1, 2. ¿Imamantam mana iskayrayananchikchu? (Qaway kay paginapi dibujota).

DIABLOQA nirqam Diosqa mana allin kamachiq kasqanta hinaspa runakuna kikillanku kamachikuspanku kusisqa kawsakunankumanta, chaytam yacharqanchik pasaq yachachikuypi. ¿Chiqapchu satanaspa chayna nisqan? Manam. Kaypi yuyaymanasun: Runakuna wiñaypaqña kawsakuyta atiptinkupas, ¿allinchu kawsakunmanku kikillanku kamachinakuspanku? ¿Aswan kusisqachu kawaq wiñaypaqña kawsakuspapas munasqallaykita ruwaspa Diosmanta karunchakuruspaykiqa?

² Kikikipunim chay tapukuykunamantaqa yachanayki. Sapakamam chay tapukuykunapi allinta yuyaymanananchik. Manam iskayrayananchikchu Dioslla kamachiqninchik  kasqanmantaqa hinaspa allin kamachiq kasqanmantapas, chaymi chayna kasqanta qawachinanchikpaq kallpanchakunanchik. Bibliam astawan yanapawanchik chayna kasqanmanta mana iskayrayanapaq. Kunanmi yachasun imanasqa Jehova Dioslla kamachiqninchik kananmanta hinaspa allin kamachiq kasqanmantapas.

3. ¿Imanasqam Jehova Dioslla kamachiwananchik?

³ ¿Imanasqam Jehova Dioslla kamachiwaqninchik kanan? Tukuy atiyniyuq hinaspa unanchawaqninchik kasqanraykum (1 Cron. 29:11; Hech. 4:24). Jesucristowan kamachiq 144.000 runakunam ninku: “Tukuy atiyniyuq Jehova Diosllayku, tukuy imata unanchasqaykiraykum qamlla kanki llapallanpa hatunchanan hinaspa yupaychanan, munaptikim tukuy imakunapas kachkan, munaptikitaqmi unanchasqapas karqa”, nispanku (Apoc. 4:11). Jehova Diosmi tukuy imata unancharqa, chaymi paylla runakunatawan angelkunataqa kamachinan.

4. ¿Imanasqam Jehova Diospa kamachiq kasqanta qipanchayqa mana allinchu?

⁴ Satanasqa manam imatapas unancharqachu, chaymi payqa mana imatapas kamachinmanchu. Satanas hinaspa Adanwan Evaqa hatun tukuspankum mana munarqakuchu Diosninchik kamachinanta (Jer. 10:23). Paykunaqa imatapas tanteakuy atiqmi karqaku, chaymi akllakunmanku karqa Diosta kasukunankupaq utaq manapas. Ichaqa ¿allinchu karqa unanchaqninkuta mana kasukuyqa? Manam. Ñuqanchikpas sapa punchawmi imatapas ruwanapaq kikinchik tanteakunchik, ichaqa manam chayraykuchu unanchaqninchik Jehova Diostaqa qipancharunanchik. Diosta qipancharuspaqa mana allin tanteaq kasqanchiktam qawachichwan. Allin kananchikpaqqa Diosllam kamachiqninchik kanan.

5. ¿Imanasqam mana iskayrayanchikchu Diospa tanteasqankuna allin kasqanmanta?

⁵ ¿Imanasqapiwanmi Jehova Diosqa kamachiqninchik kanan? Mana pantaspa allinta kamachisqanraykum. Paymi nin: ‘Yachaychikyá [ñuqa] kay pachapi kuyapayakuywan ruwaq kasqayta. Yachaychikyá kay pachapi allin arreglo ruwaq kasqayta. Yachaychikyá kay pachapi tukuy allinlla ruwaq kasqayta. Chaykuna ruwasqaymi agradawan ñuqata’, nispa (Jer. 9:24). Jehova Diosqa allin ruwaqmi. Payqa manam pantaq runakuna hinachu imatapas ruwan. Allin ruwaq kasqanman hinam kamachikuyninkunatapas runakunaman qurqa. Bibliam nin: “Munaychakuynikipa sapinqa allin arreglo ruwaywan mana pimanpas sayapakuymi”, nispa. Chaymi mana iskayrayanchikchu lliw kamachikuyninkuna, imapas nisqankuna hinaspa imapas tanteasqanqa allinpuni kasqanmantaqa (Sal. 89:14, Chuya Qellqa 2012; 119:128). Satanasqa ninmi Diosqa mana allin kamachiq kasqanta. Ichaqa kikin satanasqa manam runakunapaq imapas allin kaqta ruwaytaqa atinchu.

