1, 2. Eaa ta tatou tataki tai ka akapapu? (Akara i te tutu mua.)

TA TATOU i uriuri i te atikara mua, karanga te Tiaporo e kare a Iehova e tau kia tutara i te tangata. Karanga katoa aia e tutara kino a Iehova e ka mataora atu te tangata me tutara ia ratou uaorai. E tano ainei a Satani? Tamanako ana e ka rauka i te tangata i te tutara ia ratou uaorai e kia ora e tuatau ua atu. Ka mataora ainei ratou i te mea e kare te Atua e tutara ia ratou? Ka mataora ainei koe me rauka ia koe te ora mutukore ma te kore e tutaraia e te Atua?

² Kare tetai ua atu e rauka i te pau i teia uianga noou. Ka tau tatou tataki tai kia akamanako meitaki i te reira. Ka taka meitaki i reira ia tatou e na Iehova te tutara anga meitaki rava atu e ka turu iaia ma te ngakau katoa. Ka papu katoa mei ta tatou e tatau ra i roto i te Pipiria. Teianei ka akara ana tatou i ta te Pipiria e karanga ra no runga i to Iehova tikaanga kia tutara i te ao katoa e pini ua ake.

3. Eaa te tumu i tika ai a Iehova ei tutara Ngateitei?

³ Ko Iehova anake tei Ngateitei i te ao katoa no te mea koia te Atua Mana Katoatoa e Tei Anga Mai. (1 Paraleipomeno 29:11; Angaanga 4:24) I roto i tetai orama no te rangi, karanga to Iesu au taeake tutara e 144,000: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:11) Na Iehova i anga i te au mea ravarai, no reira e tikaanga tona kia tutara i te katoatoa i te rangi e i te enua.

4. Eaa te tumu kare te tu rangatira e oronga mai i te tika kia patoi i te Atua?

⁴ Kare a Satani apinga i anga. No reira kare ona tikaanga kia tutara i te ao katoa. Akarongo kore a Satani e te nga tokorua mua e kua patoi i to Iehova tu Ngateitei. (Ieremia 10:23) Kua riro ainei to ratou tu rangatira ei oronga i te tika kia patoi i ta Iehova tutara? Kare. Ka akatika te tu rangatira i tetai kia rave i te ikianga kare kia patoi i Tei Anga mai, ko Iehova. Te taka meitaki ua ra, me patoi i te Atua, te taangaanga tau kore ra i te tu rangatira. Te anoano ra tatou i ta Iehova tutara anga e te aratakianga.

5. No teaa ra ta te Atua au tukuanga tika i te mea tau?

⁵ Akamanako ana i tetai atu tumu i tika ai a Iehova i te tutara. Te taangaanga ra aia i tona mana ma te tau tikai. Akakite mai aia kia tatou: “Ko Iehova au, ko tei rave i te takinga-meitaki, te tuatua-tau, e te tuatua-tika, ki runga i te enua nei: ko taku ïa au mea inangaro.” (Ieremia 9:24) Kare a Iehova e anoano i te au ture a te tangata ei tauturu iaia kia rave i te tika. Mari ra, koia tei akanoo i te turanga no te tika. Pera katoa, kua oronga a Iehova i tana ture ki te tangata tei akatumuia ki runga i tona tu tau. Karanga te tata salamo: “Ko te tuatua-tika ra, e te tuatua-tau, ko te tumu ïa o toou ra terono.” No reira tetai ua atu ture, kaveinga, e te ikianga no ko mai ia Iehova, e mea tau e te tika. (Salamo 89:14; 119:128) Karanga a Satani e kare a Iehova i te Tutara tau. Inara kare e rauka ia Satani te apai mai i te tu tau ki teianei ao.

6. Eaa tetai tumu i tika ai ia Iehova te tutara?

⁶ Tetai akaou tumu i tika ai a Iehova i te tutara koia oki, tei iaia te kite e te pakari kia akono i te ao katoa e pini ua ake. Ka kite tatou i teia mei tana akamana anga i tana Tamaiti kia rapakau i te au maki kare e rauka ana i te taote. (Mataio 4:23, 24; Mareko 5:25-29) Noatu e temeio teia kia tatou, kare ra i te temeio kia Iehova. Kua mārama aia i te kopapa e tona turanga e ka rapakau i tetai ua atu kino. Ka rauka katoa iaia te akatu mai i tei mate e kia akakore i te au tumatetenga natura.

