1, 2. Zvini lezvi a mun’we ni mun’wani wa hina a faneleko ku zvi kambela hi yece? (Wona mufota laha hehla.)

KOTA lezvi hi nga zvi wona ka ndzima yi nga hundza, Sathani i wula lezvaku Jehovha a nga na fanelo ya ku fuma vanhu. I wula lezvaku Jehovha a nga fumi khwatsi niku a vanhu va wa ta tsaka nguvhu loku va wo ti fuma hi voce. Lisine lezvo? Hi nga alakanyela lezvi a wutomi gi nga wa ta tshamisa zvona loku a vanhu va wo hanya kala kupindzuka na va ti fuma hi voce! Va wa ta tsaka nguvhu ku hundza loku va fumiwa hi Nungungulu ke? U alakanya ku u wa ta tsaka nguvhu hi ku hanya kala kupindzuka na u nga fumiwi hi Nungungulu?

² A ku na munhu wa ku a nga ku hlamulela zviwutiso lezvo. Munhu ni munhu i fanele ku ehleketa khwatsi hi zvona. Hi ndlela leyo, zvi fanele ku dlunyateka lezvaku a mafumela ya Jehovha hi wona ya ma nene niku wa ringanelwa hi kuva hi mu seketela hi mbilu yontlhe. A Bhiblia ga hi vhuna ku zwisisa mhaka leyi. Zvalezvi a hi woneni lezvi gi zvi wulako xungetano hi fanelo ya Jehovha ya ku fuma wuako gontlhe.

3. Hikuyini Jehovha a nga ni fanelo ya kuva Hosi ya wuako gontlhe?

³ Jehovha hi yena yece a Hosi ya hombe wuakweni gontlhe hakuva hi yena Muvangi ni Nungungulu wa ntamu wontlhe. (1 Kronekele 29:11; Mitiro 4:24) Ka muwoniso wa le tilweni, a tihosi-kuloni ta Kristu ta 144 000 ti te: ‘Hosi ya hina ni Nungungulu wa hina, wena u fanele ku amukela kukhesiwa ni kudhumiswa ni ntamu; hakuva hi wena u nga vanga zvilo zvontlhe, hi kota ya kurandza ka wena zvi kona, zvi vangilwe.’ (Kuvululelwa 4:11) Jehovha hi yena a nga vanga zvilo zvontlhe, hikwalaho i na ni fanelo ya ku fuma zvivangwa zvontlhe, ku ngava laha misaveni kutani le tilweni.

4. Hikuyini a ku tlhatlheka ku ti hlawulela zvi kalako zvi nga hi nyiki fanelo yo tsika ku ingisa Nungungulu?

⁴ Sathani a nga vangangi nchumu. Hikwalaho a zvi mu faneli ne ni kutsongwani ku fuma a wuako. Yena ni patswa wo sangula wa vanhu va no kanyisa Jehovha a cikhati va nga tsika ku ingisa a wuhosi gakwe. (Jeremia 10:23) Xana a kuva va tlhatlhekile ku ti hlawulela zvi wa va nyika fanelo yo ala a wuhosi ga Jehovha? Ahihi. A kutlhatlheka ka ku ti hlawulela ku nyika munhu a fanelo yo hlawula lezvi a zvi lavako ni ku ti mahela zviboho, kanilezvi a ku mu nyiki fanelo yo tsika ku ingisa a Muvangi wakwe, Jehovha. Zvi te dlunya lezvaku a ku tsika ku ingisa Nungungulu ku tirisa kutlhatlheka loko hi ndlela ya hava. Hina vanhu hi na ni cilaveko ca ku fumiwa ni ku rangelwa hi Jehovha.