6. ¿Imanasqapiwanmi Jehova Diosqa kamachiqninchik kanan?

⁶ Chaymantapas, ¿imanasqapiwanmi Jehova Diosqa kamachiqninchik kanan? Ancha yachayniyuq kasqanraykum. Jehova Diosqa churin Jesusmanmi atiyta  qurqa doctorkunapa mana hampiy atinan unquqkunata hampinanpaq (Mat. 4:23, 24; Mar. 5:25-29). Runakunapaqqa Jesuspa ruwasqanqa mana ruway atinam rikchakurqa, Diospaqmi ichaqa mana. ¿Imanasqa? Imayna unanchasqa kasqanchikta yachasqanraykum. Jehova Diosqa yachayniyuqtaqmi imam kaqta kawsarichiwananchikpaq hinaspa tukuy imatapas controlananpaq.

7. ¿Pillataq aswan yachayniyuq allpa pachaman hawkayayta apamunanpaq?

⁷ Satanasqa manam munaychakusqan runakunapaqqa hawkayayta apamunmanchu. Jehova Diosllam pimantapas aswan yachayniyuq enteron allpa pachaman hawkayayta apamunanpaqqa (Is. 2:3, 4; 54:13). Chayta yachaspam apostol Pablo hina tarikunchik, paymi nirqa: “Achka-achkam Diospa bendicionninqa, ancha-anchataqmi yachayninwan yuyayninpas. ¿Pitaq lliwta yachanman Diospa tanteasqankunataqa? ¿Pitaq lliwta yachanman Diospa imapas ruwasqankunataqa?”, nispa (Rom. 11:33).

8. ¿Jehova Diospa imayna kasqantaq payman asuykachisunki?

⁸ Bibliaqa niwanchiktaqmi imanasqa Dioslla pimantapas aswan allin kamachikuq kasqanmanta. Jehova Diosqa allin kamachiqmi kuyakuywan kamachisqanrayku. Bibliaqa ninmi ‘llakipayakuq’, ‘sumaq sunqu’, ‘anaq piñakuq’ hinaspa ‘chiqap kuyapayakuq’ kasqanmanta (Ex. 34:6). Arí, payqa kuyawanchikmi hinaspa respetawanchikmi. Chaymantapas tukuy imapim yanapawanchik. Chayna kasqanraykum payman asuykuyta munanchik. Satanasqa ninmi Jehova Dios allin kaqkunata runakunapaq mana munasqanta, chayna nisqanqa llullam. Jehova Diosqa kuyawasqanchikraykum kuyasqan churinta kachamurqa wiñay kawsayta chaskinanchikpaq (qaway Salmo 84:11; Romanos 8:32).

9. ¿Imanasqam nichwan Jehova Diosqa sapakamata yanapawasqanchikta?

⁹ Llapallan yupaychaqninkunata kuyawaspanchikpas, Jehova Diosqa sapakamatam imayna kasqanchikta qawaspan yanapawanchik. Yuyaymanay ñawpaq tiempopi ima pasasqanmanta. Kimsa pachak watam Jehova Diosqa Israel llaqtanta juezkunawan yanaparqa chiqniqnin runakunata guerrapi atipanankupaq. Achka runakuna guerrapi kachkaptinkupas Rut sutiyuq warmita qawariykuspanmi yanapaykurqa, payqa manam Israel nacionniyuqchu karqa ichaqa tukuy imatam saqirqa Jehova Diosta yupaychananpaq. Jehova Diosñataqmi qusayuq hinaspa wawayuq kananpaq bendeciykurqa. Chaymantapas Rutqa kawsarimuspanmi yachanqa wawanpa mirayninmanta Jesus rikurimusqanta, yachanqataqmi bibliapi paymanta qillqasqa kasqantapas. ¡Maynatachá Rutqa kusikunqa tukuy chaykunamanta yachaspanqa! (Rut 4:13; Mat. 1:5, 16).

10. ¿Imanasqataq ninchik Jehova Dios runankunata mana ñakarichisqanmanta?

¹⁰ Jehova Diosqa manam runakunataqa ñakarichispanchu kamachin. Aswanmi kamachiptinqa runankunaqa mana manchakuspa kusisqa kawsakunku (2 Cor. 3:17). Davidmi Jehova Diosmanta nirqa:  ‘Payqa sinchillataña kanchariqmi. Payqa santuarionpi ancha atiyniyuqmi. Payqa santuarionpi ancha kusichiqmi’, nispa (1 Cron. 16:7, 27). Etan sutiyuq runapas kaynatam nirqa: ‘Dios taytalláy ¡mayna kusisqam yachaywan alabasuqniki runakunaqa! ¡Mayna kusisqam kancharichkaq qayllaykipi kawsaqkunaqa! Paykunam tukuy tiempopi sutikirayku kusikunku. Allinkuna ruwasqaykiraykum huqarisqa kanku’, nispa (Sal. 89:15, 16).

