1, 2. I kitẹ harusẹ̌ mẹ̌tiněna pakapia soal u apa? (Pěmanda gambarẹ̌ humotong su pěngangěndungang ini.)

MISA tamai i kitẹ něngěndung Iblis naul᷊ị i Yehuwa tawẹ apa hakẹ̌ e mẹ̌parenta taumata. I sie naul᷊ị pěmamarentang Yehuwa tawẹ adile kụ taumata mal᷊uasẹ̌ mạeng měngatorẹ̌ watangeng i sire hala. Apa ene kahěngang? Mạeng taumata botonge měbiahẹ̌ kěkalẹ̌ kụ makaatorẹ̌ watangeng i sire, apa i sire limembong mal᷊uasẹ̌? Mạeng i kau měbiahẹ̌ kěkalẹ̌ kụ tawe ahạkengu Mawu, apa i kau limembong mal᷊uasẹ̌?

² I kau hala harusẹ̌ sumimbahẹ̌ kakiwal᷊o ene. I kitẹ harusẹ̌ mẹ̌tiněna pakapiạ sasimbahu kakiwal᷊o ene. Mạeng měkoạ ene, i kitẹ sarung makasingkạ pěmamarentang i Yehuwa kai kapaelange kụ i kitẹ dingangu kaguwạu naung měmile si Sie. I kitẹ mangimang hal᷊ẹ̌ ene ual᷊ingu apa seng miwasang i kitẹ su Alkitapẹ̌. Mahịe i kitẹ měmanda apa niul᷊ị u Alkitapẹ̌ soal u hakẹ̌ i Yehuwa mẹ̌parenta alam semesta.

3. Kawe nụe kětạeng Yehuwa piạ hakẹ̌ e mẹ̌parenta?

³ Kětạeng Yehuwa piạ hakẹ̌ e mẹ̌parenta alam semesta ual᷊ingu i Sie Mawu mawantugẹ̌ dingangu Měndariadi. (1 Kar. 29:11; MMR. 4:24) Su penglihatan soal u sorga, 144.000 datu sarung mẹ̌parenta dingangi Kristus naul᷊ị, ”O Mawu, o Ruatang kami! Samatang i Kau Mawu e wotonge makatarimạ u raralo, adatẹ̌ dingangu kawasa. U kai i Kau něndiadi patikụ sabarange, ringangu kai su ral᷊ungu kapulun’U l᷊ai patikụ e seng nariadi dingangu nẹ̌biahẹ̌.” (Pěl. 4:11) Yehuwa něndiadi kěbị haghi, hakị u ene i Sie piạ hakẹ̌ e mẹ̌parenta dal᷊ohong sorga dingangu dunia.

4. Maning piạ hakẹ̌ měmile, kawe nụe i kitẹ tawẹ apa hakẹ̌ lumawang su Mawu?

⁴ Setang tawe něndiadi apa-apa. Hakị u ene i sie tawẹ apa hakẹ̌ e mẹ̌parenta. Su tempong Setang, i Adam, dingangi Hawa limawang pěmamarentang i Yehuwa, sěběnarẹ̌e i sire někoạ apa tawe ikakoạ i sire. (Yer. 10:23) Maning i sire piạ hakẹ̌ měmile, apa i sire piạ hakẹ̌ lumawang pěmamarentang i Yehuwa? Tala. I sire botonge měmile arau měkoạ putusang, katewe i sire tawẹ apa hakẹ̌ lumawang su Měndariading i sire, Yehuwa. Kawe nụe? Ual᷊ingu taumata harusẹ̌ ahạkeng i Yehuwa. Nal᷊ahẹ, su tempong limawang, i sire tawe něpakẹ pakapia hakẹ̌ měmile.

