BAS injil Matius sioge, ”Bengket Jesus ku rumah pertoton ipelawesna kerina kalak si erbinaga ras si nukur i je. Itunggalingkenna meja-meja kalak si nukari duit bage pe bangku-bangku kalak si erbinaga nderapati. Jenari nina man kalak e, ’Lit kap tersurat i bas Pustaka si Badia maka nina Dibata, ’Rumahku igelari me pagi rumah pertoton.’ Tapi ijadikenndu rumah e jadi asar penamun.’”​—Matius 21:12, 13.

Menurut sejarah, perbinaga bas rumah pertoton la adil alu erban erga si tinggi kel man si nukur. Contohna, biasana murah kel erga nderapati, emaka banci itukur kalak si musil guna persembahenna. Amin bage, ikataken sekalak penulis Jahudi maka bas abad si pemena erga dua nderapati eme sada koin dinar emas, seri ras upah erdahin 25 wari. Merga kel nderapati e, emaka lanai ngasup kalak si musil nukursa. (Imamat 1:14; 5:7; 12:6-8) Merawa kel Rabbi Simeon bin Gamaliel kerna si e. Emaka ikurangina jumlah persembahen si arus ipersembahken. Emaka, erga dua nderapati jadi sada per seratus arah sada koin dinar emas ntah pe upah erdahin seperempat wari ngenca.

Jelas me, perbinaga bas rumah pertoton e seh kel rangapna bas muat untung. Eme alasenna ngkai maka cocok ikataken Jesus maka kalak enda ”penamun”.