11. ¿Imatam ruwananchik Jehova Dios allin kamachiq kasqanmanta mana iskayrayanapaq?

¹¹ Jehova Diospa kuyapayakuyninpim astawan yuyaymanananchik allin kamachiq kasqanmanta mana iskayrayanapaqqa. Salmo qillqaq hinam tarikusunchik, paymi nirqa: ‘Waranqantin punchaw huk lawpi kanaymantaqa chulla punchawllapas patioykipi kaymi aswan allinqa’, nispa (Sal. 84:10). Jehova Diosqa yachanmi imayna unanchasqa kasqanchikta, chaymi yachan imakuna kusichiwasqanchikta, hinaspapas tukuy imatam quwanchik kusisqa kananchikpaq. Imapas niwasqanchikqa allinninchikpaqmi, chay niwasqanchikkunata kasukuy ñuqanchikpaq sasa kaptinpas kasukuspaqa kusisqam kasunchik (qaway Isaias 48:17).

12. ¿Imanasqam munanchik Jehova Dioslla kamachiwaqninchik kananta?

¹² Bibliaqa ninmi waranqa wata Jesuspa kamachisqan qipata wakin runakuna Jehova Diospa kamachikuyninta qipanchanankumanta (Apoc. 20:7, 8). ¿Imanasqataq chayta ruwanqaku? Satanasmi presochasqa kasqanmanta kacharisqa kanqa hinaspam runakunata pantachinqa. Ichapas runakunata ninqa Diosta mana kasukuspapas wiñaypaq kawsakuyta atinankumanta. Chayna nisqanqa yanqamá kanqa. Ichaqa tapukunanchikmi: “¿Ñuqatapas pantarachiwanqachu chayna nisqan?”, nispa. Jehova Diosta kuyaspaqa hinaspa paylla allin kamachiq kasqanta riqsikuspaqa manam satanaspa llullakusqantaqa kasusunchu. Munanchikmi Jehova Dioslla kamachiwananchikta, ¿imanasqa? Paylla allinta hinaspa kuyakuywan kamachiwasqanchikraykum.

13. ¿Imaynatam Dioslla kamachiwaqninchik kasqanta qawachichwan?

¹³ Yachamusqanchikman hinam Jehova Dioslla kamachiwaqninchikqa kanan, payqa allin kamachiqmi. Chaymi payman sunqu kaspanchik hinaspa payta qatipakuspanchik paylla kamachiwaqninchik kasqanta qawachinchik. Chaytaqa qawachinchiktaqmi Jehova Diospa munasqanman hina kawsananchikpaq kallpanchakuspapas (qaway Efesios 5:1, 2).

14. ¿Imaynatam iñiqkunapi punta apaqkunawan qusakunaqa Jehova Diosta qatipakunmanku?

¹⁴ Bibliaqa yachachinmi Jehova Diosqa kuyakuywan kamachisqanta. Chaymi iñiqkunapi punta apaqkunaqa hinaspa qusakunaqa Jehova Diospa imayna kamachisqanta qatipakuspanku kuyakuywan imatapas ruwananku. Apostol Pablopas Jehova Diostawan churin Jesucristotam qatipakurqa (1 Cor. 11:1). Pabloqa manam iñiqmasinkunataqa qaqchaqchu nitaq hikutaqchu, aswanmi kuyakuywan paykunata rimapayaq allinkunata ruwanankupaq  (Rom. 12:1; Efes. 4:1; Filem. 8-10). Pabloqa Jehova Diostam qatipakurqa. Chaynam Diospa yupaychaqninkunapas kuyakuq kananchik.

15. ¿Imaynatam Jehova Dioslla kamachiqninchik kasqanta riqsikunchik?

¹⁵ Jehova Dioslla kamachiqninchik kasqantam riqsikunchik llaqtanpi pusawaqninchik iñiqmasinchikkunata kasukuspanchik. Imapas tanteasqankuta mana entiendespanchikpas utaq mana allin rikchakuwaptinchikpas kasukunanchikmi. Manam chaynatachu ruwanku Diosta mana yupaychaq runakunaqa, ichaqa chaynatam ruwananchik Jehova Dioslla kamachiwaqninchik kasqanta riqsikuqkunaqa (Efes. 5:22, 23; 6:1-3; Heb. 13:17). Jehova Diosqa allinninchiktam munan, chaymi kasukuq kananchik.