7. Akapeea a Iehova i pakari atu ei i tetai i roto i to Satani ao?

⁷ I teianei ao tei tutaraia e Satani, kare  e au i rotopu i te au pa enua e te au iti tangata. Tei ia Iehova anake te pakari kia apai mai i te au ki te ao katoa. (Isaia 2:3, 4; 54:13) Aite to tatou manako ki to te apotetoro ko Paulo te karanga anga e: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e!”​—Roma 11:33.

8. Eaa toou manako i ta Iehova tutara anga?

⁸ Mei ta tatou i kite mai, te akaari pu tikai maira te Pipiria i to Iehova tikaanga kia tutara. Te akaari katoa maira i te tumu koia te tutara meitaki rava atu. Tetai tumu koia oki tutara aia ma te aroa. Ka piri vaitata tatou kiaia me akamanako iaia ei “Atua takinga-meitaki, e te aroa ua, e te akakoromaki maata, e te meitaki maata, e te tuatua-mou.” (Exodo 34:6) Akono mai te Atua ia tatou ma te akangateitei. E meitaki atu tana akono anga ia tatou mei ta tatou uaorai. Karanga te Tiaporo e ka tāpu a Iehova i te meitaki mei Tona au tavini, inara e pikikaa te reira. Kua oronga mai te Atua i tana Tamaiti akaperepere kia rauka ia tatou te manakonakoanga no te ora mutukore.​—E tatau ia Salamo 84:11; Roma 8:32.

9. Akapeea tatou i kite ei te manako ra te Atua ia tatou tataki tai?

⁹ Akaperepere a Iehova i tona iti tangata katoa ei pupu. Pera katoa te manako ra aia i te tangata tataki tai. Akamanako ana i tei tupu i te tuatau taito. No tetai toru anere mataiti, kua taangaanga a Iehova i te au akava ei arataki i tona iti tangata e te paruru ia ratou mei te enemi. Noatu ra i te tuatau katoa e tupu ra teia, kua akamanako rai a Iehova i te au tangata tataki tai. Tetai akaraanga ko te vaine ko Ruta. Kare aia i te vaine Iseraela, e kua akaruke aia i tana apinga pouroa kia riro mai ei vaine akamori ia Iehova. Akameitaki te Atua iaia ma te tane e te tamaiti. Tei maata atu, kua riro te tamaiti a Ruta ei ai metua no te Mesia. Kua akapapu katoa a Iehova kia tataia te tua oraanga o Ruta i roto i te Pipiria, i te puka Pipiria tei kapikiia ko Ruta. I toou manako, akapeea a Ruta te ariu atu anga me akatuia mai aia e ka apii i teia au mea?​—Ruta 4:13; Mataio 1:5, 16.

10. Eaa te tumu i karanga ai tatou e kare ta Iehova tutara e kino ana?

¹⁰ Kare ta Iehova tutara e kino ana. Mari ra, ka kite te aronga e akarongo ra iaia i te tu rangatira e te mataora. (2 Korinetia 3:17) Karanga a Davida no Iehova: “Te kakā e te akangateitei tei mua ïa i tona mata; te ririnui e te mataora tei tona ïa ngai.” (1 Paraleipomeno 16:7, 27) Karanga katoa te tata salamo ko Etana: “E ao to te au tangata i kite i te reo rekareka ra: e aaere rai ratou, e Iehova, i te mārama o to mata ra: E rekareka ratou i to ingoa e po ua atu te rā, e ka teitei ratou i te tuatua-tika naau ra.”​—Salamo 89:15, 16.

