KA IVHANGELI ya Mateu hi gondza lezvi: ‘Jesu i no enghena tempeleni ya Nungungulu, a hlongola vontlhe lava va nga kari va xavisa ni ku xava tempeleni; a khubhunyeta a timeza ta vaxavisi va mali, ni zvitshamu zva lava va nga xavisa zvipomba; aku ngalo ka vona: Ku tsalilwe ku ngalo: A yindlu ya mina yi ta tibyiwa ku ngalo i yindlu ya kukhongela; kanilezvi n’wina mu yi mahile a bako ga vaphangi.’ — Mateu 21:12, 13.

A matimu ma komba ku lava va nga xavisa lomu tempeleni va wa kalavela vaxavi hi ku va dhurisela nguvhu zvilo. Hi cikombiso, hi tolovelo a zvipomba zvi wa xavisiwa hi mali ya lahasi nguvhu yaku ni cisiwana ci zvi kota ku xava ci maha miphahlo hi zvona. Kanilezvi, a mabhuku ya kale ya vaJuda ma wula lezvaku ka zana ga malembe go sangula, kuve ni cikhati zvi nga lava ku a munhu a humesa a cingerengere ca ndzalama kasi ku xava zvipomba zvimbiri. Leyo yi wa hi mali yo tala nguvhu yi nga lava ku a munhu a tira 25 wa masiku kasi ku yi kuma. A zvipomba zvi wa dhura nguvhu laha ka kuza a cisiwana ci nga ha zvi koti ku xava. (Levi 1:14; 5:7; 12:6-8) Rabi Simeon ben Gamaliel i zangarisilwe nguvhu hi mhaka leyo laha ka kuza a hungula a ntsengo wa miphahlo leyi a vaJuda va nga fanele ku maha. Na zvi nga seya kwihi a ntsengo wa ku xava zvipomba zvimbiri wu no hunguliwa nguvhu laha ka kuza a cingerengere cin’we ca ndzalama ci enela ku xava 200 wa zvona.

Kota lezvi hi zvi wonako, lava va nga xavisa lomu tempeleni va wa yi lava nguvhu mali niku va wa xolola a vaxavi. Hi leco ci nga maha Jesu a wula lezvaku “vaphangi.”