk er a omerellel a Jehovah el mo er a rechedal el chad er a Israel er a irechar. A Jehovah a ulemekesiu er ngii el ua bechiil el sechal el mo er a  rechedal. (Isaia 54:5; 62:4) Engdi tia el renged a kmal mlo betok el taem el di lolemall er a rengul a Jehovah. Me tia el deleuill er Ngii el obengterir a di ua kmal meringel el chebechiil. Engdi a Jehovah a dimlak di lemereched el mengoit er tirka el chad er a Israel. Ngbai kmal mlo betok el taem el di lousubes er tir, e millemolem el oltaut a telbilel el mo er tir.​—Monguiu er a Psalm 106:43-45.

¹⁸ Me a rebechiil el Kristiano el betik a rengrir er a Jehovah a melasem el mo oukerebai er ngii. Me ngmo lmuut er a taem el lebo er ngii a mondai er a chebechiielir, me tir a di kerekikl me lak losiik a rolel e lorort a chebechiielir el diak loltirakl a Bades. Te ungil el medengei el kmo Ngii a omes a telbiil el kirel a chebechiil el kmal oberaod el tekoi, e dirrek el soal a bechiil el sechal a lolemolem el “obengkel” a bechil el redil. A laokreng a di chimo el tekoi el losaod er ngii a Bades el kmo, ngdi ta el uchul e ngsebechel a chad el dortii a chebechiielel, e dirrek el ngar er ngii a ilmeklel el mo bechil a ta er a chad. (Mateus 19:5, 6, 9) Me a lsekum a rebechiil el Kristiano a mo er a tkurrebab el sebechir el mesmechokl a chebechiielir, e ngolechotel a kmo te olengeseu el melisiich er a llemeltel a Jehovah el mengedereder.

19. Ngkired el mekerang a lsekum kede mo er a klengit?

¹⁹ Kid el rokui a diak demecherrungel me a lebebil er a taem, e kede mo tomellii a rengul a Jehovah. E Ngii a ungil el medengelii tiang a uchul, me ngkiltmeklii a olubet el tengetengel a Kristus. Tiaikid a uchul me sel debo er a klengit, e ngkmal kired el olengit er a Jehovah me lousubes a kngtid. (1 Johanes 2:1, 2) Me ngbai ungil a lak di douuchel er a rengud el kirel a klengit el derirellii, e bai denguu a klubeled er ngii me lak deluut el mo meruul er ngii. Ngkmal soad el melemolem el kmeed er a Jehovah el ngike el ousubes a kngtid, e dirrek el omekungil er kid me ngsebeched el melemolem el mesiou er ngii.​—Psalm 103:3.

20. Ngera me ngkmal kired el olengeseu el melisiich er a llemeltel a Jehovah el mengedereder er chelechang?

²⁰ Ngar er a chelsel a beches el beluulechad, e a rokui el chad a mo chederedall er a Jehovah, e dirrek el mo mesuub el kirel aike el melemalt el rolel. (Isaia 11:9) Engdi chelecha el taem, e ngdirrek el sebeched el suub a lmuut el betok el kirel sel rolel a lomdasu a tekoi, me sel rolel el soal a bo doltirakl er ngii sel doruul a tekoi. Ngkmal di kmedung, e ngmo diak a chad el oumededenger er a llemeltel a Dios el mengedereder. Mada bo leblak a rengud el meruul aike el sebeched el olengeseu el melisiich er a llemeltel a Jehovah el mengedereder el okiu sel dolengesenges er ngii, e leblak a rengud el mesiou er ngii, e debo er a tkurrebab el sebeched el oukerebai er ngii er a bek el taem.