O DIVULU dia Matesu dizuela: “Jezú anga u bokona mu Tembulu ia Nzambi, u kaia-mu oso ala kutela-mu mauenji, u lundula meza ma akua kutolokala kitadi, ni ibhuna ia akua kusumbisa mêmbe. Anga ua ambela, uixi: Kiòsoneke kuma: Inzo iami a kà ixana inzo ia kusamba. Enu-phe mua i bhange ngenda ia kusuamena miíi!”—Matesu 21:12, 13.

O musoso ulondekesa kuila, o jingenji ja kexile mu sumbisa mu tembulu, akexile mu talatala kiaiibha o asumbi, mukonda o ima ia tele kalu iavulu. Mu kifika, ki ku bhingile kitadi kiavulu phala kusumba membe phala kusatela Nzambi. Maji o asoneki a Jijudé amba kuila, ku hama ia dianga, o muthu se ua mesenene kusumba membe aiadi, ua tokalele kukalakala 25 a izuua. Kiki kilondekesa kuila, kua bhingile kitadi kiavulu phala kusumba o membe. Mukonda dia kiki, o jingadiama ka tenene dingi kubhana jisata kua Nzambi. (Ijila 1:14; 5:7; 12:6-8) Mu kumona o ima iii, o Mesene Simeon ben Gamaliele ua divu kiaiibha, mukonda dia kiki ua tumu kusosolola o kikalakalu kia kexile mu bhanga o Jijudé. Mu kiki, mu veji dia kukalakala 25 a izuua, ene a tokalele kukalakala kiá ola jitatu, phala kukala ni kitadi kia kusumba o membe.

Kala ki tua mono, o jingenji ja kexile mu sumbisa mu tembulu exile akuâ luímbi, akexile mu nhana o asumbi. Mukonda dia kiki, Jezú ua lungile mu ku a exana ‘mii!’