NGAR er a Ebangkelio er a Mateus e kede menguiu el kmo: “A Jesus a mlor a Templo e ultebedeterir tirkel rokui el mirruul oterullir er a chelsel. Ng militech a tebelir a re merukem a udoud e mukel a kingellir a rulterau a belochel, E dilu er tir el kmo, ‘A ngar Chedaol Llechukl el tekingel a Dios a kmo, “A Templo er ngak a mo okedongall el blil a nglunguuch.” Ngdi kemiu a meruul er ngii el mo omertelir a re merechorech!’”​—Mateus 21:12, 13.

A reksi a ochotii el kmo, a rechad er a siobai el ngar er a templo a dimlak el tabesul a omerellir el mo er a okiak er tir, e le tir el ulelterau a klalo el mo er tir el kmal meringel a cheral. El ua tiang, a belochel a mle beot a cheral el mle sebechir a remechebuul el omechar el mo tengetengir. Engdi a omesodir a Rechijudea er a irechar a melekoi el kmo, ngmla er ngii a ta el taem er sel taem er a rekot el Kristiano, el chad a mle kirel el lomechar a teblo el belochel el ousbech er a ta el kolt el denarius. E tiang a kerrekerengel a chad er a ureor er a chelsel a 25 el klebesei. A belochel a kmal mlo meringel a cheral me ngmlo diak el sebechir a remechebuul el omechar. (Levitikus 1:14; 5:7; 12:6-8) A Rabbi Simeon ben Gamaliel a kmal mlo kesib a rengul el kirel tia el blekeradel a uchul me ngulengengetii a ildisel a tenget el mle kirir a Rechijudea el melenget. E tiang a mlo uchul me a cheral a teblo el belochel a di mle mereched el monganget el mo tedobech er a ta el denarius.

Me ngsebeched el mesa el kmo, a rechad er a siobai el mla er a templo a kmal mle nguibes a rengrir me te uluusbech a bderrir er a rechokiak er tir. Tiaikid a uchul me a Jesus a mle sebechel el omekedong er tir el “merechorech.”