MATTHAI Thawngṭha cauk ah hitin kan hmuh: “Jesuh cu biakinn ah khan a va lut i biakinn chung i chaw a rak zuarmi le a rak cawmi kha a ṭhawl dih hna; tangka thlengtu pawl cabuai le laileng zuartu pawl ṭhutdan kha a leh dih hna i annih cu, ‘Cathiang chungah, “Pathian nih ka inn cu thlacamnak inn a si lai, a ti,” tiah aa ṭial. Sihmanhsehlaw nannih nih cun mifir kua ah nan ser cang,’ tiah a ti hna.”—Matt. 21:12, 13.

Biakinn ah thil a zuarmi hna nih a ding loin thil man fak tuk in an hauhmi kha tuanbia nih a langhter. Tahchunhnak ah, ṭhuro cu a man a fawi tukmi a si caah misifak pawl nih raithawinak caah an cawk khawhmi a si. Asinain hlanlio Judah mi hna ṭialmi ca nih kumzabu pakhatnak lioah ṭhuro pahnih kha sui tangka (denari) pakhat an hauh caan a um tiah a ti. Mah cu rianṭuantu pakhat i ni 25 nihlawh man hrawng a si. Ṭhuro cu a man a hun fah tuk caah misifak pawl nih an caw kho ti lo. (Lev. 1:14; 5:7; 12:6-8) Rabbi Simeon ben Gamaliel cu mah thil sining ruangah a thin a hung tuk i raithawinak caah Judah mi pawl hal an simi cazin kha a ṭhumh. Mah tikah ṭhuro pahnih man cu a let zakhat in a ṭum.

Kan hmuh bantukin biakinn i thil a zuarmi hna cu an hak a kau tuk i thil a cawtu hna sinin a miak tampi an lak. Cucaah Jesuh nih “mifir” tiah a auhmi hna cu aa tlak.