TIRHKOH Matthaia ziakah: “Isua Pathian biak inah chuan a va lût a, biak ina englo zuartute leh leitute zawng zawng chu a hnawt chhuak a, tangka thlengtuho dawhkânte leh ṭhuro zuarho ṭhutphahte pawh chu a nam thlûksak a; an hnênah, ‘Ka in chu ṭawngṭaina in an ti ang,’ tih ziak a ni; nangni erawh chuan suamhmangte pûkah in siam zâwk ṭhîn a ni,’ a ti a,” tih kan chhiar a ni.—Matthaia 21:12, 13.

Thil thleng chanchin chuan biak ina sumdâwngte’n an thil zawrh chu a lei duhte hnênah man to tak takin an hralh tih a sawi a. Entîr nân, ṭhurote chu man tlâwm tak a ni ṭhîn a, inthawina atân mi retheite lei thei tâwk a ni. Mahse, hmân lai Juda thuziak chuan kum zabi khatnaah chuan ṭhuro pahnih man chu rangkachak tangka dere pakhat a ni tih a sawi a. Chutiang pawisa hlawh chhuak tûr chuan hnathawktuin ni 25 chhûng vêl hna a thawh a ngai ngei ang. Ṭhuro man chu a to tâk êm avângin mi retheite chuan an lei thei ta lo va. (Leviticus 1:14; 5:7; 12:6-8) Chutiang dinhmun avâng chuan Rabbi Simeon ben Gamaliel-a chu a thinrim ta hle a, Juda mite inthawina thil phût chu a titlêmsak ta a. Ṭhuro pahnih man chu rangkachak tangka dere pakhat hmun zaa ṭhena hmun khat ang chauh a ni ta nghâl a ni.

Kan hmuh angin, biak ina sumdâwngte chu an duhâmin, an thil leitute lakah hlâwk an tum hle a. Chuvângin, Isua’n anni chu “suamhmangte” tiin a ko a ni.