5. Kawe nụe putusang u Mawu mang maadilẹ̌?

⁵ Alasang bal᷊inẹ Yehuwa piạ hakẹ̌ e mẹ̌parenta ene kai ual᷊ingu cara-Ne mẹ̌parenta sěbạe maadilẹ̌. Yehuwa naul᷊ị, ”Iạ e kụkěndagẹ̌ baugu sarang marěngụ-děngụ dingangu Iạ e mapakạteing tita-Ku ore lai kạadilẹ̌ e su dunia. Kěbị ene e makạl᷊uasẹ̌ naung-Ku.” (Yer. 9:24) Tawe harusẹ̌ piạ hukung bọu taumata gunang mẹ̌tul᷊ung si Yehuwa měkoạ putusang nihino. Sěběnarẹ̌e i Sie něgělị standar soal u sude nihino. Hukung nighělị’E lai maadilẹ̌. Pemazmur naul᷊ị, ”Kạadilẹ̌ dingangu toratẹ̌ e kai wawěntang kararatuang’U.” Hakị u ene kěbị hukung, prinsip, arau putusang asal᷊e bọu Yehuwa ene nihino. (Mzm. 89:15; 119:128) Setang naul᷊ị Yehuwa bal᷊inẹ Měngangawasa maadilẹ̌, sěmbal᷊iau i sie sẹ̌sane tawe makarěn-tang kal᷊aadilẹ̌ su dunia.

6. Apa alasange Yehuwa piạ hakẹ̌ e mẹ̌parenta?

⁶ Alasang bal᷊inẹ lai Yehuwa piạ hakẹ̌ e mẹ̌parenta ual᷊ingu si Sie piạ kasingkạ dingangu pelesa gunang měngurusẹ̌ alam semesta. Ini nal᷊ahẹ bọu kawasang Ahus’E napakapiang sakị tawe kaundangengu dokterẹ̌. (Mat. 4:23, 24; Mrk. 5:25-29) Su taumata ene kai mukjizat. Katewe si Yehuwa ene bal᷊inẹ mukjizat, ual᷊ingu i Sie masingkạ kerea wadangu taumata dingangu cara mapakapiang haghing sakị. I Sie lai botonge mapakawiahẹ̌ taumata nate dingangu měngatorẹ̌ tadeạu tawẹ apa bencana alam.

7. Kerea Yehuwa limembong mapelesa maning bọu i sai su duniang Setang?

 ⁷ Dunia su al᷊ungu kawasang Setang tawe makarěntang pẹ̌darame. Kětạeng si Yehuwa piạ pelesa gunang mapa-karěntang pẹ̌darame. (Yes. 2:3, 4; 54:13) Pěndang i kitẹ mẹ̌sul᷊ungi rasul Paulus, kụ naul᷊ị, ”Kai apạ e kawantugẹ̌ kakakalạ u Ruata! Mambeng masěllahẹ̌ katatahuěnna ringangu kasingkạ’E! I sai wue makasẹ̌sui manga putusang’E! I sai wue makaěnna manga kakakoạ u munaran’E?”—Rm. 11:33.

8. Kerea pěndangu soal u cara Yehuwa mẹ̌parenta?

⁸ Alkitapẹ̌ něgělị bukti Yehuwa piạ hakẹ̌ e mẹ̌parenta. Alkitapẹ̌ lai něnodẹ Yehuwa Měngangawasa kapaelange. Sěmbaụ alasange ual᷊ingu i Sie měpẹ̌parenta dingangu kakěndagẹ̌. I kitẹ mẹ̌těngkarani si Yehuwa ual᷊ingu i Sie kai ’napenẹ u karal᷊ondo ringangu kapia. Kakěndagẹ̌’E mahěmpal᷊iu, i Sie satia ringangu tawe lighạ mẹ̌pědu’. (Sas. 34:6) Mawu měngẹ̌ngarěga si kitẹ, kụ i Sie limembong masingkạ cara měngurusẹ̌ si kitẹ sul᷊ungu i kitẹ hala. Iblis naul᷊ị Yehuwa tawe mapadul᷊i su manga ělang’E. Katewe ene konti. Mawu hakị u něgělị Ahus’E tadeạu i kitẹ piạ pělaharapẹ̌ měbiahẹ̌ kěkalẹ̌.—Basa Mazmurẹ̌ 84:12; Roma 8:32.

