ENJIRI ya Matayo yithi: “Yesu mwaya omwa hekalu, mwahighirabo eyihya abosi abaghulha, n’abaghuliraya omwa hekalu, kandi mwakubulha ehimesa hy’abahinganaya esyofranka n’ebithumbi by’abaghulhaya ehirikuku. Nikwa Yesu mwabwirabo athi: ‘Kisakire kithi, Enyumba yaghe yasyahulhwa mo nyumba y’erisabiramo, nikwa inywe mukayirayo mo bwikalho bw’abanyeyi.”​—Matayo 21:12, 13.

Ebya kera bikakanganaya indi ababya bakaghulirya omwa hekalu ibakiba abakabaghulhako omw’ibatswera bbeyi nene kutsibu. Ng’eky’erileberyako, ebbeyi y’ehirikuku ini nyike kutsibu neryo n’omunakwa nayu abya iniangana kaghulha eriyakahonga. Aliwe ebihandikire by’Abayuda ebya kera bikabugha bithi omwa kighonye ky’erimbere endambi muyahika, ebbeyi y’ehirikuku hibiri yamabya dinari nguma ey’ehoro. Omundu eribana esyosente singaha n’esyo iniakendi kolha habw’ebiro 25. Ebbeyi y’ehirikuku yabya iyabirikalira ighuma, abanakwa isibangathasyathokayo. (Abalawi 1:14; 5:7; 12:6-8) Eki mukyahithania Rabbi Simeon ben Gamaliel, kyamaleka iniakehya okwa by’Abayuda babya batholere erihonga. Aho naho, ehirikuku hibiri muhyabya ihyangana ghulhwa akatahu kanyoho k’edinari nguma y’ehoro eyighabirwe emirundi kikumi.

Kwesi ababya bakaghulirya omwa hekalu babya b’omururu kandi ibak’iba ababya bakabaghulhako. Kwenene Yesu abya asingene eribahulha mwa “banyeyi.”