LÓN ewe Puken Kapas Allim makkeien Mateus, iei met a mak: “Jesus a tolong lon ewe imwenfel o asüowu ätekewe meinisin mi kamö o amömöla pisek ikenan. A akulätä ekewe chepel än ekewe chon akasiwili moni me ekewe lenien mot än ekewe chon amömö lisom. A üreniir, ‘A mak lon ekewe Toropwe mi Pin pwe Kot a apasa, “Ai imwenfel epwe iteni imwen iotek,” nge ämi oua awili ngeni eu lenien open chon solä.’”​—Mat. 21:12, 13.

A pwá me ren uruwoon chón Jus lóóm pwe ekkewe chón amémé lón ewe imwenfel ra kirikiringaw ngeni néúr kastomer ren ar fókkun amémmongú ekkewe mettóch ra amémé. Áwewe chék, ekkewe lisom ra kan mékúkkún pwe chón osupwang ra tongeni kamé pwe repwe eáni asor. Nge ekkewe soumak lóóm chón Jus ra erá pwe mi wor atun lemanawen ekkewe aposel, úkúkún liwinin rúúemén lisom eféú moni kolt itan denar. Ena úkúkún moni ina liwinin emén chón angang ren 25 rán. Pokiten liwinin lisom a fókkun mémmong, iwe ese chúen tongeni mé ren ekkewe mi osupwang. (Lif. 1:14; 5:7; 12:6-8) Emén rappai itan Simeon ben Kamaliel a fókkun song ren minne a fis ina popun a akúkkúnaló ewe úkúkún asor mi lamot ngeni chón Jus ar repwe eáni. Mwittir chék a kóturutiw méén rúúemén lisom wóón eú na ipúkúún eféú ena moni kolt itan denar.

A ffat pwe ekkewe chón amémé lón ewe imwenfel ra tipemmóng me chúri ngeni néúr kastomer. Ina popun a pwúng án Jesus erá pwe iir “chon solä.”