9. Kerea i kitẹ masingkạ Mawu mapadul᷊i si kitẹ sěngkatau-sěngkatau?

⁹ Yehuwa makěndagẹ̌ su kěbị ělang’E. Katewe i Sie lai mapadul᷊i si sire sěngkatau-sěngkatau. Kěnang pẹ̌tiněna apa nariadi su tempong tamai. Ěndịu tělu hasụ su taunge, Yehuwa něpakẹ manga hakim gunang měngahạ wangsa nipile-Ne dingangu něgělị kal᷊auntung si sire su pẹ̌seketang. Maning kerene, Yehuwa mapadul᷊i su ělang’E sěngkatau-sěngkatau. Contone i Rutẹ̌, i sie bal᷊inẹ tau Israel, katewe i sie seng něněntang kěbị haghi tadeạu botonge maněmbah si Yehuwa. Al᷊amate, Yehuwa něgěli si sie kawing dingangu sěngkatau anạ esẹ. Samurine Rutẹ̌ nakoạ iupung i Mesias. Yehuwa něngatorẹ̌ tadeạu běkeng pěbawiahi Rutẹ̌ niwohẹ su Alkitapẹ̌, kụ něpakẹ arenge. Tumuhụ si kau, kerea pěndang i Rutẹ̌ mạeng i sie saụ nipěbiahẹ̌ kụ makasingkạ hal᷊ẹ̌ ini?—Rut. 4:13; Mat. 1:5, 16, Terjemahan Dunia Baru.

10. Kawe nụe i kitẹ masingkạ cara Yehuwa mẹ̌parenta tawe kasarẹ̌?

¹⁰ Cara Yehuwa mẹ̌parenta ene tawe kasarẹ̌. Hakị u ene, i saing tụtuhụ si Sie makapěndang kawawebasẹ̌ dingangu karal᷊uasẹ̌. (2 Kor. 3:17) Daud naul᷊ị soal i Yehuwa, ”I Sie nanahiangkung kasěllahẹ̌ dingangu kawawantugẹ̌, bal᷊en’E napenẹu kawasa ringangu ral᷊uasẹ̌.” (1 Kar. 16:7, 27) Pemazmur Etan němohẹ, ”Kariangkamang bansa kụ mẹ̌kẹ̌kal᷊iomaneng dingangu ral᷊uasẹ̌, kụ mẹ̌bẹ̌biahẹ̌ su ral᷊ungu tualagu rarěntan’U e MAWU. Kanandung  ěllo e i sire lụluasẹ̌ dingangu kạta-tanạ matoghasẹ̌, ual᷊ingu kapian’U e.”—Mzm. 89:16, 17.

11. Kerea tadeạu i kitẹ sauneng mangimang pěmamarentang i Yehuwa kai kapaelange?

¹¹ Kakạsaune mẹ̌tiněna kapiang Yehuwa, i kitẹ sauneng mangimang pěmamarenta-Ne kai kapaelange. Pěndang i kitẹ sarung mẹ̌sul᷊ung dingangi pemazmur kụ naul᷊ị su Mawu, ”Limembong kapiane sěhěllo su Wal᷊e-Nu sul᷊ungu sěhiwu su ěllone su tampạ bal᷊ine.” (Mzm. 84:11) Yehuwa něndiadi si kitẹ, hakị u ene i Sie masingkạ kerea tadeạu i kitẹ mal᷊uasẹ̌. I Sie něgělị limembong mal᷊awọ bọu apa nirorongang i kitẹ. Kěbị parentang i Yehuwa ene gunang kapiang i kitẹ. Maning harusẹ̌ měněntang kěbị haghi, i kitẹ sarung mal᷊uasẹ̌ mạeng tumuhụ si Yehuwa.—Basa Yesaya 48:17.

12. Apa alasang kaguwạkenge i kitẹ měmile pěmamarentang i Yehuwa?

¹² Alkitapẹ̌ naul᷊ị masueng Pěmamarentang Kristus Sěhiwu su Taunge, sarung piạ u lumawang si Yehuwa. (Pěl. 20:7, 8) Kawe nụe i sire limawang? Su tempo ene, Iblis sarung měkoạ taumata kětạeng mẹ̌pandung watangenge hala. I sie mang měkẹ̌koạ kerene. I sie ěndịu měkoạ taumata mangimang i sire botonge měbiahẹ̌ kěkalẹ̌ maning tawe tumuhụ si Yehuwa. Katewe ene konti. I kitẹ harusẹ̌ mẹ̌tiněna, ’Apa iạ mangimang su konting Setang?’ Mạeng i kitẹ makěndagẹ̌ si Yehuwa dingangu mangimang i Sie mapia kụ piạ hakẹ̌ e mẹ̌parenta, i kitẹ tawe kaakal᷊engu konting Setang. I kitẹ mang tatapẹ̌ měmile pěmamarentang i Yehuwa ual᷊ingu i Sie měpẹ̌parenta dingangu kakěndagẹ̌.

