MUNA nsangu zasoneka Matai, tutanganga vo: “Yesu okotele muna tempelo, ovaikisi awonso batekelenge yo sumba muna tempelo, okindwidi e meza ma mimbudi a nzimbu ye kunda ya awana batekelenge mayembe. Ubavovese vo: “Diasonama vo, ‘E nzo ame iyikilwa vo nzo a sambu,’ kansi oyeno nukitwidi yo se nzo a mivi.”—Matai 21:12, 13.

Lusansu lusonganga vo akiti ana batekelanga muna tempelo ke bakadilanga mu mpila yambote ko ye asumbi kadi bakudikilanga e ntalu muna lekwa. Kasikil’owu, wau vo mayembe ke mafwanga ntalu yayingi ko, asukami balendanga mo sumba mu vana tukau. Kansi, e nkanda miankulu mia Kiyuda mivovanga vo muna tandu kiantete, vakala ye ntangwa ina muntu kafutanga denali mosi ya wolo mu sumba mayembe mole. Diavavanga vo muntu kasala 25 ma lumbu mu vua e nzimbu zazi. Wau vo e ntalu yatekelwanga mayembe yamanta kikilu, asukami ke balendanga diaka mo sumba ko. (Fuka 1:14; 5:7; 12:6-8) O Simone ben Ngamaliele wa nlongi a Kiyuda, wafunga kikilu makasi mu kuma kia diambu diadi. Muna kuma kiaki, wakulula tukau tuna Ayuda bavananga. Vana vau, e ntalu ya mayembe mole yakuluka, mayantika tekelwa mu ntalu yakete kikilu.

Nze una tumwene, akiti ana batekelanga muna tempelo akwa loko kikilu bakala ana bavunanga asumbi. Ekiaki, i kuma Yesu kabayikila vo “mivi.”