5. Hikuyini a zviboho zvontlhe zva Nungungulu zvi nga zvo lulama?

⁵ Ehleketa hi cigelo cin’wani ca kuva Jehovha a hi ni fanelo ya ku fuma. I tirisa khwatsi a wuhosi gakwe hakuva i fuma hi kululama ko mbhelela. I hi byela lezvi: ‘Hi mina Jehovha ndzi mahako wuxinji, ni kulamula ni nongameto laha misaveni; hakuva ndza xalaliswa hi zvakunghahi.’ (Jeremia 9:24) Jehovha a nga na cilaveko ca ku vhuniwa hi milayo ya vanhu kasi ku tiva lezvi zvi lulamileko. Hi yena a bohako ku a zvo lulama hi lezvi. Niku hi kululama kakwe ko mbhelela, Jehovha i va vekele milayo a vanhu. A muyimbeleli wa tisimu i te: ‘A kululama ni nongameto zviseketelo zva citshamu ca wena ca wuhosi.’ Hikwalaho, ni wihi nayo kutani tshinya ga nayo, kutani ciboho ci tako hi ka Jehovha ci lulamile. (Lisimu 89:14; 119:128) Sathani i wula lezvaku Jehovha a hi Hosi ya yi nene. Kanilezvi loyi a tsandzekako ku neha kurula laha misaveni hi yena.

6. Hi cihi a cin’we ca zvigelo zva kuva Jehovha a hi ni fanelo ya ku fuma?

⁶ A cigelo cin’wani ca kuva Jehovha a hi ni fanelo ya ku fuma hi lezvi a nga ni wutivi ni wutlhari ga ku khatalela a wuako. Lezvo hi nga zvi wona ka ntamu lowu a nga nyika N’wana wakwe kasi ku tira mababyi ya ku a ku na dhokodhela a nga ma kota. (Mateu 4:23, 24; Marku 5:25-29) Ka hina, lezvo zvive zvihlamaliso, kanilezvi ka Jehovha zvi wa nga hi zvihlamaliso. Yena wa zvi tiva lezvi a miri wu tirisako zvona niku wa zvi kota ku  lungisa ni cihi ci gohekako laha ka wona. Wa zvi kota kambe ku vhuxa lava va fileko ni ku vhalela makhombo ya ntumbuluko lezvaku ma nga humeleli.

7. Zvini zvi kombako ku Jehovha i tlharihile nguvhu ku hundza ni wihi munhu a nga kona tikweni ga Sathani?

⁷ Ka misava leyi yi fumiwako hi Sathani, a nga kona a zvi kotako ku veka kurula cikari ka matiko, hambu ndzeni ka tiko gin’we basi. Hi Jehovha yece a nga ni wutlhari ga ku neha kurula laha misaveni. (Isaya 2:3, 4; 54:13) Hi ta ku khwatsi hi mupostoli Paule loku aku: “[Hi nga wonani] a kueta ka kufuma ni kutlhariha ni wutivi ka Nungungulu! A kulamula kakwe a ku na ku pimiwa, ni tindlela takwe a ti na ku tibyiwa.” — Va Le Roma 11:33.

8. U ma wonisa kuyini a mafumela ya Jehovha?

⁸ Kota lezvi hi zvi wonileko, a Bhiblia gi komba zvi ku dlunya lezvaku Jehovha i na ni fanelo ya ku fuma. Gi tlhela gi komba ku hikuyini a nga yena Hosi ya yi nene ka tontlhe. A cin’we ca zvigelo hi lezvi a fumako hi lirandzo. Ha tshinela nguvhu ka yena loku hi ehleketa hi lezvi a nga ‘Nungungulu wa wuxinji ni tipswalo, loyi a nonokako ku zangara, na a tele hi wuxinji ni kutsumbeka.’ (Eksodusi 34:6) Nungungulu i hi khoma hi ndlela yo dzundzeka ni ya cichavo. I hi khatalela khwatsi ku hundza hina venyi. Sathani i wula lezvaku Jehovha wa tsona zvilo zva zvi nene a malandza Yakwe, kanilezvi o hemba. Nungungulu i nyikele ni N’wana wakwe wo randzeka kasi ku hi vhululela ndlela ya ku kuma wutomi ga pindzukelwa. — Gondza Lisimu 84:11; Va Le Roma 8:32.