13. Kerea měnodẹ i kitẹ měmile pěmamarentang i Yehuwa?

¹³ Kere seng niěndungang i kitẹ, Yehuwa piạ hakẹ̌ e mẹ̌parenta, kụ cara-Ne mẹ̌parenta kai kapaelange. Hakị u ene i kitẹ tantu mal᷊uasẹ̌ měmile pěmamarenta-Ne. I kitẹ měnodẹ hal᷊ẹ̌ ene mạeng i kitẹ masatia, mẹ̌těno si Sie, dingangu měkoạ apang ikẹ̌kapulu-Ne.—Basa Efesus 5:1, 2.

14. Kerea těmbonangu keluarga dingangu penatua botonge mẹ̌těno si Yehuwa?

¹⁴ Alkitapẹ̌ naul᷊ị, su tempong měpakẹ kawasa-Ne Yehuwa sěntiniạ makěn-dagẹ̌. Těmbonangu keluarga dingangu penatua apang němile pěmamarentang i Yehuwa, sarung mẹ̌těno si Sie kụ tawe kasarẹ̌ arau měngkate měngẹ̌ngatorẹ̌. Rasul Paulus nẹ̌tawakal᷊i mẹ̌těno su Mawu dingangu Ahus’E. (1 Kor. 11:1) I sie tawe mapakameang taumata wal᷊inẹ arau měnihasa si sire měkoạ barang nihino. Katewe dingangu kapiang naunge i sie měmahansang si sire. (Rm. 12:1; Ef. 4:1; Flm. 8-10) Ini něnodẹ i Paulus nẹ̌těno si Yehuwa. Kerene lai, mạeng měkoạ hal᷊ẹ̌ mẹ̌sul᷊ung, i kitẹ němile pemamarentang i Yehuwa.

15. Apa lai botonge koateng i kitẹ gunang měnodẹ i kitẹ měmile pěmamarentang i Yehuwa?

¹⁵ I kitẹ lai měmile pěmamarentang i Yehuwa mạeng měngadatẹ̌ dingangu tumol᷊e laahạ bọu manga esẹ apang nipile-Ne gunang měngahạ manga ělang’E. Maning tawe makaěna arau tawe setuju dingangu putusang nikoạ i sire, i kitẹ tatapẹ̌ tumol᷊e si sire. Ini bal᷊inẹ kere kakanoạ u taumata su dunia, katewe  ini harusẹ̌ koateng i kitẹ mạeng i kitẹ měnarimạ Yehuwa makoạ Měngangawasang i kitẹ. (Ef. 5:22, 23; 6:1-3; Ibr. 13:17) Kụ i kitẹ sarung mal᷊uasẹ̌, ual᷊ingu Mawu mapulu apang kapaelange gunang i kitẹ.

16. Kerea putusang i kitẹ něnodẹ i kitẹ měmile pěmamarentang i Yehuwa?

¹⁶ Putusang i kitẹ lai měnodẹ i kitẹ měmile pěmamarentang i Yehuwa. Yehuwa tawe něgělị hukung gunang ha-ghing situasi su pěbawiahẹ̌. Katewe i Sie naul᷊ị kerea tiněna-Ne. Ini makatu-l᷊ung si kitẹ makaěna apa harusẹ̌ koateng. Contone, Yehuwa tawe něgělị daftarẹ̌ pakeang kerea botonge paketangu tau Sahani. Katewe i Sie naul᷊ị i kitẹ manga Sahidi-Ne, harusẹ̌ mẹ̌papakeang maudupẹ̌ dingangu sederhana. (1 Tim. 2:9, 10) I Sie mapulu i kitẹ mẹ̌tiněna apa tětal᷊u putusang i kitẹ su taumata wal᷊inẹ. (1 Kor. 10:31-33) Mạeng putusang i kitẹ nẹ̌tatahino dingangu tiněnang Yehuwa, ene něnodẹ i kitẹ mal᷊uasẹ̌ měmile pěmamarenta-Ne.