16. ¿Imaynatam tanteananku Jehova Dios kamachiqninku kananta munaqkunaqa?

¹⁶ Imayna tanteasqanchikwanpas Jehova Dioslla kamachiq kasqantam qawachinchik. Diosqa manam tukuy imakunapaqchu kamachikuyta quwanchik, aswanqa willawanchikmi chaykunamanta ima piensasqanta. Payqa manam niwanchikchu imaynatapuni pachakunapaqqa, ichaqa niwanchikmi allin yuyaywan Diosta serviqkuna hina allinta pachakunapaq  (1 Tim. 2:9, 10). Chaymantapas manam munanchu imapas tanteasqanchikwan hukkuna hukmanyanankuta (1 Cor. 10:31-33). Jehova Diospa piensasqanman hina imatapas tanteaspanchikmi qawachinchik kamachiqninchik kananta munasqanchikta.

17, 18. ¿Imaynatam casarasqa iñiqmasinchikkuna Jehova Dioslla kamachiqninchik kasqanta qawachinmanku?

¹⁷ ¿Imaynatam casarasqa iñiqmasinchikkuna Jehova Dioslla kamachiqninchik kasqanta qawachinmanku? Wakin casarasqakunam hukmanyasqa tarikunku ayllunpi sasachakuykunapi tarikuspanku. ¿Imatam paykunaqa ruwanmanku? Israel nacionwan Jehova Dios imayna kasqanpim yuyaymananmanku. Jehova Diosmi nirqa huk qusa hina Israel nacionpaq kasqanmanta (Is. 54:5; 62:4). Israel runakunaqa tukuy tiempom mana allinkunata ruwarqaku, chayqa karqa casado vidapi sasachakuy hinam. Ichaqa Jehova Diosqa hinallam kallpanchakurqa llaqtanwan allinlla tarikunanpaq. Achka kutitam paykunapa huchanta pampacharqa, hinaspapas paykunawan contrato ruwasqanta yuyarispam mana castigarqachu (qaway Salmo 106:43-45).

¹⁸ Diosta kuyaq casarasqa iñiqmasinchikkunapas kallpanchakunkum payta qatipakunankupaq. Casado vidankupi sasachakuypi tarikuspankuqa manam yanqakunamantaqa rakinakunkuchu. Yachankum Jehova Diospa qayllanpi prometekusqankuta hinaspa wañukunankukama kuska kanankuta munasqantapas. Bibliapa nisqanman hinaqa huk kaqninku huchapakuruptillanmi rakikuspa hukwan casarakunmanku (Mat. 19:5, 6, 9). Casarasqakuna ayllunkupi kusisqa kanankupaq tukuyta ruwaspankuqa, Jehova Dioslla kamachiqninku kasqantam qawachichkanku.

19. ¿Imatam ruwananchik imapipas pantaruspanchikqa?

¹⁹ Pantaq runakuna kasqanchikraykum, wakinpiqa imatapas ruwaspa Jehova Diostaqa llakichisunchik. Diosqa yachanmi pantaq kasqanchikta, chaymi kuyawasqanchikrayku churinta kachamurqa ñuqanchikrayku wañunanpaq. Chaymi imapipas pantaruspaqa Jehova Diosta pampachaykuwananchikpaq mañakunanchik (1 Juan 2:1, 2). Manam tukuy tiempochu llakisqalla kananchik imapipas pantarusqanchikmantaqa, aswanmi kallpanchakunanchik chayta manaña ruwananchikpaq. Chaymi Jehova Diosman asuykuptinchikqa, payqa pampachaykuwasun hinaspa yanapawasun manaña hukmanyananchikpaq. Chaymantapas yanapawasunmi Diosta hinalla yupaychananchikpaq.

20. ¿Imakunata ruwaspam Jehova Dioslla kamachiq kasqanta qawachichwan?

²⁰ Musuq allpa pachapiqa Jehova Diosmi runakunata kamachimunqa. Chaypim lliw runakuna paypa kamachikuyninkunata astawan yachasunchik (Is. 11:9). Kunanpas kamachikuyninkunataqa ñam yachachkanchikña. Musuq pachapiqa manañam pipas iskayrayanqachu paylla allin kamachiq kasqanmantaqa. Chaymi kunan paylla kamachiqninchik kasqanta qawachinanchik payta imapipas kasukuspanchik, tukuy sunquwan yupaychaspanchik hinaspa payta qatipakuspanchik.