11. Akapeea tatou me akapapu ko to Iehova tu ngateitei te mea meitaki rava atu?

 ¹¹ Me akamanako oonu tatou i to Iehova tu meitaki, ka papu ia tatou e ko tana tutara anga e mea meitaki ïa. Manako tatou mei te tata salamo tei tuatua no runga i te Atua: “E meitaki maata to te rā okotai i roto i te au paepae noou ra, i to te au rā e tausani ua atu.” (Salamo 84:10) Ko Iehova tei anga mai ia tatou, no reira kua kite aia eaa tikai ta tatou e anoano ra kia mataora. Kua oronga maata mai aia i ta tatou e anoano ra. Tetai ua atu apinga ta Iehova ka pati ia tatou kia rave, e meitaki ïa no tatou. Noatu e ka rave i te au akaatinga, ka mataora rai tatou me akarongo kia Iehova.​—E tatau ia Isaia 48:17.

12. Eaa te tumu maata ka turu tatou i to Iehova tu ngateitei?

¹² Apii tatou i roto i te Pipiria e me ope te Tauatini Mataiti no ta Karaiti Tutaraanga, ka patoi tetai pae i to Iehova tu ngateitei. (Apokalupo 20:7, 8) Eaa tei akakeu ia ratou kia pera? A tera tuatau, ka akanauru pakari te Tiaporo i te tangata kia manako ia ratou uaorai. Kua rave ke ana aia i te reira. Penei ka tauta ua atu rai aia i te akanauru i te tangata kia manako e ka ora ratou e tuatau ua atu ma te akarongo kore kia Iehova. Kare rava teia e tupu. Inara ka tau tatou kia ui kia tatou uaorai, ‘Ka irinaki ainei au i teia pikikaa?’ Me inangaro tikai tatou ia Iehova e kua papu i tona tu meitaki e tona tikaanga kia tutara i te ao katoa e pini ua ake, ka riro teia pikikaa ei mea viivii tikai kia tatou. Ka inangaro ua tatou i te noo i raro ake i to Iehova tu ngateitei koia oki tana tutaraanga aroa.

13. Akapeea tatou me turu i to te Atua tu ngateitei ma te aru anga iaia?

¹³ Kua apii tatou e tikaanga to Iehova kia tutara e koia te tutara meitaki rava atu. Ka tau tatou kia turu i tona tu ngateitei. Ka pera tatou me vai tiratiratu kia Iehova e me aru iaia. Me tauta tatou i te rave i to Iehova anoano, ka akaari tatou i te inangaro ki tana tutara anga ma te turu i te reira.​—E tatau ia Ephesia 5:1, 2.

14. Akapeea te aronga pakari e te upoko o te ngutuare me aru ia Iehova?

¹⁴ Ka apii tatou i roto i te Pipiria e ka taangaanga ua rai a Iehova i tona mana na roto i te tu aroa. Ka tau te au upoko o te ngutuare e te aronga pakari tei inangaro i to Iehova tu ngateitei kia aru iaia e auraka e takino e te maro atu. Kua tauta pakari te apotetoro ko Paulo i te aru i te Atua e tana Tamaiti. (1 Korinetia 11:1) Kare aia e taakama i tetai ke e kare e māro ia ratou kia aru i te tika. Mari ra, kua akakeu aia ia ratou kia rave i te tika. (Roma 12:1; Ephesia 4:1; Philemona 8-10) I te raveanga i teia, kua aru a Paulo i to Iehova tu. Me akono tatou i tetai ke ma te aroa, te turu nei tatou i to Iehova tu ngateitei.

15. Akapeea tatou me turu i ta Iehova tutara na te akangateitei anga i te aronga mana taoonga?

¹⁵ Ka turu katoa tatou i ta Iehova tutara na te kauraro e te taokotai anga ki te aronga tana i oronga i te mana. Noatu e kare tatou e mārama e kare e āriki i tetai tukuanga tika ta ratou i rave, ka turu tatou ia ratou. Kare teianei ao e pera ana, inara ka akapera tatou me āriki ia Iehova  ei Tutara no tatou. (Ephesia 5:22, 23; 6:1-3; Ebera 13:17) Ka mataora tatou, no te mea ka inangaro te Atua i te mea meitaki no tatou.