9. Hi zvi tivisa kuyini lezvaku Nungungulu wa khatala hi mun’we ni mun’wani wa hina?

⁹ Jehovha i randza vanhu vakwe vontlhe kota ntlawa. Kanilezvi wa khatala nguvhu kambe hi mun’we ni mun’wani wabye. Ehleketa hi lezvi zvi nga humelela cikhatini ci hundzileko. Hi cikhati co ringana 300 wa malembe, Jehovha i tirisile valamuli kasi ku rangela tiko gakwe ni ku gi vhuna ku hlula valala va gona. Hambulezvo ka cikhati contlhe leco, Jehovha i wa chela kota kambe hi vanhu vo kongoma. A mun’we wabye hi Rute. A wasati loyi i wa nga hi muIzrayeli, niku i wa tsikile zvilo zvo tala kasi ku maha mukhozeli wa Jehovha. Jehovha i mu chachazele hi ku mu nyika nuna ni n’wana. Kanilezvi a hi lezvo basi. A n’wana wa Rute i mahile wa lixaka leli Messia a nga wa tata hi ka lona. Jehovha i tlhelile a maha lezvaku a matimu ya wutomi ga Rute ma tsaliwa lomu ka Bhiblia, ka bhuku gi tako hi vito gakwe. U alakanya ku Rute i ta ti zwisa kuyini a cikhati a to vhuka hi ka vafileko a tiva zvilo lezvo? — Rute 4:13; Mateu 1:5, 16.

10. Hikuyini hi nga wulako lezvaku Jehovha a nga fumi hi ndlela ya xapi?

¹⁰ Jehovha a nga fumi hi ndlela ya xapi. Lava va mu ingisako va tsaka va tlhela va ti wona na va tlhatlhekile. (2 Va Le Korinte 3:17) Dhavhidha i wulile lezvi ha Jehovha: ‘A wukulu ni kungangamela zvi le  mahlweni kakwe; a ntamu ni kutsaka zvi le wutshan’wini gakwe.’ (1 Kronekele 16:7, 27) Muyimbeleli Etani i tsalile lezvi: ‘Gi katekile a tiko legi gi tivako a guwa ga litsako. Gi famba kuwonekeleni ka nghohe ya wena, Jehovha. Masiku wontlhe va tsaka vitweni ga wena, va kuliswa kululameni ka wena.’ — Lisimu 89:15, 16.

11. Cini ci nga hi vhunako ku tiyiseka khwatsi lezvaku a wuhosi ga Jehovha hi gona ga gi nene nguvhu?

¹¹ A ku ehleketa nguvhu hi wunene ga Jehovha zvi hi maha hi tiyiseka khwatsi lezvaku a mafumela yakwe hi wona ya ma nene. Hi ta fana ni muyimbeleli wa tisimu loyi a nga byela Nungungulu aku: ‘A ku tshama siku gin’we ndlwini ya wena zvi sasekile ku hundza ku tshama khume ga mazana lahandle.’ (Lisimu 84:10) Jehovha hi yena a nga hi wumba ni ku hi vanga, hikwalaho wa zvi tiva khwatsi lezvi zvi to hi tsakisa. Hi kota ya wuhana gakwe, i hi nyika zvo hundza lezvi zvi lavekako. Ni cihi leci Jehovha a hi kombelako ku maha, i mahela ku vhuna hina. Hambu loku ku laveka lezvaku hi ti tsona zvokari, contlhe cikhati hi ta tsaka nguvhu loku hi mu ingisa. — Gondza Isaya 48:17.

12. Hi cihi a cigelo ca hombe ca kuva hi seketela a wuhosi ga Jehovha?

¹² Lomu ka Bhiblia hi gondza lezvaku andzhako ka Kufuma ka Kristu ka 1000 wa malembe, a vokari va ta fularela a wuhosi ga Jehovha. (Kuvululelwa 20:7, 8) Hikuyini va to maha lezvo? Ka cikhati leco, Sathani i ta zama ku maha vanhu va lwela ku ti tsakisa basi. Hi zvalezvo a mahako contlhe cikhati. Kuzvilava i ta zama ku kholwisa vokari lezvaku va nga hanya kala kupindzuka na va nga ingisi Jehovha. Lezvo zvi nga ta tshuka zviva lisine. Hambulezvo, hi fanele ku ti wutisa lezvi: ‘Ndzi wa ta kholwa a mawunwa lawo ke?’ Loku hakunene hi mu randza Jehovha hi tlhela hi tiyiseka lezvaku mu nene niku i na ni fanelo ya ku fuma a wuako, a mawunwa yo kota lawo ma to hi swira loku hi mazwa. Hi ta lava ku hanya mandleni ya wuhosi ga Jehovha, loyi a fumako hi lirandzo.

