MU MUZIMBU ua cili ua sonekele Mateo tu tandamo ngecize: “Yesu ua kovelele mu tembele ya Njambi, kaha ua mbizielele kuti vose vakua ku landesa na vakua ku landa mu tambele, ua fulumikile zimesa zia vakua ku landakana zimbongo, na vitumamo via vakua ku landesa mavembe; ua va lekele, ngueni, Va na soneka, nguavo, Va ka tumbula ndzivo yange ndzivo ya ku vundila: vunoni enu mu na i puisa cina ca vezi.”​—Mateo 21:12, 13.

Mizimbu ya muesa ngecize vakua ku landesa mu tembele va kele na ku zangamena vakua ku landa na ku londeka cikuma vindando. Ca ku muenako, mavembe va puile va vasi ku va fuka ambe vihutu va hasele ku va landa va ka kombeleye. Vunoni, visoneka via vaYundeya via ku laza nguavio ku sekulu ya ku livanga kua kele imo ntsimbu muntu ua pandele ku landa mavembe vavali na ndenaliu imo ya olu. Linga a uane vimbongo via ku pua oho muntu ua pandele ku panga matangua 25. Ndando ya ku landa mavembe ya kaluuile cikuma ngeci na vihutu ka va hasele ku va fuka. (Levitiku 1:14; 5:7; 12:6-8) Umo mukuluntu ua vulombelo vua vaYundeya Lambi ua lizina Simeon ben Gamaliel ua tenukile cikuma omo lievi ngeci ua tepuluile ndando ya vikombelo vi va lombele vaYundeya. Mu vuasi-vuasi, ndando ya mavembe vavali ya kokolokele.

Ngue mu tua mono, vakua ku landesela mu tembele va kele na ku zangamena vakua ku landa. Ngeci Yesu ua va tumbuile ngueni “vezi.”