DALAM bup Injil Matthew kitai macha: ‘Jesus tama ngagai Rumah Sembiang lalu muru semua orang ke bejual-bebeli dalam Rumah Sembiang nya. Iya nungkupka mija orang ke penukar wang, enggau bangku orang ke nyual burung achang. Ku iya bejaku ngagai sida, “Endang udah ditulis, ‘Rumah aku deka dikumbai rumah sembiang.’” Tang kita ngaga iya nyadi sarang perumpak!’—Matthew 21:12, 13.

Sejarah nunjukka bala sedagar dalam Rumah Sembiang nipu pelangan sida enggau nyual jelu ngena rega ti kelalu mar. Ngambika chunto, rega burung achang amat murah nyentukka orang ke seranta tebelika burung nya nyadika pemeri. Taja pia, utai ke ditulis orang Judah kelia madahka, ba abad keterubah orang mayar sesingkap duit emas dinar kena meli dua iku burung achang. Seiku pekereja begunaka 25 hari kena ngulihka duit nyampau nya. Rega burung achang nyau kelalu mar, nya alai orang ke seranta enda agi tebelika burung nya. (Adat Lewi 1:14; 5:7; 12:6-8) Rabbi Simeon ben Gamaliel balat ringat enggau utai tu, nya alai iya ngurangka penyampau pemeri ke patut diberi orang Judah. Tekala nya, rega dua iku burung achang ngenyit murah.

Baka ke ulih dipeda kitai, bala sedagar dalam Rumah Sembiang nya amu, lalu ngambi ulih ari pelangan sida. Nya kebuah Jesus ngumbai sida “perumpak.”