I ROTO i te evangeria a Mataio ka tatau tatou: “Aere aturā Iesu ki roto i te iero o te Atua, kua tuaru atura ki vao te aronga i oko atu e i oko mai i roto i te iero ra, tatipoki atura oki i te au papa o te aronga oko moni ra, e te au nooanga o te aronga i oko i te kukupa, Kua karanga atura kia ratou, Kua oti oki i te tataia, “E karangaia toku are, e are pure anga;” kua akariroia io nei ra e kotou ei ‘ana no te aronga keia.’”​—Mataio 21:12, 13.

Te akaari maira te tuatua enua e kua akono tau kore te aronga okooko i te tangata na te tiati anga i te moni maata kia ratou. Ei akaraanga, e māmā ua te kukupa ka rauka i te aronga putaua i te oko i te reira ei akaatinga. Inara, te karanga ra te tataanga ngati Iuda i te anere mataiti mua, ka anoanoia tetai tangata kia tutaki okotai denari auro kia rauka e rua kukupa. Ka taeria e 25 rā e rauka ai te reira moni. E oko maata roa te au kukupa i kore ei i rauka i te aronga putaua i te oko i te reira. (Levitiku 1:14; 5:7; 12:6-8) No tona riri i teia tu kua akameangiti mai te rabi ko Simeon ben Gamaliel i te au atinga ta te ngati Iuda ka anoanoia kia oronga. Mei reira mai, kua topa viviki te moni o te rua kukupa ki te kota o te denari auro.

Mei ta tatou e kite nei, e aronga noinoi te aronga okooko o te iero e kua takinokino i te tangata tei aere mai kia ratou. Te tumu te reira i kapiki ei a Iesu ia ratou e “aronga keia.”