17, 18. Kerea sěngkawingang měnodẹ i sire měmile pěmamarentang i Yehuwa?

¹⁷ Tau Sahani apang seng bọu nẹ̌kawing lai botonge měnodẹ i sire měmile pěmamarentang i Yehuwa. Su tempong nẹ̌kawing, pẹ̌kakawing i sire ěndịu bal᷊inẹ kere tẹ̌tiněnang i sire. Arau  ěndịu piạ masalah gěguwạ. Mạeng ene nariadi, mapaelẹ̌ mạeng i sire mẹ̌tiněna kerea i Yehuwa někoạ bangsa Israel su tempong tamai. Yehuwa nělahẹ i Sie kai kere kawing esẹ gunang manga ělang’E. (Yes. 54:5; 62:4) Bangsa ene hanesẹ̌ nakatědụ naungi Yehuwa. Hal᷊ẹ̌ kerene lai nariadi su pẹ̌kakawing. Katewe i Yehuwa tawe apidu něněntang si sire. I Sie masau měgělị ampung dingangu někoạ apa seng niriandi-Ne si sire.—Basa Mazmurẹ̌ 106:43-45.

¹⁸ Sěngkawingang apang makěndagẹ̌ si Yehuwa tantu mapulu mẹ̌těno si Sie. Maning piạ sungkal᷊e su pẹ̌kakawing, i sire tawe mědeạ dal᷊eng tawe nẹ̌tatahino dingangu Alkitapẹ̌. I sire masingkạ su těngong Yehuwa dianding pẹ̌kakawing ene serius, kụ i Sie mapulu sěngkawingang ”mẹ̌těngkatakidẹ̌” arau masatia sěmbaụ su wal᷊inẹ. Tumuhụ Alkitapẹ̌ kětạeng sěmbaụ alasang gunang mẹ̌cere dingangu saụ mẹ̌kawing, ene kai mạeng kawinge někoạ barang amoral. (Mat. 19:5, 6, 9) Mạeng tau Sahani měndiagạ pẹ̌kakawing i sire, ene něnodẹ i sire měmile pěmamarentang i Yehuwa.

19. Apa harusẹ̌ koateng mạeng i kitẹ někoạ pẹ̌sasal᷊a?

¹⁹ I kitẹ kěbị tawe nasukụ, kụ pẹ̌-sěnsul᷊ẹ makatědụ naungi Yehuwa. Ual᷊ingu masingkạ hal᷊ẹ̌ ene, Yehuwa něnadia tatěbusẹ̌. Hakị u ene mạeng někoạ pẹ̌sasal᷊a, i kite harusẹ̌ mẹ̌dorong ampung si Yehuwa. (1 Yoh. 2:1, 2) Bọu ene lai abe kětạeng mẹ̌sasěsilẹ̌. Pěngěndungke bọu pẹ̌sasal᷊a ene. I kitẹ mapulu tatapẹ̌ mědal᷊ahapị mapia dingangi Yehuwa ual᷊ingu i Sie sarung měgělị ampung dingangu mẹ̌tul᷊ung si kitẹ turusẹ̌ měkoạ kapulu-Ne.—Mzm. 103:3.

20. Kawe nụe měnětạ orasẹ̌ ini i kitẹ měmile pěmamarentang i Yehuwa?

²⁰ Su dunia wuhu, Yehuwa sarung mẹ̌parenta su kěbị diadikang kụ i sire sarung měngěndung dal᷊eng’E. (Yes. 11:9) Katewe měnětạ orasẹ̌ ini i kitẹ botonge měngěndung apa ikẹ̌kapuluang’E tadeạu botonge měkoạ putusang nihino. Seng mal᷊ighạ, tawẹ apa sarung mẹ̌kiwal᷊o apa Mawu piạ hakẹ̌ e mẹ̌parenta. Hakị u ene, orasẹ̌ ini mahịe i kitẹ měmile pěmamarentang i Yehuwa, carane tumuhụ si Sie, masatia, dingangu mẹ̌tawakal᷊i mẹ̌těno si Sie.