13. Hi seketelisa kuyini a wuhosi ga Nungungulu?

¹³ Kota lezvi hi zvi wonileko, Jehovha i na ni fanelo ya ku fuma, niku a mafumela yakwe hi wona ya ma nene. Hi na ni zvigelo zvontlhe zva ku seketela a wuhosi gakwe hi kumbhelela. Hi nga gi seketelisa kuyini? Hi gi seketela hi ku tsumbeka ka Jehovha hi tlhela hi mu pimanyisa. Loku hi maha zvontlhe zvi nga ntan’wini wa hina kasi ku maha zvilo hi mamahela ya Jehovha, hi komba lezvaku ha mu randza niku ha seketela a mafumela yakwe. — Gondza Va Le Efesusi 5:1, 2.

14. A madhota ni tihloko ta mingango va nga mu pimanyisisa kuyini Jehovha?

¹⁴ Lomu ka Bhiblia hi gondza lezvaku Jehovha contlhe cikhati i tirisa ntamu wakwe hi ndlela ya lirandzo. A tihloko ta mingango ni madhota ma randzako a wuhosi ga Jehovha va ta mu pimanyisa, va nga fumeli van’wani a ku khwatsi hi loku va hi ni wuhosi ga vonawu. Mupostoli Paule i wa ti karata nguvhu kasi ku pimanyisa Nungungulu ni N’wana wakwe. (1 Va Le Korinte 11:1) A nga vekangi van’wani hasi kutani ku va kurumeta ku maha lezvi zvi faneleko. Wutshan’wini ga lezvo, i wo va kuca hi lirandzo lezvaku va maha lezvi zvi faneleko. (Va Le Roma 12:1;  Va Le Efesusi 4:1; Filemoni 8-10) Hi ku maha lezvo, Paule i wo pimanyisa Jehovha. Hinawu loku hi khoma van’wani hi lirandzo, hi seketela a wuhosi ga Jehovha.

15. Hikuyini a ku kombisa cichavo ka lava va hi rangelako zvi nga ku seketela a wuhosi ga Jehovha?

¹⁵ Hi seketela wuhosi ga Jehovha kambe hi ku tirisana khwatsi ni lava a va vekileko kasi ku hi rangela ni ku va komba cichavo. Hambu loku va maha ciboho hi kalako hi nga ci zwisisi khwatsi kutani hi kalako hi nga vhumelelani naco, hi ta simama hi va seketela. Lezvo zvi hambene nguvhu ni lezvi a tiko gi mahako. Kanilezvi hi zvalezvo hi mahako loku hi vhumela ku fumiwa hi Jehovha. (Va Le Efesusi 5:22, 23; 6:1-3; Maheberu 13:17) Niku ha tsaka hi zvona hakuva ha zvi tiva ku Nungungulu i lava lezvaku hi hanya khwatsi.

16. A zviboho lezvi hi mahako zvi nga kombisa kuyini lezvaku ha seketela wuhosi ga Nungungulu?

¹⁶ Hi nga seketela a wuhosi ga Jehovha kambe hi zviboho lezvi hi mahako. Jehovha a nga hi nyiki nayo wo kongoma ka zviyimo zvontlhe zva wutomi. Kanilezvi, i hi byela a maalakanyo yakwe. Lezvo zvi hi vhuna ku tiva lezvi hi faneleko ku maha. Hi cikombiso, Jehovha a nga hi nyiki xaxameto wa lezvi a maKristu ma faneleko ku boha ni lezvi ma nga faneliko. Wutshan’wini ga lezvo, i hi tlhamusela lezvaku hi fanele ku boha hi ndlela ya cichavo ni yo dzundzeka kota Timboni takwe. (1 Timote 2:9, 10) I lava lezvaku hi ehleketa hi lezvi a zviboho zva hina zvi  khumbisako zvona van’wani. (1 Va Le Korinte 10:31-33) Loku hi maha zviboho na hi alakanyela a mawonela ya Jehovha, hi komba lezvaku ha randza a mafumela yakwe niku ha ma seketela.