16. Akapeea ta tatou ikianga te akaari maira e te turu nei tatou i to te Atua tu ngateitei?

¹⁶ Ka turu katoa tatou i to te Atua tu ngateitei na roto i ta tatou ikianga. Kare a Iehova e oronga mai i te au akauenga no te turanga ravarai o te oraanga. Mari ra, kua akakite mai aia i tona aerenga manako. Ka tauturu teia ia tatou kia mārama i ta tatou ka rave. Ei akaraanga, kare a Iehova e oronga mai i tetai papaanga no te au mea ta te au Kerititiano ka aao. Mari ra, akamārama aia e kia akaari tatou i te tu tau e te ngateitei ei Au Kite nona. (1 Timoteo 2:9, 10) Inangaro aia ia tatou kia akamanako akapeea ta tatou ikianga me akakeu i tetai ke. (1 Korinetia 10:31-33) Me rave tatou i te ikianga tei rotai ki to Iehova aerenga manako, ka akaari tatou i te inangaro ki tana tutara e ka turu i te reira.

17, 18 Akapeea te au tokorua akaipoipo me akaari e te turu nei ratou i to Iehova tu ngateitei?

¹⁷ Ka akamanako ana i tetai mataara ka turu te au Kerititiano akaipoipo i to Iehova tu ngateitei. Penei kare te oraanga akaipoipo o tetai nga tokorua i tau ki ta raua i manako. Penei te tupu ra te manamanata maata kia raua. Me koia ïa,  ka puapingaia raua me akamanako akapeea a Iehova te akono anga i to Iseraela i taito. Kua akataka a Iehova iaia uaorai ei tane ki tona iti tangata. (Isaia 54:5; 62:4) Maata te taime kua akataitaia teia iti tangata ia Iehova. Aite rai teia pirianga ki tetai oraanga akaipoipo manamanata. Inara kare a Iehova i viviki ana i te akaruke ia Iseraela. Mari ra, kua akakore ua rai aia i ta ratou ara e kua akatupu i tana i papau kia ratou.​—E tatau ia Salamo 106:43-45.

¹⁸ Ka tauta te au Kerititiano akaipoipo tei inangaro ia Iehova kia aru iaia. Noatu te au manamanata i roto i te oraanga akaipoipo, kare ratou e kimi i tetai ravenga tei kore i tau ki te tuatua tapu ei akakore i te reira. Kua kite ratou e puapinga tikai te tia akaipoipo ta raua i papau i mua ia Iehova e ka inangaro aia i te tane e te vaine kia “piri atu” ki tetai e tetai. Ko te ainga tau kore te tumu tau anake i roto i te Pipiria no te kopae e te akaipoipo akaou. (Mataio 19:5, 6, 9) Me rave te au Kerititiano i ta ratou ka rauka kia akameitaki atu i to ratou oraanga akaipoipo, ka turu ratou i to Iehova tu ngateitei.

19. Eaa ta tatou ka rave me tarevake tatou?

¹⁹ E aronga apa ua tatou, e i tetai taime ka akataitaia ia Iehova. Kua kite aia i teia, no reira aia i oronga ai ia Karaiti ei atinga oko. Me rave tatou i te tarevake, ka pati tatou kia Iehova kia akakore mai i ta tatou ara. (1 Ioane 2:1, 2) Eiaa tatou e manako tataraapa ua i te tarevake, e tauta i te apii i te reira. Ka inangaro tatou kia noo vaitata ua kia Iehova, tei akakore mai i ta tatou ara, e te tauturu mai ia tatou kia meitaki akaou i te tavini iaia.​—Salamo 103:3.

20. Eaa te tumu ka turu tatou i to Iehova tu ngateitei i teianei?

²⁰ I te ao ou, ka tutaraia te katoatoa e Iehova e ka apii ratou i tona arataa tuatua tika. (Isaia 11:9) I teianei e maata ta tatou ka apii no runga i tona aerenga manako e tana e inangaro ra ia tatou kia rave. Kare e roa atu ana, kare tetai ua atu e ekoko akaou i ta te Atua tutara. No reira e rave i ta tatou ka rauka kia turu i to Iehova tu ngateitei na te akarongo kiaia, te tavini tiratiratu, e te tauta kia aru i tona tu i roto i ta tatou ka rave.