17, 18. A maKristu ma chadhileko ma nga kombisa kuyini lezvaku ma seketela a wuhosi ga Jehovha?

¹⁷ Wona a ndlela yin’we leyi a maKristu ma chadhileko ma nga seketelako hi yona a wuhosi ga Jehovha. Zva koteka ku a wukati gabye gi nga tshamisangi lezvi va nga zvi rindzele, hambu ku tlhela va kumana ni zvikarato zva hombe. Loku zvi hi tano, va nga vhuneka hi ku ehleketa hi lezvi Jehovha a nga gi khomisa zvona a tiko ga Izrayeli. Jehovha i ti fananisile ni nuna mahlweni ka vanhu vakwe. (Isaya 54:5; 62:4) A tiko lego gi mu pandzile mbilu makhati yo tala nguvhu. A kutirisana kabye ku wa fana ni wukati ga zvikarato. Hambulezvo, Jehovha a nga tsutsumelangi ku tsika vaIzrayeli. Wutshan’wini ga lezvo, i wa tshamela ku va tsetselela a tlhela a maha lezvi a nga va tsumbisa. — Gondza Lisimu 106:43-45.

¹⁸ A maKristu ma chadhileko lawa ma randzako Jehovha ma ta ti karatela ku mu pimanyisa. Hambu loku ku hi ni zvikarato wukatini ga wona, a ma hloti ndlela ya ku gi daya na ku nga hi na cigelo ca Mitsalo. Va zvi tiva ku ka Jehovha a cifungo ca wukati a hi co hlakana hi cona niku i lava lezvaku a nuna a “namarela” ka sati wakwe; a sati yenawu a “namarela” ka nuna wakwe. Lomu ka Mitsalo kova ni cigelo cin’we basi ca ku ci nga maha munhu a tlhatlha wukati a tlhela a tlhatlheka ku tekana ni mun’wani — ku nga wubhayi. (Mateu 19:5, 6, 9) Loku a maKristu ma maha zvontlhe ma zvi kotako kasi a wukati ga wona gi famba khwatsi, mo seketela a wuhosi ga Jehovha.

19. Zvini hi faneleko ku maha loku hi maha cihoxo?

¹⁹ Hontlheni a hi mbhelelangi; ha tshuka hi maha zvilo zvi bayisako mbilu ya Jehovha. Wa zvi tiva lezvo, niku hi zvezvo zvi nga mu maha a humesa ndzhiho ha Kristu. Hikwalaho, loku hi maha cihoxo, hi fanele ku kombela Jehovha lezvaku a hi tsetselela. (1 Johani 2:1, 2) Wutshan’wini ga ku karateka basi hi kota ya cihoxo leco, hi fanele ku ti karatela ku gondza cokari kwalaho. Hi lava kuva ni kuzwanana ku nene na Jehovha, loyi a to hi tsetselela a tlhela a hi vhuna ku holisa laha ku bayisako, hi simama hi mu tirela. — Lisimu 103:3.

20. Hikuyini hi faneleko ku seketela a wuhosi ga Jehovha zvezvi?

²⁰ Misaveni yiswa, a vanhu vontlhe va ta fumiwa hi Jehovha niku va ta gondza a tindlela takwe to lulama. (Isaya 11:9) Kanilezvi hambu zvezvi hi nga gondza zvotala xungetano hi mawonela yakwe ni lezvi a lavako ku hi mahisa zvona a zvilo. Zvezvanyana, ku nga ta hava ni munhu a to vhuxa ciwutiso ca ku Nungungulu i na ni fanelo ya ku fuma ke. Hikwalaho, a hi maheni zvontlhe hi zvi kotako zvezvi kasi ku seketela a wuhosi ga Jehovha hi ku mu ingisa, hi mu tirela hi kutsumbeka, hi tlhela hi ti karatela ku mu pimanyisa ka zvontlhe hi mahako.